Aalame Bedaari Me Shahadate Husayn RadiyAllahu Ta’ala ‘Anhu Kee Khabar

Huzoor Khatmi Martabat SallAllahu Ta’ala ‘Alayhi Wa Aalihi Wa Sallam Ka Faiz Do Tareeq Se Aam Huwa. Mushaabahate Mustafa SallAllahu Ta’ala ‘Alayhi Wa Aalihi Wa Sallam Ka Faiz Aur Roohaaniyyate Mustafa SallAllahu Ta’ala ‘Alayhi Wa Aalihi Wa Sallam Ke Faiz, Aik Faiz Ke Aam Hone Ka Zari’a Hazrat Ali KarramAllahu Ta’ala Waj’hah-ul-Karim Bane Aur Dusre Faiz Ke Aam Hone Ka I’zaaz Hazrat Fatimat-uz-Zahra Salamu Allah ‘Alayha Ke Hisse Me Aaya, Faiz Ke Yeh Dono’n Dhaare Husayn Ibn Ali Murtaza RadiyAllahu Ta’ala ‘Anhuma Kee Zaat Me Aa Kar Mil Gaye Kyun Ki Husayn ‘Alayh-is-Salam Ko Dhib’he ‘Azeem Banaana Maqsood Tha. Dhib’he Isma’il Ke Baare MeTo Hazrat Ibrahim ‘Alayh-is-Salam Ko Khaab Me Hukm Mila Lekin Dhib’he Husayn Ke Liye Huzoor Aa’iya-E-Rahmat Ko Aalame Khaab Me Nahin, Aalam Aalame Bedaari Me Wah’iye Khudawandi Ke Zari’e Mutla’ Kiya Gaya. Aap SallAllahu Ta’ala ‘Alayhi Wa Aalihi Wa Sallam Ko Aalame Bedaari Me Jibra’ile Ameen Ne Ittila’ Dee Ki Ya RasoolAllah SallAllahu Ta’ala ‘Alayhi Wa Aalihi Wa Sallam! Iraq Kee Sar Zameen Me Aap Ke Shehzade Husayn RadiyAllahu Ta’ala ‘Anhu Ko Qatl Kar Diya Jaaega Aur Huzoor SallAllahu Ta’ala ‘Alayhi Wa Aalihi Wa Sallam Ke Talab Karne Par Jibra’ile Ameen Ne Aap Ko Imam Husayn RadiyAllahu Ta’ala ‘Anhu Ke Maqtal Kee Mitti Bhi Laa Kar Dee Ki Yeh Hai Sar Zameene Karbala Kee Mitti Jaha’n Ali RadiyAllahu Ta’ala ‘Anhu Ke Noore Nazar Aur Fatimah RadiyAllahu Ta’ala ‘Anha Ke Lakhte Jigar Ka Khoon Naahaque Baha Diya Jaaega Woh Husayn ‘Alayh-is-Salam Jo Daushe Payambar SallAllahu Ta’ala ‘Alayhi Wa Aalihi Wa Sallam Ka Sawaar Tha Woh Husayn RadiyAllahu Ta’ala ‘Anhu Jo Huzoor SallAllahu Ta’ala ‘Alayhi Wa Aalihi Wa Sallam Kee Aaghoshe Rehmat Me Parwaan Chadha Tha. Woh Husayn Jo Namaz Kee Haalat Me Pushte Aqdas Par Chadh Betha To Tajdare Qa’inat SallAllahu Ta’ala ‘Alayhi Wa Aalihi Wa Sallam Ne Apne Sajde Ko Tool De Diya Ki Kahin Gir Kar Shehzade Ko Chot Na Aa Jaaye. Woh Husayn RadiyAllahu Ta’ala ‘Anhu Jo Yateemo’n Ke Aaqa Aur Gharibo’n Ke Mawla SallAllahu Ta’ala ‘Alayhi Wa Aalihi Wa Sallam Kee Muhabbato’n Aur Shafqato’n Ka Mehwar Tha Aur Woh Husayn RadiyAllahu Ta’ala ‘Anhu Jis Ke Munh Me Rasoole Aakhir SallAllahu Ta’ala ‘Alayhi Wa Aalihi Wa Sallam Ne Apni Zubaane Aqdas De dee Aur Apne Lu’aabe Dahan Ko Labe Husayn Se Mas Kiya Ki Aik Din Maidaane Karbala Me In Naazuk Honto’n Ko Pur Tishnagi Kee Faslo’n Ko Bhi Lehlahaana Hai. Is Hawaale Se Chand Riwaayaat Mundarijae Zail Hain..
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/90_91.]