2 Doosra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Ibn Ziyaad Kee Makrooh Saazishein

Posted on July 31, 2016August 23, 2016 by tahirulqadribooks

DOOSRA
KHITAAB

Mu’azzaz Khawateen-o-Hazarat ! Guzishta Jum’at-ul-Mubarak Ke Khitab Me Hum Ne Imam Husayn RadiyAllahu Ta’ala ‘Anhu Ke Mawzoo’ Par Guftagu Ka Aaghaaz Kiya Tha Aur Yeh Silsila Waar Guftagu Bayan Kar Ke Is Marhale Par Khatm Huwi Thi Ki Jab Haalaat Yazeed Ke Qaabu Se Baahir Hone Lage To Yazeed Ne Nu’man Bin Bashir RadiyAllahu Ta’ala ‘Anhu Ko Ma’zool Kar Ke Ibn Ziyad Ko Koofah Ka Governor Muqarrar Kar Diya Aur Woh Raat Ke Dhundalke Me Koofah Pahuncha Aur Us Ne Apne Mansab Ko Sambhaal Liya.

Ibn Ziyaad Kee Makrooh Saazishein

Agle Roz Ibn Ziyad Ne Koofah Me Aik Jalsa-E-Aam Ka Intizaam Kiya Us Me Hazaro’n Afraad Jam’a Kar Ke Us Ne Barmala E’laan Kar Diya Ki Tum Log Jaante Ho Ki Mere Baap Ziyaad Baap Jallad Tha, Saffaak Tha, Khoon Rez Tha Aur Mein Bhi Khoon Rez Aur Saffaak Hoo’n Mujhe Ma’loom Huwa Hai Ki Tum Yazeed Kee Bay’at Aur Us Kee Hukoomat Se Inkaari Ho Pas Mein Tumhein Sakhti Ke Saath Is Baat Se Man’a Karta Hoo’n Aur Yeh E’laan Karta Hoo’n Ki Jo Shakhs Imam Husayn RadiyAllahu Ta’ala ‘Anhu Ke Liye Muslim Bin Aqil RadiyAllahu Ta’ala ‘Anhuma Ke Haath Par Bay’at Karega Mein Us Kaa Naam Safha-E-Hasti Se Mita Dunga. Mein Tum Sab Logo’n Ke Naam Bhi Jaanta Hoo’n Aur Tumhari Shaklein Bhi Pahchaanta Hoo’n Aur Tumhare Khandano’n Se Bhi Waqif Hoo’n.

Us Kee Is Haybat Naak Guftagu Ke Nateeje Me Woh Hazaro’n Koofi Jo Hazrat Ali KarramAllahu Ta’ala Waj’hah-ul-Karim Aur Imam Husayn RadiyAllahu Ta’ala ‘Anhu Kee Himayat Aur Ghair Mashroot Wafadaari Ke Alambardaar They. Woh Apni Buzdili Ke Baa’is Unhin Qadmo’n Par Pichhe Hat Gaye, Aur Bahut Se Log Khauf Ke Maare Chhup Gaye.

Baa’d Aza’n Hazrat Muslim Bin Aqil RadiyAllahu Ta’ala ‘Anhuma Kee Riha’ish Kee Sahih Khabar Ma’loom Karne Ke Liye Aik Ghulaam Ko Teen Hazar-3.000 Dirham De Kar Bheja, Us Ko Ittila’ Ho Gayi Thi Ki Hazrat Muslim Bin Aqil RadiyAllahu Ta’ala ‘Anhuma Us Waqt Koofah Ke Aik Ra’is, Aik Amir Kabir Shakhs Ke Ghar Me Maujood Hain Jis Ka Naam Haani Bin Urwah RadiyAllahu Ta’ala ‘Anhu Hai, Aur Ahl-E-Bayt ‘Alayhim-us-Salatu Was-Salam Ke Saath Muhabbat Karne Waala Hai, Us Ghulam Se Kaha Ki Tum Haani Ke Ghar Jaao Aur Yeh Zaahir Karo Ki Tumhein Basrah Waalo’n Ne Imam Husayn ‘Alayh-is-Salam Ke Haque Me Hazrat Muslim Bin Aqil RadiyAllahu Ta’ala ‘Anhuma Ke Haath Par Bay’at Karne Ke Liye Bataur Numa’indah Bheja Hai Aur Yeh Teen Hazar-3.000 Dirham Unhone Bataur Hadiya Bheje Hain, Is Bahaane Sahih Soorate Haal Se Aagaah Ho Kar Mujhe Khabar Karo! Chunache Woh Ghulaam Haani Bin Urwah RadiyAllahu Ta’ala ‘Anhu Ke Ghar Pahuncha, Darwazah Khatkhataya Aur Kaha Ki Mujhe Basrah Walao’n Ne Hazrat Muslim Bin Aqil Ke Haath Par Bay’at Karne Bataur Numa’indah Bheja Hai To Woh Us Kee Chikni Chupdi Baato’n Me Aa Gaye Aur Andar Hazrat Muslim Bin Aqil RadiyAllahu Ta’ala ‘Anhuma Ke Paas Le Gaye, Us Ne Un Ke Saath Bhi Woh Baat Halafan Kahi, Aur Un Ke Daste Aqdas Par Bay’at Karte Huwe Teen Hazar-3.000 Dirham Hadiya Ke Taur Par Pesh Kiye.

Wapas Aa Kar Us Ne Ibn Ziyad Ko Khabar Kee, Ibn Ziyad Ne Agle Roz Haani Bin Urwah RadiyAllahu Ta’ala ‘Anhu Ko Bulaya Aur Kaha Ki Haani! Tum Jaante Ho Ki Mere Baap Ziyad Bin Sufyan Ne Koofah Me Aik Shakhs Ko Bhi Khandane Nubuwwat Se Muhabbat Karne Waala Nahin Chhoda Tha Tere Siwa Sab Ko Khatm Kar Diya Tha Aur Tujh Par Ihsaan Karte Huwe Mere Waalid Ne Tujhe Mu’aaf Kar Diya Tha Lekin Aaj Isi Ahl-E-Bayt Kee Muhabbat Me Banu Umayya Kee Dushmani Kar Rahe Ho Aur Banu Umayya Aur Yazeed Ke Dushman Ko Apne Ghar Panah De Rahe Ho, Hazrat Haani RadiyAllahu Ta’ala ‘Anhu Ne Inkaar Kar Diya, Lekin Jab Us Ne Ghaddaar Ghulaam Ko Pesh Kiya To Aap Samajh Gaye Ki Saazish Ka Shikaar Ho Gaye Hain Aur Ibn Ziyad Ko Ilm Ho Gaya Hai.

Ibn Ziyad Bola ! Ab Muslim Bin Aqil RadiyAllahu Ta’ala ‘Anhuma Ko Mere Supurd Kar Do! Haani RadiyAllahu Ta’ala ‘Anhu Kehne Lage Ki Mein Yeh Zulm Nahin Kar Sakta Ki Khanwada-E-Rasool Ke Chashm-o-Chiraag Ko Mein Apne Haatho’n Se Gul Hota Huwa Dekho’n. Us Ne Aik Gurz Haani Bin Urwah RadiyAllahu Ta’ala ‘Anhu Kee Peshaani Par Maari Aur Un Ka Sar Phat Gaya.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-27_28.]

2 Doosra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Ahle Koofah Kee Be Wafaa’i

Posted on July 31, 2016August 23, 2016 by tahirulqadribooks

Hani Bin Urwah RadiyAllahu Ta’ala ‘Anhu Chun Ki Koofah Ke Ra’is They Is Liye Un Ke Qabeele Ke Hazaro’n Afraad Nangi Talwaarein Le Kar Nikal Aaye, Is Khayaal Se Ki Haani Qatl Kar Diye Gaye Hain Yaka Yak Koofah Kee Galiyo’n Me Aik Ma’rakah Bapa Ho Gaya, Imam Husayn RadiyAllahu Ta’ala ‘Anhu Ke Numa’inde Muslim Bin Aqil RadiyAllahu Ta’ala ‘Anhuma Bhi Talwaar Le Kar Maidaane Kaarzaar Me Aa Gaye Baa’z Riwayat Me Chaar Hazar-4.000 Ta’daad Aati Hai Lekin Baa’zo’n Ne Chawdah Hazar-14.000 Kee Ta’daad Bayaan Kee Hai, Yeh Hazrat Muslim Bin Aqil RadiyAllahu Ta’ala ‘Anhuma Kee Qiyaadat Me Ibn Ziyad Ke Qal’ah Par Hamla Aawar Ho Gaye, Shaam Tak Ibn Ziyaad Ne Tero’n Kee Baarish Kee, Itna Pathraao Kiya Itna Zulm-o-Sitam Kiya Ki Chawdah Hazar-14.000 Hazar Afraad Me Se Maghrib Ke Waqt Tak Kam-o-Besh Paanch Sau-500 Koofi Hazaraat Muslim Bin Aqil RadiyAllahu Ta’ala ‘Anhuma Ke Saath Rah Gaye Aur Baaqi Sab Log Buzdili Ke Sabab Un Ka Saath Chhod Gaye, Aap Ne Namaze Maghrib Kee Niyyat Baandhi Paanch Sau-500 Koofi Aap Ke Muqtadi They Jab Aap Ne Salaam Phera Aur Palat Kar Dekha To Un Paanch Sau-500 Koofiyo’n Me Se Aik Shakhs Bhi Na Tha Andheri Raat Me Zaalim Wa Be-Wafa Log Hazrat Muslim Bin Aqil RadiyAllahu Ta’ala ‘Anhuma Ko Tanha Chhod Kar Gharo’n Ko Waapas Chale Gaye They, Ab Koofe Kee Haulnaak Galiyon’n Me Raat Ka Haibat Naak Maahol Hai, Yazeed Aur Ibn Ziyad Ke Zalimana Aur Baimanah Mansoobe Hain Aur Woh Jo Hazaro’n Kee Ta’dad Me Aa Ke Daste Aqdas Par Bay’at Kar Ke Aap Se Ghair Mashroot Wafadari Ka Wa’dah Kar Chuke They Un Me Se Aik Shakhs Bhi Us Waqt Hazrat Muslim Bin Aqil RadiyAllahu Ta’ala ‘Anhuma Ka Sahaara Ban Ne Ke Liye Tayyar Nahin Aap Un Be-Hayaa’on Kee Be-Ghairati Par Ta’jjub Karte Rahe, Aakhir Thak Haar Kar Aik Darwaze Par Chupke Se Baith Gaye Ki Chalo Diwaar Se Tek Laga Kar Raat Kee Kuchh Gadiya’n Basar Karte Hain, Achaanak Darwazah Khula Aur Ghar Kee Maalika Ne Jhaanka Aur Kaha : Aye Bhaai Too Koun Hai ? Aur Is Waqt Mere Darwaze Par Kyun Baytha Hai ? Fitne Ka Zamana Hai, Sarkari Pahredaar Phir Rahe Hain Koi Sipaahi Tumehin Giriftaar Kar Ke Le Jaaega. Farmane Lage : Mein Muslim Bin Aqil RadiyAllahu Ta’ala ‘Anhuma Hoo’n Saara Din Sub’h Se Shaam Tak Jihaad Karta Raha Hoo’n Aur Bhooka Pyaasa Hoo’n Aur Jism Thak Kar Choor-Choor Ho Chuka Hai Mujhe Sirf Raat Kee Chand Gadiya’n Aaraam Kar Lene De. Woh Nek Bakht Khaatoon Bhi Ahl-E-Bayt Se Muhabbat Karne Waali Thi, Aur Dil Me Muhabbat Chhupaaye Huwe Thi Us Ne Muslim Bin Aqil RadiyAllahu Ta’ala ‘Anhuma Ko Apne Ghar Jagah De Dee, Lekin Use Kya Khabar Ki Us Ka Beta Muslim Bin Aqil RadiyAllahu Ta’ala ‘Anhuma Kee Talaash Me Sargardaa’n Hai, Woh Jab Raat Ko Ghar Pahuncha, Us Maa Ne Apne Kaam Ko Kaare Khayr Samajhte Huwe Apne Bete Se Kaha Ki Aaj Hamaare Ghar Me Gulistane Muhammadi Ka Mahakta Huwa Phool Hai. Us Bete Ne Khunkhaar Aankho’n Se Dekha Aur Ibn Ziyad Ko Khabar Kar Dee. Us Ke Sipaahi Aaye Aur Muslim Bin Aqil RadiyAllahu Ta’ala ‘Anhuma Par Hamla Aawar Ho Gaye, Der Tak Aap Ne Wafaa’i Jang Ladi, Lekin Tanha They Giriftar Kar Ke Ibn Ziyad Ke Paas Pahucnha Diye Gaye, Ibn Ziyad Ne Aap Ko Haani Bin Urwah Ke Saath Qayd Me Rakkha, Yeh Khabar Phir Koofe Me Aag Kee Tarah Phail Gayi Aur Kam-o-Besh Aththarah Hazar-18.000 Afraad Phir Hazrat Muslim Bin Aqil RadiyAllahu Ta’ala ‘Anhuma Kee Rihaa’i Ke Liye Aa Gaye.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-28_29.]

2 Doosra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Hazrat Muslim RadiyAllahu Ta’ala ‘Anhu Kee Shahadat

Posted on July 31, 2016August 23, 2016 by tahirulqadribooks

Ibn Ziyad Ahle Koofah Kee Nafsiyaat Aur Kameena Fitrat Se Bakhoobi Aagaah Tha, Use Ilm Tha Yeh Log Intiha’i Buzdil, Darpok Aur Kam Himmat Hain Sher Kee Tarah Aage Aate Hain, Magar Madde Muqaabil Ke Bigde Tewar Dekh Kar Fauran Hee Sahm Jaate Hain, Us Ne Un Kee Is Buzdili, Kam Himmati Aur Be-Ghairati Se Poora Poora Faa’idah Uthaaya Aur Hazrat Imam Muslim Bin Aqil RadiyAllahu Ta’ala ‘Anhuma Aur Hazrat Hani RadiyAllahu Ta’ala ‘Anhu Ko Shaheed Karne Ka Faisalah Kar Liya Ki In Hazaraat Ke Sar Ko Koofiyo’n Kee Bheeed Me Phaink Diye Jaaein, Un Ke Kate Huwe Sar Dekhte Hee Un Kee Yeh Sab Na’rah-Baazi Khatm Ho Jaaegi Aur Yeh Josh-o-Kharosh Bhul Kar Dum Daba Kar Bhaag Jaaeinge.

Chunanche Aisa He Huwa. Un Dono’n Ko Shaheed Kar Ke Jab Un Ke Sar Koofiyo’n Me Phainke Gaye To Un Ke Haath Pair Phool Gaye Khauf Se Kaanp Utthey, Aur Khisakna Shuru’ Ho Gaye, Aahista Aahista Naubat Yaha’n Tak Pahunchi Ki Aththarah Hazar-18.000 Afraad Me Se Aik Bhi Na Bacha, Aur Sab Dum Daba Kar Aur Jaan Bacha Kar Bhaag Gaye.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-29_30.]

2 Doosra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Imam Muslim RadiyAllahu Ta’ala ‘Anhu Ke Do Sahibzaade

Posted on July 31, 2016August 23, 2016 by tahirulqadribooks

Hazrat Muslim Bin Aqil RadiyAllahu Ta’ala ‘Anhuma Ne Jab Yeh Manzar Dekha To Apne Chhoto’n Sahibzado’n Ko Jo Ki Ma’soom Bacche Hazrat Muhammad Aur Hazrat Ibrahim Apne Abba Ke Saath Koofe Aaye They Un Ko Qaadi Shurayh Ke Haa’n Hifazat Ke Liye Bhej Diya, Tarikh Kee Aksar Kitabo’n Me Yahi Kuchh Aata Hai Ki Hazrat Muhammad Aur Hazrat Ibrahim Jo Hazrat Muslim Bin Aqil RadiyAllahu Ta’ala ‘Anhuma Ke Bete They Aur Ma’soom They, Un Ko Hazrat Muslim Bin Aqil RadiyAllahu Ta’ala ‘Anhuma Kee Shahadat Ke Baa’d Shaheed Kar Diya Gaya Tha Lekin “Rawdat-ush-Shuhda” Me Mulla Husayn Kashifi Ne Is Waqi’a Ko Yun Bayan Kiya Hai Ki Hazrat Muslim Bin Aqil RadiyAllahu Ta’ala ‘Anhuma Ne Un Dono’n Shehzado’n Ko Hazrat Shurayh RadiyAllahu Ta’ala ‘Anhu Ke Haa’n Bhej Diya Aur Farmaya Tha Ki Beto! Tum Idhar Thahro Mein Tumhare Chacha Haani Kee Rihaa’I Ke Liye Jang Karne Jaa Raha Hoo’n Aur Abhi Laut Kar Aata Hoo’n. Woh Dono’n Usi Lamhe Se Apne Waalid Kee Waapasi Ka Intezaar Kar Rahe They Saara Din Guzar Gaya Phir Saari Raat Beet Gayi Lekin Hazrat Muslim Bin Aqil RadiyAllahu Ta’ala ‘Anhuma Waapas Tashrif Na Laaye, Un Ma’soom Baccho’n Ne Pardes Me Aik Luqma Tak Tanaawul Na Kiya Tha. Aik Ajib Pareshaani Thi Maayoosi Kee Kayfiyyat Thi Na Paani Peete They Na Khaana Khaate They Janab Qazi Shurayh Pur Nam Aankho’n Ke Saath Dast-Basta Shahzado’n Ke Saamne Pesh Hote! Arz Karte : Shahzado ! Khaana Khaa Lo To Woh Arz Karte: Chacha Jaan ! Hum Apne Abba Jaan Ke Baghair Khaana Nahin Khaaeinge. Hum Un Ka Intezaar Kar Rahe Hain, Aur Qaazi Shurayh Aah Bhar Kar Sar Jhuka Lete Na Woh Bayan Kar Sakte They Aur Na Hee Woh Chhupa Sakte They Pur Nam Aankho’n Ke Saath Laut Jaate Phir Aa Kar Arz Karte To Phir Wohi Jawaab Milta Ki Chacha Hum Abba Jaan Ke Baghair Khaana Nahin Khaaeinge. Yeh Kashmakash Jaari Hai Do Din Se Bacche Bhooke Aur Pyaase Hain Phir Chhota Ibrahim Apne Bade Bhaai Se Kehta Hai Bhaai Jaan Khuda Jaane Abba Jaan Kab Aaeinge ! Mein Madine Kee Galiyo’n Ke Liye Udaas Ho Gaya Hoo’n, Mera Dil Chaahta Hai Ki Hum Daud Kar Waapas Madine Chale Jaaein, Aur Madine Ke Bacche Kehte Honge Ki Ibrahim Hamein Koofah Jaa Kar Bhool Gaya Hai, Is Qism Kee Ma’soomana Guftagu Dono’n Bhaai Aapas Me Kar Rahe Hain. Qaazi Shurayh Aur Us Ke Ghar Waale Is Guftagu Ko Sun Rahe Hain Un Ka Kaleja Phata Ja Raha Hai.

Isi Athna Me Koofe Kee Galiyo’n Me E’laan Ho Gaya Ki Jo Shakhs Muslim Bin Aqil RadiyAllahu Ta’ala ‘Anhuma Ke Dono’n Beto’n Ko Giriftaar Kar Ke Laaega Use In’aam Wa Ikraam Se Nawaaza Jaaega Aur Jo Shakhs Un Dono’n Ko Apne Ghar Me Panaah Dega Use Sakht Saza Dee Jaaegi.

Ab Qaazi Shurayh Se Raha Na Gaya, Is Liye Ki Har Taraf Jasoos In Baccho’n Kee Talaash Me They Us Woh Dil Thaam Kar Badi Pareshaani Ke Aalam Me Shahzado’n Ke Saamne Aa Kar Arz Karne Lage. Mein Tumhein Bade Afsos Ke Saath Tumhein Yeh Khabar Sunane Ke Liye Majboor Hoo’n Ki Tumhaare Baaba Hazrat Muslim Bin Aqil RadiyAllahu Ta’ala ‘Anhuma Ko Shaheed Kar Diya Gaya Hai. Aur Yeh Hazaro’n Koofi Jo Kal Tak Tumhare Haath Chumte They Tumhare Daaman Chhu Chhu Kar Apni Aankho’n Se Lagaate They.

Aur Tumhare Baaba Ke Haath Par Bay’at Kar Ke Un Kee Khaatir Kat Marne Ka E’laan Karte They Sab Ke Sab Tumhaara Saath Chhod Chuke Hain. Ab Siwaye Is Ke Koi Chaarah Nahin Ki Tum Chupke Se Madine Chale Jaao, Agar Mein Tumhein Mazeed Apne Ghar Thahraata Hoo’n To Kisi Bhi Lamhe Tumhaari Giriftaari Amal Me Aa Sakti Hai, Bacche Ro Diye Unhone Samjha Ki Shaayad Baaqi Koofiyo’n Kee Tarah Chacha Bhi Hum Se Baaghi Ho Gaya Hai, Kehne Lage : Chacha Jaan ! Kya Aap Bhi Hamein Ghar Se Nikaalne Lage Hain ? Arz Kiya : Nahin Shahzado, Baat Yeh Nahin Lekin Tumhari Hifazat Isi Tarah Mumkin Hai Ki Tum Madinah Chale Jaao. Sub’h Sawere Fula’n Jagah Se Aik Qaafila Madine Ko Rawana Ho Raha Hai Woh Tumhein Waha’n Pahuncha Dega. Phir Apne Bete As’ad Ko Bulaaya Aur Kaha : As’ad Sub’h Sawere In Dono’n Baccho’n Ko Le Jaa Kar Un Qaafile Waalo’n Ke Supurd Kar Dena, In Kee Shinaakht Na Karwaana Kisi Ko Pata Na Chal Sake Ki Ajnabi Koun Hain ? Woh Chupke Se Unhein Madinah Chhod Denge, Phir Yeh Shahzaade Khud Apne Ghar Chale Jaaeinge.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-30_32.]

2 Doosra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Sahibzado’n Kee Shahadat

Posted on July 31, 2016August 23, 2016 by tahirulqadribooks

As’ad Bin Shurayh Alal Sub’h Hazrat Ibrahim Aur Hazrat Muhammad Ko Le Kar Us Qaafile Kee Jaanib Rawaana Huwe, Lekin Afsos Ki Yeh Qaafila Kuchh Der Pehle Rawana Ho Chuka Tha, Us Ne Qaafile Kee Raah Kee Taraf Nazar Daudaayi Thode Hee Faasle Par Kuchh Gard Udti Huwi Nazar Aa Rahi Thi, As’ad Bin Shurayh Ne Kaha : Baccho’n ! Woh Gard Usi Qaafile Kee Hai, Tumhare Saath Mera Jaana Aur Daudna Kuchh Munasib Nahin Hai Balki Maslahat Ke Khilaaf Hai Tum Daud Pado Jaldi Hee Us Qaafile Ke Saath Mil Jaaoge! Ma’soom Bacchho’n Ne Us Ka Shukriya Ada Kiya Aur Aik Doosre Ke Haath Pakad Kar Qaafile Keee Jaanib Daud Pade, Bacche Bahut Kam Umr They Raasta Khaardaar Tha Tezi Se Dauda Bhi Na Jaata Tha, Kuchh Hee Aage Chale They Ki Chhote Bacche Ibrahim Ke Paaun Me Kaanta Chubh Gaya, Us Ko Sakht Taklif Huwi Woh Baithna Chaahta Tha Aur Bhaai Use Giriftaari Ke Khauf Se Aage Bhagaana Chahta Tha, Der Tak Yahi Soorate Haal Rahi Lekin Bada Bhai Bhi Chhota Hee Tha Kis Tarah Ghaseet Kar Le Jata. Kuchh Der Ke Baa’d Use Rukna Hee Pada Aur Chhote Bhaai Ke Paaun Se Kaanta Nikaala, Thodi Der Baa’d Jab Do Baara Qafile Kee Taraf Rawaana Huwe To Gard Bhi Nazro’n Se Ojhal Ho Chuki Thi. Aur Qafile Kee Koi Khabar Na Thi Aik Doosre Kee Aankho’n Me Aankhein Daal Kar Zabaane Haal Se Kehne Lage Ki Hum Akele Rah Gaye Aur Qafila Jaata Raha Aik Doosre Ke Gale Lag Kar Rona Shuru’ Kar Diya.

Din Ka Ujaala Phailte Hee Ibn Ziyad Ke Sipaahi In Kee Talaash Me Wahin Aa Pahunche Jaha’n Shahzade Khade They, Unhone In Ke Chehre Ke Husn Se Pahchaan Liya Ki Yeh Khaandane Nubuwwat Ke Chashm-o-Chiragh Ma’loom Hote Hain. Un Ko Giriftar Kar Ke Ibn Ziyad Ke Paas Le Gaye Us Ne Un Ke Nanhe Munne Haath Rassiyo’n Se Baandh Diye, Aur Aik Siyaah Kothdi Me Band Kar Diya, Yeh Tang Wa Taareek Aur Bhayaanak Kothdi Dekh Kar Hayraan Rah Gaye Aur Aik Doosre Se Puchhne Lage Yeh Kaisi Kothdi Hai Hum Ne Madine Me To Aisi Kothdi Ko Kabhi Nahin Dekhi, Woh Ma’soom Jail Ke Tasawwur Se Na Aashna They, Unhein Kya Ma’loom Ke Jail Khaana Kya Hota Hai, Is Liye Udaas Aur Ghamgeen, Aik Doosre Se Chimat Kar Usi Kaali Kothdi Me Baith Gaye. Un Baccho’n Ne Teen Din Se Kuchh Khaaya Piya Na Tha. Jism Nidhaal Ho Chuka Tha Aur Pareshaani Kee Kaifiyyat Is Ke Ilaawah Thi Raat Bhar Rassiyo’n Kee Taklif Ke Sabab Rote Rahe Pareshaani Me Saari Raat Tadapte Rahe. Yeh Manzar Dekh Kar Aik Sipaahi Pahredaar Ko Taras Aa Gaya. Us Ne Chupke Se Un Kee Rassiya’n Khol Dee’n Aur Apni Anguthi Unhein De Kar Kahne Laga Shahzado’n! Mein Bhi Dil Me Tumhaare Hee Khaandan Kee Muhabbat Chhupaaye Huwe Hoo’n Lekin Haalaat Ne Zulm-o-Sitam Aur Jabar Wa Barbariyyat Par Majboor Kar Diya Hai. Meri Anguthi Thi Le Jaao. Chupke Se Chhup Chhupa Kar Qaadisiyah Ke Maqaam Par Pahuncha Jaao. Qaadisiyah Me Fula’n Jagah Mera Bhaai Rahta Hai Us Ka Yeh Naam Hai Use Meri Anguthi Dikha Dena Woh Tumhein Aafiyat Se Madinah Pahuncha Dega.

In Ma’soom Baccho’n Ko Kya Khabar Ke Qaadisiyah Kaha’n Hai? Dar Ke Maare Ab Kisi Se Puchhte Bhi Na They, Raat Ko Chal Pade Saari Raat Ghoom Phir Kar Bil-Aakhir Jab Sub’h Tuloo’ Huwi To Yeh Dekha Ki Koofah Kee Galiyo’n Me Hee Chakkar Laga Rahe Hain Aur Qaadisiyah Kee Koi Khabar Nahin Ki Woh Kaha’n Hai ? Faasle Par Dekha Ki Aik Weeraan Khushk Darakht Ka Tana Hai Jis Ka Khol Hai Chhote Se Ma’soom Bacche Phir Aik Doosre Ke Gale Lag Kar Ro Pade Aur Darakht Ke Khol Me Chhup Gaye Aur Saara Din To Yaha’n Rahein Phir Raat Ho Gayi To Dekha Jaaega. Woh Khade Hee They Ki Darakht Ke Qareeb Bahne Waale Aik Chashme Se Panai Bharne Ke Liye Aik Laundi Idhar Aa Gayi Us Kee Nazar Jab In Do Ma’soom Baccho’n Par Padi To Boli, Tum Koun Ho? Sach Bolne Ke Aadi They Bol Pade Hum Muslim Bin Aqil RadiyAllahu Ta’ala ‘Anhuma Ke Bete Hain, Fauran Aayi Aur Un Dono’n Shahzado’n Ko Apne Ghar Le Gayi Un Ko Nehlaaya, Dhulaaya, Din Bhar Un Ka Khayaal Rakkha Raat Ko Aik Alag Kamre Me Khaana Khila Kar Chhupa Diya, Us Aurat Ka Khaawind Un Shahzado’n Kee Talaash Me Saara Din Sar Gardaa’n Raha Tha. Thak Haar Kar Raat Ko Ghar Pahuncha Aur Khaana Khaa Kar Apne Kamre Me Let Gaya, Aik Kamre Me Woh Maalika Aur Us Ka Shauhar Lete Huwe They Doosre Kamre Me Tanha Do Ma’soom Bacche They. Achaanak Raat Ko Aik Bhaai Khwaab Dekhta Hai Ki Bahisht Ka Manzar Hai Aur Hamaare Naana Sayyidina Muhammad Mustafa SallAllahu Ta’ala ‘Alayhi Wa Aalhi Wa Sallam Aik Majlis Me Jalwah Farma Hain Woh Baccha Dekta Hai Ki Huzoor SallAllahu Ta’ala ‘Alayhi Wa Aalhi Wa Sallam Ke Darbaar Me Hazrat Ali Shere Khuda KarramAllahu Ta’ala Waj’hah-ul-Karim Bhi Hain Aur Hazrat Sayyida-E-Aalam Fatimat-uz-Zahrah Salam Allah ‘Alayha Bhi Hain. Hazrat Imam Hasan RadiyAllahu Ta’ala ‘Anhu Bhi Hain Aur Un Ke Waalid Hazrat Muslim Bin Aqil RadiyAllahu Ta’ala ‘Anhuma Bhi Hain Aur Huzoor SallAllahu Ta’ala ‘Alayhi Wa Aalhi Wa Sallam Hazrat Muslim Bin Aqil RadiyAllahu Ta’ala ‘Anhuma Se Farma Rahe Hain : Bete Muslim Bin Aqil RadiyAllahu Ta’ala ‘Anhuma ! Khud Aa Gaye Ho Aur Baccho’n Ko Akela Chhod Aaye Ho Is Par Hazrat Muslim Bin Aqil RadiyAllahu Ta’ala ‘Anhuma Ro Kar Arz Karte Hain, Ya RasoolAllah SallAllahu Ta’ala ‘Alayhi Wa Aalhi Wa Sallam ! Chand Ghadiyo’n Kee Baat Hai Woh Bhi Aa Rahe Hain Bas Yeh Guftagu Suni Yeh Manzar Dekha To Baccha Be Saakhta Cheekh Utha Us Kee Cheekh Buland Huwi Doosra Bhaai Bhi Be Saakhta Cheekh Pada Aur Phir Dono’n Aik Doosre Ke Gale Lag Kar Rone Lage, Bhaai Ne Puchha : Bhaai Tum Kyun Ro Rahe Ho? Woh Kehne Lage : Abhi Hamaare Nana Jaan Ne Baba Jaan Se Poochha Hai Ki Muslim Baccho’n Ko Akela Kyun Chhod Aaye Ho? Aur Baaba Jaan Ne Kaha Ki Huzoor Woh Bhi Aa Rahe Hain. Bada Bhaai Qasam Khaa Kar Kehne Laga : Ibrahim Mein Ne Bhi Yeh Manzar Dekha Hai Bas Woh Zaaro Qataar Ro Pade Un Kee Aawaaz Buland Huwi To Us Zaalim Kee Bhi Aankh Khul Gayi, Us Ne Apni Biwi Se Poochha! Us Kamre Me Koun Bacche Ro Rahe Hain ? Us Ne Jawaab Diya Ki Zaalim Ab Us Qisse Ko Bhool Jaa Khair Us Ne Biwi Ko Maara Pita, Aur Sakhti Se Darwazah Tod Kar Andar Ghus Gaya, Bacche Tharra Rahe They, Khauf Se Kaanp Rahe They, Us Ne Aa Kar Baccho’n Ko Gaisoo’o’n Se Pakad Liya, Tamaancho’n Se Maarna Shuru’ Kar Diya Woh Zaalim Kehta Tha Ki Zaalimo’n! Mein Teen Din Se Musasal Tumhaari Talaash Me Hoo’n Aur Tum Yaha’n Aaraam Se Chhupe Huwe Ho, Na Mujhe Khaane Ka Hosh Hai Na Peene Ka. Tum Ne Mujhe Be Had Pareshaan Kiya Hai Ab Mein Tumhein Nahin Chhodunga. Baccho’n Ne Kaha : Bataao To Sahi, Hum Ne Tumhaara Kya Bigaada Hai Tum Hamein Kis Wajah Se Maar Rahe Ho? Woh Aage Koi Jawaab Na De Saka, Aur Giriftaar Kar Ke Ibn Ziyad Ke Paas Le Gaya, Ibn Ziyad Ne Bhi In Baccho’n Ko Qatl Karne Ka Hukm De Diya, Us Shakhs Ne Dono’n Shahzado’n Ko Pakada Aur Shahr Ke Aik Goshe Me Le Jaa Kar Baari Baari Apni Talwaar Se Dono’n Ko Nihaayat Be Dardi Se Qatk Kar Daala. Chamanistane Mustafawi Ke Yeh Dono’n Phool Khilne Se Pehle Hee Murjha Gaye Un Ka Muqaddas Khoon Zameen Par Bah Gaya, Sar Tan Se Juda Ho Gaye Aur Tan Khaak Par Maahi-E-Be-Aab Kee Tarah Tadapne Lage. Phir Yeh Dono’n Sar Aur Muslim Bin Aqil Aur Haani Ke Sar Sab Yazeed Ke Paas Pahuncha Diye Gaye Aur Use Ittila’ Kar Dee Gayi Ki Tere Zulm-o-Sitam Ke Tasakeen Ka Saamaan Yun Faraaham Kiya Jaa Raha Hai. Shahzade Shaheed Ho Gaye. Shahadat Se Pehle Woh Is Baat Par Bhi Pareshaan Rahe Ki Hum To Jaa Rahe Hain Lekin Koi Hamaare Chacha Husayn ‘Alayh-is-Salam Ko Khabar Kar Deta Aur Unhein Pata Chal Jaata Ki Koofi Phir Gaye Hain Woh Yaha’n Tashrif Na Laaein Yahi Tamanna Dil Me Liye Woh Dunya Se Rukhsat Ho Gaye.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-32_35.]

2 Doosra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Sooe Koofah Rawaangi

Posted on July 21, 2016August 23, 2016 by tahirulqadribooks

Idhar Aali Maqaam, Khanwada-E-Rasool Kee Muqaddas Aur Izzat Maab Khawaateen Apne Baccho’n Dosto’n Aur Behi Khaaho’n Ko Saath Le Kar Aazime Koofah Ho Gaye. Hazrat Abd Allah Bin Abbas RadiyAllahu Ta’ala ‘Anhuma Ne Man’a Kiya Ki Bhaai Jaan Koofi Bade Be Wafa Hain, Woh Na-Qabile I’timaad Hain, Aap Koofah Na Jaaiye, Isi Tarah Hazrat Ja’far RadiyAllahu Ta’ala ‘Anhu Man’a Karte Rahe Abd Allah Bin Zubayr RadiyAllahu Ta’ala ‘Anhu Man’a Karte Rahe Aur Saathi Man’a Karte Rahe Lekin Imam Aali Maqam Sab Ko Yeh Jawaab Dete Rahe Ki Ab Mas’ala Wafa Aur Be-Wafa’i Ka Nahin Hai Mas’ala Da’wat Ka Hai Jis Ka Mujh Se Mutaalibah Kiya Gaya Hai Ki Mein Kalima-E-Haque Bulnad Karne Ke Liye, Jabr-o-Barbariyyat Ke Khilaaf, Zulm-o-Sitam Ke Khilaaf, Kufr Wa Taaghoot Ke Khilaaf, Shari’ate Mustafawi Kee Ihya’ Ke Liye Aur Deene Islam Kee Qadro’nKo Paamaal Hone Se Bachaane Ke Liye, Maidaan Me Aa Jaaun Aur Alame Jihaad Buland Karoo’n Taa Ki Mere Naana Jaan Ka Deen Phir Se Zinda Ho Sake, Mas’ala-E-Deen Ko Zinda Karne Ka Hai, Mas’ala-E-Haque Kee Sham’a Ko Raushan Karne Ka Hai Yaha’n Ba’z Ahbaab Naadaani Me Ya Bugze Ahl-E-Bayt Me Keh Dete Hain Aur Likh Dete Hain Aur Likh Jaate Hain Ki Aise Haalaat Me Jab Ki Imam Husain (‘Alayh-is-Salam) Ke Paas Musallah Lashkar Na Tha, Fauj Na Thi, Siyaasi Quwwat Na Thi Haalaat Saaz Gaar Na They. Ibn Ziyad Aur Yazeed Ke Paas Sab Kuchh Tha Aise Haalaat Me Imam Husayn RadiyAllahu Ta’ala ‘Anhu Ka Aise Maqaam Par Jaana Ma’azAllah Khurooj Tha Yeh Tasawwur Siwaye Us Ke Ki Ahl-E-Bayt Ka Bugz Aur Aale Rasool Ke Saath Dil Me Inaad Ho Is Ke Siwa Aur Koi Sabab Nahin Hai.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-35.]

2 Doosra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Raahe Rukhsat Aur Raahe Azimat

Posted on July 20, 2016August 26, 2016 by tahirulqadribooks

Aap Ke Dhihn Saaf Karne Ke Liye Mein Aik Zaabitah Aap Ke Saamne Pesh Karta Hoo’n Sune! Shari’ate Mutahharah Me Aise Mushkil Waqt Par Do Raaste Bataaye Jaate Hain Aur Dono’n Raaste Allah Aur Us Ke Rasool Ke Taraf Se Tajweez Kardah Hain, Aik Raaste Ko Raahe Rukhsat Kaha Jaata Hai Aur Aik Raaste Ko Raahe Azimat Kaha Jaata Hai Agar To Halate Saazgaar Ho’n Jabar Wa Barbariyyat Kufr-o-Zulm Aur Baatil Wa Taaghoot Ka Safaya Aasaani Se Kiya Ja Sakta Ho In Haalaat Me Har Chhote Bade Par, Har Kalimah Go Par, Us Zulm Ke Khilaaf Maidaane Kaarzaar Me Nikal Aana Farz Aur Waajib Ho Jaata Hai Phir Kisi Shakhs Ke Liye Siwaye Kisi Shar’iy Majboori Ke Koi Udhr Qaabile Qubool Nahin Hota Lekin Haalaat Jab Na Saazgaar Ho’n Jami’at, Quwwate Aslihah Aur Bhaari Fauj Saath Na Ho Aur Baatil Ziyaada Mazboot Ho, Taaqatwar Ho, Qawi Tar Ho Aise Haalaat Me Baatil Ko Khatm Karne Ya Hata Dene Kee Soorat Zaahiran Nazar Na Aati Ho To In Na Saazgaar Haalaat Me Do Raaste Shari’at Ne Ummat Ko ‘Ata Kiye Hain. Woh Log Jo Haalaat Kee Na Saazgaari Ko Dekhe Unhein Ijaazat Hai Ki Woh Rukhsati Par ‘Amal Karein Gosha Nashee’n Ho Jaaein Chupke Se La’nat Malaamat Karte Rahein Dil Se Bura Jaanein. Lekin Musallah Kashmakash Ke Liye Maidaan Me Na Aaein BeShak Alag Thalag Aik Jagah Gosha Nasheeni Kee Zindagi Basar Karein Yeh Raahe Rukhsat Hai Aur Har Daur Me Aksariyyat Rukhsat Par Amal Karti Rahi Hai. Aur Raahe Rukhsat Kee Raah Par Amal Karna Shari’at Me Na Jaa’iz Hai, Na Haraam Hai Aur Na Allah Kee Narazgi Ka Sabab Hai Isi Liye Allah Ta’ala Ne Har Iztiraari Haalaat Me Rukhsat Kee Ijaazat De Rakkhi Hai Lekin Agar Sab Ke Sab Log Bila Istishna Aise Haalaat Me Rukhsat Par Hee Amal Karna Shuru’ Kar De’n To Phir Zulm-o-Kufr Aur Taaghoot Ko Khatm Karne Ke Liye Haalaat Kabhi Bhi Saazgaar Nahin Ho Sakte Is Liye, Ba-Wajood Rukhsat Ke Kuchh Log Raahe Azimat Par Bhi Chalne Waale Hote Hain. Woh Haalaat Kee Saazgaari Aur Na Saazgaari Ko Nahin Dekhte, Woh Fauj Aur Lashkar Kee Bhaari Aksariyyat Par Nahin Nazar Daalte, Woh Musallah Kashmakash Me Naakaami Aur Kaamyabi Ke Anjaam Par Tawajjuh Nahin Dete Balki Un Kee Tawajjuh Sirf Aur Sirf Is Amr Par Markooz Hoti Hai Ki Hum Apne Tan Ko, Apne Man Ko Allah Ke Deen Ke Bachaane Ke Liye Kaise Qurbaan Karein Shaayad Tan Mein Lagi Huwi Yeh Aag Hee Aaindah Naslo’n Ke Andhere Dur Kar De Woh Apne Khoon Se Poore Deen Kee Aabiyaari Karne Ko Hee Deen Ke Ihya’ Aur Tahaffuz Ka Baa’ith Samajhte Hain Woh Haalaat Kee Na Saazgaari Se Be Khabar Aur Laa Ta’alluq Rahte Huwe Iztiraari Haalaat Me Bhi Apni Jaan Par Khel Jaate Hain Aur Sare Bakaf Ho Kar Maidaane Kaarzaar Me Utarte Aate Hain Woh Apni Shaan Ke Laa’iq Aur Apne Maqaam Kee Munaasabat Se Is Iqdaam Ko Farz Samajhte Hain, Jis Tarah Har Shakhs Raahe Rukhsat Par Amal Nahin Kar Sakta Usi Tarah Azimat Par Bhi Chalna Har Kisi Kee Bas Kee Baat Nahin Hai.

Imam Husayn RadiyAllahu Ta’ala ‘Anhu Ne Yeh Iqdaam Is Liye Kiya Tha Ki Un Ke Rag-o-Reshe Me Ali Bin Abi Talib KarramAllahu Ta’ala Waj’hah-ul-Karim Ka Khoon Gardish Kar Raha Tha. Hazrat Sayyidah Zahrah Salam Allah ‘Alayha Kee Goud Me Parwarish Paayi Thi, Mahboobe Khuda SallAllahu Ta’ala ‘Alayhi Wa-Aalihi Wa-Sallam Ke Mubarak Kandho’n Par Sawaari Kee Thi. Huzoor SallAllahu Ta’ala ‘Alayhi Wa-Aalihi Wa-Sallam Kee Zabaan Mubarak Ko Choosa Tha Woh Ali KarramAllahu Ta’ala Waj’hah-ul-Karim Ke Farzand Aur Khanwada-E-Nubuwwat Ke Chashm-o-Chiragh They, Is Liye Jo Ehsaase Ziya’n Unhein Tha, Woh Kisi Ko Nahin Ho Sakta Tha Woh Binaa-E-La Ilah They.

Is Liye Zaahir Hai Raahe Azimat Par Amal Karne Kee Izzat Us Daur Me Aap Ke Siwa Aur Kise Naseeb Ho Sakti Thi? Aur Phir Yeh Baat Bhi Dhihn Nasheen Farma Le’n Ki Jo Log Raahe Rukhsat Par Amal Karte Hain Woh Bhi Haque Bi-Jaanib Hote Hain. Kisi Shakhs Ko Haque Nahin Pahunchta Ki Unhein Mata’oon Kare Aur Bura Bhala Kahe. Is Liye Ki Unhein Haque Diya Gaya Hai Ki Raahe Rukhsat Ikhtiyar Karein Albatta Aisi Logo’n Kee Raah Ko Koi Shakhs Apna Uswah Aur Raahenuma Nahin Banaata, Ahle Azimat Aur Ushshaaq Un Kee Raah Par Chalte Hain Jo Log Apne Gale Katwaate Hain. Aur Apne Khoon Se Holi Khelte Hain Aur Qurbaniya’n Dete Hain. Woh Raahe Azimat Par Chal Kar Qiyamat Tak Aik Uswa-E-Hayaat De Jaate Hain. Deen Ko Zinda Karne Ke Liye Aik Shaahraah Qaa’im Kar Dete Hain. Deeni Aqdaar Ko Mitne Se Bachaane Ke Liye Aur Phir Se Bahaal Karne Ke Liye Aik Zaabita-E-Hayaat De Jaate Hain. Is Liye Jin Logo’n Ne Imam Husayn ‘Alayh-is-Salam Ke Iqdaam Ko Zaahiri Haalaat Kee Na Saazgaari Kee Bina Par Ma’azAllah Khurooj Aur Baghaawat Ka Ilzaam Diya Hai Woh Na To Deen Kee Rooh Aur Ta’leem Se Waaqif Hain Aur Na Hee Shari’ate Islamiya Ke Ihya’ Ke Taqaazo’n Se Waaqif Hain. Aur Na Hee Us Kee Amr Kee Khabar Rakhte Hain Ki Islam Kee Qadrein Mit Rahi Ho To Unhein Zinda Karne Ke Liye Khoon Kee Baazi Kis Tarah Lagaayi Jaati Hai Aur Shaayad Woh Yeh Bhi Nahin Jaante Ki Us Waqt Yazeed Ka Takht Par Baithna Islam Kee Taarikh Ko Kis Rookh Par Daal Raha Tha Aur Agar Aik Husayn RadiyAllahu Ta’ala ‘Anhu Bhi Maidaane Kaarzaar Me Alame Haque Buland Karne Ke Liye Na Nikalta To Aur Yeh Bahattar-72 Tan Bhi Apne Khoon Ka Nazaranah Dene Ke Liye Na Nikalte To Aaj Islaam Kee Jo Mataa’, Jamhoori Qadro’n Kee Soorat Me, Aazaadi Kee Soorat Me Izzat Aur Jaah-o-Shauqat Kee Soorat Me, Islam Kee Shari’at Ke Nafaadh Kee Soorat Me, Jis Haal Me Bhi Nazar Aa Rahi Hai Woh Shaayad Is Ka Nazaarah Kahin Dikhaayi Na Deta, Islam Kee Pairwi Taarikh Aur Ummate Mustafawi Marhoone Minnat Hai. Husayn Ibn Ali ‘Alayhima-‘s-Salam Ke Khoon Ke Qatraat Kee, Aur Khanwada-E-Rasool Kee Us Azeem Qurbaani Kee Jis Ne Rukhsat Ko Chhod Kar Apne Tan Ko To Maachis Kee Tarah Jala Liya Aur Umr Bhar Ke Liye Is Zamaane Kee Taarikiyo’n Aur Andhero’n Ko Ujaale Me Badal Daala. Yahi Wajah Hai Ki Aaj Chawdah Sau-14.00 Baras Beet Gaye. Rukhsat Kee Raah Chalne Waale Hazaro’n They Lekin Azimat Kee Raah Par Chalne Waale Bahattar-72 They Jin Ke Qaa’id Husayn Ibn Ali RadiyAllahu Ta’ala ‘Anhuma They Chawdah-14 Sadiya’n Beet Gayi’n Dunya Jab Bhi Naam Leti Hai Bataure Namoonah Ke, Woh Husayn Bin Ali ‘Alayhima-‘s-Salam Hee Naam Leti Hai.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-35_38.]

2 Doosra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Makkah Se Karbala Tak

Posted on July 20, 2016August 23, 2016 by tahirulqadribooks

Imam Husayn ‘Alayh-is-Salam Makkah Mu’azzamah Se Teen Dhu-‘l-Hijjah Ko Rawana Huwe Raaste Me Aik Shaa’ir Mila Aap Ne Puchha Ki Koofah Ka Kya Haal Hai? Us Ne Jawaab Dya : Un Ke Dil Aap Kee Saath Magar Talwaarein Yazeed Ke Saath Hain.

Aap Jab Teen Dhu-‘l-Hijjah Ko Rawana Huwe To Aap Kee Khidmat Me Darkhaast Kee Gayi Ki Kuchh Deen Aur Guzaar Le’n Lekin Imam Husayn RadiyAllahu Ta’ala ‘Anhu Ke Saamne Apne Naana Jaan Ka Yeh Irshaad Mubarak Tha Ki Mein Dekh Raha Hoo’n Ki Makkah Ke Haram Ka Taqaddus Quraysh Ke Aik Shakhs Ke Sabab Paamaal Ho Raha Hai, Yaha’n Aik Shakhs Ke Sabab Khoon Beh Raha Hai. Farmane Lage Mumkin Hai Ki Makkah Me Yazeedi Fauj Giriftaari Ke Liye Ihtimaam Kare Aur Hamaare Haami Hamaare Difa’ Me Talwaarein Utha Le’n Aur Mere Sabab Se Harame Makkah Me Khoon Bahe. Mein Nahin Chaahta Ki Apne Naana Jaan Ke Irshaad Ka Misdaaq Banu’n.

Hajj Ke Dino’n Se Qabl Rawangi Ikhtiyaar Farmayi Us Shaa’ir Kee Baat Sun Ne Ke Ba-Wajood Aage Gaye, Raaste Me Hurr Bin Yazeed Tamimi RadiyAllahu Ta’ala ‘Anhu Mila Use Ziyaad Ne Lashkar De Kar Bheja Tha Taa Ki Husayn RadiyAllahu Ta’ala ‘Anhu Tumhein Jaha’n Mile Use Koofah Me Daakhil Na Hone Do Aur Koshish Kar Ke Mere Paas Le Aao Hurr Ne Kaha : Husayn Bin Ali RadiyAllahu Ta’ala ‘Anhuma Aap Ko Pata Chal Chuka Hoga Ki Aap Ke Chacha Zaad Bhaai Muslim Bin Aqil RadiyAllahu Ta’ala ‘Anhuma Shaheed Ho Gaye Hain, Koofi Ke Log Hasbe Dastoor Be-Wafa Sabit Huwe Woh Aap Kee Itaa’at Se Phir Chuke Hain, Haalaat Saazgaar Nahin Hain, Bataaiye Aap Ka Kya Khayaal Hai? Mujhe Hukm Hai Ki Mein Aap Ko Ibn Ziyad Ke Paas Le Chaloo’n.

Imam Aali Maqam Ne Ahle Qaafila Se Mashwarah Kiya Aur Yeh Qaraar Paaya Ki Filhaal Maidan Me Padaao Kiya Jaae. Wahin Amr Bin Sa’d Bhi Aik Bahut Bade Lashkar Ke Saath Ibn Ziyaad Kee Taraf Se Imaam Husayn ‘Alayh-is-Salam Ke Qatl Ke Mansoobe Ke Taht Aa Pahuncha. Imam Husayn RadiyAllahu Ta’ala ‘Anhu Jis Maidaan Tak Pahunche Us Maidaan Kee Khabar Tak Na Thi Ki Yeh Kounsa Maidaan Hai Darya-E-Furaat Ka Kinaarah Tha, Khayaal Kiya Ki Yaha’n Paani Qareeb Hai Kuchh Aasaani Hogi, Yakum Muharram Ko Aur Baa’z Riwayato’n Ke Mutaabiq Do Muharram Ko Usi Maidaan Me Utre Aur Saathiyo’n Se Puchha Ki Yeh Kounsa Maidaan Hai ? Is Ka Naam Kya Hai ? Unhone Bataya Ki Hazrat Is Ka Naam Karbala Hai, Farmane Lage : Bas Yahi’n Khaime Laga Do, Yahi Hamare Safar Kee Aakhiri Manzil Hai, Us Jagah Pahunchte Hee Aap Ko Huzoor Nabiyye Akram SallAllahu Ta’ala ‘Alayhi Wa-Aalihi Wa-Sallam Ke Woh Faraamin Yaad Aa Gaye Jo Aap Ne Karbala Ke Muta’alliq Farmaaye They Aur Bachpan Ke Zamaane Kee Yaadein Aur Huzoor Kee Dee Huwi Bashaaratein Aankho’n Ke Saamne Aa Gayi’n. Woh Bachpan Ka Lamha Yaad Aa Gaya Ki Jab Hazrat Ummi Salamah Aur Hazrat Umm-il-Fadl RadiyAllahu Ta’ala ‘Anhuma Kee Riwaayat Ki Mutabiq Hazrat Ummi Salamah RadiyAllahu Ta’ala ‘Anha Kee Goud Me Imam Aali Maqaam Khel Rahe They Ki Achaanak Aaqa-E-Do-Jaha’n Kee Chashmane Muqaddas Par Aansu Aa Gaye Umm-il-Mu’minin Ne Puchha : Ya RasoolAllah SallAllahu Ta’ala ‘Alayhi Wa-Aalihi Wa-Sallam Kya Baat Hai ? Aap Kee Aankho’n Me Aansu Aa Gaaye Hain ? Farmaya :

أتاني جبريل أخبرني أن ابني الحسين يقتل في بعض أرض العراق يقال لها كربلا وهذه تربتها تربة حمراء.

–
[Suyooti Fi Khasa’is Al-Kubra, 02/125.]

Aye Ummi Salamah! Mere Paas Jibra’il Aaya Hai, Aur Us Ne Is Shahzade Kee Taraf Ishaarah Kar Ke Mujhe Bataaya Hai Ki Aaqa! Aap Ke Baa’d Ummat Ka Aik Zaalim Giroh, Aap Ke Bete Husayn RadiyAllahu Ta’ala ‘Anhu Ko Gharib-ul-Watani Ke Aalam Me Shaheed Kar Dega Aur Iraq Ke Jis Maidaan Me Un Kee Shahadat Hogi Us Ka Naam Karb Wa Bala Hai Aur Yeh Us Jagah Kee Surkh Mitti Hai, Huzoor SallAllahu Ta’ala ‘Alayhi Wa-Aalihi Wa-Sallam Ne Us Mitti Ko Sungh Kar Farmaya : “ريح كرب و بلاء” Haqiqat Yeh Hai Ki Is Mitti Se Bhi Ranj-o-Alam Aur Dukh Aur Dard Kee Boo Aa Rahi Hai, Yahi Woh Maidaan Hai Jis Kee Nisbat Mere Abba Ne Khabar Dee Thi Ki

هاهنا مناخ ركابهم و موضع رحالهم و مهراق دمائهم، فتية من آل محمد يقتلون بهذه العرصة تبكى عليهم السماء والأرض.

Yaha’n Mere Husayn ‘Alayh-is-Salam Aur Us Ke Qaafile Ke Khaime Lagenge, Yaha’n Un Musaafiro’n Ke Kajaawe Rakhe Jaaeinge. Yaha’n Un Ka Muqaddas Khoon Bahaya Jaaega Aur Aale Muhammad Ka Aik Mubarak Giroh Be-Dardi Ke Saath Yaha’n Shaheed Kar Diya Jaaega Aisi Shahadat Ki Jis Kee Shahadat Par Zameen Bhi Rooegi Aur Aur Aasmaan Bhi Aansu Bahaaega.
–
[Suyooti Fi Khasa’is Al-Kubra, 02/126,

Aboo Nu’aym Fi Dala’il-un-Nubuwwah,/509.]

Isi Maidaan Kee Mitti Huzoor ‘Alayh-is-Salatu Wa’s-Salam Ne Hazrat Ummi Salamah RadiyAllahu Ta’ala ‘Anha Ko Ata Kee Thi Aur Farmaya Tha :

إذا تحولت هذه التربة دما فاعلمي ان ابني قد قتل

Jab Yeh Mitti Khoon Me Tabdeel Ho Jaae To Jaan Lena Mera Beta Shaheed Kar Diya Gaya Hai.
–
[Ibn Hajar ‘Asqalani Fi Tahdhib-ut-Tahdhib, 02/347,

Suyooti Fi Khasa’is Al-Kubra, -2/125.]

Aye Ummi Salamah! Is Mitti Ko Sambhaal Kar Rakhna Mujhe Ma’loom Hai Ki Jab Mere Bete Husayn RadiyAllahu Ta’ala ‘Anhu Kee Shahaadat Ka Waqt Aaega To Us Waqt Too Zinda Hogi Jab Yeh Mitti Surkh Ho Jaaye To Samajh Lena Ki Mera Husayn ‘Alayh-is-Salam Shaheed Kar Diya Gaya Hai. Yeh Saari Bashaaratein Pehle Se Dee Jaa Chuki Thi’n. Isi Liye Imaam Aali Maqam Ne Is Maidaan Ko Apne Apne Safar Ka Muntahi Samajh Kar Khaime Lagaaye Aur Yeh Khayaal Farmaya Ki Darya Qareeb Hai Paani Muyassar Aayega Lekin Un Zaalimo’n Ne Aap Ko Paani Se Mehroom Karne Ka Mansooba Bana Liya. Aath-08 Din Amr Bin Sa’d Aur Ibn Ziyad Ke Qaasido’n Ke Darmiyaan Aane Jaane Me Guzar Gaye Kuchh Guft-o-Shunid Chalti Rahi, Ibn Ziyaad Ne Jab Samajha Ki Amr Bin Sa’d Imam Husayn RadiyAllahu Ta’ala ‘Anhu Ke Qatl Se Gurez Chaahta Hai To Us Ne Shimr Dhi-‘l-Jawshan Ko Lashkar De Kar Rawana Kiya Aur Kaha Ki Amr Bin Sa’d Agar Husayn RadiyAllahu Ta’ala ‘Anhu Ke Saath Muqaatalah Kare To Fabiha Agar Mutaammil Ho To Use Ma’zool Kar Ke Lashkar Kee Qiyaadat Tum Sambhaal Lena. Shimr Dhi-‘l-Jawshan Pahuncha To Muharram Ka Aaghaaz Ho Chuka Tha Amr Bin Sa’d Ne Yeh Dekha Ki Hukoomat Mujh Se Chhini Jaa Rahi Hai, Imam Husayn ‘Alayh-is-Salam Ke Saath Muqabala Karne Ka Faisalah Kar Liya Aur Ibn Ziyad Ke Kehne Par Paanch Sau-500 Lashkariyo’n Ko Bheja Ki Woh Furaat Par Qabza Kar Le’n Aur Husayn RadiyAllahu Ta’ala ‘Anhu Ko Paani Ka Aik Ghoont Tak Na Lene De’n.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-38_40.]

2 Doosra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Nau Aur Das Muharram Ke Waqe’at

Posted on July 20, 2016August 23, 2016 by tahirulqadribooks

Imam Husayn RadiyAllahu Ta’ala ‘Anhu Ne Nau-09 Muharram Ko Apne Bhaai Abbas Bin Ali Bin Abi Talib RadiyAllahu Ta’ala ‘Anhuma Ko Pachaas-50 Jawano’n Ke Saath Bheja Ki Kuchh Paani Le Kar Aaein Kyun Ki Kal Jang Ka Din Hai. Wuzoo Ke Liye Aur Peene Ke Liye Paani Kee Zaroorat Hogi. Hazrat Abbas RadiyAllahu Ta’ala ‘Anhu Gaye Furaat Ke Kinaare Jang Huwi Aap Shadeed Zakhmi Ho Gaye Thoda Sa Paani Lene Me Kaamyaab Ho Gaye.

Amr Bin Sa’d Aur Shimr Dhi-‘l-Jawshan Ne Mutaalibah Kiya Ki Abhi Raat Kee Jang Shuru’ Kee Jaaye. Imam Husayn ‘Alayh-is-Salam Ne Farmaya Ki Jab Jang Ka Faisalah Ho Hee Chuka Hai To Yeh Aik Raat Allah Se Munaajaat Aur Alahidagi Me Us Se Mulaqat Ke Ke Liye De Doo, Faisalah Ho Gaya Ki Kal Das-10 Muharram Ko Jang Shuru’ Hogi Raat Ko Aap Apne Khaime Me Gaye Izzat Maab Khawaateen Ko Jam’a Kiya Apni Bahan Hazrat Zaynab Salam Allah ‘Alayha Ko Zawja-E-Mutahharah Hazrat Shahr Baanu Salam Allah ‘Alayha, Chhoti Shahzadiyo’n Ko, Shahzado’n Ko Khanwada-E-Rasool Ke Jawaano’n Ko Irshaad Farmaya : Mein Tum Se Be-Had Raazi Hoo’n Aur Khush Hoo’n Tum Ne Haque-E-Sadaaqat, Wafa Shi’aari Ada Kar Diya. Qiyamat Ke Din Tumhare Haque Me Gawaahi Dunga. Tumhein Ijaazat Deta Hoo’n Ki Raat Ke Andhere Me Jaha’n Chaho Chale Jaao Mujhe Jaame Shahadat Isi Maidaan Me Naush Karna Hai Lekin Tumhein Apni Khaatir Jang Me Jhonkna Aur Marwaana Nahin Chaahta, Azizo’n Kee Aankhein Poor Nam Ho Gayi’n Sab Ne Thar-Tharaate Huwe Labo’n Se Jawaab Diya Ki Imam Aali Maqam! Hum Apne Khoon Ka Aakhiri Qatrah Bhi Aap Ke Qadmo’n Par Gira Denge. Agar Aaj Aap Ko Tanha Chhod Diya To Kal Apne Khuda, Aur Nabiyye Karim SallAllahu Ta’ala ‘Alayhi Wa-Aalihi Wa-Sallam Ko Kya Munh Dikhaaeinge. Hum Aap Kee Khaatir Kat Marenge Jaanein Qurbaan Karenge Aur Yazeedi Lashkar Ko Bata Denge Ki Ahl-E-Bayt Aise Hote Hain. Imam Aali Maqam Ne Raat Bhar Sabr Kee Talqeen Kee Ahl-E-Bayt ‘Alayhim-us-Salatu Wa’s-Salam Ke Muqaddas Khaimo’n Me Raat Bhar Tilaawat Hoti Rahi Sajde Hote Rahe, Istighfaar Hota Raha Aur Zikr Hota Raha Aur Allah Kee Baargaah Me Munaajaat Karte Rahe.

Alal-Sub’h Ma’reka-E-Karbala Bapa Ho Gaya Sab Se Pehle Yake Ba’d Deegare Aik Aik Shakhs Aata Raha Aur Qaafila-E-Husayni Ke Jawaan Yazeedi Lashkar Ke Logo’n Ko Waasile Jahannam Karte Rahe Unhone Ijtima’iy Hamle Ka Faisalah Kar Liya Lekin Idhar Se Aik Aik Jawaan Us Poore Qaafile Ko Muqaabalah Karta Raha Saare Saathi, Jaa’n Nishaar Shaheed Ho Gaye Ab Sirf Ahl-E-Bayte Nubuwwat ‘Alayhim-us-Salatu Wa’s-Salam Ke Afraad Rah Gaye, Imam Husayn RadiyAllahu Ta’ala ‘Anhu Ne Chaaha Ki Is Khandan Se Mein Aaghaaz Karoo’n, Talwaar Uthaayi, Lekin Hazrat Ali Akbar Maidan Me Aa Gaye. Arz Karne Lage : Abba Jaan! Beta Aap Ka Jawaan Hai, Aur Jawaan Beto’n Ke Hote Huwe Baap Ko Aisi Takleef Kee Zaroorat Nahin, Maidaan Me Pahuncha Jihaad Shuru’ Kiya. Aap Kee Talwaar Jis Samt Uthti Yazeed Fauj Ke Tukde Uda Deti. Aap Ne Unhein Gaajar Mooli Kee Tarah Kaat Kar Rakh Diya. Phir Aap Ka Ghoda Zakhmi Ho Gaya, Haydari Khoon Aur Husayni Shujaa’at Ne Yazeedi Lashkar Ko Museebat Wa Mashaqqat Me Daal Diya Aur Un Ke Parakhche Uda Deeye, Imam Husayn RadiyAllahu Ta’ala ‘Anhu Chaahte They Ki Apne Jawaan Bete Ko, Shabaab Ke Maahe Kaamil Ko, Husn Ke Maahe Tamaam Ko, Apni Aankho’n Se Ladta Huwa Dekhein. Lekin Maidane Karb-o-Bala Kee Gard Ne Un Ko Chhupa Liya Tha, Kuchh Khabar Na Thi Ki Woh Kaha’n Hai, Aur Un Par Kya Beet Rahi Hai? Bas Itna Andaazah Hota Tha Ki Jis Samt Yazeedi Lashkar Kee Bhedein Bhaagti’n, Imam Husayn ‘Alayh-is-Salam Aur Ahl-E-Bayt ‘Alayhim-us-Salam Ke Log Samajh Lete Hain Ki Husayn RadiyAllahu Ta’ala ‘Anhu Ka Laadla Beta, Us Samt Jaa Raha Tha. Yeh Ali Haidare Karrar Ka Pauta Tha Hazrat Muhammad SallAllahu Ta’ala ‘Alayhi Wa-Aalihi Wa-Sallam Ka Nawaasa, Derr Tak Yazeediyo’n Ko Waasile Jahannam Karta Raha, Pyaas Kee Shiddat Ne Aa Ghera Jism Par Beeso’n Zakhm Lag Gaye, Paani Ka Aik ghoont Bhar Kar Do Baarah Taazah Dam Hone Ke Liye Aaye To Arz Kee : Abba Jaan! Agar Paani Ka Aik Ghoont Mil Jaae To Phir Taazah Dam Ho Kar Hamla Karu’n Farmaya : Ali Akbar! Paani To Muyassar Nahin Lekin Apni Sookhi Huwi Zubaan Tere Moonh Me Daal Sakta Hoo’n Hazrat Ali Akbar ‘Alayh-is-Salam Ne Imam Aali Maqaam Kee Sookhi Huwi Zubaan Chakhi Aur Us Se Phir Taazah Dam Ho Kar Maidaan Me Pahunche, Derr Tak Ladne Ke Baa’d, Be-Andaazah Zakhm Khaa Kar Zameen Par Gir Pade Aik Nezah Aap Ke Seena-E-Aqdas Me Paiwast Ho Gaya Achaanak Zubaan Se Aawaaz Aayi : Ya Abtah ! Aye Abba Jaan! Imam Husayn RadiyAllahu Ta’ala ‘Anhu Be-Saakhta Daud Pade Jaa Kar Apne Bete Ko Goud Me Le Kar Utha Liya. Beta, Aik Ajeeb Andaaz Se Apne Baap Ko Tak Raha Hai Arz Kee! Abba Jaan! Agar Aap Neze Ka Yeh Phal Jism Se Nikaal De’n To Mein Aik Baar Phir Maidaan Me Jaane Ke Liye Tayyar Hoo’n. Aap Ka Beta Dushman Kee Kasrat Ke Ba-Wajood Himmat Haarne Waala Nahin. Imam Husayn ‘Alayh-is-Salam Ne Goud Me Jawaan Bete Ko, Us Maahe Tamaam Ko, Us Husn Ke Paikar Ko Apni Goud Me Le Liya, Sar Se Paau’n Tak Jism Zakhmo’n Se Choor Tha Aap Ne Neze Ka Phal Nikaala Khoon Ka Fawwaarah Ubal Pada.

Imam Husayn RadiyAllahu Ta’ala ‘Anhu Jab Hazrat Ali Akbar ‘Alayh-is-Salam Ko Goud Me Uthaaye Huwe They. Us Waqt Aap Kee Umr Chhappan-56 Saal Paanch-05 Mahine Aur Paanch-05 Din Thi. Ibn Asaakir Likhte Hain Ki Daadhi Aur Sar Ka Aik Baal Bhi Sufed Na Tha Lekin Khoon Ke Fawwaare Ko Dekh Kar Aur Jawaan Bete Kee Rooh Qafase Unsuri Se Parwaaz Karti Dekh Kar, Itna Sadma Pahuncha, Aur Is Qadar Gham Laahiq Huwa Ki Jab Jab Jawaan Bete Kee Laash Utha Kar Waapas Aaye To Sar Aur Daadhi Ke Baal Sufed Ho Chuke They.

Azm Wa Himmat Wa Sabr Wa Istiqlaal Ke Is Paikar Ne, Jawaa’n Bete Kee Laash, Khaime Me Rakkhi Huwi Shaheedo’n Kee Laasho’n Ke Saath Laa Kar Rakh Dee, Aur Is Daf’ah Khood Maidan Me Jaane Kee Tayyari Shuru’ Kar Dee. Aik Nau-09 Saal Ka Chhota Sa Baccha Talwaar Utha Kar Saamne Aaya. Yeh Koun Hai. Yeh Qasim Bin Hasan Bin Ali RadiyAllahu Ta’ala ‘Anhuma Hai, Hazrat Qasim ‘Alayh-is-Salam Se Farmaya : Bete! Too Mere Bhaai Hasan ‘Alayh-is-Salam Kee Nishaani Hai To Too Aaraam Kar! Jawaab Diya : Chacha Jaan! Mein Qiyamat Ke Din Apne Baap Ko Kya Munh Dikhaaunga? Woh Kaheinge Ki Tere Chacha Shaheed Ho Gaye Too Dekhta Raha, Nahin Mere Nanhe Gale Par Talwaar Chal Le, Phir Aap Kee Baari Aayegi, Aakhir Qasim Bin Hasan ‘Alayhima-‘s-Salam Bhi Shaheed Ho Gaye.

Aksar Log Kehte Hain Ki Hazrat Ali Asghar Jin Kee Umr Mubarak Sirf Chhe-06 Maah Thi Aur Woh Pyaas Se Tadap Rahe They Imam Husayn RadiyAllahu Ta’ala ‘Anhu Unhein Utha Kar Le Gaye, Aur Lashkare Yazeed Se Un Ke Liye Paani Maanga Lekin Paani Ke Bajaae Teer Aaya Aur Baccha Shaheed Ho Gaya, Mein Is Se Muttafique Nahin Mujhe Husayn RadiyAllahu Ta’ala ‘Anhu Kee Ghairat Aur Hamiyyat Is Baat Par Yaqeen Karne Kee Ijaazat Nahin Deti. Kyun Ki Woh Husayn RadiyAllahu Ta’ala ‘Anhu Jo Islam Kee Khaatir, Ahl-E-Bayt ‘Alayhim-us-Salam Kee Ghairat Wa Hammiyat Kee Khaatir, Sab Kuchh Luta Raha Hai Woh Is Bacche Ke Liye Yazeedi Badbakhto’n Se Paani Kee Bheek Kis Tarah Maang Sakta Hai? Agar Paani Kee Bheek Hee Maangna Thi To Phir Husayn RadiyAllahu Ta’ala ‘Anhu Ko Un Se Khayrat Talab Karne Kee Haajat Na Thi Woh Chaahte To Darya-E-Furaat Ko Ishaarah Karte, Darya-E-Furaat Un Ke Qadmo’n Me Bahne Lagta, Aasmaan Kee Taraf Haath Uthaate, Baarish Se Bhare Baadal Umad Aate, Moosla Dhaar Baarish Hoti, Isma’il Bin Ibrahim ‘Alayhima-‘s-Salam Kee Aidi Ke Ragadne Se Agar Zam Zam Ka Aik Chashma Nikal Sakta Hai To Phir Mustafa SallAllahu Ta’ala ‘Alayhi Wa-Aalihi Wa-Sallam Ke Laadle Bete Husayn Ibn Ali ‘Alayhima-‘s-Salam Kee Zarb Aur Aidi Maarne Se Karbala Ke Maidaan Me Chashma Kyun Nahin Phoot Sakta, Mera To Yeh Aqidah Hai Ki Agar Woh Zameen Par Paau’n Maarte To Aik Chashma To Kya, Regzaare Karbala Me Hazaro’n Chashme Phoot Padte.

Lekin Yeh Maidaane Imtihaan Wa Aazma’ish Tha Husayn ‘Alayh-is-Salam To In Masaa’ib-o-Aalaam Me Sabr Kar Ke Apne Mawla Ko Raazi Kar Rahe They Un Ke Naana Un Ko Tak Rahe They Ki Mera Husayn RadiyAllahu Ta’ala ‘Anhu Jise Mein Ne Apne Kandhe Par Sawaar Kiya Hai, Hazrat Fatimat-uz-Zahra Salam Allah ‘Alayha Dekh Rahi Thi’n Ki Jis Husayn ‘Alayh-is-Salam Ko Mein Ne Apni Chhati Ka Doodh Pilaaya Hai. Ali Shere Khuda KarramAllahu Ta’ala Waj’hah-ul-Karim Mulaahiza Farma Rahe They Ki Jis Ke Rag-o-Reshe Me Mera Khoon Gardish Kar Raha Hai Aaj Is Maqame Sabr Aur Maqame Istiqaamat Par Is Ke Qadam Kahin Ladkhadaye To Nahin Hain? Husayn Ibn Ali RadiyAllahu Ta’ala ‘Anhuma Is Haal Me Sabr-o-Raza Ka Paikare Atam Ban Kar Azm-o-Himmat Ke Saath Muskuraate Rahe.

Aakhir Jab Imam Husayn RadiyAllahu Ta’ala ‘Anhu Ne Maidaan Me Aane Ka Iraadah Kiya To Hazrat Aabid Bimar ‘Alayh-is-Salam Nikal Aaye Aur Arz Kee : Abba Jaan! Mere Oopar To Aisa Zulm Na Keejiye Ki Mere Hote Huwe Aap Maidaan Me Jaa Rahe Hain Mein Bhi Baaqi Bhaa’iyo’n Kee Tarah Apne Nana Jaan Ka Deedaar Karna Chaahta Hoo’n, Mein Bhi Apni Daadi Jaan Kee Bargah Me Jaa Kar Surkhroo Hona Chaahta Hoo’n, Ab Shahadat Ka Jaam Peena Meri Baari Hai, Imam Husayn RadiyAllahu Ta’ala ‘Anhu Ne Farmaya : Too Rah Jaa Ki Khanwada-E-Rasool Ka Har Chiraaag Gul Ho Chuka Hai Har Phool Murjha Chuka Hai Ab Meri Nasl Me Faqat Too Hee Baaqi Rah Gaya Hai Mujhe To Shaheed Hona Hee Hai Agar Too Bhi Shaheed Ho Gaya To Tere Naana Kee Nasl Kaha’n Se Chalegi Too Apne Naana Kee Nasl Kee Baqa Kee Khaatir Zinda Rah.

Hazrat Imam Husayn RadiyAllahu Ta’ala ‘Anhu Imam Zayn-ul-Aabidin ‘Alayh-is-Salam Ko Chhod Kar Khud Maidane Karbala Me Utre Aap Bhi Derr Tak Hazaaro’n Yazeediyo’n Ko Waasile Jahannam Karte Rahe. Poore Lashkar Me Kohraam Mach Gaya. Ali Shere Khuda KarramAllahu Ta’ala Waj’hah-ul-Karim Ka Yeh Jawaa’n Beta, Yeh Allah Ka Sher Jis Taraf Talwaar Le Kar Nikal Jaata Hazaaro’n Afraad Bhedo’n Kee Tarah Aage Bhaagne Lagte Aap Unhein Waasile Jahannam Karte Rahe Talwaaro’n Aur Nezo’n Ke Waar Khaate Rahe, Saara Din Is Tarah Guzar Gaya Khayaal Aaya Ki Wuzoo Taazah Kar Loo’n, Maidane Furaat Par Gaye Paanch Sau-500 Ka Lashkar Chhod Kar Bhaag Gaya, Aap Ne Wuzoo Karne Ke Liye Furaat Se Chullu Me Paani Liya To Woh Khoon Aaloodah Ho Gaya, Aap Ne Us Ko Uchhaala Aur Waapas Laut Aaye Muskura Kar Aasmaan Kee Taraf Dekha Aur Sar Jhuka Liya Jum’ah Ka Din Tha Ab Waha’n Jum’ah Kaha’n? Namaze Zuhr Ka Waqt Aaya Farmane Lage Yazeediyo’n ! Kuchh Der Rukh Jaao Taa Ki Allah Kee Bargah Me Do Sajde Aur Kar Loo’n, Lekin Woh Zaalim Yeh Muhlat Bhi Dene Par Tayyar Na They. Imam Aali Maqaam Ne Un Ke Azaa’im Dekh Kar Talawaar Rakh Dee Aur Zuhr Kee Namaaz Ke Liye Niyyat Baandh Lee Zaalimo’n Ne Yeh Na Dekha Ki Namaaz Ada Kar Rahe Hain, Kuchh Derr Tawaqquf Kar Le’n. Balki Unhone Mauqa-E-Ghanimat Jaana, Chaaro’n Taraf Se Chadhaayi Kar Dee, Teero’n Kee Bauchhaar Aur Pey Dar Pey Hamlo’n Ne Nawasa-E-Rasool Ke Jism Ko Nidhaal Kar Diya, Chunanche Ghode Se Gir Gaye Yaha’n Tak Ki Jisme At’har Me Uthne Kee Sakat Baaqi Na Rahi, Gire Huwe Husayn RadiyAllahu Ta’ala ‘Anhu Ke Saamne Aa Kar Bhi Koi Waar Na Karta Tha Peechhe Se Waar Karte. Nezo’n Se Waar Hote Imam Husayn ‘Alayh-is-Salam Sabr-o-Raza Aur Tawakkul Ke Saare Marhale Kaamyaabi Se Tay Kar Ke Shahadat Ke Us Maqaam Par Pahuncha Gaye Jis Kee Rif’at Wa Azmat Ko Koi Nahin Paa Sakta Un Kee Rooh Ko Qudsiyaane Falak Ne Aik Juloos Kee Soorat Me Huzoore Iyzidi Pahunchaane Ke Liye Tamaam Intizaamaat Mukammal Kar Liye They Aur Idhar Rooh Qafase Unsuri Se Parwaaz Karne Lagi. Udhar Haatife Ghaybi Se Nida Aayi Husayn Ab Aaja ! Too Ne Sabr Ko Kamaal Ata Kar Diya Istiqaamat Ko Intiha Tak Pahuncha Diya Hai Ummate Mustafa Salam Allah ‘Alayha Ka Sar Ooncha Kar Diya Aye Husayn! Aaj Se Tere Iqdaam Ko Bina-E-La-Ilah Qaraar De Diya Jaaega Aye Husayn Ab Aaja. Aye Roohe Taahir! ارْجِعِي إِلَىٰ رَبِّكِ رَاضِيَةً مَّرْضِيَّةً Jannat Ke Darwaaze Khol Diye Gaye Naana Jaan Istiqbaal Ke Liye Khade Hain Aye Husayn RadiyAllahu Ta’ala ‘Anhu Too Ne Mera Sar Fakhr Se Buland Kar Diya Hai. Hazrat Fatimat-uz-Zahrah RadiyAllahu Ta’ala ‘Anha Bete Ko Shabashi Deti Hain Ali Shere Khuda KarramAllahu Ta’ala Waj’hah-ul-Karim Bete Ko Aafreen Kehte Hain. Imam Aali Maqaam Kee Roohe Paak Is Tarah Hujoome Mala’ikah Me Allah Kee Bargaah Me Baaryaab Hoti Hai, Aur Izzat Paati Hai, Aap Ka Sar Tan Se Juda Kar Diya Jaata Hai Zaalimo’n Ke Jazba-E-Intiqaam Kee Phir Bhi Taskeen Nahin Hoti Woh Jisme At’har Par Ghode Daudaate Hain Taapo’n Se Raundate Hain Unhein Khayaal Tak Nahin Aata Ki Yeh Woh Sar Hai Jise Sarkare Do-Aalam SallAllahu Ta’ala ‘Alayhi Wa-Aalihi Wa-Sallam Chooma Karte They. Yeh Woh Jism Hai Jise Apne Kaandhe Par Sawaar Karte They Aur Apni Peeth Par Bitha Kar Ghutno’n Ke Bal Chalte They.

Koofi Har Qism Ke Ihsaasaat Se Aari They, Insaaniyyat Ko Khayr Aabaad Keh Chuke They Aur Aisi Darindagi Par Utar Aaye They Jis Par Darindagi Bhi Sharmaati Hai Imam Husayn ‘Alayh-is-Salam Ke Sare Aqdas Ke Ilaawah Unhone Baaqi Bahattar-72 Afraad Ke Sar Bhi Jismo’n Se Alaahidah Kiye Un Ka Juloos Nikaala Aur Un Ke Saath Khanwada-E-Rasool Kee Baa-Pardah, Hayaadaar Khawaateen Ko Le Kar Ibn Ziyaad Ke Darbaar Kee Taraf Rawaana Huwe, Koofah Me Us Paleed Ibn Ziyaad Ka Darbaar Laga Huwa Tha Ki Yeh Juloos Waha’n Pahunch Gaya.
Phir Kya Huwa Yeh Aaindah Khutbah Me Bayaan Kiya Jaaega…
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-41_46.]

DOOSRA KHITAAB

Ibn Ziyaad Kee Makrooh Saazishein

DOOSRA
KHITAAB