Tag: Yazeediyyat

Posted in 2 Doosra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Nau Aur Das Muharram Ke Waqe’at

Posted on by tahirulqadribooks

Imam Husayn RadiyAllahu Ta’ala ‘Anhu Ne Nau-09 Muharram Ko Apne Bhaai Abbas Bin Ali Bin Abi Talib RadiyAllahu Ta’ala ‘Anhuma Ko Pachaas-50 Jawano’n Ke Saath Bheja Ki Kuchh Paani Le Kar Aaein Kyun Ki Kal Jang Ka Din Hai. Wuzoo Ke Liye Aur Peene Ke Liye Paani Kee Zaroorat Hogi. Hazrat Abbas RadiyAllahu Ta’ala ‘Anhu Gaye Furaat Ke Kinaare Jang Huwi Aap Shadeed Zakhmi Ho Gaye Thoda Sa Paani Lene Me Kaamyaab Ho Gaye.

 

Amr Bin Sa’d Aur Shimr Dhi-‘l-Jawshan Ne Mutaalibah Kiya Ki Abhi Raat Kee Jang Shuru’ Kee Jaaye. Imam Husayn ‘Alayh-is-Salam Ne Farmaya Ki Jab Jang Ka Faisalah Ho Hee Chuka Hai To Yeh Aik Raat Allah Se Munaajaat Aur Alahidagi Me Us Se Mulaqat Ke Ke Liye De Doo, Faisalah Ho Gaya Ki Kal Das-10 Muharram Ko Jang Shuru’ Hogi Raat Ko Aap Apne Khaime Me Gaye Izzat Maab Khawaateen Ko Jam’a Kiya Apni Bahan Hazrat Zaynab Salam Allah ‘Alayha Ko Zawja-E-Mutahharah Hazrat Shahr Baanu Salam Allah ‘Alayha, Chhoti Shahzadiyo’n Ko, Shahzado’n Ko Khanwada-E-Rasool Ke Jawaano’n Ko Irshaad Farmaya : Mein Tum Se Be-Had Raazi Hoo’n Aur Khush Hoo’n Tum Ne Haque-E-Sadaaqat, Wafa Shi’aari Ada Kar Diya. Qiyamat Ke Din Tumhare Haque Me Gawaahi Dunga. Tumhein Ijaazat Deta Hoo’n Ki Raat Ke Andhere Me Jaha’n Chaho Chale Jaao Mujhe Jaame Shahadat Isi Maidaan Me Naush Karna Hai Lekin Tumhein Apni Khaatir Jang Me Jhonkna Aur Marwaana Nahin Chaahta, Azizo’n Kee Aankhein Poor Nam Ho Gayi’n Sab Ne Thar-Tharaate Huwe Labo’n Se Jawaab Diya Ki Imam Aali Maqam! Hum Apne Khoon Ka Aakhiri Qatrah Bhi Aap Ke Qadmo’n Par Gira Denge. Agar Aaj Aap Ko Tanha Chhod Diya To Kal Apne Khuda, Aur Nabiyye Karim SallAllahu Ta’ala ‘Alayhi Wa-Aalihi Wa-Sallam Ko Kya Munh Dikhaaeinge. Hum Aap Kee Khaatir Kat Marenge Jaanein Qurbaan Karenge Aur Yazeedi Lashkar Ko Bata Denge Ki Ahl-E-Bayt Aise Hote Hain. Imam Aali Maqam Ne Raat Bhar Sabr Kee Talqeen Kee Ahl-E-Bayt ‘Alayhim-us-Salatu Wa’s-Salam Ke Muqaddas Khaimo’n Me Raat Bhar Tilaawat Hoti Rahi Sajde Hote Rahe, Istighfaar Hota Raha Aur Zikr Hota Raha Aur Allah Kee Baargaah Me Munaajaat Karte Rahe.

 

Alal-Sub’h Ma’reka-E-Karbala Bapa Ho Gaya Sab Se Pehle Yake Ba’d Deegare Aik Aik Shakhs Aata Raha Aur Qaafila-E-Husayni Ke Jawaan Yazeedi Lashkar Ke Logo’n Ko Waasile Jahannam Karte Rahe Unhone Ijtima’iy Hamle Ka Faisalah Kar Liya Lekin Idhar Se Aik Aik Jawaan Us Poore Qaafile Ko Muqaabalah Karta Raha Saare Saathi, Jaa’n Nishaar Shaheed Ho Gaye Ab Sirf Ahl-E-Bayte Nubuwwat ‘Alayhim-us-Salatu Wa’s-Salam Ke Afraad Rah Gaye, Imam Husayn RadiyAllahu Ta’ala ‘Anhu Ne Chaaha Ki Is Khandan Se Mein Aaghaaz Karoo’n, Talwaar Uthaayi, Lekin Hazrat Ali Akbar Maidan Me Aa Gaye. Arz Karne Lage : Abba Jaan! Beta Aap Ka Jawaan Hai, Aur Jawaan Beto’n Ke Hote Huwe Baap Ko Aisi Takleef Kee Zaroorat Nahin, Maidaan Me Pahuncha Jihaad Shuru’ Kiya. Aap Kee Talwaar Jis Samt Uthti Yazeed Fauj Ke Tukde Uda Deti. Aap Ne Unhein Gaajar Mooli Kee Tarah Kaat Kar Rakh Diya. Phir Aap Ka Ghoda Zakhmi Ho Gaya, Haydari Khoon Aur Husayni Shujaa’at Ne Yazeedi Lashkar Ko Museebat Wa Mashaqqat Me Daal Diya Aur Un Ke Parakhche Uda Deeye, Imam Husayn RadiyAllahu Ta’ala ‘Anhu Chaahte They Ki Apne Jawaan Bete Ko, Shabaab Ke Maahe Kaamil Ko, Husn Ke Maahe Tamaam Ko, Apni Aankho’n Se Ladta Huwa Dekhein. Lekin Maidane Karb-o-Bala Kee Gard Ne Un Ko Chhupa Liya Tha, Kuchh Khabar Na Thi Ki Woh Kaha’n Hai, Aur Un Par Kya Beet Rahi Hai? Bas Itna Andaazah Hota Tha Ki Jis Samt Yazeedi Lashkar Kee Bhedein Bhaagti’n, Imam Husayn ‘Alayh-is-Salam Aur Ahl-E-Bayt ‘Alayhim-us-Salam Ke Log Samajh Lete Hain Ki Husayn RadiyAllahu Ta’ala ‘Anhu Ka Laadla Beta, Us Samt Jaa Raha Tha. Yeh Ali Haidare Karrar Ka Pauta Tha Hazrat Muhammad SallAllahu Ta’ala ‘Alayhi Wa-Aalihi Wa-Sallam Ka Nawaasa, Derr Tak Yazeediyo’n Ko Waasile Jahannam Karta Raha, Pyaas Kee Shiddat Ne Aa Ghera Jism Par Beeso’n Zakhm Lag Gaye, Paani Ka Aik ghoont Bhar Kar Do Baarah Taazah Dam Hone Ke Liye Aaye To Arz Kee : Abba Jaan! Agar Paani Ka Aik Ghoont Mil Jaae To Phir Taazah Dam Ho Kar Hamla Karu’n Farmaya : Ali Akbar! Paani To Muyassar Nahin Lekin Apni Sookhi Huwi Zubaan Tere Moonh Me Daal Sakta Hoo’n Hazrat Ali Akbar ‘Alayh-is-Salam Ne Imam Aali Maqaam Kee Sookhi Huwi Zubaan Chakhi Aur Us Se Phir Taazah Dam Ho Kar Maidaan Me Pahunche, Derr Tak Ladne Ke Baa’d, Be-Andaazah Zakhm Khaa Kar Zameen Par Gir Pade Aik Nezah Aap Ke Seena-E-Aqdas Me Paiwast Ho Gaya Achaanak Zubaan Se Aawaaz Aayi : Ya Abtah ! Aye Abba Jaan! Imam Husayn RadiyAllahu Ta’ala ‘Anhu Be-Saakhta Daud Pade Jaa Kar Apne Bete Ko Goud Me Le Kar Utha Liya. Beta, Aik Ajeeb Andaaz Se Apne Baap Ko Tak Raha Hai Arz Kee! Abba Jaan! Agar Aap Neze Ka Yeh Phal Jism Se Nikaal De’n To Mein Aik Baar Phir Maidaan Me Jaane Ke Liye Tayyar Hoo’n. Aap Ka Beta Dushman Kee Kasrat Ke Ba-Wajood Himmat Haarne Waala Nahin. Imam Husayn ‘Alayh-is-Salam Ne Goud Me Jawaan Bete Ko, Us Maahe Tamaam Ko, Us Husn Ke Paikar Ko Apni Goud Me Le Liya, Sar Se Paau’n Tak Jism Zakhmo’n Se Choor Tha Aap Ne  Neze Ka Phal Nikaala Khoon Ka Fawwaarah Ubal Pada.

 

Imam Husayn RadiyAllahu Ta’ala ‘Anhu Jab Hazrat Ali Akbar ‘Alayh-is-Salam Ko Goud Me Uthaaye Huwe They. Us Waqt Aap Kee Umr Chhappan-56 Saal Paanch-05 Mahine Aur Paanch-05 Din Thi. Ibn Asaakir Likhte Hain Ki Daadhi Aur Sar Ka Aik Baal Bhi Sufed Na Tha Lekin Khoon Ke Fawwaare Ko Dekh Kar Aur Jawaan Bete Kee Rooh Qafase Unsuri Se Parwaaz Karti Dekh Kar, Itna Sadma Pahuncha, Aur Is Qadar Gham Laahiq Huwa Ki Jab Jab Jawaan Bete Kee Laash Utha Kar Waapas Aaye To Sar Aur Daadhi Ke Baal Sufed Ho Chuke They.

 

Azm Wa Himmat Wa Sabr Wa Istiqlaal Ke Is Paikar Ne, Jawaa’n Bete Kee Laash, Khaime Me Rakkhi Huwi Shaheedo’n Kee Laasho’n Ke Saath Laa Kar Rakh Dee, Aur Is Daf’ah Khood Maidan Me Jaane  Kee Tayyari Shuru’ Kar Dee. Aik Nau-09 Saal Ka Chhota Sa Baccha Talwaar Utha Kar Saamne Aaya. Yeh Koun Hai. Yeh Qasim Bin Hasan Bin Ali RadiyAllahu Ta’ala ‘Anhuma Hai, Hazrat Qasim ‘Alayh-is-Salam Se Farmaya : Bete! Too Mere Bhaai Hasan ‘Alayh-is-Salam Kee Nishaani Hai To Too Aaraam Kar! Jawaab Diya : Chacha Jaan! Mein Qiyamat Ke Din Apne Baap Ko Kya Munh Dikhaaunga? Woh Kaheinge Ki Tere Chacha Shaheed Ho Gaye Too Dekhta Raha, Nahin Mere Nanhe Gale Par Talwaar Chal Le, Phir Aap Kee Baari Aayegi, Aakhir Qasim Bin Hasan ‘Alayhima-‘s-Salam Bhi Shaheed Ho Gaye.

 

Aksar Log Kehte Hain Ki Hazrat Ali Asghar Jin Kee Umr Mubarak Sirf Chhe-06 Maah Thi Aur Woh Pyaas Se Tadap Rahe They Imam Husayn RadiyAllahu Ta’ala ‘Anhu Unhein Utha Kar Le Gaye, Aur Lashkare Yazeed Se Un Ke Liye Paani Maanga Lekin Paani Ke Bajaae Teer Aaya Aur Baccha Shaheed Ho Gaya, Mein Is Se Muttafique Nahin Mujhe Husayn RadiyAllahu Ta’ala ‘Anhu Kee Ghairat Aur Hamiyyat Is Baat Par Yaqeen Karne Kee Ijaazat Nahin Deti. Kyun Ki Woh Husayn RadiyAllahu Ta’ala ‘Anhu Jo Islam Kee Khaatir, Ahl-E-Bayt ‘Alayhim-us-Salam Kee Ghairat Wa Hammiyat Kee Khaatir, Sab Kuchh Luta Raha Hai Woh Is Bacche Ke Liye Yazeedi Badbakhto’n Se Paani Kee Bheek Kis Tarah Maang Sakta Hai? Agar Paani Kee Bheek Hee Maangna Thi To Phir Husayn RadiyAllahu Ta’ala ‘Anhu Ko Un Se Khayrat Talab Karne Kee Haajat Na Thi Woh Chaahte To Darya-E-Furaat Ko Ishaarah Karte, Darya-E-Furaat Un Ke Qadmo’n Me Bahne Lagta, Aasmaan Kee Taraf Haath Uthaate, Baarish Se Bhare Baadal Umad Aate, Moosla Dhaar Baarish Hoti, Isma’il Bin Ibrahim ‘Alayhima-‘s-Salam Kee Aidi Ke Ragadne Se Agar Zam Zam Ka Aik Chashma Nikal Sakta Hai To Phir Mustafa SallAllahu Ta’ala ‘Alayhi Wa-Aalihi Wa-Sallam Ke Laadle Bete Husayn Ibn Ali ‘Alayhima-‘s-Salam Kee Zarb Aur Aidi Maarne Se Karbala Ke Maidaan Me Chashma Kyun Nahin Phoot Sakta, Mera To Yeh Aqidah Hai Ki Agar Woh Zameen Par Paau’n Maarte To Aik Chashma To Kya, Regzaare Karbala Me Hazaro’n Chashme Phoot Padte.

 

Lekin Yeh Maidaane Imtihaan Wa Aazma’ish Tha Husayn ‘Alayh-is-Salam To In Masaa’ib-o-Aalaam Me Sabr Kar Ke Apne Mawla Ko Raazi Kar Rahe They Un Ke Naana Un Ko Tak Rahe They Ki Mera Husayn RadiyAllahu Ta’ala ‘Anhu Jise Mein Ne Apne Kandhe Par Sawaar Kiya Hai, Hazrat Fatimat-uz-Zahra Salam Allah ‘Alayha Dekh Rahi Thi’n Ki Jis Husayn ‘Alayh-is-Salam Ko Mein Ne Apni Chhati Ka Doodh Pilaaya Hai. Ali Shere Khuda KarramAllahu Ta’ala Waj’hah-ul-Karim Mulaahiza Farma Rahe They Ki Jis Ke Rag-o-Reshe Me Mera Khoon Gardish Kar Raha Hai Aaj Is Maqame Sabr Aur Maqame Istiqaamat Par Is Ke Qadam Kahin Ladkhadaye To Nahin Hain? Husayn Ibn Ali RadiyAllahu Ta’ala ‘Anhuma Is Haal Me Sabr-o-Raza Ka Paikare Atam Ban Kar Azm-o-Himmat Ke Saath Muskuraate Rahe.

 

Aakhir Jab Imam Husayn RadiyAllahu Ta’ala ‘Anhu Ne Maidaan Me Aane Ka Iraadah Kiya To Hazrat Aabid Bimar ‘Alayh-is-Salam Nikal Aaye Aur  Arz Kee : Abba Jaan! Mere Oopar To Aisa Zulm Na Keejiye Ki Mere Hote Huwe Aap Maidaan Me Jaa Rahe Hain Mein Bhi Baaqi Bhaa’iyo’n Kee Tarah Apne Nana Jaan Ka Deedaar Karna Chaahta Hoo’n, Mein Bhi Apni Daadi Jaan Kee Bargah Me Jaa Kar Surkhroo Hona Chaahta Hoo’n, Ab Shahadat Ka Jaam Peena Meri Baari Hai, Imam Husayn RadiyAllahu Ta’ala ‘Anhu Ne Farmaya : Too Rah Jaa Ki Khanwada-E-Rasool Ka Har Chiraaag Gul Ho Chuka Hai Har Phool Murjha Chuka Hai Ab Meri Nasl Me Faqat Too Hee Baaqi Rah Gaya Hai Mujhe To Shaheed Hona Hee Hai Agar Too Bhi Shaheed Ho Gaya To Tere Naana Kee Nasl Kaha’n Se Chalegi Too Apne Naana Kee Nasl Kee Baqa Kee Khaatir Zinda Rah.

 

Hazrat Imam Husayn RadiyAllahu Ta’ala ‘Anhu Imam Zayn-ul-Aabidin ‘Alayh-is-Salam Ko Chhod Kar Khud Maidane Karbala Me Utre Aap Bhi Derr Tak Hazaaro’n Yazeediyo’n Ko Waasile Jahannam Karte Rahe. Poore Lashkar Me Kohraam Mach Gaya. Ali Shere Khuda KarramAllahu Ta’ala Waj’hah-ul-Karim Ka Yeh Jawaa’n Beta, Yeh Allah Ka Sher Jis Taraf Talwaar Le Kar Nikal Jaata Hazaaro’n Afraad Bhedo’n Kee Tarah Aage Bhaagne Lagte Aap Unhein Waasile Jahannam Karte Rahe Talwaaro’n Aur Nezo’n Ke Waar Khaate Rahe, Saara Din Is Tarah Guzar Gaya Khayaal Aaya Ki Wuzoo Taazah Kar Loo’n, Maidane Furaat Par Gaye Paanch Sau-500 Ka Lashkar Chhod Kar Bhaag Gaya, Aap Ne Wuzoo Karne Ke Liye Furaat Se Chullu Me Paani Liya To Woh Khoon Aaloodah Ho Gaya, Aap Ne Us Ko Uchhaala Aur Waapas Laut Aaye Muskura Kar Aasmaan Kee Taraf Dekha Aur Sar Jhuka Liya Jum’ah Ka Din Tha Ab Waha’n Jum’ah Kaha’n? Namaze Zuhr Ka Waqt Aaya Farmane Lage Yazeediyo’n ! Kuchh Der Rukh Jaao Taa Ki Allah Kee Bargah Me Do Sajde Aur Kar Loo’n, Lekin Woh Zaalim Yeh Muhlat Bhi Dene Par Tayyar Na They. Imam Aali Maqaam Ne Un Ke Azaa’im Dekh Kar Talawaar Rakh Dee Aur Zuhr Kee Namaaz Ke Liye Niyyat Baandh Lee  Zaalimo’n Ne Yeh Na Dekha Ki Namaaz Ada Kar Rahe Hain, Kuchh Derr Tawaqquf Kar Le’n. Balki Unhone Mauqa-E-Ghanimat  Jaana, Chaaro’n Taraf Se Chadhaayi Kar Dee, Teero’n Kee Bauchhaar Aur Pey Dar Pey Hamlo’n Ne Nawasa-E-Rasool Ke Jism Ko Nidhaal Kar Diya, Chunanche Ghode Se Gir Gaye Yaha’n Tak Ki Jisme At’har Me Uthne Kee Sakat Baaqi Na Rahi, Gire Huwe Husayn RadiyAllahu Ta’ala ‘Anhu Ke Saamne Aa Kar Bhi Koi Waar Na Karta Tha Peechhe Se Waar Karte.  Nezo’n Se Waar Hote Imam Husayn ‘Alayh-is-Salam Sabr-o-Raza Aur Tawakkul Ke Saare Marhale Kaamyaabi Se Tay Kar Ke Shahadat Ke Us Maqaam Par Pahuncha Gaye Jis Kee Rif’at Wa Azmat Ko Koi Nahin Paa Sakta Un Kee Rooh Ko Qudsiyaane Falak Ne Aik Juloos Kee Soorat Me Huzoore Iyzidi Pahunchaane Ke Liye Tamaam Intizaamaat Mukammal Kar Liye They Aur Idhar Rooh Qafase Unsuri Se Parwaaz Karne Lagi. Udhar Haatife Ghaybi Se Nida Aayi Husayn Ab Aaja ! Too Ne Sabr Ko Kamaal Ata Kar Diya Istiqaamat Ko Intiha Tak Pahuncha Diya Hai Ummate Mustafa Salam Allah ‘Alayha Ka Sar Ooncha Kar Diya Aye Husayn! Aaj Se Tere Iqdaam Ko Bina-E-La-Ilah Qaraar De Diya Jaaega Aye Husayn Ab Aaja. Aye Roohe Taahir! ارْجِعِي إِلَىٰ رَبِّكِ رَاضِيَةً مَّرْضِيَّةً   Jannat Ke Darwaaze Khol Diye Gaye Naana Jaan Istiqbaal Ke Liye Khade Hain Aye Husayn RadiyAllahu Ta’ala ‘Anhu Too Ne Mera Sar Fakhr Se Buland Kar Diya Hai. Hazrat Fatimat-uz-Zahrah RadiyAllahu Ta’ala ‘Anha Bete Ko Shabashi Deti Hain Ali Shere Khuda KarramAllahu Ta’ala Waj’hah-ul-Karim Bete Ko Aafreen Kehte Hain. Imam Aali Maqaam Kee Roohe Paak Is Tarah Hujoome Mala’ikah Me Allah Kee Bargaah Me Baaryaab Hoti Hai, Aur Izzat Paati Hai, Aap Ka Sar Tan Se Juda Kar Diya Jaata Hai Zaalimo’n Ke Jazba-E-Intiqaam Kee Phir Bhi Taskeen Nahin Hoti  Woh Jisme At’har Par Ghode Daudaate Hain Taapo’n Se Raundate Hain Unhein Khayaal Tak Nahin Aata Ki Yeh Woh Sar Hai Jise Sarkare Do-Aalam SallAllahu Ta’ala ‘Alayhi Wa-Aalihi Wa-Sallam Chooma Karte They. Yeh Woh Jism Hai Jise Apne Kaandhe Par Sawaar Karte They Aur Apni Peeth Par Bitha Kar Ghutno’n Ke Bal Chalte They.

 

Koofi Har Qism Ke Ihsaasaat Se Aari They, Insaaniyyat Ko Khayr Aabaad Keh Chuke They Aur Aisi Darindagi Par Utar Aaye They Jis Par Darindagi Bhi Sharmaati Hai Imam Husayn ‘Alayh-is-Salam Ke Sare Aqdas Ke Ilaawah Unhone Baaqi Bahattar-72 Afraad Ke Sar Bhi Jismo’n Se Alaahidah Kiye Un Ka Juloos Nikaala Aur Un Ke Saath Khanwada-E-Rasool Kee Baa-Pardah, Hayaadaar Khawaateen Ko Le Kar Ibn Ziyaad Ke Darbaar Kee Taraf Rawaana Huwe, Koofah Me Us Paleed Ibn Ziyaad Ka Darbaar Laga Huwa Tha Ki Yeh Juloos Waha’n Pahunch Gaya.
Phir Kya Huwa Yeh Aaindah Khutbah Me Bayaan Kiya Jaaega…
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-41_46.]

Posted in 3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Sare Husayn RadiyAllahu Ta’ala ‘Anhu Ka Safar

Posted on by tahirulqadribooks

                    Raat Guzar Gayi Sub’h Un Muqaddas Saro’n Ko Nezo’n Par Uthaaya Gaya, Oonto’n Kee Sawaariyo’n Par Muqaddas Biwiyo’n Ko Bithaya Gaya Aur Yeh Luta Pita Saara Qaafila Sooe Koofah Rawanah Ho Gaya, Zaalim Yazeedi Us Qaafile Ko Le Kar Koofah Kee Taraf Rawana Ho Gaye. Raat Ko Ibn Sa’d Ke Lashkar Me Se Kisi Ne Chaaha Ki Hazrat Zayn-ul-Aabidin Ko Bhi Shaheed Kar De Lekin Ibn Sa’d Ne Kaha Bimaar Baccha Hai, Ise Rahne Do!

 

Mashiyyate Iyzidi Yahi Thi Ki Koi Mard Un Me Zaroor Rahe Jis Ne Sab Kuchh Apni Aankho’n Se Dekha Ho Aur Woh Haalaat Ka Ayni Shaahid Ho.

Doosre Roz Lashkare Yazeed Ne Apni Tamam Laasho’n Ko Jam’a Kiya Aur Unhein Dafn Kar Ke Rawangi Ka E’laan Kar Diya, Magar Ahl-E-Bayte Kiram ‘Alayhim-us-Salatu Wa’s-Salam Kee Laasho’n Ko Dafn Karne Kee Koi Zaroorat Mahsoos Na Kee, Be Ghairat Kameene Logo’n Ne Imame Paak Ke Khandan Aur Saathiyo’n Ke Jismo’n Aur Laasho’n Ko Usi Jagah Be Goro Kafan Chhod Diya.

 

Furaat Ke Kinaare Aik Qabeela-E-Banu Sa’d Aabaad Tha Jab Unhein Yeh Pata Chala Ki Yazeedi Log Ahl-E-Bayte At’har ‘Alayhim-us-Salam Kee Laasho’n Ko Khule Aasmaan Tale Chhod Kar Chale Gaye Hain Woh Fauran Waha’n Pahunche Aur Shuhda’ Ke Mubarak Jismo’n Ke Kafan Dafan Ka Intizaam Kiya.

 

Yazeediyo’n Ka Qaafila Ahl-E-Bayte Kiram Salam Allah ‘Alayhim Ke Hamrah Koofah Daakhil Huwa Shuhada’ Ke Sar Un Ke Paas They. Woh Sab Ibn Ziyad Ke Saamne Pesh Kar Deeye Gaye. Hazrat Imam Paak Ka Sar Mubarak Khooli Ke Paas Tha Woh Kisi Wajah Se Barwaqt Darbaar Me Nahin Pahunch Saka  Aur Sar Mubarak Apne Hamraah Apne Ghar Le Gaya. Apni Biwi Se Kehne Laga : Aaj Mein Tere Liye Dunya Wa Jahaan Kee Daulat Le Kar Aaya Hoo’n Is Ka Matlab Yeh Tha Ki Jab Yeh Sar Ibn Ziyad Ke Saamne Pesh Hoga To Bahutsa In’aam Milega.
Sang Dil Khooli Lambi Taan Kar So Gaya Magar Us Kee Biwi Sar Mubarak Ke Saamne Baith Gayi Aur Saari Raat Ro Ro Kar Guzaar Dee. Us Ne Dekha Ki Zameen Se Asmaan Tak Noor Hee Noor Phaila Huwa Hai Aur Sar Mubarak Ke Ird Gird Ajeeb Shakl Ke Noorani  Paikar Tawaaf Kar Rahe Hain Kuchh Nahin Kaha Jaa Sakta Ki Woh Hoor Wa Firishte Hain, Is Jaha’n Kee Makhlooq Hain Ya Aalame Baala Se Aaye Huwe Mala’ikah Hain Woh Saari Raat Yahi Nazaare Karti Rahi.
Sub’h Badbakht Khooli Utha Aur Imam Paak Ka Sare Anwar Ibn Ziyad Ke Paas Le Gaya Imam Aali Maqaam Ka Sare Anwar Baaqi Saro’n Ke Saath Aur Khanwada-E-Rasool Ke Baaqi Qaidiyo’n Ke Saath Us Badbakht Ibn Ziyaad Ke Takht Ke Saamne Pesh Kiya Gaya Woh Badbakht Us Waqt Takht Par Baitha Tha Us Ke Haath Me Chhadi Thi Us Ne Chhadi Le Kar Sayyidina Imam Husayn Ke Dandan Mubarak Par Maari Aur Kaha Dekho! Sar Akda Kar Chalne Waale! Aaj Too Apne Anjaam Ko Pahunch Gaya. Huzoor SallAllahu Ta’ala ‘Alayhi Wa-Aalihi Wa-Sallam Ke Aik Naabina Sahabi Jo Ki Bilkul Naabina Na They Nazar Kuchh Kamzor Thi Woh Bahut Budhe Ho Chuke They Un Ka Naam Zayd Bin Arqam Tha Woh Majlis Me Mawjood They. Ibn Zayd Ne Chhadi Ko Jab Imame Aali Maqam Ke Mubarak Labo’n Par Dekha To Woh Cheekh Uthe Aur Kaha Ki Kuchh To Haya Kar! Mein Ne Apni Aankho’n Se Huzoor SallAllahu Ta’ala ‘Alayhi Wa-Aalihi Wa-Sallam Ke Labo’n Ko In Ke Labo’n Par Dekha Hai Huzoor SallAllahu Ta’ala ‘Alayhi Wa-Aalihi Wa-Sallam In Labo’n Ko Chooma Karte They, Us Ne Kaha Ki Aye Zayd Bin Arqam! Agar Aap Rasool Ke Sahaabi Aur Budhe Na Hote To Mein Aap Ka Sar Qalam Kar Deta.

 

Zaalim! Tujhe Kya Haya Hai Huzoor Ke Sahabi Ka, Jis Rasool Ke Lakhte Jigar Se Tum Yeh Sulooq Kar Rahe Ho Us Rasool Ke Sahabi Se Haya Karne Ka Tumhein Kya Haque Pahunchta Hai? Ibn Ziyad Ne Yeh Sab Kuchh Karne Ke Baa’d Yazeed Kee Khushnudi Ke Liye Imam Aali Maqam Ka Sare Anwar Deegar Saro’n Ke Juloos Ke Saath Aur Unhein Khanwada-E-Rasool Kee Barguzidah Qaidiyo’n Ke Saath Yazeed Kee Taraf Dimashq Rawana Kar Diya.

 

Jab Yeh Qaafila Dimashq Kee Taraf Rawana Huwa To Raaste Me Aik Girje Ke Qareeb Padaao Kiya Waha’n Unhone Jali Huroof Me Aik Pahaadi Par Surkh Rang Ke Saath Yeh She’r Likha Huwa Dekha :

أترجو أمّةٌ قتَلَـت حسينـاً       شفاعةَ جَدِّهِ يومَ الحسابِ ؟!

“Jis Qaum Ne Husayn Ko Qatl Kar Diya Hai Kya Woh Qiyaamat Ke Din In Ke Naana Jaan Kee Shafa’at Kee Ummid Rakhte Hain?”
Ahle Qaafila Ne Jab Yeh Ajeeb-o-Gharib She’r Padha To Un Ke Raungte Khade Ho Gaye Kuchh Samajh Na Sake Ki Yeh She’r Is Pahaadi Par Is Qadar Numaaya Soorat Me Kaise Mastoor Ho Gaya. Abhi In Par Hairat Aur Dahshat Ka Aalam Taari Tha Ki Us Girje Me Se Aik Isaa’i Paadri Un Ke Qareeb Aaya Ahle Qafile Ne Us Kee Aamada Ko Ghaneemat Jaana Aur Puchha Ki Yeh She’r Yaha’n Kab Se Likha Huwa Hai? Us Ne Kaha Mujhe Ma’loom Nahin, Hum To Apni Paida’ish Ke Waqt Se Dekhte Aa Rahe Hain Aur Hamaare Bade Buddhe Bataate Hain Ki Nabiyye Karim SallAllahu Ta’ala ‘Alayhi Wa-Aalihi Wa-Sallam Kee Bi’that Se Bhi Sadiyo’n Pehle Yeh She’r Yahin Likha Huwa Tha Aur Yeh Arse Se Chala Aa Raha Hai. Yeh Bataane Ke Liye Ki Zaalimo’n! Woh Badbakht Giroh Tum Me Se Hoga Jo Tumhein Kalimah Padhaane Waale Nabi Ke Nawaase Ko Shaheed Kar Dega. Us Raahib Ne Jab Yeh Kaifiyyat Dekhi To Puchha Yeh Sar Kis Ka Hai? Yeh Qaafila Kaisa Hai? Yeh Maajra Kya Hai? Us Raahib Ko Bataaya Gaya Ki Yeh Sar Husayn Ibn Ali Ka Hai, Nabi Ke Lakhte Jigar Ka Sar Hai, Yeh Un Ke Khandan Kee Muqaddas Bibiyo’n Ka Qaafila Hai, Yeh Un Kee Awlaad Ke Muqaddas Sar Hain.
Woh Raahib Kaanp Utha, Us Ka Jism Laraz Gaya Woh Kehne Laga Zaalimo’n Mein Tumhein Das Hazar-10.000 Dinaar Deta Hoo’n, Das Hazar Ke Badle Aik Raat In Saro’n Kee Mehmaani Mujhe Ata Kar Do! Mein Isaa’i Hoo’n, Mein Tumhaare Deen Par Imaan Nahin Rakhta, Mein Tumhaara Kalimah Nahin Padhta Lekin Musaafir Samajh Kar Mein Chaahta Hoo’n Ki Aik Raat Khidmat Kar Loo’n.

 

Woh Zaalim Seem-o-Zar Ke Ghulaam They, Un Logo’n Ne Das Hazaar Dinaaro’n Kee Khaatir Aik Raat Raahib Ke Paas Padaao Qubool Kar Liya. Raahib Ne Apne Ghar Ko Khaali Kar Liya Parda Daar Muqaddas Bibiyo’n Ko Ghar Ke Chaar Diwaari Me Mahfooz Rakkha Apni Khawaateen Se Kaha Ki Raat Bhar Un Kee Khidmat Karo Yeh Musalmano’n Ke Nabi Kee Betiya’n Hain. Aur Khud Imam Aali Maqam Ke Sare Anwar Ko Aik Dhoye Huwe Saaf Ujle Tasht Me Rakh Liya, Raat Ko Aik Pyaala Paani Le Kar Us Sare Anwar Ko Dhoya Us Kee Gard Saaf Kee, Rishe Mubaarak Par Khooshbu Lagaayi Phir Saari Raat Sare Anwar Ke Saamne Haath Baandh Kar Khada Raha Zaar-o-Qataar Rota Raha Aur Yeh Kehta Raha : Aye Husayn! Mein Musalman Nahin Hoo’n, Aap Ke Naana Jaan Ka Kalimah Nahin Padha Phir Bhi Yeh Khaufnaak Manzar Dekhne Se Qaasir Hoo’n, Yeh Harees-o-Dhaleel Aur Zaalim Log Kis Be Dardi Se Aap Ke Khandan Ko Dhib’h Kar Ke Badi Be Parwaahi Se Safar Kar Rahe Hain Unhein Ihsaas Hee Nahin Ki Unhone Kitna Bada Jurm Kiya Hai.

Saari Raat Us Khidmat Ke Iwaz Khanwada-E-Rasool Kee Muqaddas Bibiya’n Us Raahib Ko Du’aaein Deti Rahin, Sare Husayn Bhi Zubaane Haal Se Use Du’aaein Deta Raha, Yaakayak Us Kee Qismat Ka Sitaarah Chamka, Us Kee Aankho’n Ke Aage Se Hijaabaat Uth Gaye, Aur Woh Noor Jo Khooli Kee Biwi Ne Dekha Tha Woh Arsh Se Zameen Tak Us Kee Aankho’n Par Bhi Munkashif Ho Gaya Us Ne Dekha Ki Aik Noor Utara Hai Aur Husayn Ke Sar Ke Ird Gird Tawaaf Kar Raha Hai. Jab Us Ne Yeh Hairat Angez Manzar Dekha, Aur Sare Aqdas Ke Ru’b-o-Jalaal Ka Mushaahidah Kiya, To Us Ke Dil Kee Kaifiyyat Hee Badal Gayi, Us Kee Muhabbat Aur Husne Aqidat Ka Silah Milne Ke Intizaamaat Ho Gaye Us Waqt Us Ka Baatin Jagmaga Utha, Seena Raushan Ho Gaya Aur Us Ne Fauran Kalimah Padh Liya, Ab Us Ke Liye Ahle Bayte Kiram ‘Alayhim-us-Salam Se Doorr Rahna Naa Mumkin Ho Gaya. Chunanche Jab Yeh Qaafila Rawaana Huwa To Woh Bhi Un Ke Saath Ho Liya, Apni Manzilein Tay Karta Huwa Jab Yeh Qaafila Yazeed Ke Darbar Me Pahuncha To Woh Pehle Hee Se Us Ka Muntazar Tha Aur Badi Ra’oonat Ke Saath Apne Takht Par Baitha Huwa Tha Aik Chhadi Us Ke Haath Me Thi.
Jab Sare Husayn Us Ke Saamne Rakkha Gaya To Us Ke Tan Badan Me Aag Lag Gayi Chhadi Aap Ke Dandaan Mubaarak Par Maari Aur Daant Pees Kar Bola : Tum Apne Anjaam Ko Pahunch Gaye Ho.

Waha’n Bhi Darbaar Me Huzoor Nabiyye Karim SallAllahu Ta’ala ‘Alayhi Wa-Aalihi Wa-Sallam Ke Aik Buzurg Sahabi Hazrat Aboo Barzah Aslami RadiyAllahu Ta’ala ‘Anhu Bhi Mawjood They, Woh Yeh Be Adabi Bardaasht Na Kar Sake Aur Yazeed Ko Daant Kar Farmaane Lage Zaalim! Is Behoodah Harkat Aur Gustaakhi Se Baaz Aaja Mein Ne Baaraha Dekha Ki Huzoor Nabiyye Karim SallAllahu Ta’ala ‘Alayhi Wa-Aalihi Wa-Sallam In Honto’n Ko Chooma Karte They Aur Husayn In Honto’n Ke Saath Zubaane Nubuwwat Choosa Karte They.

Yazeed Paleed Ko Sahabi Kee Yeh Tanqeed Pasand Na Aayi Aur Un Kee Yeh Baat Sakht Naa Gawaar Guzri Chunanche Unhein Darbaar Se Nikaal Diya.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-56_60.]

Posted in 3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Yazeed Kee Manafiqanah Siyaasat

Posted on by tahirulqadribooks

                   Al-Gharaz Is Qism Kee Guftagu Aur Waqe’at Darbare Yazeed Me Pesh Aaye Is Ke Baa’d Us Badbakht Ne Khushi Manaayi Aur Fakhr Kiya. Ibn Ziyad Ko In’aam-o-Ikraam Diya Lekin Baa’d Me Jab Us Ne Dekha Ki Logo’n Ke Tewar Badal Rahe Hain Aur Jis Iktidaar Kee Khaatir Us Ne Yeh Saare Mazaalim Dhaaye Hain Woh Khatre Me Hai Aur Log Us Se Sakht Nafrat Karne Lag Gaye Hain To Us Ne Fauran Paintara Badla Aur Bhola Miskeen Ban Kar Kehne Laga :

“Bura Ho Ibn Ziyad Ka Jis Ne Maidane Karbala Me Ahl-E-Bayt Kee Tauheen Kee Aur Un Ke Chidah Chidah Afraad Ko Qatl Kiya Aur Nihaayat Saffaaki Aur Be Rahmi Ka Suboot Diya, Mein Us Ke Is Fi’l Par Khush Nahin Hoo’n, Agar Woh Husayn Ko Zinda Le Aata To Mujhe Ziyaada Khushi Hoti Magar Is Sitamgar Ne Bahut Jabar Kiya Hai Aur Zulm-o-Sitam Kee Intiha Kar Dee Hai Khuda Is Par La’nat Kare, Woh Bahut Badi La’nat Wa Malaamat Ka Mustahiq Hai.”

 

Yazeed Kee In Munafiqana Baato’n Kee Bunyaad Par Baa’z Kotaah Andesh Is Ghalat Fahmi Ka Shikaar Ho Gaye Hain Ki Woh Qatle Husayn Se Khush Na Tha Aur Us Ne Us Waqi’a Se Be Had Sadmah Pahuncha Tha.

Aisi Soch Rakhne Waale Se Hum Puchhte Hain Ki Agar Woh Ibn Ziyad Kee Is Kaarwaa’i Se Naakhush Tha To Phir Un Se Aur Ibn Sa’d Se Qisaas Kyun Na Liya? Chalo Qatl Ka Qisaaas Lena Doorr Kee Baat Hai, Un Dono’n Ko Ma’zool Kyun Na Kiya? Ya Un Ke Uhdo’n Me Kami Kyun Na Kee? In Sab Soorto’n Ke Bar Aks Hum Dekhte Hain Ki Us Ne Un Se Baazpurs Tak Na Kee Na Koi Saza Dee.

Yeh Soorate Haal Is Baat Kee Daleel Hai Ki Woh Andar Se Khush Tha Un Kee Kaarwaa’i Ko Haque-E-Bi-Jaanib Jaanta Tha, Baa’d Me Us Ne Jo Magarmachh Ke Aansu Bahaaye Aur Chikni Chupdi Baatein Kee’n Woh Sab Apne Siyaasi Anjaam Se Bachne Aur Iqtedaar Ko Dawaam Bakhshne Ke Liye Thi’n. Kyun Ki Qatle Husayn Ne Us Ke Takhte Iqtedaar Ko Hila Kar Rakh Diya Tha.

Baa’d Azaa’n Us Zaalim Ne Imam Aali Maqam Ke Sar Aur Baaqi Saro’n Ke Baare Me Kaha Ki Inhein Dimashq Ke Baazaro’n Me Phiraaya Jaaye. Kya Yahi Yazeed Jo Qatle Husayn Par Khush Nahin Hai Agar Khush Nahin To Phir Kya Qatle Husayn Ke Baa’d Koi Gunjaa’ish Rah Gayi Thi Jo Us Ne Saro’n Kee Numaa’ish Ka Bhi Ihtimaam Kiya.

Yazeed Paleed Ibn Ziyad Aur Ibn Sa’d Kee Saffakaana Kaarkardagi Se Badal-o-Jaa’n Khush Tha Aur Mahz Oopar Se Lipa Poti Kar Raha Tha Ki Log Badzan Na Ho Jaaein Us Kee Aik Daleel Yeh Bhi Hai Ki Ahl-E-Bayt ‘Alayhim-us-Salam Ke Qaafile Ko Dimashq Ke Baazaaro’n Me Phiraaya Gaya, Shuhada’ Ke Saro’n Kee Numa’ish Kee Gayi Aur Nezo’n Par Latke Huwe Un Saro’n Ka Juloos Bhi Nikaala Gaya.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-61_63.]

Posted in 3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Yazeed Kee Fir’awniyyat Wa Gumraahi Kee Tafseelaat

Posted on by tahirulqadribooks

                   Imam Aali Maqam Kee Shahadat Ke Baa’d Yazeed Badbakht Ne Fir’awniyyat Aa Gayi, Mazeed Qaarooniyyat Aa Gayi, Us Kee Badkaari Me Izaafa Ho Gaya Nasha-E-Iqtidar Me Mazeed Dhut Ho Gaya. Sharaabi To Pehle Hee Tha Lekin Ab Sharaab Khori Kee Koi Had Na Rahi, Badkaar To Pehle Hee Tha Lekin Ab To Sauteli Maao’n Bahno’n Aur Beto’n Ke Saath Bhi Badkaari Karne Laga.

 

Al-Gharaz Uyoob-o-Naqa’is Ka Mujassama Ban Gaya Aur Us Ka Zulm-o-Sitam Intiha Ko Pahunch Gaya, Loot Maar Kee Koi Had Na Rahi Hazrat Abd Allah Bin Handhalah Ghasil-ul-Mala’ikah Farmate Hain Ki Jab Hum Ne Yeh Sab Kuchh Dekha To Hum Is Nateeje Par Pahunche Ki Ab Is Kee Bay’at Ka Inkaar Karna Zaroori Ho Gaya Hai Wagarna Mumkin Hai Ki Allah Ka ‘Azaab Naazil Ho Jaaye Aur Aasmaan Se Patthar Barasne Lagein. Chunanche Madinah Aur Makkah Waalo’n Ne Barmala Yazeed Kee Bay’at Ko Tod Daala Aur Us Kee Hukoomat Ko Taslim Karne Se Inkaar Kar Diya Is Ko Yazeed Ne Apne Khilaaf Baghaawat Samajha Aur Muslim Bin Uqbah Ke Zere Qiyaadat Me Hazaaro’n Faujiyo’n Ka Lashkar Tayyar Kiya Aur Kaha Ki Jaao Madine Par Hamla Kar Do Aur Mein Teen Din Ke Liye Tum Par Madinah Ko Halaal Karta Hoo’n Jo Tumhaare Jee Me Aaye Karo Tumhein Koi Nahin Puchhega.
Yeh Kirdaar Hai Us Yazeed Ka…

Jise Kabhi “Amir Al-Mu’minin” Kaha Jaata Hai Aur Kabhi Us Ke Naam Ke Saath “RadiyAllahu Ta’ala ‘Anhu” Padha Aur Likha Jaata Hai. Kabhi Use Momin Aur Jannati Qaraar Diya Jaata Hai. Yeh Hai Woh Yazeed Yeh Hai Us Ka Deeni Kirdaar Yeh Hai Us Kee Jannati Sirat, Jo Bees Hazaar-20.000 Ka Lashkar Nawasa-E-Rasool Kee Shahadat Ke Baa’d Madine Ko Taakht-o-Taaraaj Karne Ke Liye Bhej Raha Hai Chunanche Mash’hoor Waaqe’a-E-Harrah Pesh Aaya Yazeedi Fauj Ne Madine Ke Lashkar Ka Muhaasarah Kar Liya Shahre Madinha Ka Gheraao Kar Liya Unhone Khandaq Se Apni Muhaafazat Kee Yeh Pathraao Karte Rahe Aur Na’re Buland Karte Rahe Ki Aao Ab Hum Badr Aur Uhad Ke Apne Maqtoolin Ka Badla Lene Ke Liye Aa Gaye Hain. Unhone Apne Ghode Ane Khacchar Apne Oont Apni Sawariya’n Huzoor Ke Rawda-E-At’har Aur Masjide Nabawi Ke Sutono’n Ke Saath Baandh Dee’n. Masjide Nabawi Weeraan Ho Gayi Us Kee Be Hurmati Hone Lagi Teen-03 Din Tak Mere Aaqa Kee Masjid Me Azaan Mu’attal Rahi, Namazein Mu’attal Ho Gayi’n Aur Teen Din Tak Qatle Aam Jaari Raha.

 

Aap Wafa’-ul-Wafa Li-Ibn Kathir Aur Tarikh-ul-Khulafa’ Jaisi Mu’tabar Tawarikh Wa Siyar Uthaa Kar Dekhein Tab Aap Ko Pata Chalega Ki Yazeedi Lashkar Ne Madinah Tayyibah Par Kya Qiyamat Dhaa’i. Sahaba-E-Kiram, Sahabiyat, Tabi’iyn Aur Tab’a Tabi’iyn Me Se Taqriban Das Hazaar-10.000 Muqaddas Hastiyo’n Ko Be Daregh Tegh Kiya. Khawaatin Kee Behurmati Kee, Aur Awaam Par Be Panaah Tashaddud Rawa Rakkha. Umm-il-Mu’minin Hazrat Ummi Salamah RadiyAllahu Ta’ala ‘Anha Isi Mauqa Par Shaheed Huwin Aur Huzoor Ke Sahabi Aboo Sa’iyd Khudri Jo Naabina Ho Gaye They Un Kee Daadhi Mubarak Sufed Thi Huzoor Ke Deedaar Kee Talab Le Kar Madinah Me Masjide Nabawi Kee Taraf Aa Rahe They Ki Yazeedi Lashkar Ne Puchha Baaba Too Koun Hai? Woh Kehne Lage Mein Aaqa-E-Do-Jaha’n Ka Sahabi Hoo’n, Aboo Sa’iyd Khudri Mera Naam Hai, Un Zaalimo’n Ne Un Kee Daadhi Mubarak Pakad Kar Tamaanche Maare Aur Waapas Ghar Bhej Diya.

 

Teen Din Tak Masjide Nabawi Kee Ibaadatein, Namazein Jama’atein Mu’attal Rahi’n. Hazrat Aboo Sa’iyd Bin Musayyab Jalil-ul-Qadr Tabi’iy Farmate Hain Ki Mein Paagal Diwana Aur Majnoo’n Ban Kar Masjide Nabawi Me Huzoor Ke Rawda-E-At’har Me Mimbar Ke Qareeb Chhup Gaya. Pakda Bhi Gaya Lekin Majnoo’n Samajh Kar Chhod Diya Gaya. Mera Dil Gawaara Na Karta Tha Ki Us Kaifiyyat Me Apne Aaqa Ka Mazaar Chhod Kar Apne Ghar Jaau’n Teen Din Aur Teen Raatein Usi Mimbar Me Baitha Raha, Koi Azaan Kee Awaaz Masjid Me Na Uthti Thi Jama’at Ka Ihtimaam Na Tha, Kehte Hain Ki Rabbe Dhi-‘l-Jalaal Kee Izzat Kee Qasam! Namaz Ka Waqt Aata To Mujhe Rawda-E-Rasool Se Azaan Wa Takbeer Kee Aawaaz Aati Thi Aur Mein Rawda-E-Rasool Kee Azaan Ko Sun Kar Namazein Ada Karta Tha.

Yaha’n Apne Maqaasid Aur Naapaak Azaa’im Ko Poora Karne Ke Baa’d Woh Makkah Kee Taraf Laute Chun Ki Makkah Me Bhi Yazeed Ke Khilaaf Baghaawat Ho Chuki Thi Is Liye Unhone Zaroori Samjha Ki Ahle Makkah Ko Bhi Saza De’n.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-64_66.]