Ab Zehne Insaani Me Sawaal Paida Hota Hai Ki Agar Hazrat Isma’il ‘Alayh-is-Salam Ko Bachaana Hee Maqsood Tha To Phir Un Ko Allah Kee Raah Me Qurban Karne Ka Hukm Kyun Diya? Aur Agar Hukm Huwa Tha To Un Kee Zindagi Ko Tahaffuz Kyun Diya Gaya. Aakhir Is Kee Wajah Kya Hai? Hukm Is Liye Huwa Ki Saraapa-E-Ithaar Wa Qurbaani Paighmbar Hazrat Ibrahim ‘Alayh-is-Salam Ke Lakhte Jigar Se Dhib’h Kee Taarikh Kee Ibtida Ho Jaaye Ki Raahe Haque Me Qurbaniya’n Dene Ka Aaghaaz Ambiya’ Kee Sunnat Hai Aur Bacha Is Liye Gaya Ki Us Azeem Paighambar Kee Nasle Paak Me Nabi-E-Aakhir-uz-Zama’n Hazrat Muhammad SallAllahu Ta’ala ‘Alayhi Wa Aalihi Wa Sallam Kee Wiladate Baa-Sa’adat Hona Thi. Aulade Ibrahim ‘Alayh-is-Salam Me Tajdare Ka’enat SallAllahu Ta’ala ‘Alayhi Wa Aalihi Wa Sallam Ko Tashrif Laana Tha Is Liye Hazrat Isma’il ‘Alayh-is-Salam Kee Dhib’h Ko Jannat Se Laaye Gaye Maindhe Kee Qurbaani Kee Soorat Me “Azeem Dhib’h” Ke Saath Badal Diya Gaya Aur Hazrat Isma’il ‘Alayh-is-Salam Mahfooz Wa Maamoon Rahe.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/09_10.]
Author: tahirulqadribooks
Ta’mieere Ka’bah Se Ka’enat Kee Imamat Tak
Sayyidina Hazrat Isma’il ‘Alayh-is-Salam Sinne Buloghat Ko Pahunche, To Makkah Mu’azzamah Kee Waadi Me Apne Waalid Buzurgwaar Hazrat Ibrahim ‘Alayh-is-Salam Ke Saath Tashrif Laaye. Allah Rabb-ul-Izzat Kee Taarf Se Unhein Ka’batullah Kee Ta’meer Ka Hukm Huwa, Yeh Aik Bohat Bada I’zaaz Tha Jo Sarware Ka’enat Huzoor Rahmate Aalam SallAllahu Ta’ala ‘Alayhi Wa Aalihi Wa Sallam Ke Jadde Amjad Ke Hisse Me Aaya. Inhin Kee Nasle Paak Me Mab’ooth Hone Waale Paighambare Aa’zam Wa Aakhir Huzoor Nabiyye Akram SallAllahu Ta’ala ‘Alayhi Wa Aalihi Wa Sallam Ke Hisse Me Yeh Sa’adat Bhi Aayi Ki Ka’batullah Ko Teen Sau Saath Buto’n Se Paak Kar Ke Us Par Parchame Tawheed Lehraaya.
Hazrat Ibrahim ‘Alayh-is-Salam Kee Hayaate Muqaddasa Par Aik Nazar Daalein To Kaare Nubuwwat Kee Anjaam Dihi Me Unhein An Ginat Masaa’ib Ka Saamna Raha Aur Aazmaa’ish Ke Kathin Maraahil Se Guzarna Pada. Allah Ke Us Azeem Paighambar Ne Raahe Haque Me Aane Waali Un Mushkilaat Ka Khandah Peshaani Se Muqabala Kiya Aur Har Aazma’ish Par Pura Utre. Kamyaabi Ne Qadam Qadam Par Un Ke Qadmo’n Ko Bosa Dene Ka I’zaaz Haasil Kiya Chunanche Qur’ane Hakeem Me Allah Ta’ala Ne Baar Baar Sayyidina Ibrahim ‘Alayh-is-Salam Kee Daastaane Azeemat Ko Shaandaar Alfaaz Me Duhraaya Hai Soorah Baqarah Me Irshaade Khudawandi Hai :
وَإِذِ ابْتَلَى إِبْرَاهِيمَ رَبُّهُ بِكَلِمَاتٍ فَأَتَمَّهُنَّ قَالَ إِنِّي جَاعِلُكَ لِلنَّاسِ إِمَامًا قَالَ وَمِنْ ذُرِّيَّتِي قَالَ لَا يَنَالُ عَهْدِي الظَّالِمِينَ وَإِذْ جَعَلْنَا الْبَيْتَ مَثَابَةً لِلنَّاسِ وَأَمْنًا وَاتَّخِذُوا مِنْ مَقَامِ إِبْرَاهِيمَ مُصَلًّى وَعَهِدْنَا إِلَى إِبْرَاهِيمَ وَإِسْمَاعِيلَ أَنْ طَهِّرَا بَيْتِيَ لِلطَّائِفِينَ وَالْعَاكِفِينَ وَالرُّكَّعِ السُّجُودِ وَإِذْ قَالَ إِبْرَاهِيمُ رَبِّ اجْعَلْ هَذَا بَلَدًا آمِنًا وَارْزُقْ أَهْلَهُ مِنَ الثَّمَرَاتِ مَنْ آمَنَ مِنْهُمْ بِاللَّهِ وَالْيَوْمِ الْآخِرِ قَالَ وَمَنْ كَفَرَ فَأُمَتِّعُهُ قَلِيلًا ثُمَّ أَضْطَرُّهُ إِلَى عَذَابِ النَّارِ وَبِئْسَ الْمَصِيرُ وَإِذْ يَرْفَعُ إِبْرَاهِيمُ الْقَوَاعِدَ مِنَ الْبَيْتِ وَإِسْمَاعِيلُ رَبَّنَا تَقَبَّلْ مِنَّا إِنَّكَ أَنْتَ السَّمِيعُ الْعَلِيمُ رَبَّنَا وَاجْعَلْنَا مُسْلِمَيْنِ لَكَ وَمِنْ ذُرِّيَّتِنَا أُمَّةً مُسْلِمَةً لَكَ وَأَرِنَا مَنَاسِكَنَا وَتُبْ عَلَيْنَا إِنَّكَ أَنْتَ التَّوَّابُ الرَّحِيمُ رَبَّنَا وَابْعَثْ فِيهِمْ رَسُولًا مِنْهُمْ يَتْلُو عَلَيْهِمْ آيَاتِكَ وَيُعَلِّمُهُمُ الْكِتَابَ وَالْحِكْمَةَ وَيُزَكِّيهِمْ إِنَّكَ أَنْتَ الْعَزِيزُ الْحَكِيمُ
–
[البقره، ٢ : ١٢٤_١٢٩]
“Aur (Woh Waqt Yaad Karo) Jab Ibrahim Ko Un Ke Rabb Ne Kai Baato’n Me Aazmaaya To Unhone Woh Poori Kar Dee, (Is Par) Allah Ne Farmaya Mein Tumhein Logo’n Ka Peshwa Banaaunga, Unhone Arz Kiya (Kya) Meri Aulaad Me Se Bhi? Irshaad Huwa (Haa’n Magar) Mera Wa’dah Zaalimo’n Ko Nahin Pahunchta. (Aur Yaad Karo) Jab Hum Ne Is Ghar (Khana-E-Ka’bah) Ko Logo’n Ke Liye Rujoo’(Aur Ijtima’) Ka Markaz Aur Jaae Amaan Bana Diya, Aur (Hukm Diya Ki) Ibrahim Ke Khade Hone Kee Jagah Ko Maqaame Namaz Bana Lo, Aur Hum Ne Ibrahim Aur Isama’il Ko Taakeed Farmaayi Ki Mere Ghar Ko Tawaaf Karne Waalo’n Aur I’tikaf Karne Waalo’n Aur Rukoo’ Wa Sujood Karne Waalo’n Ke Liye Paak (Saaf) Kar Do. Aur Jab Ibrahim Ne Arz Kiya Aye Mere Rabb! Ise Amn Waala Shahr Bana De Aur Is Ke Baashindo’n Ko Tarah Tarah Ke Phalo’n Se Nawaaz (Ya’ni) Un Logo’n Ko Jo Un Me Se Allah Par Aur Yawme Aakhirat Par Imaan Laaye, (Allah Ne) Farmaya Aur Jo Koi Kufr Karega Us Ko Bhi Zindagi Kee Thodi Muddat (Ke Liye) Faa’idah Pahunchaunga Phir Use (Us Kufr Ke Baa’is) Dozakh Kee Azaab Kee Taraf (Jaane Par) Majboor Kar Dunga Aur Woh Bohat Buri Jagah Hai. Aur (Yaad Karo) Jab Ibrahim Aur Isma’il Khana-E-Ka’bah Kee Bunyaadein Utha Rahe They (To Dono’n Du’aa Kar Rahe They) Ki Aye Hamare Rabb! Too Hum Se (Yeh Khidmat) Qubool Farma Le, Be Shak Too Khoob Sun’ne Waala Khoob Jaan’ne Waala Hai. Aye Hamare Rabb Hum Dono’n Ko Apne Hukm Ke Saamne Jhukne Waala Bana Aur Hamaari Aulaad Se Bhi Aik Ummat Ko Khaas Apna Taabe’ Farmaan Bana, Aur Hamein Hamaari Ibaadat (Aur Hajj Ke) Qawaa’id Bata De Aur Hum Par (Rahmat Wa Maghfirat ) Kee Nazar Farma, Be Shak Too Hee Bohat Tauba Qubool Famaane Waala Maherbaan Hai. Aye Hamaare Rabb, Un Me Inhin Me Se (Woh Aakhiri Aur Barguzidah) Rasool Mab’ooth Farma Jo Un Par Teri Aayatein Tilaawat Farmaaye Aur Unhein Kitaab Wa Hikmat Kee Ta’leem De (Kar Daana-E-Raaz Bana De) Aur Un (Ke Nufoos Wa Quloob) Ko Khoob Paak Saaf Kar De, Be Shak Too Hee Ghaalib Hikmat Waala Hai.”
Aazma’ish Ka Marhala Guzar Gaya. Kaamyaabi Ka Noor Sayyidina Hazrat Ibrahim ‘Alayh-is-Salam Kee Muqaddas Peshaani Par Chamakne Laga, Us Waqt Paighaame Haque Aaya Ki Ibrahim! Hum Ne Teri Abdiyyat Ko Parkh Liya, Hum Ne Teri Shaane Khalili Ka Imtihaan Le Liya. Hum Ne Dekh Liya Ki Teri Dil Me Hamaari Mahabbat Ke Kitne Samundar Maujzan Hain, Hum Ne Teri Qurbaani Ka Bhi Mushaahidah Kiya, Qadam Qadam Par Tere Sabr-o-Istiqaamat Ko Bhi Dekha. Hum Ne Tere Tawakkul Aur Kalima-E-Shukr Kee Adaa’igi Ka Husn Bhi Dekha. In Tamam Aazma’ish Par Poora Utarne Ke Baa’d Ibrahim! Ab Aik Khushkhabari Bhi Sun Le, Aik Mujhdah Jaan Fiza Bhi Sama’at Kar, Woh Khushkhabari Kya Hai, Woh Mujhdah Jaan Fiza Kya Hai? Woh Khushkhabari Yeh Hai Ki Ibrahim! Mein Tujhe Nasle Bani Aadam Kee Imamat Ata Karta Hoo’n. Poori Insaaniyat Kee Imamat, Tamaam Ummato’n Kee Imamat, Aqwame Aalam Kee Imamat.
Allah Ta’ala Ne Farmaya : إِنِّي جَاعِلُكَ لِلنَّاسِ إِمَامًا
Sayyidina Ibrahim ‘Alayh-is-Salam Ne Arz Kiya Baari Ta’ala Yeh Imamat Sirf Mere Liye Hai Ya Meri Dhurriyyat Aur Nasl Ke Liye Bhi? Irshad Huwa : “لَا يَنَالُ عَهْدِي الظَّالِمِينَ” Ibrahim! Hum Ne Tujhe Bhi Imaamat Dee Aur Yeh Imaamat Teri Dhurriyyat Aur Nasl Ko Bhi Ata Kee, Magar Shart Yeh Hai Ki Yeh Imaamat Us Ka Muqaddar Banegi Jo Tere Naqshe Qadam Par Chalega Jo Siraate Mustaqeem Ko Apnaayega Woh Dunya Kee Imaamat Paayega Lekin Jo Teri Raah Se Munharif Hoga, Imaamat Ka Bhi Haque Daar Na Hoga.
Phir Ta’meere Ka’ba Ka Hukm Huwa. Azeem Baap Aur Azeem Beta Ta’meere Ka’ba Me Masroof Ho Gaye Aik Aik Patthar Laate Aur Ka’be Kee Diwaarein Ta’meer Karte. Diwaarein Buland Ho Gayin, Aik Patthar Ata Huwa Jis Par Khade Ho Kar Ta’meer Ka Kaam Ho Raha Tha. Joo’n Joo’n Diwaarein Oonchi Ho Rahi Thi Too’n Too’ n Yeh Patthar Bhi Buland Hota Jaata Aur Sayyidina Hazrat Isma’il ‘Alayh-is-Salam Ta’meere Ka’ba Me Apne Waalide Giraami Kee Mu’awanat Farmaate, Patthar Dhoond Dhoond Kar Laate وَإِذْ يَرْفَعُ إِبْرَاهِيمُ الْقَوَاعِدَ مِنَ الْبَيْتِ وَإِسْمَاعِيلُ Jab Sayyidina Ibrahim ‘Alayh-is-Salam Aur Sayyidina Isma’il ‘Alayh-is-Salam Ta’meere Ka’ba Me Masroof Hote To Yeh Kalimaat Un Kee Zubaane Aqdas Par Jaari Hote “رَبَّنَا تَقَبَّلْ مِنَّا إِنَّكَ أَنْتَ السَّمِيعُ الْعَلِيمُ” Mawla! Hum Tere Ghar Kee Ta’meer Kar Rahe Hain Hamaari Yeh Mashaqqat Qubool Farma, Hamaari Is Mazdoori Ko Qubooliyyat Ka Sharaf Ata Kar, رَبَّنَا وَاجْعَلْنَا مُسْلِمَيْنِ لَكَ Ya Baari Ta’ala! Hamaari Jabeenein Tere Huzoor Jhuki Rahein, Hamare Sajdo’n Ko Apni Baargah Me Qubool Farma. وَمِنْ ذُرِّيَّتِنَا أُمَّةً مُسْلِمَةً لَكَ Hamaari Aal Aur Dhurriyyat Me Se Ummate Muslima Paida Kar. Phir Agli Aayat Me Hukm Huwa Tum Ne Aaj Hamaara Ghar Ta’meer Kiya Hai Jo Maangna Hai Maang Lo, Apni Mashaqqat Ka Silah Talab Kar Lo, Baargaahe Khudawandi Me Haath Uth Gaye “رَبَّنَا وَابْعَثْ فِيهِمْ رَسُولًا مِنْهُمْ يَتْلُو عَلَيْهِمْ آيَاتِكَ وَيُعَلِّمُهُمُ الْكِتَابَ وَالْحِكْمَةَ وَيُزَكِّيهِمْ إِنَّكَ أَنْتَ الْعَزِيزُ الْحَكِيمُ” Baari Ta’ala Hum Ne Tere Ghar Kee Diwaarein Buland Kee Hain Hum Ne Apni Dhurriyyat Me Se Ummate Muslima Maang Lee Hai. Aye Rahim-o-Karim, Hazrat Aadam ‘Alayh-is-Salam Se Le Kar Mujh Tak Har Zamaane Me Nabi Aakhir-uz-Zama’n SallAllahu Ta’ala ‘Alayhi Wa Aalihi Wa Sallam Ke Zahoor Ka I’laan Karta Raha Hai, Yeh Silsila-E-Nubuwwat Wa Risaalat Us Muqaddas Hasti Par Ja Kar Khatm Ho Jaayega. Woh Rasoole Mu’azzam SallAllahu Ta’ala ‘Alayhi Wa Aalihi Wa Sallam Jis Kee Khaatir Too Ne Yeh Bazme Kaa’enaat Sajaayi. Kura’-E-Arz Par Hazaarha Ambiya’ Ko Mab’ooth Farmaya Woh Rasoole Aakhir SallAllahu Ta’ala ‘Alayhi Wa Aalihi Wa Sallam Jis Ke Liye Too Ne Millato’n Ko Paida Kiya. Dunya-E-Rang-o-Boo Ko Aaraasta Kiya, Aabshaaro’n Ko Takallum Ka Hunar Bakhsha, Hawaao’n Ko Chalne Kee Khoo Ata Farmaayi. Woh Rasoole Bar Haque Jis Kee Khaatir Too Ne Apna Jalwah Be Naqaab Kiya, Jis Kee Khaatir Too Ne Apni Makhlooqaat Ko Parda-E-Adam Se Wujood Bakhsha, Jis Kee Khaatir Too Ne Insaano’n Ke Liye Hidaayate Aasmaani Ke Silsile Ka Aaghaaz Kiya, Us Rasoole Mu’azzam SallAllahu Ta’ala ‘Alayhi Wa Aalihi Wa Sallam Aur Us Nabi Aakhir-uz-Zama’n SallAllahu Ta’ala ‘Alayhi Wa Aalihi Wa Sallam Ka Is Kaa’inaate Rang-o-Boo Me Zahoor Hone Waala Hai, Baari Ta’ala Ne Farmaya Haa’n Ibrahim Hamaara Woh Mahboob Rasool Aane Waala Hai, Bata Ibrahim! Too Kya Chaahta Hai. Farmaya Rabbe Kaa’enaat! Agar Too Ta’meere Ka’ba Kee Hamein Mazdoori Dena Chaahta Hai, Agar Ta’meele Hukm Me Hamein Too Kuchh Ata Karna Chaahta Hai To Aye Parwardigaar Apne Aakhiri Rasool SallAllahu Ta’ala ‘Alayhi Wa Aalihi Wa Sallam Ko Meri Aulaad Me Mab’ooth Hone Ka Sharaf Ata Farma. Meri Dhurriyyat Ko Noore Muhammadi Ke Jalwo’n Se Hamkinaar Kar De, Meri Aulaad Ko Huzoor SallAllahu Ta’ala ‘Alayhi Wa Aalihi Wa Sallam Kee Qadam Bosi Kee Sa’aadat Bakhsh De, Mawla! Mujhe Apna Mahboob SallAllahu Ta’ala ‘Alayhi Wa Aalihi Wa Sallam De De. Irshaad Huwa, Ibrahim Too Ne Teen Chizein
(01) Nubuwwat Wa Risaalat
(02) Khatme Nubuwwat Aur
(03) Ummate Muslima Apni Dhurriyyat Ke Liye Maang Lee Hain, Ibrahim Too Ne Meri Mahabbat Aur Raza Ke Liye Mera Ghar Ta’meer Kiya Hai Aur Du’aa Bhi Woh Maangi Hai Jise Mein Rad Nahin Kar Sakta Is Liye Ibrahim! Jaa Hum Ne Tujhe Teri Mazdoori Ke Sile Me Yeh Teeno’n Chizein Ata Kar Dee.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/10 Ta 16.]
Patthar Kee Azmat
Riwayat Me Hai Ki Sayyidina Ibrahim ‘Alayh-is-Salam Ne Jis Patthar Par Khade Ho Kar Apni Nasl Me Taajdaare Kaa’enaat SallAllahu Ta’ala ‘Alayhi Wa Aalihi Wa Sallam Kee Wialdate Ba-Sa’adat Kee Du’aa Maangi Thi Yeh Wahi Patthar Tha Jis Par Khade Ho Kar Ta’meere Ka’ba Ka Kaam Sar Anjaam Diya Tha. Us Muqaddas Patthar Kee Azmat Par Jaan-o-Dil Nisaar Jis Par Khade Ho Kar Apni Aulaad Me Nabi Aakhir-uz-Zama’n SallAllahu Ta’ala ‘Alayhi Wa Aalihi Wa Sallam Ke Mab’ooth Hone Kee Du’aa Maangi Jaa Rahi Hai. Rabb Ne Kaha Aye Be Jaan Patthar Tujhe Khabar Hai Tujh Par Khade Ho Kar Ibrahim ‘Alayh-is-Salam Ne Hum Se Kyaa Maang Liya Hai Is Lamhe Ko Apne Seene Me Mehfooz Kar Le Yeh Lamha Qubooliyyat Ka Lamha Hai. Is Lamhe Hamaare Mahboob SallAllahu Ta’ala ‘Alayhi Wa Aalihi Wa Sallam Kee Aamad Ka Zikr Ho Raha Hai. Is Waqt Rasoole Kaa’enaat SallAllahu Ta’ala ‘Alayhi Wa Aalihi Wa Sallam Ke Tazkaare Jalila Se Roohe Ka’enaat Mu’attar Hai, Qudrate Khudawandi Se Patthar Mom Ho Gaya Aur Hazrat Ibrahim ‘Alayh-is-Salam Ke Qadmo’n Ke Nishaan Qiyaamat Tak Ke Liye Us Me Paiwast Ho Gaye.
Us Patthar Ka I’zaaz Yeh Tha Ki Us Par Khade Ho Kar Allah Ke Aik Jalil-ul-Qadr Paighmabar Ne Us Ke Mahboob Ka Tazkirah Chhed Diya Tha. Allah Ke Nabi Kee Nisbat Se Woh Patthar Bhi Muhtaram Ho Gaya. Be Shumaar Pattharo’n Par Hazrat Ibrahim ‘Alayh-is-Salam Ke Qadmo’n Ke Nishaan Lage Honge, An Ginat Pattharo’n Ne Kafe Paae Ibrahim ‘Alayh-is-Salam Ko Bosa Dene Ka I’zaaz Haasil Kiya Hoga Lekin Imtidaad Zamane Ke Saath Woh Nuqoosh Mit’te Gaye, Maah-o-Saal Kee Gird Unhein Apne Daaman Me Chhupaati Rahi Magar Jis Patthar Par Khade Ho Kar Sayyidina Hazrat Ibrahim ‘Alayh-is-Salam Ne Tuloo’e Sub’h Milaad Kee Du’aa Maangi Thi, Allah Se Us Ke Mahboob SallAllahu Ta’ala ‘Alayhi Wa Aalihi Wa Sallam Ko Maanga Tha. Kawnayn Kee Daulat Ko Apne Daaman Me Simetne Kee Aarzu Kee Thi Woh Patthar Harame Aqdas Me Maqame Ibrahim Par Qiyamat Tak Ke Liye Mahfooz Kar Diya Gaya.
Hum Ne Ibrahim ‘Alayh-is-Salam Kee Du’aa Qubooliyyat Kee Khil’ate Faakhirah Ata Kee, Aur Jo Patthar Ibrahim ‘Alayh-is-Salam Kee Du’aa Ka Nishaan Tha Use Sahne Ka’ba Me Qiyamat Tak Ke Liye Mahfooz Kar Diya Aur Baaqi Tamam Patthar Hadoode Ka’ba Se Hata Diye Kyun Ki Ka’ba Meri Sajdahgah Hai. Yeh Meri Tawheed Ka Markaz Hai, Is Ke Samt Munh Kar Ke Ibaadat Kee Jaati Hai Yeh Mehware Haque Hai. Khalqat Ka Mamba’-o-Markaz Hai, Mashriq Se Maghrib Tak Log Mere Ka’be Me Hajj Wa Ibaadat Ke Liye Aaeinge, Haram Kee Zameen Ko Apne Sajdo’n Se Basaaeinge. Yeh Fiza’ Un Ke Naala-E-Neem Shabi Se Ma’moor Hogi. Mein Unhein Yeh Patthar Dikhaunga Jo Du’a-E-Khalil ‘Alayh-is-Salam Kee Yaadgaar Hai Jis Par Khade Ho Kar Us Ne Nabi Aakhir-uz-Zama’n SallAllahu Ta’ala ‘Alayhi Wa Aalihi Wa Sallam Ke Apni Nasl Me Mab’ooth Hone Kee Du’aa Maangi Thi. Aye Harame Ka’ba Tak Aane Waalo! Aye Mere Ghar Kee Ziyaarat Kee Sa’adat Haasil Karne Waalo! Yeh Sadqah Hai Is Patthar Ka Jin Par Ibrahim ‘Alayh-is-Salam Ke Qadmo’n Ke Nishaan Hain Kyun Ki Yeh Du’a-E-Mustafa Ka Naqsh Hai.
Hukm Huwa وَاتَّخِذُوا مِنْ مَقَامِ إِبْرَاهِيمَ مُصَلًّى Sawaal Huwa Ki Baari Ta’ala Us Patthar Ko Kaise Mahfooz Karein. Farmaya Is Patthar Ko Ka’be Ke Saamne Gaad Do, Us Waqt Tak Mere Ghar Ka Tawaaf Mukammal Nahin Hoga Jab Tak Tawaaf Karne Waale Us Patthar Ke Saamne Mere Huzoor Sajdah Rez Na Honge Taa Ki Dunya Ko Ma’loom Ho Jaaye Ki Yeh Tamaam In’aamaat Wa Ikraaamaat Sadaqa Hai Is Patthar Ka.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/17_18.]
Du’aa-E-Khalil Kee Qubooliyyat
Du’aa-E-Khalil Ko Khil’ate Qubooliyyat Ata Huwi, Kawnayn Kee Daulat Sayyidina Ibrahim ‘Alayh-is-Salam Ke Daamane Talab Me Daal Dee Gayi Yeh Du’aa Pehle Paare Ke Aakhir Me Aayi Hai Dusre Paare Ke Shuroo’ Me Is Ka Jawaab Bhi Aa Gaya. Irshade Baari Ta’ala Hai :
كَمَا أَرْسَلْنَا فِيكُمْ رَسُولًا مِنْكُمْ يَتْلُو عَلَيْكُمْ آيَاتِنَا وَيُزَكِّيكُمْ وَيُعَلِّمُكُمُ الْكِتَابَ وَالْحِكْمَةَ وَيُعَلِّمُكُمْ مَا لَمْ تَكُونُوا تَعْلَمُونَ فَاذْكُرُونِي أَذْكُرْكُمْ وَاشْكُرُوا لِي وَلَا تَكْفُرُونِ يَا أَيُّهَا الَّذِينَ آمَنُوا اسْتَعِينُوا بِالصَّبْرِ وَالصَّلَاةِ إِنَّ اللَّهَ مَعَ الصَّابِرِينَ وَلَا تَقُولُوا لِمَنْ يُقْتَلُ فِي سَبِيلِ اللَّهِ أَمْوَاتٌ بَلْ أَحْيَاءٌ وَلَكِنْ لَا تَشْعُرُونَ وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ
–
[البقره، ٢ : ١٥١_١٥٧]
“Isi Tarah Hum Ne Tumhare Andar Tumhin Me Se (Apna) Rasool Bheja Jo Tum Par Hamaari Aayatein Tilaawat Farmata Hai Aur Tumhein (Nafsan Wa Qalban) Paak Saaf Karta Hai Aur Tumhein Kitab Kee Ta’leem Deta Hai Aur Hikmat Wa Daana’i Sikhaata Hai Aur Tumhein Woh (Asraare Ma’rifat Wa Haqiqat) Sikhaata Hai Jo Tum Na Jaante They. So Tum Mujhe Yaad Karo Mein Tumhein Yaad Rakhunga Aure Mera Shukr Ada Kiya Karo Aur Meri Naa Shukri Na Kiya Karo. Aye Imaan Waalo’n Sabr Aur Namaz Ke Zari’e (Mujh Se) Madad Chaaha Karo, Yaqinan Allah Sabr Karne Waalo’n Ke Saath (Hota) Hai. Aur Jo Log Allah Kee Raah Me Maare Jaaein Unhein Mat Kaha Karo Ki Yeh Murdah Hain, (Woh Murdah Nahin) Balki Zinda Hain Lekin Tumhein (Un Kee Zindagi Ka) Shu’oor Nahin. Aur Hum Tumhein Zaroor Bil-Zarool Aazmaaenge Kuchh Khauf Aur Bhook Se Aur Kuchh Maalo’n Aur Jaano’n Aur Phalo’n Ke Nuqshaan Se, Aur (Aye Habib) Aap (Un) Sabr Karne Waalo’n Ko Khushkhabari Suna De’n. Jin Par Koi Musibat Padti Hain To Kehte Hain Be Shak Hum Bhi Allah Hee Ka (Maal) Hain Aur Hum Bhi Us Kee Taraf Palat Kar Jaane Waale Hain. Yahi Woh Log Hain Jin Par Un Kee Rabb Kee Taraf Se Pey Dar Pey Nawaazishein Hain Aur Rahmat Hai, Aur Yahi Log Hidayat Yaafta Hain.”
Hazrat Ibrahim Ne Allah Se Qaumo’n Kee Imaamat Ka Sawaal Kiya, Imaamat Kee Do Shaklein Kar Dee Gayi. Kyun Ki Huzoor SallAllahu Ta’ala ‘Alayhi Wa Aalihi Wa Sallam Ke Saath Nubuwwat Ko Khatm Hona Tha Aur Taajdaare Kaa’enaat Ke Sare Aqdas Par Khatme Nubuwwat Ka Taaj Sajaaya Jana Maqsood Tha Is Liye Imaamat Ke Do Juzw Kar Diye Gaye. Aik Imaamat Se Nubuwwat Aur Dusri Imaamat Se Wilaayat. Hikmat Yeh Thi Ki Jab Huzoor SallAllahu Ta’ala ‘Alayhi Wa Aalihi Wa Sallam Par Nubuwwat Ka Silsila Khatm Ho Jaata To Phir Faize Nubuwwat Ba-Shakl Imaamat Mere Nabi SallAllahu Ta’ala ‘Alayhi Wa Aalihi Wa Sallam Kee Ummat Ko Milna Shuroo’ Ho Jaaye Yun Soorah Baqarah Aayat 151 Se 157 Tak Du’aa-E-Ibrahim Ka Jawab Hai.
Du’aa To Faqat Yeh Thi Ki Mawla! Apna Woh Paighambar, Rasoole Aakhir-uz-Zama’n SallAllahu Ta’ala ‘Alayhi Wa Aalihi Wa Sallam Meri Aal Me Meri Nasl Me Mab’ooth Farma. Allah Rabb-ul-Izzat Ne Jawaab Me Farmaya Ki Do Chizein Ata Karta Hoo’n Aik Nabi Aakhir-uz-Zama’n SallAllahu Ta’ala ‘Alayhi Wa Aalihi Wa Sallam Kee Be’that Aur Phir Shahadat. Farmaya “كَمَا أَرْسَلْنَا فِيكُمْ رَسُولًا مِنْكُمْ” Aage Is Se Muta’alliq Farmaya “يَا أَيُّهَا الَّذِينَ آمَنُوا اسْتَعِينُوا بِالصَّبْرِ وَالصَّلَاةِ إِنَّ اللَّهَ مَعَ الصَّابِرِينَ” Aye Waalo! Sabr Aur Namaaz Ke Zari’e Madad Maangna “وَلَا تَقُولُوا لِمَنْ يُقْتَلُ فِي سَبِيلِ اللَّهِ أَمْوَاتٌ” Jo Allah Kee Raah Me Shaheed Ho’n Unhein Murdah Na Kaho “بَلْ أَحْيَاءٌ وَلَكِنْ لَا تَشْعُرُونَ” Woh Zinda Hai Lekin Un Kee Zindagi Ka Shu’oor Nahin”
Be’thate Muhammadi Aur Shahaadat Ka Baahmi Rabt Mazkoorah Aayaat Me Bade Aham Nikaat Kee Taraf Rehnumaayi Karta Hai. Du’aa-E-Ibrahim ‘Alayh-is-Salam Ke Jawab Me Aik Taraf Huzoor SallAllahu Ta’ala ‘Alayhi Wa Aalihi Wa Sallam Kee Khatme Nubuwwat Bayaan Kee Jaa Rahi Hai To Dusri Taraf Shahaadat Ka Zikr Hai. Is Wijdaani Aur Irfaani Nukte Kee Wazaahat To Aa’indah Safhaat Me Kee Jaayegi, Taa Hum Yaha’n Sirf Itna Bata Dena Kaafi Hai Ki Huzoor SallAllahu Ta’ala ‘Alayhi Wa Aalihi Wa Sallam Kee Shaan Khatme Nubuwwat Ke Saath Aap Ko Martaba-E-Shahaadat Par Bhi Faa’iz Karna Maqsood Tha Jis Ka Mazhar Nawasa-E-Rasool Sayyidina Imam Husayn Qaraar Paaye. Yahi Wajah Hai Ki Shahaadate Imame Husayn RadiyAllahu Ta’ala ‘Anhu Ko Hee Dhib’he ‘Azeem Samajhte Hain.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/18 Ta 20.]
Dhib’he ‘Azeem Ka Mafhoom
Hazrat Sayyidina Ibrahim ‘Alayh-is-Salam Kee Hayate Muqaddasa Me Hazrat Isma’il ‘Alayh-is-Salam Kee Qurbaani Ka Waaqia Aik Aisa Waaqia Hai Jis Kee Wajah Se Unhein Baargaahe Khudawandi Se Sharfe Imaamat Bhi Ata Kiya Gaya. Hazrat Ibrahim ‘Alayh-is-Salam Allah Kee Raah Me Apne Bete Ko Qurbaan Karne Ke Liye Khud Bhi Tayyar Ho Gaye They Aur Sa’adat Mand Bete Ne Bhi Hukme Khudawandi Ke Aage Sar Taslime Kham Kar Diya Tha. Baap Bete Ne Taslime Jaa’n Ka Yeh Izhaar Zubaani Kalaami Nahin Kiya Balki Amalan Hukm Kee Baja Aawri Ke Liye Bete Kee Qurbaani Kee Gharaz Se Hazrat Ibrahim ‘Alayh-is-Salam Ne Apne Haath Me Chhuri Bhi Le Lee Thi. Is Ka Tafseeli Zikr Guzishta Safhaat Me Ho Chuka Hai, Hazrat Isma’il ‘Alayh-is-Salam Kee Zindagi Mahfooz Rahi Ki Un Kee Nasle Paak Se Nabi Aakhir-uz-Zama’n SallAllahu Ta’ala ‘Alayhi Wa Aalihi Wa Sallam Kee Wiladate Baa Sa’adat Hona Thi, Khuda-E-Burzurg-o-Bartar Ne وَفَدَيْنَاهُ بِذِبْحٍ عَظِيمٍ Keh Kar Isama’il Ke Dhib’h Ko Dhib’he ‘Azeem Ka Fidya Qaraar Diya. Farzande Paighambar Kee Qurbaani Hona Be’thate Mustafa SallAllahu Ta’ala ‘Alayhi Wa Aalihi Wa Sallam Ke Khaatir Mauqoof Huwi. Hikmate Khudawandi Yeh Thi Ki Huzoor SallAllahu Ta’ala ‘Alayhi Wa Aalihi Wa Sallam Ke Baa’d Chunki Koi Nabi Nahin Aayega Is Liye Shahaadat Ke Liye Us Ke Lakhte Jigar Ka Intekhaab Amal Me Aayega Aur Dhib’he Isma’il ‘Alayh-is-Salam Ko Mustafa SallAllahu Ta’ala ‘Alayhi Wa Aalihi Wa Sallam Ka Lakhte Jigar Sayyidina Imam Husayn RadiyAllahu Ta’ala ‘Anhu Se Dhib’he ‘Azeem Bana Denge.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/20_21.]
Dhib’he Isma’il ‘Alayh-is-Salam Aur Shahadate Imam Husayn Ka Baahami Ta’alluq
Agar Shahaadate Husayn RadiyAllahu Ta’ala ‘Anhu Ka Ta’alluq Dhib’he Isma’il Se Joda Na Jaaye To Baat Mukammal Nahin Hoti, Shahaadat Ka Amal Adhoora Rah Jaata Hai Aur Baat Mukammal Taur Par Samajh Me Nahin Aati. Hazrat Isma’il Kee Qurbaani Ko Sirf “Dhib’h” Ke Lafz Se Zikr Kiya Gaya. Un Kee Jagah Maindhe Kee Qurbaani Huwi To Use “Dhib’he ‘Azeem” Kaha Gaya. Ab Yeh Baat Samajh Me Nahin Aati Ki Maindhe Kee Qurbaani Ko Azeem Aur Paighambar Ke Bete Kee Qurbaani Ko Mahaz Dhib’h Kaha Jaae. Ab Sawaal Paida Hota Hai Ki Is Dhib’he ‘Azeem Se Muraad Kounsi Qurbaani Hai? Dhib’he ‘Azeem Yaqinan Wahi Qurbaani Hogi Jo Dhib’he Isma’il Se Badi Qurbaani Kee Soorat Me Ada Hogi.
Isma’il ‘Alayh-is-Salam Hazrat Sayyidina Ibrahim ‘Alayh-is-Salam Ke Farzand They Jab Ki Sayyidina Hasan RadiyAllahu Ta’ala ‘Anhu Huzoor Sarware Kawnayn SallAllahu Ta’ala ‘Alayhi Wa Aalihi Wa Sallam Ke Lakhte Jigar Aur Noore Nazar They. Qat’a Nazar Is Ke Liye Nabi Aur Sahaabi Ke Martabe Me Bohat Farq Hota Hai Lekin Nisbate Ibrahimi Se Nisbate Mustafawi Yaqinan Arf’a Wa A’la Hai Ilaawah Azi’n Sayyidina Husayn RadiyAllahu Ta’ala ‘Anhu Ko Sibte Paighambar Aur Pisare Batool-o-Haydar Hone Ke Saath Saath Nisbate Ibrahimi Bhi Haasil Hai. Neez Shahaadate Imame Husayn Chunki Sirate Rasool SallAllahu Ta’ala ‘Alayhi Wa Aalihi Wa Sallam Ka Hee Baab Hai Is Liye Kaa’enaat Kee Isi Munfarid Aur Yakta Qurbaani Ko Hee Dhib’he ‘Azeem Hone Ka Sharaf Haasil Hai. Lihaaza Badi Sadaaqat Ke Saath Yeh Baat Paaya-E-Suboot Ko Pahunch Gayi Ki Hazrat Isma’il ‘Alayh-is-Salam Kee Qurbaani Ke Zimn Me Jis Dhib’he ‘Azeem Ka Fidya Diya Gaya Woh Aik Maindha Na Tha Balki Lakhte Jigare Musatafa Husayn Ibn Ali RadiyAllahu Ta’ala ‘Anhuma Kee Qurbaani Thi. Hakim-ul-Ummat Allama Iqbal Ne Is Haqiqat Ko Badi Khoobsoorat She’ri Qaalib Me Dhaala Hai :
Allah Allah Baa-E-Bismi Allah Pidar
Ma’na-E-Dhib’he ‘Azeem Aamad Pisar
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/21_22.]
Dhib’he ‘Azeem Ke Liye Nawasa-E-Rasool SallAllahu Ta’ala ‘Alayhi Wa Aalihi Wa Sallam Ka Intekhaab Kyun?
Ab Sawaal Paida Hota Hai Ki Dhib’he ‘Azeem Ka Misdaaq Agar Imam Husayn Hai To Aap Ka Ta’alluq Huzoor Nabiyye Akram SallAllahu Ta’ala ‘Alayhi Wa Aalihi Wa Sallam Se Woh Nahin Jo Sayyidina Isma’il ‘Alayh-is-Salam Ko Sayyidina Ibrahim ‘Alayh-is-Salam Ke Saath Tha. Ya’ni Woh Baap Beta They Aur Yaha’n Beta Nahin Balki Nawaasa-E-Rasool Ka Intekhaab Ho Raha Hai. Chaahiye To Yeh Tha Ki Dhib’he ‘Azeem Ka I’zaaz Huzoor SallAllahu Ta’ala ‘Alayhi Wa Aalihi Wa Sallam Ke Haqiqi Ke Bete Ke Hisse Me Aata. Is Mumkina Sawaal Ke Kai Jawaabaat Ho Sakte Hain Sab Se Pehla Jawaab To Yeh Hai Ki Huzoor SallAllahu Ta’ala ‘Alayhi Wa Aalihi Wa Sallam Koi Beta Jawaani Ya Bulooghat Kee Umr Ko Pahuncha Hi Nahin Aisa Kyun Huwa? Yeh Allah Ta’ala Kee Hikmat Thi Jis Kee Taraf Qur’an Ne Yoo’n Rehnumayi Farmaayi :
مَا كَانَ مُحَمَّدٌ أَبَا أَحَدٍ مِنْ رِجَالِكُمْ وَلَكِنْ رَسُولَ اللَّهِ وَخَاتَمَ النَّبِيِّينَ وَكَانَ اللَّهُ بِكُلِّ شَيْءٍ عَلِيمًا
–
[ألأحزاب، ٣٣ :٤٠]
“Muhammad (SallAllahu Ta’ala ‘Alayhi Wa Aalihi Wa Sallam) Tumhaare Mardo’n Me Se Kisi Ke Baap Nahin Hai Balki Allah Ke Rasool Aur Khaatama-‘n-Nabiyyin Hain (Ya’ni Silsila-E-Nubuwwat Ko Khatm Karne Waale) Aur Allah Ta’ala Sab Chizo’n Ko Jaan’ne Waala Hai (Use Ilm Hai Ki Khatme Risaalat Aur Khatme Nubuwwat Ka Waqt Aa Gaya Hai.)”
Ya’ni Ab Wah’iy-E-Ilaahi Ka Darwazah Band Hota Hai, Huzoor Tajdare Ka’enat SallAllahu Ta’ala ‘Alayhi Wa Aalihi Wa Sallam Ke Baa’d Ab Qiyamat Tak Koi Nabi Nahin. Qur’an Aasmaani Hidaayat Par Mushtamil Aakhiri Sahifa Hai Jo Qiyaamat Tak Allah Ke Bando’n Kee Rehnumaayi Ke Liye Kaafi Hai.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/22 Ta 23.]
Agar Huzoor SallAllahu Ta’ala ‘Alayhi Wa Aalihi Wa Sallam Ka Koi Jawaan Beta Hota?
Aayate Mazkoorah Me Allah Ta’ala Ne Farmaya Muhammad Tumhaare Mardo’n Me Se Kisi Ke Baap Nahin, Yeh Nukta Qaabile Ghaur Hai Woh Allah Ke Rasool Hain Aur Silsila-E-Ambiya’ Kee Aakhiri Kadi Hain. Allah Rabb-ul-Izzat Ne Is Baat Par Kyoo’n Zor Diya Ki Mera Rasol Tum Me Se Kisi Mard Ka Baap Nahin Ya’ni Woh Kisi Jawaan Bete Ke Baap Nahin? Sawaal Paida Hota Hai Ki Kya Kisi Jawaan Bete Ka Baap Ya Mukhaatabin Me Se Kisi Mard Ka Baap Hone Waala Shakhs Allah Ka Rasool Nahin Ho Sakta Masalan :
Hazrat Ibrahim ‘Alayh-is-Salam Allah Ke Rasool They Aur Jawaan Beto’n Ke Baap Bhi Hain. Hazrat Is’haq Allah Ke Jalil-ul-Qadr Paighambar Hain Aur Ya’qoob ‘Alayh-is-Salam Ke Waalide Giraami Bhi Hain. Is Tarah Hazrat Ya’qoob ‘Alayh-is-Salam Khud Nabi Hain Aur Hazrat Yoosuf ‘Alayh-is-Salam Ke Waalid Bhi Hain. Hazrat Dawud ‘Alayh-is-Salam Allah Ke Paighambar Aur Hazrat Sulayman ‘Alayh-is-Salam Aap Ke Farzande Arjmand.
Bani Isra’il Me Nasl Dar Nasl Nubuwwat Ka Silsila Jaari Raha, Paighambaro’n Kee Aulaad (Bete) Bhi Paighambar Huwi. To Phir Allah Rabb-ul-Izzat Ne Kyun Farmaya Ki Mera Nabi SallAllahu Ta’ala ‘Alayhi Wa Aalihi Wa Sallam Tum Mardo’n Me Se Kisi Ka Baap Nahin, Ya Kisi Jawaan Mard Ke Baap Nahin. Aakhir Is Me Kya Hikmat Kaarfarma Hai? Rasool Hona Kisi Mard Ke Baap Hone Kee Raah Me Rukaawat Nahin Banta.
Is Sawaal Ka Jawaab Yeh Hai Ki Khuda-E-‘Aleem-o-Khabeer Ne Is Nukte Par Is Liye Zor Diya Ki Huzoor SallAllahu Ta’ala ‘Alayhi Wa Aalihi Wa Sallam Khaatam-un-Nabiyyin Hain. Woh Mere Aakhiri Nabi Hain Magar Muhammad SallAllahu Ta’ala ‘Alayhi Wa Aalihi Wa Sallam Kisi Mard Ke Baap Hote Ya’ni Huzoor SallAllahu Ta’ala ‘Alayhi Wa Aalihi Wa Sallam Ka Koi Beta Hota Aur Woh Jawaan Hota To Do Sooratein Mumkin Hotin :
- Aik Yeh Ki Woh Beta Bhi Allah Ka Rasool Ya Nabi Hota Jaisa Ki Saabiqa Ambiya’ Ke Baab Me Hum Ne Dekha Ki Agar Baap Nabi Hai To Bete Ko Bhi Khuda Ne Nubuwwat Ata Kee.
- Dusri Soorat Yeh Thi Ki Beta Nabi Na Hota Ya’ni Do Hee Imkaanaat Mumkin Thet Pehli Soorat Me Huzoor Khaatam-un-Nabiyyin SallAllahu Ta’ala ‘Alayhi Wa Aalihi Wa Sallam Na Rehte, Beta Bhi Jawaan Ho Kar Nabi Banta To Silsila-E-Khatme Nubuwwat Mustafa SallAllahu Ta’ala ‘Alayhi Wa Aalihi Wa Sallam Par Khatm Na Hota Aur Yeh Baat Khuda Ke Faisle Ke Khilaaf Hoti Is Liye To Huzoor SallAllahu Ta’ala ‘Alayhi Wa Aalihi Wa Sallam Ko Khatme Nubuwwat Kee Sifat Se Sarfaraaz Kiya Hai.
Dusri Soorat Me Agar Huzoor SallAllahu Ta’ala ‘Alayhi Wa Aalihi Wa Sallam Ka Koi Beta Jawaan Hota Aur Nabi Na Banta To Dusre Nabiyo’n Kee Ummatein Ta’na Dete’n Ki Hamaare Nabi Ka To Beta Bhi Nabi Tha, Hamaare Paighambar Ka To Pauta Bhi Paighambari Sifate Faakhirah Se Nawaaza Gaya, Hamaare Paighambar SallAllahu Ta’ala ‘Alayhi Wa Aalihi Wa Sallam Kee Poori Nasl Me Nubuwwat Thi. Koi I’tiraaz Kar Sakta Tha Ki Huzoor SallAllahu Ta’ala ‘Alayhi Wa Aalihi Wa Sallam Ke Pairokaaro’n! Tumhaare Paighambar Ka To Beta Bhi Huwa Lekin Use Nubuwwat Se Sarfaraaz Na Kiya Gaya. Is I’tiraaz Me Ba-Zaahir Dusre Ambiya’ Ke Muqabale Me Shaane Risaalat Ma’ab SallAllahu Ta’ala ‘Alayhi Wa Aalihi Wa Sallam Me Aik Tarah Kee Kami Aa Jaati Aur Use Jihat Se Digar Ambiya’ Fazilat Le Jaate Lekin Allah Rabb-ul-Izzat Ko Yeh Baat Manzoor Na Thi Jis Tarah Use Yeh Manzoor Na Tha Ki Aaminah Ke Laal Ke Sare Aqdas Par Khatme Nubuwwat Ka Taaj Na Sajaaya Jaaye Usi Tarah Use Yeh Bhi Gawaara Na Tha Ki Huzoor SallAllahu Ta’ala ‘Alayhi Wa Aalihi Wa Sallam Ka Koi Jawaan Beta Ho Aur Nubuwwat Kee Sa’adat Se Mahroom Rahe, Zaahiran Hee Sahi Khuda Ko Kisi Hawaale Se Bhi Yeh Baat Manzoor Na Thi Ki Koi Paighambar Fazilat Me Mustafa SallAllahu Ta’ala ‘Alayhi Wa Aalihi Wa Sallam Se Badh Jaaye Is Kee Misaal Yoo’n Hai Ki Qur’an Majeed Furqaane Hameed Me Allah Rabb-ul-Izzat Ne Farmaya Ki Aye Mahboob Farma De’n Un Kaafiro’n Aur Mushriko’n Ko Jo Kabhi Isa Ko Mera Beta Samajhte Hain Aur Kuchh Uzayr Ko Mera Farzand Qaraar Dete Hain :
قُلْ إِنْ كَانَ لِلرَّحْمَنِ وَلَدٌ فَأَنَا أَوَّلُ الْعَابِدِينَ
–
[الزخرف، ٤٣ : ٨١]
“Aap (Un Ahmaqo’n Se) Kahiye Ki Agar (Khuda-E-)Rahmaan Ka Beta Hota To Mein Sab Se Pehle Us Kee Ibaadat Karne Waala Hoo’n”
Mudda’a Yeh Hai Ki Agar Koi Allah Ka Beta Hota To Mein Us Kee Ibaadat Na Karta? Allah Kee Shaan Ka Taqaaza Hota Ki Us Ka Beta Bhi Uloohiyat Kaa Haamil Hota. Agar Rabb Ka Beta Ho Kar Rabb Na Banta To Us Kee Fazilat Me Kami Aa Jaati. Log Ta’na Dete Ki Khuda Ka Beta Ho Kar Khuda Na Ban Saka. Isi Tarah Agar (Nauzubillah) Koi Khuda Ka Beta Hota Aur Woh Bhi Uloohiyat Ke Mansab Me Allah Ta’ala Ka Shareek Hota To Zaahir Hai Baap Ke Saath Khuda’i Me Shiraakat Daar Hota, Aur Yoo’n Tasawwure Tawheed Khatam Ho Jaata. Is Liye Farmaya :
قُلْ هُوَ اللَّهُ أَحَدٌ اللَّهُ الصَّمَدُ لَمْ يَلِدْ وَلَمْ يُولَدْ وَلَمْ يَكُنْ لَهُ كُفُوًا أَحَدٌ
–
[الأخلاص، ١١٢]
“(Aye Nabiyye Mukarram) Aap Farma Dijiye Woh Allah Hai Jo Kehta Hai. Allah Sab Se Be Niyaaz Hai, Sab Kee Panaah Aur Sab Faa’iq Hai. Na Us Se Se Koi Paida Huwa Hai Aur Na Hee Woh Paida Kiya Gaya Hai Aur Na Hee Us Ka Koi Hamsar Hai.”
Allah Jalla Shaanuhu Ne Is Mukhtasar Soora-E-Paak Me Aqida-E-Tawheed Kee Tamaam Juz’iyyaat Aur Shirk Kee Mumkina Shaklo’n Ko Baatil Qaraar Diya, Aqa’ide Islamiya Ba Soorat Khulaasa Apne I’jaaz-o-Ikhtisaar Ke Baa Wajood Itna Jaandaar Hai Ki Huzoor SallAllahu Ta’ala ‘Alayhi Wa Aalihi Wa Sallam Ne Soorah Ikhlaas Ko Qur’an Ka Teesra Juzw Qaraar Dete Huwe Farmaya Jis Ne Teene Martaba Us Soorat Ko Padha Goya Us Ne Poora Qur’an Padh Liya. (Muttafaque Alayh)
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/23 Ta 26.]
Huzoor Ke Saahibzaadga’n Kee Bachpan Me Wafaat Kee Hikmat
Jis Tarah Is Soora-E-Mubaraka Me Bayan Kiye Jaane Waale Mazaameen Ka Khulaasa Yahi Hai Ki Allah Ta’ala Waahdahu La Shareek Hai, Woh Be Niyaaz Hai, Us Ka Koi Beta Nahin, Agar Us Ka Koi Beta Hota To Woh Bhi Khuda Hota Aur Yahi Yeh Shirk Hota Aur Us Kee Wahdaaniyat Par Harf Aata. Tawheed, Tawheed Na Rehti. Jis Tarah Tawheede Uloohiyat Ne Rabb Ko Bete Se Paak Rakkha Usi Tarah Shaane Khatme Nubuwwat Ne Huzoor SallAllahu Ta’ala ‘Alayhi Wa Aalihi Wa Sallam Ko Jawaan Bete Se Alahidah Rakkha. Agar Huzoor SallAllahu Ta’ala ‘Alayhi Wa Aalihi Wa Sallam Ka Koi Jawaan Beta Hota To Woh Bhi Paighambar Hota Aur Agar Paighmabar Na Hota To (Nauzubillah) Shaane Risaalat Me Kami Aati Aur Paighambar Hota To Khatme Nubuwwat Kee Shan Khatm Ho Jaati. Huzoor Nabiyye Akram SallAllahu Ta’ala ‘Alayhi Wa Aalihi Wa Sallam Khaatam-un-Nabiyyin Na Rehete, Hadithe Paak Me Aata Hai, Hazrat Ibrahim RadiyAllahu Ta’ala ‘Anhu Jo Huzoor Nabiyye Akram SallAllahu Ta’ala ‘Alayhi Wa Aalihi Wa Sallam Ke Saahibzaade They Bachpan Hee Me Wafaat Paa Gaye Lekin Un Kee Umr Baaqi Saahibzaadagaan Hazaraat Se Nisbatan Ziyaada Thi.
- Un Kee Wafaat Par Aaqa-E-Do-Jaha’n SallAllahu Ta’ala ‘Alayhi Wa Aalihi Wa Sallam Ne Farmaya :
عن ابن عباس قال لمامات إبراهيم ابن رسول الله صلى الله تعالى عليه وآله وسلم وقال ان له مرضعا فى الجنة ولو عاش لكان صديقا نبيا
“Hazrat Abd Allah Bin Abbas RadiyAllahu Ta’ala ‘Anhuma Se Marwi Hai Ki Jab Ibrahim Bin RasoolAllah SallAllahu Ta’ala ‘Alayhi Wa Aalihi Wa Sallam Wafaat Paa Gaye To Aap SallAllahu Ta’ala ‘Alayhi Wa Aalihi Wa Sallam Ne Un Ka Janaazah Padhaaya Aur Farmaya In Ke Liye Jannat Me Doodh Pilaane Waali Hai Aur Agar Zinda Rehte To Sacche Nabi Hote.”
–
[Ibn Majah Fi As-Sunan, :108.]
- Sahih Bukhari Me Hazrat Abd Allah Bin Abi Awfa Inhin Ke Baare Me Kehte Hain :
مات صغير ولو قضى أن أكون بعد محمد صلى الله تعالى عليه وآله وسلم نبى عاش أبنه ولكن لا نبى بعده.
“Aap (Hazrat Ibrahim) Saghir Sini Me Wisaal Farma Gaye Aur Agar Yeh Faisla Qudrat Ka Hota Ki Muhammad SallAllahu Ta’ala ‘Alayhi Wa Aalihi Wa Sallam Ke Baa’d Koi Nabi Ho To Aap Ke Yeh Saahibzaade Zinda Hote Magar Haqiqat Yeh Hai Ki Un Ke Baa’d Koi Nabi Nahin.”
–
[Bukhari Fi As-Sahih, 02/914.]
- Isi Tarah Musnad Ahmad Me Riwayat Hai :
عن السدى قال سمعت أنس بن مالك يقول لوعاش إبراهيم ابن النبى صلى الله تعالى عليه وآله وسلم لكان صديقا نبيا.
“Hazrat Suddiy Se Riwayat Hai Woh Kehte Hain Ki Mein Ne Hazrat Anas Bin Maalik RadiyAllahu Ta’ala ‘Anhu Ko Yeh Farmaate Huwe Suna Ki Agar Huzoor Nabiyye Akram SallAllahu Ta’ala ‘Alayhi Wa Aalihi Wa Sallam Ke Saahibzaade Hazrat Ibrahim RadiyAllahu Ta’ala ‘Anhu Zinda Rehte To Woh Allah Ka Saccha Nabi Hote.”
–
[Ahmad Bin Hanbal FI Al-Musnad, 03/133.]
Is Liye Allah Rabb-ul-Izzat Ne Unhein Bachpan Hee Me Apne Paas Bula Liya, Unhone Mout Ko Qubool Kar Ke Huzoor SallAllahu Ta’ala ‘Alayhi Wa Aalihi Wa Sallam Kee Shaane Khatme Nubuwwat Ko Zinda Rakkha. Sahih Bukhaari Aur Digar Kutube Sihaah Kee Riwayat Se Maloom Huwa Ki Agar Huzoor SallAllahu Ta’ala ‘Alayhi Wa Aalihi Wa Sallam Ke Baa’d Koi Nabi Ho Sakta To Huzoor SallAllahu Ta’ala ‘Alayhi Wa Aalihi Wa Sallam Ke Bete Hazrat Ibrahim RadiyAllahu Ta’ala ‘Anhu Ko Zinda Rakkah Jaata. Unhein Bachpan Hee Me Mout Kee Aaghosh Me Is Liye De Diya Gaya Kyun Ki Huzoor SallAllahu Ta’ala ‘Alayhi Wa Aalihi Wa Sallam Ke Baa’d Kisi Nabi Ko Nahin Aana Tha.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/26 Ta 28.]
Faize Nubuwwat-o-Wilaayat Kee Baqa’ Ka Uloohi Nizaam
Baab 02
Faize Nubuwwat-o-Wilaayat Kee Baqa’ Ka Uloohi Nizaam
Hazrat Ibrahim ‘Alayh-is-Salam Ne Du’aaein Maangi Thi Aik Yeh Ki Baari Ta’ala Meri Dhurriyyat Se Khaatim-ul-Ambiya’ Paida Fama. Dusre Meri Dhurriyyat Ko Mansabe Imaamat Ata Kar Chunaanche Hazrat Muhammad Mustafa SallAllahu Ta’ala ‘Alayhi Wa Aalihi Wa Sallam Kee Shakl Me Nabi Aakhir-uz-Zama’n Tashrif Le Aaye, Huzoor SallAllahu Ta’ala ‘Alayhi Wa Aalihi Wa Sallam Par Nubuwwat Khatm Ho Jaane Ke Baa’d Ab Yeh Laazmi Taqaaza Tha Ki Huzoor Rahmate Kawnayn SallAllahu Ta’ala ‘Alayhi Wa Aalihi Wa Sallam Kee Nubuwwat Ka Faiz Ab Imaamat Wa Wilaayat Kee Shakl Me Aage Chale, Hazrat Ibrahim ‘Alayh-is-Salam Kee Dhurriyyat Me Wilaayat Bhi Aa Gayi, Huzor SallAllahu Ta’ala ‘Alayhi Wa Aalihi Wa Sallam Ka Apna Sulbi Beta Na Tha. So Aab Nubuwwate Mustafa SallAllahu Ta’ala ‘Alayhi Wa Aalihi Wa Sallam Ka Faiz Aur Imamat-o-Wilaayate Mustafawi Ka Mazhar Tha Is Liye Zaroori Tha Ki Yeh Kisi Muqaddas Aur Muhtaram Khaandaan Se Chale. Aise Afraad Se Chale Jo Huzoor Rahmate Aalam SallAllahu Ta’ala ‘Alayhi Wa Aalihi Wa Sallam Ka Sulbi Beta To Na Ho Magar Jigar Gosha-E-Rasool, Chunaanche Is Mansabe Azeem Ke Liye Hazrat Ali KarramAllahu Ta’ala Waj’hah-ul-Karim Aur Huzoor Kee Laadli Beti Khatoone Jannat Sayyidah Fatimat-uz-Zahra RadiyAllahu Ta’ala ‘Anha Par Qudrat Kee Nigaahe Intekhaab Padi.
Hazrat Ali KarramAllahu Ta’ala Waj’hah-ul-Karim Aur Hazrat Sayyidah Fatimah Salamu Allah ‘Alayha Kee Shaadi Ka Aasmaani Faisla
Allah Ta’ala Aur Us Ke Rasool SallAllahu Ta’ala ‘Alayhi Wa Aalihi Wa Sallam Kee Khushnoodi Raza Aur Mashiyyat Se Yeh Muqaddas Hastiya’n Rishta-E-Izdiwaaj Me Munsalik Ho Gayin. Hadithe Paak Me Hain :
عن عبد الله بن مسعود عن رسول الله صلى الله تعالى عليه وآله وسلم قال ان الله امرنى ان ازوج فاطمة من على رضى الله عنهما
“Hazrat Abd Allah Bin Mas’ood RadiyAllahu Ta’ala ‘Anhuna Se Marwi Hai Ki Nabiyye Akram SallAllahu Ta’ala ‘Alayhi Wa Aalihi Wa Sallam Ne Farmaya Ki Be Shak Allah Ta’ala Ne Mujhe Hazrat Fatimah RadiyAllahu Ta’ala ‘Anha Ka Hazrat Ali RadiyAllahu Ta’ala ‘Anhu Se Nikaah Karne Ka Hukm Diya.”
–
[Tabarani Fi Al-Mu’jam-ul-Kabir, 10/156, Hadith-10305.]
Taajdaare Kaa’enaat SallAllahu Ta’ala ‘Alayhi Wa Aalihi Wa Sallam Ne Farmaya Ki Ali KarramAllahu Ta’ala Waj’hah-ul-Karim Aur Fatimah Salamu Allah ‘Alayha Kee Shaadi Ka Faisla Aasmaano’n Par Ho Chuka Tha. Yeh Shaadi Amre Ilaahi Se Anjaam Paayi Is Liye Ki Hazrat Ali Se Wilaayate Mustafa Ke Silsile Ko Qaa’im Hona Tha Aur Hazrat Ali KarramAllahu Ta’ala Waj’hah-ul-Karim Ko Takmeele Du’a-E-Ibrahim ‘Alayh-is-Salam Ka Zari’a Ban’na Tha Isi Maqsad Ke Liye Taajdaare Ka’enaat SallAllahu Ta’ala ‘Alayhi Wa Aalihi Wa Sallam Se Un Kee Hazrat Fatimah Ke Zari’e Aik Aur Mazboot Paakizah Nisbat Bhi Qaa’im Huwi. Aa’indah Safhaat Me Hum Do Alag Alag Faslo’n Me In Dono’n Muqaddas Hastiyo’n Ke Faza’il-o-Manaqib Jo Sahih Riwaayaat Se Saabit Hain Aur Ahl-E-Sunnat Wa’l-Jama’at Ke Haa’n Un Kee Kitabo’n Me Darj Hain Jis Ko Bayaan Karenge Taa Ki Ma’loom Ho Jaaye Ki Mawla-E-Ka’enat Hazrat Ali KarramAllahu Ta’ala Waj’hah-ul-Karim Aur Khatoone Jannat Sayyidah Fatimat-uz-Zahra Salamu Allah ‘Alayha Aur Un Kee Aulaade At’har Jamhoor Ahle Islam Ke Haa’n Muhtaram-o-Mukarram Au Qaabile Izzat-o-Takreem Hain Yeh Na To Kisi Khaas Firqe Ka Mashrab-o-Maslak Hai Aur Na Kisi Kee Khaas Alaamat Hai Aur Aisa Ho Bhi Kyun Yeh Khanwada-E-Nubuwwat Hai Aur Jumla Musalmano’n Ke Haa’n Me’yaare Haque Aur Markaz-o-Mehware Imaan-o-Amal Hai.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/29 Ta 31.]
Tahirul Qadri Books 
You must be logged in to post a comment.