Namaze Fajr Jaan Nithaar As’haab Ne Imaame Aali Maqaam Kee Iqtida’ Me Adaa Kee, Baargaahe Khudawandi Me Karbala Waale Sar Basujood They Woh Sar Jinhein Aaj Shaam Nezo’n Par Bhi Qur’an Padhna Tha, Allah Rabb-ul-Izzat Ke Huzoor Jhuke Huwe They Mawla! Yeh Zindagi Teri Ata Kardah Hai Hum Ise Teri Raah Me Quraan Karne Ke Liye Tayyar! Yazeedi Lashkar Ne Bhi Badbakht Ibn Sa’d Se Saath Fajr Kee Namaaz Aada Kee, 10 Muharram-ul-Haraam Ka Sooraj Tuloo’ Huwa To Khoon Me Dooba Huwa Tha, Aasmaan Khoon Ke Aansoo Ro Raha Tha. Aaj Ali Asghar Ke Halqoom Me Teer Paiwast Hona Tha Khandane Rasoole Hashimi Ke Bhooke Pyaase Shehzado’n Ke Khoon Se Rege Karbala Ko Sukh Hona Tha.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/102_103.]
Category: Baab-03 : Dhib’he ‘Azeem Kee Takmeel
Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)
Hurr Kee Tawbah
Yazeedi 72 Jaan Nithaaro’n Aur Aurto’n Aur Baccho’n Ke Khilaaf Saf Aaraa’ Huwe, Dastoore Arab Ke Mutaabiq Pehle Inferaadi Jang Ka Aaghaaz Huwa. Yazeedi Lashkar Se Aik Shehsawaar Nikla, Ibn Sa’d Se Puchha Kya Waaqe’iy Tum Ne Imam Husayn ‘Alayh-is-Salam Ko Shaheed Karne Ka Faisla Kar Liya Hai? Woh Badbakht Jawaab Deta Hai Ki Is Ke Siwa Hamaari Paas Koi Chaarah Nahin. Yeh Sun Kar Shehsawaar Par Larza Taari Ho Jaata Hai Ki Yeh Badbakht To Nawasa-E-Rasool SallAllahu Ta’ala ‘Alayhi Wa Aalihi Wa Sallam Ko Qatl Kar Dega. Rasool SallAllahu Ta’ala ‘Alayhi Wa Aalihi Wa Sallam Ke Gharaane Ka Khoon Bahaaega. Is Ke Dil Me Imaan Ke Jo Changaari Sulag Rahi Thi Us Ne Josh Maara, Qudrat Ne Use Us Muhabbate Ahle Bayt Ka Thamar Diya, Us Ke Andar Ka Insaan Bedaar Ho Gaya. Woh Khauf Se Kaanp Raha Tha. Us Kee Yeh Kaifiyyat Dekh Kar Aik Shakhs Us Se Puchhta Hai, Tum Koofah Waalo’n Me Se Sab Se Bahaadur Shakhs Ho, Tumhaari Bahaaduri Kee To Mithaalein Dee Jaati Hain, Mein Ne Aaj Tak Tumhein Itna Paz Murda Nahin Dekha, Tumhaari Haalat Ghair Kyun Ho Rahi Hai? Woh Shakhs Sar Uthaata Hai Aur Imaame Aali Maqaam Kee Taraf Ishaarah Kar Ke Kehta Hai Mere Aik Taraf Jannat Hai Aur Dusri Taraf Dozakh Hai…..Mujhe Aaj Aur Isi Waqt Dono’n Me Se Kisi Aik Ka Intekhaab Karna Hai! Thode Se Tawaqquf Ke Baa’d Woh Shehsawaar Silsila-E-Kalaam Jaari Rakhte Huwe Kehta Hai…….. Mein Ne Dozakh Ko Thukraane Ka Faisla Kar Liya Hai Aur Apne Jannat Ko Muntakhab Kiya Hai, Phir Woh Apne Ghode Ko Aidi Lagaata Hai Aur Imaame Aali Maqaam Kee Khidmat Me Pahunchta Hai. Nawasa-E-Rasool SallAllahu Ta’ala ‘Alayhi Wa Aalihi Wa Sallam Hazrat Imam Husayn ‘Alayh-is-Salam Ko Mukhaatib Kar Ke Kehta Hai : Huzoor! Mein Aap Ka Mujrim Hoo’n, Mein Hee Aap Ke Qaafile Ko Gher Kar Maidaane Karbala Tak Laaya Hoo’n Kya Is Lamhe Me Bhi Meri Tawbah Qubool Ho Sakti Hai? Shaafi’-E-Mahshar Ke Noore Nazar Imaame Aali Maqaam Ne Farmaya Ki Agar Tawbah Karne Aaye Ho To Ab Bhi Qubool Ho Sakti Hai. Woh Kehta Hai Kya Mera Rabb Mujhe Mu’aaf Kar Dega? Husayn RadiyAllahu Ta’ala ‘Anhu : Haa’n, Tera Rabb Tujhe Mu’aaf Kar Dega. Lekin Yeh To Bata Ki Tera Naam Kya Hai, Us Shehsawaar Kee Aankho’n Se Aansoo Jaari Ho Jaate Hain, Arz Karta Hai Mera Naam Hurr Hai, Imaame Aali Maqaam Ne Farmaaya : Hurr Tumhein Dunya Me Bhi Aur Aakhirat Me Bhi Aazaad Kar Diya Gaya Hai. Farmaya : Hurr Neeche Aao! Woh Kehta Hai : Nahin Imame Aali Maqam! Ab Zinda Neeche Nahin Aaunga, Apni Laash Aap Ke Qadmo’n Par Nichhaawar Karunga Aur Yazeed Ke Lashkar Ke Saamne Seesa Pilaayi Huwi Deewaar Ban Jaaunga. Is Ke Baa’d Khush Bakht Hurr Ne Yazeedi Lashkar Se Khitaab Kiya Lekin Jab Aankho’n Par Mafaadaat Kee Patti Baandh Dee Jaaye To Kuchh Nazar Nahin Aata. Koofi Lashkar Par Hurr Kee Baato’n Ka Koi Asar Na Huwa.
–
[Ibn Kathir Fi Al-Bidayah Wa An-Nihayah, 08/180, 181,
Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/104_105.]
Inferaadi Jang Ka Aaghaaz
Us Dhib’he ‘Azeem Ka Lamha Joo’n Joo’n Qareeb Aa Raha Tha Aale Rasool SallAllahu Ta’ala ‘Alayhi Wa Aalihi Wa Sallam Kee Sakhtiya’n Badhti Chali Jaa Rahi Thi’n Teen Dino’n Ke Pyaase Husayni Sipaahiyo’n Ne Munaafiqat Ke Khilaaf Faisla Kun Ma’rike Kee Tayyari Shuru’ Kar Dee. Inferaadi Jang Ka Aaghaaz Huwa. Janaabe Hurr As’haabe Husayn RadiyAllahu Ta’ala ‘Anhu Ke Pehle Shaheed They Ab Aik Mujaahid Lashkare Husayn RadiyAllahu Ta’ala ‘Anhu Se Nikalta Aur Aik Yazeedi Lashkar Se. Aap Ke Jaan Nithaar Dushman Kee Safo’n Kee Safein Ulat Dete, Kushto’n Kee Pushte Lagaate Rahe, Yazeediyo’n Ko Waasile Jahannum Kar Ke Aur Phir Khud Bhi Jaame Shahadat Nosh Kar Ke Nawasa-E-Rasool SallAllahu Ta’ala ‘Alayhi Wa Aalihi Wa Sallam Ke Qadmo’n Par Nithaar Ho Jaate, Pehle As’haabe Husayn Shaheed Huwe, Ghulaam Nithaar Huwe, Qaraabat Daar Aik Aik Kar Ke Haque Shujaa’at Dete Huwe Sifate Shahadat Se Sarfaraaz Huwe.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/104_105.]
Khandane Rasool SallAllahu Ta’ala ‘Alayhi Wa Aalihi Wa Sallam Kee Jaa-Nithaari
Ab Paighambare A’zam SallAllahu Ta’ala ‘Alayhi Wa Aalihi Wa Sallam Ke Khandan Ke Afraad Kee Baari Thi. Un Ke Chehre Tamtama Rahe They. Bhook Aur Pyaas Se Bura Haal Ho Raha Tha Lekin Jazba-E-Shahadat Ke Josh Me Dunya Kee Yeh Cheez Un Ke Nazdeek Be Waq’at Ho Kar Rah Gayi Thi. Ali Akbar, Jise Hamshakle Paighambar Hone Ka I’zaaz Haasil Tha Baargaahe Husayn ‘Alayh-is-Salam Me Haazir Hota Hai Ki Abba Jaan! Ab Mujhe Ijaazat Dijiye. Hazrat Imam Husayn RadiyAllahu Ta’ala ‘Anhu Ne Us Kee Peshaani Par Al-Wada’iy Bosa Thabt Karte Huwe Jawa’n Saal Bete Ko Seene Se Laga Liya Aur Bete Ko Hasrat Bhari Nazro’n Se Dekha Aur Du’aaein De Kar Mqtal Kee Taraf Rawaana Kiya Ki Beta! Jaao Allah Kee Raah Me Apni Jaan Ka Nazraana Pesh Karo Ali Akbar Sher Kee Tarah Maidaane Jang Me Aaye, Saraapa Paikare Ra’naa’iy, Saraapa Paikare Husn, Saraapa Paikare Jamaal, Mustafa-o-Mujtaba SallAllahu Ta’ala ‘Alayhi Wa Aalihi Wa Sallam Kee Tasweere Kaamil, Yazeedi Lashkar se Nabard Aazma Tha. Hazrat Imam Husayn RadiyAllahu Ta’ala ‘Anhu Maqtal Kee Taraf Badh Ke Apne Bete Kee Jang Ka Nazaarah Karein Woh Dushman Par Kis Tarah Jhapat’ta Hai? Lekin Lashkare Yazeed Me Itna Gard-o-Ghubaar Chaaya Huwa Tha Ki Imame Aali Maqam Daade Shujaa’at Dete Huwe Ali Akbar Ko Na Dekh Sake.
Imame Aali Maqam Aarzu Mand They Ki Dekhein Mera Beta Kis Tarah Raahe Haque Me Istiqaamat Ka Kohe Garaa’n Saabit Hota Hai Kis Tarah Yazeedi Lashkar Par Waar Karta Hai, Shuja’ate Haydari Ke Paikar Ali Kabar Barqe Ra’d Ban Kar Yazeedi Asaakir Par Hamle Kar Rahe They, Safein Kee Safein Ulat Rahe They. Lashkare Yazeed Jis Taraf Daudta Imaame Aali Maqaam Samajh Jaate Ki Ali Akbar Us Taraf Daade Shujaa’at De Raha Hai, Isi Tarah Samto’n Ka Ta’ayyun Hota Raha, Yazeedi Sipaahi Waasile Jahannam Hote Rahe, Ali Akbar Mardaana Waar Jang Kar Rahe They. Teen Deen Ke Pyaase They, Gard-o-Ghubaar Se Faa’idah Utha Kar Ghode Ko Aidi Laga Kar Waapas Aaye Arz Kee Abba Jaan! Agar Aik Ghunt Paani Mil Jaaye To Taazah Dam Ho Kar Badbakhto’n Par Hamla Karu’n. Farmaya : Beta! Mein Tumhein Paani To Nahin De Sakta Meri Zubaan Ko Choosh Lo, Imaame Aali Maqaam RadiyAllahu Ta’ala ‘Anhu Kee Apni Zubaan Khushk Hai, Imaame Aali Maqaam Ne Apni Zubaan Mubaarak Ali Akbar Ke Munh Me Daal Dee Ki Beta Isi Tarah Naana Jaan Apni Zubaan Mubaarak Mere Munh Me Daala Karte They. Shaayad Woh Mere Munh Me Apni Zubaan Aaj Ke Din Ke Liye Daalte They. Ali Akbar Ne Apne Baaba Kee Sookhi Huwi Zubaan Choosi, Aik Naya Hausla Aur Walwala Mila. Palat Kar Phir Lashkare Yazeed Par Hamla Kar Diya Achaanak Ladte Ladte Aawaaz Dee.
يا ابتاه ادر كنى
Abba Jaan Aa Kar Mujhe Thaam Lijiye
Hazrat Imaam Husayn RadiyAllahu Ta’ala ‘Anhu Samajh Gaye Ki Jawaa’n Saal Bete Kee Shahadat Kee Ghadi Aa Gayi, Daud Kar Ali Akbar Kee Taraf Aaye, Qareeb Ho Kar Dekha To Humshakle Paighambar Ali Akbar Zameen Par Tha. Lashkare Yazeed Ke Kisi Badbakht Sipaahi Ka Nezah Ali Akbar Ke Seene Me Paiwast Ho Chuka Tha, Imaame Aali Maqaam Zameen Par Baith Gaye Apne Zakhmi Bete Ka Bosa Liya, Ali Akbar Ne Kaha : Abba Jaan! Agar Yeh Neze Ka Phal Seene Se Nikaal De’n To Phir Dushman Par Hamla Karu’n. Imaame Aali Maqaam Ne Ali Akbar Ko Apne Goud Me Le Liya, Neze Ka Phal Khincha To Seene Se Khoon Ka Fawwaara Beh Nikla Aur Rooh Qafase Unsuri Se Parwaaz Kar Gayi انا لله و انا اليه راجعون.
Imaame Aali Maqaam Jawa’n Saal Bete Kee Laash Ko Le Kar Apne Khaime Kee Taraf Palte, Raawi Bayaan Karta Hai Ki Jab Hazrat Imam Husayn RadiyAllahu Ta’ala ‘Anhu Maidaane Karbala Me Aaye They To 10 Muharram Ke Din Aap Kee Umr Mubaarak 56 Baras Paanch Maah Aur Paanch Din Thi Magar Sare Anwar Aur Reesh Mubarak Ka Aik Baal Bhi Sufed Na Tha Lekin Jab Jawaan Ali Akbar Ka Laasha Apne Baazu’n Me Samet Kar Palte To Sare Anwar Ke Saare Baal Aur Reesh Mubaarak Sufed Ho Chuki Thi. Hazrat Safiyyah RadiyAllahu Ta’ala ‘Anha Hazrat Zaynab RadiyAllahu Ta’ala ‘Anha Se Keh Rahi Thi Ki Phoophi Jaan! Baaba Jaan Buddhe Ho Gaye Hain. Gham Ne Aap Ko Nidhaal Kar Diya Tha.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/105_107.]
Ali Akbar Ke Baa’d Kasim Bhi Shaheed Ho Gaye
Imame Aali Maqam RadiyAllahu Ta’ala ‘Anhu Dekh Rahe Hain Ki Ab Kounsa Ra’na Uroose Shahdat Se Ham-Linaar Hone Ke Liye Maqtal Kee Taraf Rawana Hota Hai……Ab Koun Ali Akbar Ke Saath Apni Masnade Shahadat Bichhaata Hai….Ab Koun Mafaaraqat Ke Daagho’n Se Seena Chhalni Karta Hai……. Ab Koun Tashna Lab Hawze Kawthar Par Pahunch Kar Apni Pyaas Bujhata Hai ….. Ab Koun Apne Lahu Se Daastaane Hurriyyat Ka Naya Baab Tehrir Karta Hai…… ? Nazarein Utha Kar Dekhte Hain To Saamne Imam Hasan ‘Alayh-is-Salam Ke Lakhte Jiagr Qaasim Khade Hain, Yeh Woh Jawaan Hain Jin Ke Saath Hazrat Sakeena Kee Nisbat Tay Ho Chuki Hai, Arz Karte Hain Chacha Jaan! Ijaazat Dijiye Ki Apni Jaan Aap Ke Qadmo’n Par Nithaar Kar Du’n, Imame Aali Maqam Jo Maqame Raza Par Faa’iz Hain Farmate Hain : Qasim! Too To Mere Bade Bhaai Hasan RadiyAllahu Ta’ala ‘Anhu Kee Ek-Lauti Nishaani Hai, Tumhein Dekh Kar Mujhe Bhaai Hasan RadiyAllahu Ta’ala ‘Anhu Yaad Aa Jaate Hain, Tujhe Maqtal Me Jaane Kee Ijaazat Kaise De Du’n? Qaasim Ne Kaha : Chacha Jaan! Yeh Kaise Mumkin Hai Ki Mein Apne Khoon Se Haque Kee Gawaahin Na Du’n? Chacha Jaan! Mujhe Jaane Dijiye, Meri Laash Par Se Guzar Kar Hee Dushman Aap Tak Pahunch Paayega, Agar Aaj Aap Ke Qadmo’n Par Jaan Nithaar Na Kar Saka To Kal Abba Jaan Ko Kya Munh Dikhaaunga? Hazaaro’n Du’aaon Kee Chaao’n Me Khanwada-E-Rasool SallAllahu Ta’ala ‘Alayhi Wa Aalihi Wa Sallam Ka Yeh Chashm-o-Charaagh Bhi Maidaane Shahdat Kee Taraf Badhne Laga.
Humid Bin Ziyaad, Ibn Ziyaad Kee Fauz Ka Sipaahi Hai, Al-Bidayah Wa An-Nihayah Me Imam Ibn Kathir Kee Riwaayat Ke Mutaabiq Woh Bayaan Karta Hai Ki Hum Ne Achaanak Dekha Ki Ahl-E-Bayt Ke Khaimo’n Me Se Aik Khubsoorat Aur Kadyal Jawaan Nikla, Us Ka Chehrah Chaand Ka Tukda Ma’loom Hota Tha. Us Ke Haath Me Talwaar Lehra Rahi Thi. Ghaaliban Us Ke Baaein Joote Ka Tasama Toota Huwa Tha Woh Sher Kee Tarah Hamla Aawar Huwa, Ibn Sa’d Ke Lashkar Par Toot Pada Aur Yazeediyo’n Ko Waasile Jahannam Karne Laga, Yeh Jawaan Imam Hasan Ka Beta Qaasim Tha, Yazeediyo’n Ne Chaaro’n Taraf Se Hamla Kar Diya Kisi Badbakht Ne Shahzaada Qaasim Ke Sar Par Talwaar Maari Aawaaz Dee : يا عماه! Aur Chakra Kar Gir Pade, Imaame Aali Maqaam Ali Akbar Ke Gham Me Nidhaal They, Bhateeje Kee Laash Ke Girne Ka Manzar Dekha To Uthey, Qaasim Kee Laash Par Aaye, Farmaya : Bete Qaasim! Yeh Kaisi Ghadi Hai Ki Mein Aaj Teri Madad Nahin Kar Saka! Imame Aali Maqam Ne Qasim Ke Laashe Ko Apne Seene Laga Liya. Imam Ibn Kathir Ke Mutaabiq Raaw Ka Kehna Hai Ki Imaame Aali Maqaam Aik Jawaan Kee Laash Utha Kar Khaimo’n Kee Taraf Laaye, Woh Itna Kadyal Jawaan Tha Ki Us Ke Paaun Aur Taangein Zameen Par Latak Rahi Thi. Mein Ne Kisi Se Puchha : Yeh Jawaan Jis Ko Husayn RadiyAllahu Ta’ala ‘Anhu Utha Kar Le Jaa Rahe Hain Koun Hai? Kisi Ne Mujhe Bataaya Ki Imam Hasan RadiyAllahu Ta’ala ‘Anhu Ka Beta Qaasim Hai, Imame Aali Maqam Ne Qaasim Kee Laash Ko Bhi Apne Shehzade Ali Akbar Kee Laah Ke Saath Lita Diya.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/107_108.]
Ma’soom Ali Asghar Kee Shahaadat
Ali Akbar Aur Qaasim Kee Laasho’n Ko Aik Saath Lita Kar Hazrat Imam Husayn RadiyAllahu Ta’ala ‘Anhu Aik Lamha Ke Liye Khaime Ke Darwaaze Par Baithey, Dukh Aur Karb Kee Tasweer Bane Kisi Gehri Soch Me Gharq They. Zubaane Haal Se Keh Rahe They Naan Jaan! Aap SallAllahu Ta’ala ‘Alayhi Wa Aalihi Wa Sallam Kee Ummat Ne Aap SallAllahu Ta’ala ‘Alayhi Wa Aalihi Wa Sallam Ke Gulshan Ko Taaraaj Kar Diya Hai ……… Aap SallAllahu Ta’ala ‘Alayhi Wa Aalihi Wa Sallam Ke Shahzaade Khoon Me Nahaaye Huwe Hain ……… Woh Dekhiye Ali Akbar Aur Qasim Ke Laashe Pade Hain ……. Ab Kuchh Der Baa’d Khaimo’n Ko Aag Laga Dee Jaayegi ……. Laasho’n Par Ghode Daudaaye Jaaeinge ……….. Naana …..! Aap Kee Betiyo’n Se Ridaaein Chhin Lee Jaaeingi ……… Unhein Qaidi Bana Kar Shaam Ke Baazaaro’n Me Phiraaya Jaaega………
Khayaalaat Ka Silsila Us Waqt Toota Jab Bibiyo’n Ne Khaimo’n Ke Andar Se Ali Asghar Ko Aap Ke Paas Bhej Diya. Imame Aali Maqam Ne Apne Nanhe Munne Bete Ko Apni Goud Me Sameta, Be Saakhta Pyaar Kiya Aur Us Ka Sar Munh Choom Kar Aane Waale Lamhaat Ke Liye Naseehatein Farmaane Lage Ki Bani Asad Ke Qabile Ke Aik Badbakht Ne Teer Maara Jo Ma’soom Ali Asghar Ke Halqoom Me Paiwast Ho Gaya. Nanha Baccha Apne Hee Khoon Me Naha Gaya. Imame Aali Maqam Ne Us Ma’soom Ke Khoon Se Chullu Bhar Kar Aasmaan Kee Taraf Uchhal Diya Ki Baari Ta’ala Hum Teri Raza Aur Khushi Ke Talabgaar Haim………..Nanhe Ali Asghar Kee Yeh Qurbani Qubool Farma. Ibn Kathir Kee Riwaayat Hai Jise Tabari Ne Bhi Naqal Kiya Hai Ki Hazrat Ali Asghar Kee Wilaadat Bhi Maidane Karbala Hee Me Huwi Thi, Bibiyo’n Ne Nau Maulood Ali Asghar Ko Hazrat Imam Husayn RadiyAllahu Ta’ala ‘Anhu Ke Paas Is Liye Bheja Tha Ki Woh Nau Maulood Ke Kaan Me Adhaan Kahein Idhar Imame Aali Maqam Ne AllahuAkbar Ke Alfaaz Ada Kiye Udhar Yazeedi Lashkar Kee Taraf Se Teer Aaya Jo Ali Asghar Ke Gale Se Paar Ho Gaya Aur Un Kee Ma’soom Rooh Qafase Unsuri Se Parwaaz Kar Gayi. Baa’z Riwaayaat Ke Mutaabiq Shahaadat Ke Waqt Ali Asghar Kee Umr Chheh Maah Thi Aur Woh Pyaase They Imame Aali Maqam Kee Khidmat Me Unhein Is Liye Rawaana Kiya Gaya Ki Yazeediyo’n Se Kaha Jaaye Ki Hamaara Paani Tum Ne Band Kar Diya Hai Lekin Is Ma’soom Bacche Ne Tumhaara Kya Bigaada Hai Is Ke Liye Paani De Do.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/108_109.]
Ghairate Husayn Ke Munaafi Riwaayat Ka Tajziya
Mein Samajhta Hoo’n Ki Paani Maangne Kee Pur Riwaayat Imame Aali Maqam Kee Ghairat Aur Hamiyyat Munaafi Hai Woh Husayn RadiyAllahu Ta’ala ‘Anhu Jo Usoolo’n Kee Khaatir Maidaane Karbala Me Apne Shahzado’n Kee Qurbaaniya’n De Sakte Hain, Paani Kee Aik Bund ke Liye Yazeedi Lashkar Ke Saamne Daste Sawaal Daraaz Nahin Kar Sakte They. Husayn Ibn Ali RadiyAllahu Ta’ala ‘Anhuma Kee Ghairat Daste Sawaal Daraaz Karne Kee Ijaazat Nahin Deti. Agar Ali Asghar Ke Liye Paani Maangna Hee Tha To Us Ka Sawaal Yazeedi Lashkar Se Kyun Kiya Jaata? Rabbe Dhu-‘l-Jalaal Kee Izzat Kee Qasam! Agar Husayn RadiyAllahu Ta’ala ‘Anhu Paani Ke Liye Bargahe Khudawandi Me Haath Uthaate Aur Aasmaan Kee Taraf Ishaarah Karte To Chaaro’n Taraf Se Ghataaein Daud Kar Aati’n Aur Karbala Kee Tapti Huwi Zameen Tak Kee Pyaas Bujh Jaati. Hazrat Isama’il ‘Alayh-is-Salam Kee Aidi Se Zam Zam Ka Chashma Phoot Nikla Tha Agar Nawasa-E-Rasool SallAllahu Ta’ala ‘Alayhi Wa Aalihi Wa Sallam Maidane Karbala Me Aidi Maarte To Karbala Se Laakho’n Chashme Phoot Padte, Magar Nahin Yeh Maqaame Raza Tha ………. Yeh Maqaame Tawakkal Tha ………… Yeh Maqaame Tafweez Aur Maqaame Sabr Tha ………… Yeh Marhala-E-Istiqaamat Tha ……… Yeh Lamha Imtihaan Ka Lamha Tha ………… Imame Aali Maqam RadiyAllahu Ta’ala ‘Anhu Aazmaa’ish Kee Us Ghadi Me Dagmaga Nahin Sakte They Kyun Ki Woh Baraahe Raast Huzoor Huzoor Nabiyy-E-Akram SallAllahu Ta’ala ‘Alayhi Wa Aalihi Wa Sallam Kee Tarbiyyat Yaafta They. Aap Sabr-o-Raza Ke Maqaam Par Istiqaamat Ka Khe Gira’n Bane Rahe Is Liye Ki Husayn RadiyAllahu Ta’ala ‘Anhu Kee Nigaah Me Mustafa SallAllahu Ta’ala ‘Alayhi Wa Aalihi Wa Sallam They Aur Mustafa SallAllahu Ta’ala ‘Alayhi Wa Aalihi Wa Sallam Kee Saamne Un Ka Khuda Tha. Chashme Falak Husayn ‘Alayh-is-Salam Kee Istiqaamat Ka Yeh Manzar Dekh Rahi Thi. Makeene Gumbade Khazra Ke Saath Fatimah Salamu Allah ‘Alayha Aur Ali KarramAllahu Ta’ala Waj’hah-ul-Karim Kee Nazarein Bhi Azm-o-Istiqlaal Ke Paikar Husayn ‘Alayh-is-Salam Ke Jaala-o-Jamaal Ka Nazaarah Kar Rahi Thi. Fatimah RadiyAllahu Ta’ala ‘Anha Zubaane Haal Se Keh Rahi Thi Beta Husayn! Mein Ne Tujhe Doodh Pilaaya Hai. Aaj Mein Karbala Ke Maidaan Me Apne Doodh Kee Laaj Dekhne Aayi Hoo’n. Beta! Mere Doodh Kee Laaj Rakhna. Dekhna Ali Akbar Aur Ali Asghar Kee Qurbani Ke Waqt Tere Qadam Dagmag Na Jaaein, Idhar Ali Murtaza Shere Khuda Farma Rahe They Husayn! Raahe Khuda Me Istiqaamat Se Date Rehna, Apne Baaba Ke Khoon Kee Laaj Rakhna. Udhar Muhabbate Husayn Me Tajdare Ka’inat SallAllahu Ta’ala ‘Alayhi Wa Aalihi Wa Sallam Karbala Ke Shaheedo’n Ka Khoon Aik Sheeshi Me Jam’a Farma Rahe They, Husayn! Mere Kandho’n Par Sawaari Kee Laaj Rakhna.
Sawaal Paida Hota Hai Ki Jab Huzoor Nabiyy-E-Akram SallAllahu Ta’ala ‘Alayhi Wa Aalihi Wa Sallam Se Le Kar Ali KarramAllahu Ta’ala Waj’hah-ul-Karim Aur Apni Ammi Jaa Fatimat-uz-Zahra Salamu Allah ‘Alayha Ke Muqaddas Chehre Saamne Ho’n To Husayn ‘Alayh-is-Salam Jaise Bahaadur Shakhs Ke Qadam Shaahraahe Shahdat Par Kaise Dagmaga Sakte Hain? Aap Yazeediyo’n Ke Saamne Daste Sawaal Kis Tarah Daraaz Kar Sakte They? Mout kee Aankho’n Me Aankhein Daal Kar Use Lalkaarne Waale Bhala Maut Se Kab Darte Hain. Jo Marna Nahin Jaante Unhein Jeene Ka Bhi Koi Haque Nahin Aur Jo Marna Jaante Hain Woh Allah Kee Raah Me Apni Jaan Ka Nadhraana Pesh Kar Ke Hayaate Jaawidaa’n Paa Lete Hain Isi Liye Kaha Gaya Ki Allah Kee Raah Me Maare Jaane Waalo’n Ko Murdah Na Kaho Woh Zinda Hain Magar Tumhein Un Kee Zindagi Ka Shu’oor Nahin. Husayn RadiyAllahu Ta’ala ‘Anhu Aazmaa’ish Kee Un Ghadiyo’n Me Saabit Qadam Rahe Is Liye Aaj Unhein Dhib’h-E-Isma’il Ka Fidya Dhib’h-E-Azeem Ke Maqaam Par Raunaq Afroz Hona Tha Aaj Husayn RadiyAllahu Ta’ala ‘Anhu Ko Du’a-E-Ibrahim ‘Alayh-is-Salam Kee Takmeel Ka Baa’ith Banta Tha.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/109 Ta 111.]
Qatle Husayn Asl Me Marge Yazeed Hai
Nawasa-E-Rasool SallAllahu Ta’ala ‘Alayhi Wa Aalihi Wa Sallam Karbala Ke Maidaan Me Khada Hai ………… Honto’n Par Tashnagi Ke Kaante Chubh Rahe Hain ………… Aasmaan Se Sooraj Aah Barsa Raha Hai ………… Naynawa Ke Seene Se Furaat Beh Raha Tha Aaj Nawasa-E-Rasool SallAllahu Ta’ala ‘Alayhi Wa Aalihi Wa Sallam Ke Ilaawah Yeh Paani Har Shakhs Ke Liye Aam Hai…………Imame Aali Maqam Ke Jaan Nithaar Aik Aik Kar Ke Raahe Haque Me Tawheed Kee Gawaahi Dete Dete Jaame Shahdat Nosh Kar Chuke Hain ………… Gulistaane Rasool Ujad Chuka Hai…………Chamanistaane Fatimah RadiyAllahu Ta’ala ‘Anha Ko Mout Kee Be Rahm Hawaaon Ne Apne Daaman Me Samet Rakkha Hai ……… Awn-o-Muhammad Bhi Rukhsaat Ho Chuke Hain…………Abbas Alamdaar Maqaame Shahadat Paa Chuke Hain…………Shahzaada Qasim Mout Ko Gale Se Laga Chuke Hain…………Shehzadh Ali Akbar Ka Be Gor-o-Kafan Laasha Rege Karbala Par Pada Hai. …………Ma’soom Ali Asghar Ka Khoon Bhi Fazaae Karbala Ko Rangeen Kar Gaya Hai…………Imame Aali Maqam Apne Jaan Nithaaro’n Ke Laashe Uthaate Uthaate Nidhaal Ho Chuke Hain…………Lekin…….. Ali Kee Shajaa’at, Bahaaduri Aur Jawaanmardi Par Dhalti Umr Ka Saaya Bhi Nahin Pada. Shere Khuda Hazrat Ali KarramAllahu Ta’ala Waj’hah-ul-Karim Ka Sher Apne Tamaam Athaathe Lutaane Ke Baa’d Bhi I’timaad Ka Noor Bikhra Huwa Hai, Ghode Par Sawaar Hote Hain, Zaynab RadiyAllahu Ta’ala ‘Anha Rikaab Thaamti Hain, Imaame Aali Maqaam Maidane Karbala Me Talwaar Liye Khade Hain, Yazeedi Asaakir Par Khaamoshi Chaayi Huwi Hai. Farzande Shere Khuda Ka Saamna Karne Se Har Koi Katra Raha Hai.Woh Jaante Hain Ki Madde Muqaabil Koun Khada Hai. Nawasa-E-Rasool Ko Pehchaante Hain Un Kee Azmat Aur Fazeelat Se Aagaah Hain. Unhein Ma’loom Hai Ki Un Ke Paighambar SallAllahu Ta’ala ‘Alayhi Wa Aalihi Wa Sallam Ka Farmaan Hai Ki Husayn Mujh Se Hai Aur Mein Husayn Se Hoo’n, Woh Jaante Hain Ki Nabze Husayn Nabze Rasool Hai, Lekin Maslahatein Paaon Kee Zanjeer Bani Huwi Hain. Mafaadaat Ne Honto’n Par Qafl Daal Rakkhi Hain. Laalach, Hars Aur Tam’a Ne Un Kee Aankho’n Par Pardah Daal Rakkha Hai Aur Nawasa-E-Rasool SallAllahu Ta’ala ‘Alayhi Wa Aalihi Wa Sallam Ko Qatl Kar Ke Darbaare Yazeed Me Masnade Shaahi Ka Qurb Haasil Karne Kee Aarzumand Hain. Yazeedi Lashkar Me Koi Nikal Kar Shehsawaare Karbala Ka Muqaabala Karne Kee Jur’at Na Kar Saka.
Yazeedi Lashkar Ne Jaan Nithaaraane Husayn RadiyAllahu Ta’ala ‘Anhu Kee Istiqaamat, Shujaa’at Aur Jur’at Dekh Kar Inferaadi Jang Band Kar Dee Thi, Jab Husayn Maqtal Me Aaye To Ijtima’iy Hamla Jaari Tha Lekin Pura Lashkar Bhi Ijtima’iy Taur Par Nawasa-E-Rasool SallAllahu Ta’ala ‘Alayhi Wa Aalihi Wa Sallam Par Hamla Karne Se Dar Raha Tha. Dur Dur Se Teer Chalaate Rahe, Kai Ghanto’n Tak Husayn ‘Alayh-is-Salam Ke Jism Par Talwaar Ka Zakhm Na Laga Kyun Ki Qareeb Aa Kar Ali KarramAllahu Ta’ala Waj’hah-ul-Karim Kee Shujaa’at Ke Waarith Se Jang Karne Ka Kisi Ko Hausla Na Huwa. Teero’n Kee Barsaat Me Imaame Aali Maqaam Ka Jisme At’har Chhalni Ho Gaya. Zakhmo’n Se Choor Imam Par Chaaro’n Taraf Se Hamla Kiya Gaya. Shimr Aur Yazeed Ke Badbakht Sipaahi Qareeb Aa Gaye, Yak Baargi Husayn RadiyAllahu Ta’ala ‘Anhu Ko Talwaaro’n Ke Narghe Me Le Liya Gaya. Aakhir Mardaana Waar Jang Karte Karte Shehsawaare Karbala Ghode Se Neeche Aa Gaye. Nezo’n Aur Talwaaro’n Se Bhi Imaame Aali Maqaam Ka Jism Chhalni Kar Diya Gaya.
Zindagi Ka Aakhiri Lamha Aa Pahuncha, Imaame Aali Maqaam Ne Daryaaft Farmaya Ki Kounsa Waqt Hai Jawaab Mila Namaz Ka Waqt Hai. Farmaya : Mujhe Apne Mawla Ke Huzoor Aakhiri Sajdah Kar Lene Do. Khoon Aaloodah Haatho’n Ke Saath Tayammum Kiya Aur Baargaahe Khudawandi Me Sajda Rez Ho Gaye Baari Ta’ala Yeh Zindagi Teri Hee Dee Huwi Hai Ise Teri Hee Raah Me Qurbaan Kar Raha Hoo’n Aye Khaaliqe Ka’inaat! Mera Yeh Aakhiri Sajda Qubool Ho. Badbakht Shimr Aage Badha Aur Chaaha Ki Imame Aali Maqam Ka Sar Tan Se Juda Kar De Ki Hazrat Imam Husayn ‘Alayh-is-Salam Nw Kaha : Mere Qaatil! Zara Mujhe Apna Seena To Dikha Kyun Ki Mere Naana Ne Mujhe Jahannami Kee Nishaani Bataayi Thi.
- Imam Ibn Asakir Ne Sayyidina Husayn Bin Ali RadiyAllahu Ta’ala ‘Anhuma Se Riwayat Kee Hai Ki Huzoor SallAllahu Ta’ala ‘Alayhi Wa Aalihi Wa Sallam Ne Irshaad Farmaya :
کأنی أنظر إلی کلب أبقع يلغ فی دماء اهل بيتی
“Goya Ki Mein Aik Sufed Daagho’n Waale Kutte Ko Dekh Raha Hoo’n Jo Mere Ahl-E-Bayt Ke Khoon Me Munh Maar Raha Hai.”
–
[Hisam-ud-Deen Hindi Fi Kanz-ul-‘Ummal, Hadith-34322.]
- Muhammad Bin Amr Bin Hasan Bayan Karte Hain :
کنا مع الحسين بنهر کربلا فنظر إلي شمر ذي الجوشن فقال : صدق اﷲ ورسوله! فقال رسول اﷲ صلى الله تعالى عليه وآله وسلم کائي أنظر : إلي کلب أبقع يلغ في دماء أهل بيتي و کان شمر أبرص
“Hum Sayyidina Imam Husayn RadiyAllahu Ta’ala ‘Anhu Ke Saath Karbala Ke Darya Par Maujood They To Aap RadiyAllahu Ta’ala ‘Anhu Ne Shimr Ke Seene Kee Taraf Dekha Aur Farmaya : Allah Aur Us Ke Rasool SallAllahu Ta’ala ‘Alayhi Wa Aalihi Wa Sallam Farmaya Tha Ki Goya Mein Us Sufed Daagho’n Waale Kutte Kee Taraf Dekh Raha Hoo’n Jo Mere Ahl-E-Bayt Ke Khoon Me Munh Maar Raha Hai Aur Shimr Bars Ke Daagho’n Waala Tha.”
–
[Hisam-ud-Deen Hindi Fi Kanz-ul-‘Ummal, 13/672.]
Chunanche Aap RadiyAllahu Ta’ala ‘Anhu Ne Nishaani Dekh Kar Farmaya Haa’n Yeh Badbakhti Tera Hee Muqaddar Hai, Woh Badbakht Aage Badha Aur Sare Aqdas Ko Tan Se Juda Kar Diya. Idhar Rooh Ne Qafase Unsuri Se Parwaaz Kee Udhar Nida Aayi.
يَا أَيَّتُها النَّفْسُ الْمُطْمَئِنَّةُo ارْجِعِي إِلَى رَبِّكِ رَاضِيَةً مَّرْضِيَّةًo
“Aye Itminaan Paa Jaane Waale Nafs. Too Apne Rabb Kee Taraf Is Haal Me Laut Aa Ke Too Us Kee Raza Ka Talab Bhi Ho Aur Us Kee Raza Ka Matloob Ho Aur Tere Raza Us Kee Matloob Bhi(Goya Us Kee Raza Teri Matloob Ho Aur Teri Raza Us Kee Matloob)”
Husayn! Mein Tujh Par Raazi Ho Gaya. Aye Roohe Husayn! Mere Paas Laut Aa Jannat Ke Darwaaze Khule Hain, Hoor-o-Ghulaamaan Tere Muntazar Hain, Qudsiyaane Falaq Tere Intezaar Me Hain.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/111 Ta 114.]
Dhib’he Azeem
Imame Aali Maqam Apna Saara Gharaana Allah Kee Raah Me Qurbaan Kar Chuke Hain. Islaam Kee Izzat-o-Hurmat Par Ali Asghar Jaise Ma’soom Farzand Kee Bhi Qurbaani De Chuke Hain. Apni Jaan Ka Nadharaana De Ke Tawheed-E-Ilaahi Kee Gawaahi De Chuke Hain, Aap Maqaame Sabr-o-Raza Par Istiqaamat Se Date Rahe, Qudsiyaane Falaq Mutahayyir Hain Ki Paikaraane Sabr-o-Raza Aise Bhi Hote Hain …………?
Imame Aali Maqam Ne Apne Naana Aur Abba Ke Khoon Aur Apni Ammi Ke Doodh Kee Laaj Rakh Lee, Husayn Kaamyaab Ho Gaye. Husayniyyat Zinda Ho Gayi. Waaqe’iy Yeh Khanwada Aur Is Ka Aali Waqaar Sarbaraah…….. Is Dhib’he Azeem Ka Sazaawaar Hai. Aaj Sayyidina Ibrahim ‘Alayh-is-Salam Kee Rooh Bhi Rashk Kar Rahi Thi Ki Yeh Sharaf Bhi Un Kee Nasl Ke Aik Farde Fareed ke Hisse Me Aaya. Husayn ‘Alayh-is-Salam Is Azeem Kaamyaabi Par Qudsiyaane Falaq Baashindagaane Kura-E-Arzi Ka Salaam Qubool Ho, Husayn Raahe Khuda Me Nadharana-E-Jaan Pesh Kar Ke Aur Mulukiyyat Aur Aamiriyyat Ke Andhero’n Me Apne Khoon Ke Charaagh Raushan Kar Ke Dhurriyyate Ibrahim Kee Muhaafizat Kee Alaamat Ban Gaye, Shahdate Uzma Ne Unhein Wilaayate Mustafa SallAllahu Ta’ala ‘Alayhi Wa Aalihi Wa Sallam Ka Nishaana Bana Diya. Husayn RadiyAllahu Ta’ala ‘Anhu Qiyaamat Tak Ke Liye Islam kee Hifaazat Ka Sutoon Ban Gaye.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/115.]
Shahaadate Husayn Par Aasmaan Ka Nauha
Shahadate Husayn RadiyAllahu Ta’ala ‘Anhu Taarikhe Insaani Ka Aik Ghair Ma’mooli Waaqe’a Hai Ki Paighambar Ke Pairokaaro’n Ne Apne Nabi SallAllahu Ta’ala ‘Alayhi Wa Aalihi Wa Sallam Ke Nawaase Ko Be Dardi Se Shaheed Kar Ke Us Ka Sare Aqdas Neze Par Sajaaya. Yahi Nahin Khandane Rasool SallAllahu Ta’ala ‘Alayhi Wa Aalihi Wa Sallam Ke Shahzaado’n Aur As’haabe Husayn Ko Bhi Apne Intiqaam Ka Nishaanah Bana Kar Unhein Mout Ke Ghaat Utaar Diya. Un Ka Jurm Yeh Tha Ki Woh Aik Faasik Aur Faazir Kee Bay’at Kar Ke Deen Me Tehrif Ke Murtakib Nahin Huwe They, Unhone Usoolo’n Par Baatil Ke Saath Samjhote Se Saaf Inkaar Kar Diya Tha. Unhone Aamiriyyat Aur Mulookiyyat Ke Aage Sar Taslime Kham Karne Se Inkaar Kar Diya Tha, Unhone Insaan Ke Bunyaadi Huqooq Ke Ghaasibo’n Kee Hukoomat Kee Tauthiq Karne Kee Buzdili Nahinn Dikhaayi Thi. Husayn Ibn Ali ‘Alayhima-‘s-Salam Aur Un Ke 72 Jaan Nitharo’n Ke Khoon Se Karbala Kee Ret Hee Surkh Nahin Huwi, Balki Us Surkhi Ne Har Cheez Ko Apni Lapet Me Le Liya.
Muhaddithin Bayaan Karte Hain Ki Imame Aali Maqam Kee Shahadat Par Na Sirf Dunya Roi, Zameen Wa Aasmaan Ne Bhi Aansu Bahaae, Shahaadate Husayn Par Aasmaan Bhi Nauha Kuna’n Tha Insaan To Insaan Jinnat Ne Bhi Mazloome Karbala Kee Nohah Khwaani Kee. Muhaddithin Bayaan Karte Hain Ki Nawaasa-E-Rasool SallAllahu Ta’ala ‘Alayhi Wa Aalihi Wa Sallam Kee Shahadat Ke Waqt Bayt Al-Maqdis Me Jo Pat’thar Uthaaya Gaya Us Ke Neeche Se Khoon Nikala, Shahadate Husayn Ke Baa’d Mulke Shaam Me Bhi Jis Pat’thar Ko Hataaya Gaya Us Ke Niche Se Khoon Ka Chashmah Ubal Pada. Muhaddithin Ka Kehna Hai Ki Shahadate Husayn Par Pehle Aasmaan Surkh Ho Gaya. Phir Siyaah Ho Gaya. Sitaare Aik Dusre Se Takraane Lage Yu’n Lagta Tha Jaise Kaa’inaat Takra Kar Khatm Ho Jaayegi, Yoo’n Laga Jaise Qiyaamat Qaa’im Ho Gayi Ho Dunya Par Andhera Chha Gaya.
- Imam Tabarani Ne Aboo Qabil Se Sanade Hasan Ke Saath Riwayat Kiya Hai Ki :
لما قتل الحسين بن علي انکسفت الشمس کسفة حتي بدت الکواکب نصف النهار حتي ظننا أنهاهي
“Jab Sayyidina Imam Husayn RadiyAllahu Ta’ala ‘Anhu Ko Shaheed Kiya Gaya To Sooraj Ko Shadeed Gahan Lag Gaya Hatta Ki Do Pahar Ke Waqt Taare Namoodaar Ho Gaye Yaha’n Tak Ki Unhein Itminaan Hone Laga Ki Yeh Raat Hai.”
–
[Haythami Fi Majma’-uz-Zawa’id Wa Manba’-ul-Fawa’id, 09/197, Tabarani Fi Al-Mu’jam-ul-Kabir, Hadith -2838.]
- Imam Tabarani Ne Mu’jam-ul-Kabir Me Jamil Bin Zayd Se Riwayat Kee Hai Unhone Kaha :
لما قتل الحسين احمرت السماء
“Jab Husayn RadiyAllahu Ta’ala ‘Anhu Ko Shaheed Kiya Gaya To Aasmaan Surkh Ho Gaya.”
–
[Tabarani Fi Al-Mu’jam-ul-Kabir, Hadith-28377,
Haythami Fi Majma’-uz-Zawa’id Wa Manba’-ul-Fawa’id, 09/197.]
- Isa Bin Haarith Ak-Kindi Se Marwi Hai Ki :
لما قتل الحسين مکثنا سبعة أيام اذا صلينا العصر نظرنا الي الشمس علي أطراف الحيطان کأنها الملاحف المعصفرة و نظرنا إلي الکواکب يضرب بعضها بعضاً
“Jab Imam Husayn Ko Shaheed Kar Diya Gaya To Hum Saat Din Tak Thehre Rahe Jab Hum Asr Kee Namaaz Padhte To Hum Diwaaro’n Ke Kinaaro’n Se Sooraj Kee Taraf Dekhte To Goya Woh Zard Rang Kee Chaadarein Mehsoos Hota Aur Hum Sitaaro’n Kee Taraf Dekhte Un Me Se Baa’z, Baa’z Se Takraate.”
–
[Tabarani Fi Al-Mu’jam-ul-Kabir, Hadith-2839.]
- Imam Tabarani Mu’jam-ul-Kabir Me Muhammad Bin Sirin Se Riwayat Kee Hai. Fartmate Hain :
لم يکن في السماء حمرة حتي قتل الحسين
“Hazrat Imam Husayn RadiyAllahu Ta’ala ‘Anhu Kee Shahaadat Ke Waqt Aasmaan Par Surkhi Chhaayi Rahi.”
–
[Tabarani Fi Al-Mu’jam-ul-Kabir, Hadith-2840,
Haythami Fi Majma’-uz-Zawa’id Wa Manba’-ul-Fawa’id, 09/197.]
- Imam Tabarani Sayyidah Ummi Salamah RadiyAllahu Ta’ala ‘Anha Se Riwayat Bayan Karte Hain. Sayyidah Farmati Hain :
سمعت الجن تنوح علی الحسين بن علی رضى الله تعالى عنه
“Mein Ne Jinno’n Ko Suna Ki Woh Husayn Bin Ali Ke Qatl Par Nohah Kar Rahe Hain.”
–
[Tabarani Fi Al-Mu’jam-ul-Kabir, Hadith-2862, 2867,
Haythami Fi Majma’-uz-Zawa’id Wa Manba’-ul-Fawa’id, 09/199.]
- Imam Tabarani Ne Zuhri Se Riwayat Kiya Hai Ki Huzoor SallAllahu Ta’ala ‘Alayhi Wa Aalihi Wa Sallam Ne Farmaya :
لما قتل الحسين بن علی رضى الله تعالى عنه لم يرفع حجر بيت المقدس الا وجد تحته دم عبيط
“Jab Hazrat Husayn RadiyAllahu Ta’ala ‘Anhu Ko Shaheed Kar Diya Gaya To Bayt Al-Maqdis Ka Jo Pat’thar Bhi Uthaaya Jaata Us Ke Neeche Taaza Khoon Paaya Gaya.”
–
[Tabarani Fi Al-Mu’jam-ul-Kabir, Hadith-2834.]
- Imam Tabarani Ne Imam Zuhri Se Is Qism Kee Aik Our Riwayat Bhi Naqal Kee Hai. Unhone Kaha :
مارفع حجر بالشام يوم قتل الحسين بن علی الاعن دم
“Shahadate Husayn RadiyAllahu Ta’ala ‘Anhu Ke Din Shaam Me Jo Bhi Pat’thar Uthaaya Jaata To Woh Khoon Aalood Hota.”
–
[Tabarani Fi Al-Mu’jam-ul-Kabir, Hadith-2835,
Haythami Fi Majma’-uz-Zawa’id Wa Manba’-ul-Fawa’id, 09/194.]
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/115 Ta 118.]
Tahirul Qadri Books 
You must be logged in to post a comment.