Karbala Mein Shaam Ne Apne Par Phaila Diye. Sooraj Ne Farte Khauf Se Maghrib Kee Waadiyo’n Me Apna Munh Chhupa Liya. Aasmaan Kee Aankhein Khoon Ke Aansuo’n Se Bhar Gayi’n. Khandane Rasoole Hashimi Ke Aik Aik Fard Ko Qatl Karne Ke Baa’d Yazeediyo’n Ka Kaleja Thanda Na Huwa, Intiqaam Kee Aag Sard Na Hwi, Imam Husayn Aur Un Ke Jaan Nithaar Rufaqa’ Ke Laasho’n Par Ghode Daudne Lage, Ghodo’n Kee Taap Se Shehzadagaane Rasool SallAllahu Ta’ala ‘Alayhi Wa Aalihi Wa Sallam Ke Naazuk Jismo’n Ko Raund Daala. Yeh Naazuk Jism Pehle Hee Tegh-o-Teer Se Chhalni Ho Chuke They. Phir Khanwada-E-Ahl-E-Bayt Ke Khaymo’n Ko Aag Laga Dee Gayi. Sakeena Tamanche Khaa Chuki To Khaimo’n Ka Saamaan Bhi Loot Liya Gaya. Apne Paighambar Ke Gharaane Kee Barahna Sar Bibiyo’n Ko Qaidi Banaaya Gaya. Bimaare Karbala Zayn-ul-Aabidin Bhi Qaidi Ban Gaye. Shaheedaane Karbala Ke Saro’n Ko Kaat Kar Nezo’n Par Chadha Liya Gaya. Aur Aseeraane Karbala Ka Qaafila Sayyidah Zaynab RadiyAllahu Ta’ala ‘Anhu Kee Qiyaadat Me Shaheedo’n Ke Saro’n Ke Saath Koofa Kee Jaanib Rawaana Huwa. Shaam Ke Saaye Kuchh Aur Bhi Gehre Ho Gaye, Bibiyo’n Kee Barahna Saro’n Ko Raat Ne Apne Siyaah Aanchal Se Dhaanp Diya. Abhi Is Qaafile Kee Qiyaadat Bimaare Karbala Hazrat Zayn-ul-Aabidin Kar Rahe They. Us Waqt Un Kee Umr Terah Chawdah Baras Ke Qareeb Thi. Sayyidah Fatimat-uz-Zahra RadiyAllahu Ta’ala ‘Anha Kee Shahzaadi Zaynab RadiyAllahu Ta’ala ‘Anha Khawaateen Kee Dekh Bhaal Karti’n Ki Koi Baccha Qaafile Se Bichhad Na Jaaye, Kisi Bibi Ke Sar Se Dupatta Ludhak Na Jaaye.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/118_119.]
Category: Baab-03 : Dhib’he ‘Azeem Kee Takmeel
Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)
Isaa’i Raahib Ka Izhaare Aqeedat
Aseeraane Karbala Ka Qaafila Apni Manzil Kee Taraf Badh Raha Tha. Raaste Me Raat Ho Gayi, Chunanche “Faateheene Karbala” Ne Padaao Ka Faisla Kiya. Padaao Kee Jagah Ke Qareeb Hee Aik Girja Ghar Tha. Us Gije Me Aik Za’if-ul-Umr Isaa’i Raahin Rehta Tha. Bada Parhezgaar Aur Muttaqi Raahib Tha. Ibaadat Guzaar Bhi Tha Aur Khuda Taras Bhi. Use Jab Ma’loom Huwa Ki Qaafile Waale Apne Paighambar Ke Nawaase Aur Us Ke As’haab Ko Qatl Karne Ke Baa’d Un Ke Sar Le Kar Yazeed Ke Paas Jaa Rahe Hain To Us Ne Qaafile Ke Yazeedi Ameer Se Kaha : Mein Tumhein Das Hazaar Dinaar Dunga Shart Sirf Yeh Hai Ki Aaj Kee Raat Tumhaare Paighambar Ke Nawaase Ka Sar Mere Paas Rahega. Us Ke Liye Tum Padaao Hamaare Paas Karo. Tumhaari Khidmat Bhi Karunga Aur Tumhein Izzat Ke Saath Rawaana Karunga. Yazeedi Ameer Dunydaar Shakhs Tha Harse Dunya Ka Taalib, Us Ne Raahib Kee Sharaa’it Maan Lee’n Aur Husayn Ka Sar Us Raahib Ke Hawaale Kar Diya. Raahib Husayn RadiyAllahu Ta’ala ‘Anhu Ka Sar Le Kar Andar Chala Gaya. Raahib Ne Neze Se Sare Anwar Ko Utaara Aur Us Ko Khushbudaar Paani Se Dhoya Use Saaf Kiya Aur Khushbu Lagaayi, Khubshurat Ghilaaf Me Rakkha Aur Us Ke Paas Baith Gaya. Raat Bhar Chehra-E-Husayn RadiyAllahu Ta’ala ‘Anhu Kee Ziyaarat Me Masroof Raha. Woh Raahib Bayaan Karta Hai Ki Husayn ‘Alayh-is-Salam Ka Sar Pada Hai Aur Us Sar Se Noori Shu’aaein Uth Kar Arshe Mu’alla Tak Jaa Rahi Hain, Noor Ka Haala Sare Aqdas Ka Tawaaf Kar Raha Hai Jab Us Ne Yeh Kaifiyyat Dekhi To Saari Raat Qatl Husayn RadiyAllahu Ta’ala ‘Anhu Par Aansu Bahaata Raha. Husayn ‘Alayh-is-Salam Ke Ihtiraam Aur Tauqeer Ka Use Yeh Sila Mila Ki Sub’h Jab Baahar Nikla Rahmate Khudawandi Ne Use Apni Aaghosh Me Le Liya Us Ne Kalima Padha Aur Daa’ira-E-Islam Me Daakhil Ho Gaya. Aik Taraf Woh Shaqqi-ul-Qalb Ibn Sa’d Ke Sipaahi They Ki Be Adabi Ka Irtikaab Kar Ke Daulate Imaan Se Mahroom Ho Gaye Aur Aik Yeh Raahib Tha Ki Husayn Ke Sar Kee Izzat Karne Ke Sadqe Me Us Ka Daaman Imaab Kee Ne’mat Se Bhar Diya Gaya.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/119_120.]
Aik Qaatil Kee Biwi Kee Gawaahi
Riwaayat Mein Hain Ki Ibn Sa’d Ne Imame Aali Maqam Ke Sare Aqdas Ko Khooli Ke Haath Ibn Ziyaad Ke Darbaar Me Bheja Jab Khooli Hazrat Imam Husayn RadiyAllahu Ta’ala ‘Anhu Ka Sare Aqdas Le Kar Koofah Me Pahuncha To Qasre Imaarat Ka Darwaaza Badn Ho Chuka Yha Chunanhe Woh Sare Anwar Ko Apne Ghar Le Aaya Aur Aik Bartan Se Sare Anwar Ko Dhaanp Diya Us Kee Biwi Niwaare Sakht Naaraaz Huwi Ki Too Rasoole Khuda SallAllahu Ta’ala ‘Alayhi Wa Aalihi Wa Sallam Ke Nawaase Ka Sar Le Kar Aaya Hai Chunanche Woh Us Jagah Aa Baithi Jaha’n Imame Aali Maqam Ka Sare Aqdas Rakkha Tha. Woh Riwaayat Karti Hai :
قواﷲ مازلت انظر الی نور يسطع مثل العمود من السماء الي الاجانة ورايت طيراً بيضاء ترفرف حولها
“Khuda Kee Qasam Mein Ne Dekha Ki Aik Noor Baraabar Aasmaan Se Us Bartan Tak Sutoon Kee Maanind Chamak Raha Hai Aur Mein Ne Sufed Parinde Dekhe Jo Bartan Ke Ird Gird Mandla Rahe They.”
–
[Tabari Fi Tarikh Al-Umam Wa’l-Mulook Al-Ma’roof Tarikh At-Tabari, 06/33,
Ibn Athir Fi Al-Kamil Fi At-Tarikh, 04/80.]
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/120_121.]
Darbaare Yazeed Me
Ibn Ziyaad Ke Qasre Imaarat Ke Baa’d Aseeraane Karbala Ka Yeh Qaafila Jab Dimashq Me Yazeed Ke Darbaar Me Pahuncha To Woh Badbakht Us Waqt Masnade Shaahi Par Baitha Huwa Tha. Us Badbakht Ne Imame Aali Maqam Ke Dandaan Mubaarak Par Apni Chhadi Maari Aur Ash’aar Padhe Jin Ka Mafhoom Yeh Tha Ki Aaj Hum Ne Badr Me Apne Maqtoolin Ka Ka Badla Le Liya Hai, Us Badbakht Ne Apne Andar Chhupe Huwe Kufr Ko Zaahir Kar Diya. (Ibn Ziyaad Ke Darbaar Me Bhi Is Qism Ke Waaqe’aat Pesh Aaye They) Yeh Manzar Dekh Darbaar Me Maujood Aik Sahaabi Uthey Aur Yazeed Ko Us Harkat Se Baaz Rakhne Kee Koshis Kee Farmaya : Khuda Kee Qasam Mein Ne Apni Aankho’n Se Mustafa SallAllahu Ta’ala ‘Alayhi Wa Aalihi Wa Sallam Ko In Labo’n Ko Choomte Dekha Hai, Darbaar Me Qaysare Room Ka Safeer Jo Aik Isaa’i Bhi Masnad Nasheen Tha Us Ne Yazeed Ko Mukhaatib Karte Huwe Kaha Ki Tum Badbakht Aur Be Imaan Ho, Tum Ne Apne Paighambar Ke Nawaase Ko Shaheed Kar Ke Us Ka Sar Tan Se Juda Kar Diya Hai Aur Ab Apni Chhadi Se Is Muqaddas Sar Kee Be Hurmati Kar Rahe Ho, Mein Mazhaban Isaa’i Hoo’n Aik Ilaaqe Me Hamaare Paas Hazrat Isa ‘Alayh-is-Salam Kee Sawaari Ke Paao’n Ke Khur Hain, Hum Ne Unhein Mahfooz Kar Liya Hai Khuda Kee Qasam Aik Muddat Guzar Jaane Ke Baa’d Bhi Us Sawaari Ke Na’l Kee Izzat Karte Hain Jis Tarah Tum Apne Ka’bah Kee Izzat Karte Ho. Hum Apne Nabi Kee Sawaari Ke Qadmo’n Ka Yeh Ihtiraam Karte Hain, Har Saal Us Na’l Kee Ziyaarat Karte Hain Us Ka Adab Karte Hain. Badbakhto’n! Apne Paighambar Ke Shahzaade Ke Saath Yeh Sulook Kar Rahe Ho……! La’nat Hai Tumhaare Amal Aur Kirdaar Par, Yazeed Samajh Raha Tha Ki Husayn ‘Alayh-is-Salam Ko Qatl Kar Ke Us Ne Bahut Bada Ma’rika Sar Kar Liya Hai Ab Us Ke Khabare Musalsal Saamne Koi Deewaar Ban Kar Khada Na Hoga Ab Deen Kee Tehreef me Woh Aazaad Hoga Lekin Us Badbakht Ko Yeh Ma’loom Na Tha Ki Yazeediyyat Jeet Kar Bhi Haar Gayi Hai Aur Husayniyyat Bazaahir Haar Kar Bhi Jeet Gayi Hai.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/121_122.]
Ibn Ziyaad Ka Anjaam
Mukhtaar Thaqafi Ke Lashkar Ke Sip’he Saalaar Ne Ibn Ziyaad Ka Sar Qalam Kiya Aur Use Neze Par Chadha Kar Mukhtaar Thaqafi Ke Paas Bheja . Badbakht Ibn Ziyaad Ka Sar Mukhtaar Thaqafi Ke Saamne Rakkha Tha. Aik Saanp Kahin Se Namoodaar Huwa Woh Maqtooleen Ke Saro’n Ko Sunghta Raha Jab Mukhtaar Thaqafi Ke Qareeb Pahuncha To Us Ke Munh Me Daakhil Hota Aur Naak Ke Nathno’n Se Baahar Aata Aur Yeh Amal Us Ne Kai Baar Dohraaya Goya Zubaane Haal Se Keh Raha Tha Ki Yazeediyo’n! Tumhaare Chehro’n Par La’nat Bhejta Hoo’n. Ibn Ziyaad Qatl Huwa. Yazeed Barbaad Huwa Lekin Husayn ‘Alayh-is-Salam Zinda Hai Aur Qiyaamat Tak Husayn Zinda Rahega. Yazeed Mar Gaya Aaj Koi Yazeed Ka Naam Bhi Nahin Leta. Karbala Me Aaj Husayn RadiyAllahu Ta’ala ‘Anhu Kee Qabr Bhi Zinda Hai. Jab Ki Dimashq Me Yazeed Kee Qabr Bhi Murdah Hai Waha’n Har Lamha La’nat Baras Rahi Hai Lekin Saari Dunya Husayn ‘Alayh-is-Salam Kee Qabr Par Salat-o-Salam Ke Phool Nichhaawar Kar Rahi Hai.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/122.]
Shu’oore Karbala Se Paighaame Karbala Tak
Shahaadate Husayn RadiyAllahu Ta’ala ‘Anhu Baa’d Kaa’inaate Insaani Ko Do Kirdaar Mil Gaye. Yazeediyyat Jo Badbakhti Zulm, Isitehsaal, Jabar, Tafreqa Parwari, Qatl-o-Ghaaratgiri Aur Khoon Aashaami Ka Iste’aara Ban Gayi Aur Husayniyyat Jo Adal, Aman, Wafa Aur Tahaffuze Deene Mustafa SallAllahu Ta’ala ‘Alayhi Wa Aalihi Wa Sallam Kee Alaamat Thehri, Qiyaamat Tak Husayn Bhi Zinda Rahega Aur Husayniyyat Ke Parcham Bhi Qiyaamat Tak Lehraate Rahenge, Yazeed Qiyaamat Tak Ke Liye Murdah Hai Aur Yazeediyyat Bhi Qiyaamat Tak Ke Liye Murdah Hai, Husayn RadiyAllahu Ta’ala ‘Anhu Kee Rooh Rege Karbala Se Phir Pukaar Rahi Hai …………Aaj Sayyidah Zaynab RadiyAllahu Ta’ala ‘Anha Kee Rooh Ujde Huwe Khaimo’n Se Hamein Sada De Rahi Hai ……… Aaj Ali Akbar Aur Ali Asghar Ke Khoon Ka Aik Aik Qatrah Darya-E-Furaat Ka Shuhda-E-Karbala Ke Khoon Se Rangeen Hone Waala Kinaarah Hamein Aawaaz De Raha Hai Ki Husayn ‘Alayh-is-Salam Se Mahabbat Karne Waalo’n! Husayniyyat Ke Kirdaar Ko Apne Qaul-o-Amal Me Zinda Karo ……… Har Daur Ke Yazeedo’n Ko Pehchaano’n ……… Yazeediyyat Ko Pehchaano’n ……… Yazeediyyat Tumhein Todne Aur Tumhaare Ittehaad Ko Paarah Paarah Karne Ke Liye Sar Garm Amal Hai, Husayniyyat Tumhein Jodne Ke Liye Hai ……… Husayniyyat Ukhuwwat Mahabbat Aur Wafa Kee Alambardaar Hai, Yazeediyyat Islaam Kee Qadrein Mitaane Ka Naam Hai ……… Yazeediyyat Jahaalat Ka Aur Husayniyyat Ilm Ka Naam Hai ……… Yazeed Zulm Ka Aur Husayn Amn Ka Naam Hai ……… Yazeed Andhere Kee Alaamat Hai Aur Husayn Raushni Ka Isti’aarah Hai ……… Yazeediyyat Pasti Aur Zillat Ka Naam Hai Jab Ki Husayniyyat Insaaniyyat Kee Naf’a Bakhshi Ka Naam Hai………
Aa’iye Sab Mil Kar Yazeediyyat Ke Khilaaf Aik Ahed Karein Aur Waqt Ke Yazeedo’n Ke Qasre Imaarat Ko Paash Paash Kar De’n, Musalmaano’n! Yazeediyyat Ka Takhta Ulatne, Zulm-o-Isitehsaal Ka Naam-o-Nishaan Mitaane Aur Ghareeb Dushmani Par Mabni Nizaam Ko Paash Paash Karne Liye Utho, Apne Andar Husayni Kirdaar Paida Karo Aur Karbala-E-Asr Me Aik Naya Ma’rika Bapa Kar Do, Aik Nayi Waadi Furaat Ko Apne Lahu Se Rangeen Bana Do, Apni Jaan Aur Apne Amwaal Kee Qurbaani De Kar Mustafawi Inqilaab Kee Raah Hamwaar Karo, Taa Ki Ufuqe Aalam Par Mustafawi Inqilaab Ka Sawera Tuloo’ Huwa Aur Husayn RadiyAllahu Ta’ala ‘Anhu Ke Naam Par Yazeediyyat Ka Aakhiri Nishaan Bhi Mit Jaae. Dilo’n Kee Saltanat Husayni Kirdaar Ke Saath Aabaad Karein Aur Apni Sar Zameen Ko Yazeedi Fitno’n Se Yaksar Paak Kar De’n. Is Khitte Ko Hum Aik Baar Phir Ahl-E-Bayt Aur Sahaba-E-Kiram Kee Muhabbato’n ka Markaz-o-Mehwar Bana De’n, Fitna-E-Fasaad, Jang, Qatl-o-Ghaaratgiri Kee Aag Ko Bujha Kar Husayn ‘Alayh-is-Salam Ke Jalaaye Huwe Charaaghe Amn Se Apne Zaahir-o-Baatin Ke Andhere Dur Karein Aur Sar Zameene Pakistan Ko Aman Ka Gehwaarah Bana De’n Ki Pakistan Hamaari Hee Nahin Poori Millate Islamiya Kee Amaanat Hai. Yeh Khitta Deeda Dil Aalame Islam Kee Pehli Difaa’iy Line Hai. Aa’iye Ise Islaam Ka Naaqaabile Taskheere Qil’a Bana De’n.
Musalmano’n! Husayni Mission Ke Charaagh Jalaane Aur Huzoor SallAllahu Ta’ala ‘Alayhi Wa Aalihi Wa Sallam Ke Azeem Sahabah RadiyAllahu Ta’ala ‘Anhum Ke Naqshe Qadam Ujaagar Karne Ke Liye Haath Me Haath De Kar Aik Ho Jaao Yahi Waqt Kee Aawaaz Hai Ki Shi’aa Sunni Ikatthe Ho Kar Aalame Kufr Ke Khilaaf Aik Jaaein. Apne Andar Kee Nafrato’nKo Mita Do, Kadoorato’n Ko Khatm Kar Do Ab Hamein Basti Basti Qarya Qarya Muhabbato’n Ke Charaagh Jalaana Honge. Madine Se Karbala Tak Safar Me Qurbaniyo’n Kee An Ginat Daastaanein Bikhri Huwi Hain. In Daastaano’n Ko Apna Shi’aar Bana Lo, Shu’oore Karbala Ko Har Sat’h Par Zinda Karo, Taarikhe Karbala Aik Waaqe’a Nahin Aik Tehreek Hai. Shu’oore Karbala Ko Aik Awaami Tehreek Bana Do. Shi’aa Sunni Bhaai Bhaai Hain Inhein Bhaai Ban Kar Islaam Kee Sar Bulandi Ke Liye Aur Qaumo’n Kee Biraadari Me Apne Khoye Huwe Maqaam Ke Liye Aik Saath Jidd-o-Jahd Karna Hogi, Dushmanane Islam Musalmano’n Ke Isi Ittihaad Se Khaa’if Hain. Apne Qaul-o-Amal Se Unhein Bada Do Ki Hum Aik Hain, Baanho’n Me Baanhein Daal Kar Quroone Oola Ke Musalmano’n Jaisi Ukhuwwate Islaami Ka Muzaahara Karo.
Aalami Saamraaj Hamein Firqa Waariyyat Me Uljha Kar Hamein Ilm Kee Raushni Se Mahroom Rakhna Chaahta Hai. Uloome Jadeedah Aur Jadeedtar Technology Ko Hamaare Liye Shajre Mamnoo’a Qaraar Dena Chaahta Hai. Woh Apne Mazmoom Iraado’n Ko Usi Waqt Paaya-E-Takmeel Tak Pahuncha Sakta Hai Jab Hum Apni Ijtimaa’iy Quwwat Firqa Waariyyat kee Nazar Karte Rahenge. Hamaara Ittihaad Aalami Saamraaj Kee Maut Hai. Shi’aa Aur Sunni Utthey Aur Haath Me Haath De Kar Dushmanaane Islaam Kee Saazisho’n Ko Khaak Me Mila De’n. Uttho! Nafrato’n Aur Kadoorato’n Ke But Paash Paash Kar Do ……… Taarikh Ka Rookh Badar Do ……… Aalame Kufr Ke Khilaaf Seesa Pilaayi Deewaar Ban Jaao Aur Allah Kee Rassi Mazbooti Se Thaam Lo Ki Yahi Shu’oore Karbal Hai ……… Yahi Paighaame Karbala Hai ……… Isi Paighaam Kee Khushbu Ka Parcham Le Kar Niklo Ki Manzilein Tumhaare Qadam Choomne Ke Liye Betaab Hain.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/122 Ta 125.]
۞ ۞ ۞
Tahirul Qadri Books 