Author: tahirulqadribooks

Posted in Baab-03 : Dhib’he ‘Azeem Kee Takmeel, Dhibhe 'Azeem

Ma’soom Ali Asghar Kee Shahaadat

Posted on by tahirulqadribooks

Ali Akbar Aur Qaasim Kee Laasho’n Ko Aik Saath Lita Kar Hazrat Imam Husayn RadiyAllahu Ta’ala ‘Anhu Aik Lamha Ke Liye Khaime Ke Darwaaze Par Baithey, Dukh Aur Karb Kee Tasweer Bane Kisi Gehri Soch Me Gharq They. Zubaane Haal Se Keh Rahe They Naan Jaan! Aap SallAllahu Ta’ala ‘Alayhi Wa Aalihi Wa Sallam Kee Ummat Ne Aap SallAllahu Ta’ala ‘Alayhi Wa Aalihi Wa Sallam Ke Gulshan Ko Taaraaj Kar Diya Hai ……… Aap SallAllahu Ta’ala ‘Alayhi Wa Aalihi Wa Sallam Ke Shahzaade Khoon Me Nahaaye Huwe Hain ……… Woh Dekhiye Ali Akbar Aur Qasim Ke Laashe Pade Hain ……. Ab Kuchh Der Baa’d Khaimo’n Ko Aag Laga Dee Jaayegi ……. Laasho’n Par Ghode Daudaaye Jaaeinge ……….. Naana …..! Aap Kee Betiyo’n Se Ridaaein Chhin Lee Jaaeingi ……… Unhein Qaidi Bana Kar Shaam Ke Baazaaro’n Me Phiraaya Jaaega………

 

Khayaalaat Ka Silsila Us Waqt Toota Jab Bibiyo’n Ne Khaimo’n Ke Andar Se Ali Asghar Ko Aap Ke Paas Bhej Diya. Imame Aali Maqam Ne Apne Nanhe Munne Bete Ko Apni Goud Me Sameta, Be Saakhta Pyaar Kiya Aur Us Ka Sar Munh Choom Kar Aane Waale Lamhaat Ke Liye Naseehatein Farmaane Lage Ki Bani Asad Ke Qabile Ke Aik Badbakht Ne Teer Maara Jo Ma’soom Ali Asghar Ke Halqoom Me Paiwast Ho Gaya. Nanha Baccha Apne Hee Khoon Me Naha Gaya. Imame Aali Maqam Ne Us Ma’soom Ke Khoon Se Chullu Bhar Kar Aasmaan Kee Taraf Uchhal Diya Ki Baari Ta’ala Hum Teri Raza Aur Khushi Ke Talabgaar Haim………..Nanhe Ali Asghar Kee Yeh Qurbani Qubool Farma. Ibn Kathir Kee Riwaayat Hai Jise Tabari Ne Bhi Naqal Kiya Hai Ki Hazrat Ali Asghar Kee Wilaadat Bhi Maidane Karbala Hee Me Huwi Thi, Bibiyo’n Ne Nau Maulood Ali Asghar Ko Hazrat Imam Husayn RadiyAllahu Ta’ala ‘Anhu Ke Paas Is Liye Bheja Tha Ki Woh Nau Maulood Ke Kaan Me Adhaan Kahein Idhar Imame Aali Maqam Ne AllahuAkbar Ke Alfaaz Ada Kiye Udhar Yazeedi Lashkar Kee Taraf Se Teer Aaya Jo Ali Asghar Ke Gale Se Paar Ho Gaya Aur Un Kee Ma’soom Rooh Qafase Unsuri Se Parwaaz Kar Gayi. Baa’z Riwaayaat Ke Mutaabiq Shahaadat Ke Waqt Ali Asghar Kee Umr Chheh Maah Thi Aur Woh Pyaase They Imame Aali Maqam Kee Khidmat Me Unhein Is Liye Rawaana Kiya Gaya Ki Yazeediyo’n Se Kaha Jaaye Ki Hamaara Paani Tum Ne Band Kar Diya Hai Lekin Is Ma’soom Bacche Ne Tumhaara Kya Bigaada Hai Is Ke Liye Paani De Do.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/108_109.]

Posted in Baab-03 : Dhib’he ‘Azeem Kee Takmeel, Dhibhe 'Azeem

Ghairate Husayn Ke Munaafi Riwaayat Ka Tajziya

Posted on by tahirulqadribooks

Mein Samajhta Hoo’n Ki Paani Maangne Kee Pur Riwaayat Imame Aali Maqam Kee Ghairat Aur Hamiyyat Munaafi Hai Woh Husayn RadiyAllahu Ta’ala ‘Anhu Jo Usoolo’n Kee Khaatir Maidaane Karbala Me Apne Shahzado’n Kee Qurbaaniya’n De Sakte Hain, Paani Kee Aik Bund ke Liye Yazeedi Lashkar Ke Saamne Daste Sawaal Daraaz Nahin Kar Sakte They. Husayn Ibn Ali RadiyAllahu Ta’ala ‘Anhuma Kee Ghairat Daste Sawaal Daraaz Karne Kee Ijaazat Nahin Deti. Agar Ali Asghar Ke Liye Paani Maangna Hee Tha To Us Ka Sawaal Yazeedi Lashkar Se Kyun Kiya Jaata? Rabbe Dhu-‘l-Jalaal Kee Izzat Kee Qasam! Agar Husayn RadiyAllahu Ta’ala ‘Anhu Paani Ke Liye Bargahe Khudawandi Me Haath Uthaate Aur Aasmaan Kee Taraf Ishaarah Karte  To Chaaro’n Taraf Se Ghataaein Daud Kar Aati’n Aur Karbala Kee Tapti Huwi Zameen Tak Kee Pyaas Bujh Jaati. Hazrat Isama’il ‘Alayh-is-Salam Kee Aidi Se Zam Zam Ka Chashma Phoot Nikla Tha Agar Nawasa-E-Rasool SallAllahu Ta’ala ‘Alayhi Wa Aalihi Wa Sallam Maidane Karbala Me Aidi Maarte To Karbala Se Laakho’n Chashme Phoot Padte, Magar Nahin Yeh Maqaame Raza Tha ………. Yeh Maqaame Tawakkal Tha ………… Yeh Maqaame Tafweez Aur Maqaame Sabr Tha ………… Yeh Marhala-E-Istiqaamat Tha ……… Yeh Lamha Imtihaan Ka Lamha Tha ………… Imame Aali Maqam RadiyAllahu Ta’ala ‘Anhu Aazmaa’ish Kee Us Ghadi Me Dagmaga Nahin Sakte They Kyun Ki Woh Baraahe Raast Huzoor Huzoor Nabiyy-E-Akram SallAllahu Ta’ala ‘Alayhi Wa Aalihi Wa Sallam Kee Tarbiyyat Yaafta They. Aap Sabr-o-Raza Ke Maqaam Par Istiqaamat Ka Khe Gira’n Bane Rahe Is Liye Ki Husayn RadiyAllahu Ta’ala ‘Anhu Kee Nigaah Me Mustafa SallAllahu Ta’ala ‘Alayhi Wa Aalihi Wa Sallam They Aur Mustafa SallAllahu Ta’ala ‘Alayhi Wa Aalihi Wa Sallam Kee Saamne Un Ka Khuda Tha. Chashme Falak Husayn ‘Alayh-is-Salam Kee Istiqaamat Ka Yeh Manzar Dekh Rahi Thi. Makeene Gumbade Khazra Ke Saath Fatimah Salamu Allah ‘Alayha Aur Ali KarramAllahu Ta’ala Waj’hah-ul-Karim Kee Nazarein Bhi Azm-o-Istiqlaal Ke Paikar Husayn ‘Alayh-is-Salam Ke Jaala-o-Jamaal Ka Nazaarah Kar Rahi Thi. Fatimah RadiyAllahu Ta’ala ‘Anha Zubaane Haal Se Keh Rahi Thi Beta Husayn! Mein Ne Tujhe Doodh Pilaaya Hai. Aaj Mein Karbala Ke Maidaan Me Apne Doodh Kee Laaj Dekhne Aayi Hoo’n. Beta! Mere Doodh Kee Laaj Rakhna. Dekhna Ali Akbar Aur Ali Asghar Kee Qurbani Ke Waqt Tere Qadam Dagmag Na Jaaein, Idhar Ali Murtaza Shere Khuda Farma Rahe They Husayn! Raahe Khuda Me Istiqaamat Se Date Rehna, Apne Baaba Ke Khoon Kee Laaj Rakhna. Udhar Muhabbate Husayn Me Tajdare Ka’inat SallAllahu Ta’ala ‘Alayhi Wa Aalihi Wa Sallam Karbala Ke Shaheedo’n Ka Khoon Aik Sheeshi Me Jam’a Farma Rahe They, Husayn! Mere Kandho’n Par Sawaari Kee Laaj Rakhna.

 

Sawaal Paida Hota Hai Ki Jab Huzoor Nabiyy-E-Akram SallAllahu Ta’ala ‘Alayhi Wa Aalihi Wa Sallam Se Le Kar Ali KarramAllahu Ta’ala Waj’hah-ul-Karim Aur Apni Ammi Jaa Fatimat-uz-Zahra Salamu Allah ‘Alayha Ke Muqaddas Chehre Saamne Ho’n To Husayn ‘Alayh-is-Salam Jaise Bahaadur Shakhs Ke Qadam Shaahraahe Shahdat Par Kaise Dagmaga Sakte Hain? Aap Yazeediyo’n Ke Saamne Daste Sawaal Kis Tarah Daraaz Kar Sakte They? Mout kee Aankho’n Me Aankhein Daal Kar Use Lalkaarne Waale Bhala Maut Se Kab Darte Hain. Jo Marna Nahin Jaante Unhein Jeene Ka Bhi Koi Haque Nahin Aur Jo Marna Jaante Hain Woh Allah Kee Raah Me Apni Jaan Ka Nadhraana Pesh Kar Ke Hayaate Jaawidaa’n Paa Lete Hain Isi Liye Kaha Gaya Ki Allah Kee Raah Me Maare Jaane Waalo’n Ko Murdah Na Kaho Woh Zinda Hain Magar Tumhein Un Kee Zindagi Ka Shu’oor Nahin. Husayn RadiyAllahu Ta’ala ‘Anhu Aazmaa’ish Kee Un Ghadiyo’n Me Saabit Qadam Rahe Is Liye Aaj Unhein Dhib’h-E-Isma’il Ka Fidya Dhib’h-E-Azeem Ke Maqaam Par Raunaq Afroz Hona Tha Aaj Husayn RadiyAllahu Ta’ala ‘Anhu Ko Du’a-E-Ibrahim ‘Alayh-is-Salam Kee Takmeel Ka Baa’ith Banta Tha.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/109 Ta 111.]

Posted in Baab-03 : Dhib’he ‘Azeem Kee Takmeel, Dhibhe 'Azeem

Qatle Husayn Asl Me Marge Yazeed Hai

Posted on by tahirulqadribooks

Nawasa-E-Rasool SallAllahu Ta’ala ‘Alayhi Wa Aalihi Wa Sallam Karbala Ke Maidaan Me Khada Hai ………… Honto’n Par Tashnagi Ke Kaante Chubh Rahe Hain ………… Aasmaan Se Sooraj Aah Barsa Raha Hai ………… Naynawa Ke Seene Se Furaat Beh Raha Tha Aaj Nawasa-E-Rasool SallAllahu Ta’ala ‘Alayhi Wa Aalihi Wa Sallam Ke Ilaawah Yeh Paani Har Shakhs Ke Liye Aam Hai…………Imame Aali Maqam Ke Jaan Nithaar Aik Aik Kar Ke Raahe Haque Me Tawheed Kee Gawaahi Dete Dete Jaame Shahdat Nosh Kar Chuke Hain ………… Gulistaane Rasool Ujad Chuka Hai…………Chamanistaane Fatimah RadiyAllahu Ta’ala ‘Anha Ko Mout Kee Be Rahm Hawaaon Ne Apne Daaman Me Samet Rakkha Hai ……… Awn-o-Muhammad Bhi Rukhsaat Ho Chuke Hain…………Abbas Alamdaar Maqaame Shahadat Paa Chuke Hain…………Shahzaada Qasim Mout Ko Gale Se Laga Chuke Hain…………Shehzadh Ali Akbar Ka Be Gor-o-Kafan Laasha Rege Karbala Par Pada Hai. …………Ma’soom Ali Asghar Ka Khoon Bhi Fazaae Karbala Ko Rangeen Kar Gaya Hai…………Imame Aali Maqam Apne Jaan Nithaaro’n Ke Laashe Uthaate Uthaate Nidhaal Ho Chuke Hain…………Lekin…….. Ali Kee Shajaa’at, Bahaaduri Aur Jawaanmardi Par Dhalti Umr Ka Saaya Bhi Nahin Pada. Shere Khuda Hazrat Ali KarramAllahu Ta’ala Waj’hah-ul-Karim Ka Sher Apne Tamaam Athaathe Lutaane Ke Baa’d Bhi I’timaad Ka Noor Bikhra Huwa Hai, Ghode Par Sawaar Hote Hain, Zaynab RadiyAllahu Ta’ala ‘Anha Rikaab Thaamti Hain, Imaame Aali Maqaam Maidane Karbala Me Talwaar Liye Khade Hain, Yazeedi Asaakir Par Khaamoshi Chaayi Huwi Hai. Farzande Shere Khuda Ka Saamna Karne Se Har Koi Katra Raha Hai.Woh Jaante Hain Ki Madde Muqaabil Koun Khada Hai. Nawasa-E-Rasool Ko Pehchaante Hain Un Kee Azmat Aur Fazeelat Se Aagaah Hain. Unhein Ma’loom Hai Ki Un Ke Paighambar SallAllahu Ta’ala ‘Alayhi Wa Aalihi Wa Sallam Ka Farmaan Hai Ki Husayn Mujh Se Hai Aur Mein Husayn Se Hoo’n, Woh Jaante Hain Ki Nabze Husayn Nabze Rasool Hai, Lekin Maslahatein Paaon Kee Zanjeer Bani Huwi Hain. Mafaadaat Ne Honto’n Par Qafl Daal Rakkhi Hain. Laalach, Hars Aur Tam’a Ne Un Kee Aankho’n Par Pardah Daal Rakkha Hai Aur Nawasa-E-Rasool SallAllahu Ta’ala ‘Alayhi Wa Aalihi Wa Sallam Ko Qatl Kar Ke Darbaare Yazeed Me Masnade Shaahi Ka Qurb Haasil Karne Kee Aarzumand Hain. Yazeedi Lashkar Me Koi Nikal Kar Shehsawaare Karbala Ka Muqaabala Karne Kee Jur’at Na Kar Saka.

 

 

Yazeedi Lashkar Ne Jaan Nithaaraane Husayn RadiyAllahu Ta’ala ‘Anhu Kee Istiqaamat, Shujaa’at Aur Jur’at Dekh Kar Inferaadi Jang Band Kar Dee Thi, Jab Husayn Maqtal Me Aaye To Ijtima’iy Hamla Jaari Tha Lekin Pura Lashkar Bhi Ijtima’iy Taur Par Nawasa-E-Rasool SallAllahu Ta’ala ‘Alayhi Wa Aalihi Wa Sallam Par Hamla Karne Se Dar Raha Tha. Dur Dur Se Teer Chalaate Rahe, Kai Ghanto’n Tak Husayn ‘Alayh-is-Salam Ke Jism Par Talwaar Ka Zakhm Na Laga Kyun Ki Qareeb Aa Kar Ali KarramAllahu Ta’ala Waj’hah-ul-Karim Kee Shujaa’at Ke Waarith Se Jang Karne Ka Kisi Ko Hausla Na Huwa. Teero’n Kee Barsaat Me Imaame Aali Maqaam Ka Jisme At’har Chhalni Ho Gaya. Zakhmo’n Se Choor Imam Par Chaaro’n Taraf Se Hamla Kiya Gaya. Shimr Aur Yazeed Ke Badbakht Sipaahi Qareeb Aa Gaye, Yak Baargi Husayn RadiyAllahu Ta’ala ‘Anhu Ko Talwaaro’n Ke Narghe Me Le Liya Gaya. Aakhir Mardaana Waar Jang Karte Karte Shehsawaare Karbala Ghode Se Neeche Aa Gaye. Nezo’n Aur Talwaaro’n Se Bhi Imaame Aali Maqaam Ka Jism Chhalni Kar Diya Gaya.

 

Zindagi Ka Aakhiri Lamha Aa Pahuncha, Imaame Aali Maqaam Ne Daryaaft Farmaya Ki Kounsa Waqt Hai Jawaab Mila Namaz Ka Waqt Hai. Farmaya : Mujhe Apne Mawla Ke Huzoor Aakhiri Sajdah Kar Lene Do. Khoon Aaloodah Haatho’n Ke Saath Tayammum Kiya Aur Baargaahe Khudawandi Me Sajda Rez Ho Gaye Baari Ta’ala Yeh Zindagi Teri Hee Dee Huwi Hai Ise Teri Hee Raah Me Qurbaan Kar Raha Hoo’n Aye Khaaliqe Ka’inaat! Mera Yeh Aakhiri Sajda Qubool Ho. Badbakht Shimr Aage Badha Aur Chaaha Ki Imame Aali Maqam Ka Sar Tan Se Juda Kar De Ki Hazrat Imam Husayn ‘Alayh-is-Salam Nw Kaha : Mere Qaatil! Zara Mujhe Apna Seena To Dikha Kyun Ki Mere Naana Ne Mujhe Jahannami Kee Nishaani Bataayi Thi.

 

 

  1. Imam Ibn Asakir Ne Sayyidina Husayn Bin Ali RadiyAllahu Ta’ala ‘Anhuma Se Riwayat Kee Hai Ki Huzoor SallAllahu Ta’ala ‘Alayhi Wa Aalihi Wa Sallam Ne Irshaad Farmaya :

کأنی أنظر إلی کلب أبقع يلغ فی دماء اهل بيتی 

“Goya Ki Mein Aik Sufed Daagho’n Waale Kutte Ko Dekh Raha Hoo’n Jo Mere Ahl-E-Bayt Ke Khoon Me Munh Maar Raha Hai.”
–
[Hisam-ud-Deen Hindi Fi Kanz-ul-‘Ummal, Hadith-34322.]

 

 

  1. Muhammad Bin Amr Bin Hasan Bayan Karte Hain :

کنا مع الحسين بنهر کربلا فنظر إلي شمر ذي الجوشن فقال : صدق اﷲ ورسوله! فقال رسول اﷲ صلى الله تعالى عليه وآله وسلم کائي أنظر : إلي کلب أبقع يلغ في دماء أهل بيتي و کان شمر أبرص

“Hum Sayyidina Imam Husayn RadiyAllahu Ta’ala ‘Anhu Ke Saath Karbala Ke Darya Par Maujood They To Aap RadiyAllahu Ta’ala ‘Anhu Ne Shimr Ke Seene Kee Taraf Dekha Aur Farmaya : Allah Aur Us Ke Rasool SallAllahu Ta’ala ‘Alayhi Wa Aalihi Wa Sallam Farmaya Tha Ki Goya Mein Us Sufed Daagho’n Waale Kutte Kee Taraf Dekh Raha Hoo’n Jo Mere Ahl-E-Bayt Ke Khoon Me Munh Maar Raha Hai Aur Shimr Bars Ke Daagho’n Waala Tha.”
–
[Hisam-ud-Deen Hindi Fi Kanz-ul-‘Ummal, 13/672.]

 

Chunanche Aap RadiyAllahu Ta’ala ‘Anhu Ne Nishaani Dekh Kar Farmaya Haa’n Yeh Badbakhti Tera Hee Muqaddar Hai, Woh Badbakht Aage Badha Aur Sare Aqdas Ko Tan Se Juda Kar Diya. Idhar Rooh Ne Qafase Unsuri Se Parwaaz Kee Udhar Nida Aayi.

يَا أَيَّتُها النَّفْسُ الْمُطْمَئِنَّةُo ارْجِعِي إِلَى رَبِّكِ رَاضِيَةً مَّرْضِيَّةًo

“Aye Itminaan Paa Jaane Waale Nafs. Too Apne Rabb Kee Taraf Is Haal Me Laut Aa Ke Too Us Kee Raza Ka Talab Bhi Ho Aur Us Kee Raza Ka Matloob Ho Aur Tere Raza Us Kee Matloob Bhi(Goya Us Kee Raza Teri Matloob Ho Aur Teri Raza Us Kee Matloob)”

 

Husayn! Mein Tujh Par Raazi Ho Gaya. Aye Roohe Husayn! Mere Paas Laut Aa Jannat Ke Darwaaze Khule Hain, Hoor-o-Ghulaamaan Tere Muntazar Hain, Qudsiyaane Falaq Tere Intezaar Me Hain.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/111 Ta 114.]

Posted in Baab-03 : Dhib’he ‘Azeem Kee Takmeel, Dhibhe 'Azeem

Dhib’he Azeem

Posted on by tahirulqadribooks

Imame Aali Maqam Apna Saara Gharaana Allah Kee Raah Me Qurbaan Kar Chuke Hain. Islaam Kee Izzat-o-Hurmat Par Ali Asghar Jaise Ma’soom Farzand Kee Bhi Qurbaani De Chuke Hain. Apni Jaan Ka Nadharaana De Ke Tawheed-E-Ilaahi Kee Gawaahi De Chuke Hain, Aap Maqaame Sabr-o-Raza Par Istiqaamat Se Date Rahe, Qudsiyaane Falaq Mutahayyir Hain Ki Paikaraane Sabr-o-Raza Aise Bhi Hote Hain …………?

 

Imame Aali Maqam Ne Apne Naana Aur Abba Ke Khoon Aur Apni Ammi Ke Doodh Kee Laaj Rakh Lee, Husayn Kaamyaab Ho Gaye. Husayniyyat Zinda Ho Gayi. Waaqe’iy Yeh Khanwada Aur Is Ka Aali Waqaar Sarbaraah…….. Is Dhib’he Azeem Ka Sazaawaar Hai. Aaj Sayyidina Ibrahim ‘Alayh-is-Salam Kee Rooh Bhi Rashk Kar Rahi Thi Ki Yeh Sharaf Bhi Un Kee Nasl Ke Aik Farde Fareed ke Hisse Me Aaya. Husayn ‘Alayh-is-Salam Is Azeem Kaamyaabi Par Qudsiyaane Falaq Baashindagaane Kura-E-Arzi Ka Salaam Qubool Ho, Husayn Raahe Khuda Me Nadharana-E-Jaan Pesh Kar Ke Aur Mulukiyyat Aur Aamiriyyat Ke Andhero’n Me Apne Khoon Ke Charaagh Raushan Kar Ke Dhurriyyate Ibrahim Kee Muhaafizat Kee Alaamat Ban Gaye, Shahdate Uzma Ne Unhein Wilaayate Mustafa SallAllahu Ta’ala ‘Alayhi Wa Aalihi Wa Sallam Ka Nishaana Bana Diya. Husayn RadiyAllahu Ta’ala ‘Anhu Qiyaamat Tak Ke Liye Islam kee Hifaazat Ka Sutoon Ban Gaye.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/115.]

Posted in Baab-03 : Dhib’he ‘Azeem Kee Takmeel, Dhibhe 'Azeem

Shahaadate Husayn Par Aasmaan Ka Nauha

Posted on by tahirulqadribooks

Shahadate Husayn RadiyAllahu Ta’ala ‘Anhu Taarikhe Insaani Ka Aik Ghair Ma’mooli Waaqe’a Hai Ki Paighambar Ke Pairokaaro’n Ne Apne Nabi SallAllahu Ta’ala ‘Alayhi Wa Aalihi Wa Sallam Ke Nawaase Ko Be Dardi Se Shaheed Kar Ke Us Ka Sare Aqdas Neze Par Sajaaya. Yahi Nahin Khandane Rasool SallAllahu Ta’ala ‘Alayhi Wa Aalihi Wa Sallam Ke Shahzaado’n Aur As’haabe Husayn Ko Bhi Apne Intiqaam Ka Nishaanah Bana Kar Unhein Mout Ke Ghaat Utaar Diya. Un Ka Jurm Yeh Tha Ki Woh Aik Faasik Aur Faazir Kee Bay’at Kar Ke Deen Me Tehrif Ke Murtakib Nahin Huwe They, Unhone Usoolo’n Par Baatil Ke Saath Samjhote Se Saaf Inkaar Kar Diya Tha. Unhone Aamiriyyat Aur Mulookiyyat Ke Aage Sar Taslime Kham Karne Se Inkaar Kar Diya Tha, Unhone Insaan Ke Bunyaadi Huqooq Ke Ghaasibo’n Kee Hukoomat Kee Tauthiq Karne Kee Buzdili Nahinn Dikhaayi Thi. Husayn Ibn Ali ‘Alayhima-‘s-Salam Aur Un Ke 72 Jaan Nitharo’n Ke Khoon Se Karbala Kee Ret Hee Surkh Nahin Huwi, Balki Us Surkhi Ne Har Cheez Ko Apni Lapet Me Le Liya.

 

Muhaddithin Bayaan Karte Hain Ki Imame Aali Maqam Kee Shahadat Par Na Sirf Dunya Roi, Zameen Wa Aasmaan Ne Bhi Aansu Bahaae, Shahaadate Husayn Par Aasmaan Bhi Nauha Kuna’n Tha Insaan To Insaan Jinnat Ne Bhi Mazloome Karbala Kee Nohah Khwaani Kee. Muhaddithin Bayaan Karte Hain Ki Nawaasa-E-Rasool SallAllahu Ta’ala ‘Alayhi Wa Aalihi Wa Sallam Kee Shahadat Ke Waqt Bayt Al-Maqdis Me Jo Pat’thar Uthaaya Gaya Us Ke Neeche Se Khoon Nikala, Shahadate Husayn Ke Baa’d Mulke Shaam Me Bhi Jis Pat’thar Ko Hataaya Gaya Us Ke Niche Se Khoon Ka Chashmah Ubal Pada. Muhaddithin Ka Kehna Hai Ki Shahadate Husayn Par Pehle Aasmaan Surkh Ho Gaya. Phir Siyaah Ho Gaya. Sitaare Aik Dusre Se Takraane Lage Yu’n Lagta Tha Jaise Kaa’inaat Takra Kar Khatm Ho Jaayegi, Yoo’n Laga Jaise Qiyaamat Qaa’im Ho Gayi Ho Dunya Par Andhera Chha Gaya.

 

  1. Imam Tabarani Ne Aboo Qabil Se Sanade Hasan Ke Saath Riwayat Kiya Hai Ki :

لما قتل الحسين بن علي انکسفت الشمس کسفة حتي بدت الکواکب نصف النهار حتي ظننا أنهاهي

“Jab Sayyidina Imam Husayn RadiyAllahu Ta’ala ‘Anhu Ko Shaheed Kiya Gaya To Sooraj Ko Shadeed Gahan Lag Gaya Hatta Ki Do Pahar Ke Waqt Taare Namoodaar Ho Gaye Yaha’n Tak Ki Unhein Itminaan Hone Laga Ki Yeh Raat Hai.”
–
[Haythami Fi Majma’-uz-Zawa’id Wa Manba’-ul-Fawa’id, 09/197, Tabarani Fi Al-Mu’jam-ul-Kabir,  Hadith -2838.]

 

 

  1. Imam Tabarani Ne Mu’jam-ul-Kabir Me Jamil Bin Zayd Se Riwayat Kee Hai Unhone Kaha :

لما قتل الحسين احمرت السماء

“Jab Husayn RadiyAllahu Ta’ala ‘Anhu Ko Shaheed Kiya Gaya To Aasmaan Surkh Ho Gaya.”
–
[Tabarani Fi Al-Mu’jam-ul-Kabir, Hadith-28377,

Haythami Fi Majma’-uz-Zawa’id Wa Manba’-ul-Fawa’id, 09/197.]

 

 

  1. Isa Bin Haarith Ak-Kindi Se Marwi Hai Ki :

لما قتل الحسين مکثنا سبعة أيام اذا صلينا العصر نظرنا الي الشمس علي أطراف الحيطان کأنها الملاحف المعصفرة و نظرنا إلي الکواکب يضرب بعضها بعضاً

 “Jab Imam Husayn Ko Shaheed Kar Diya Gaya To Hum Saat Din Tak Thehre Rahe Jab Hum Asr Kee Namaaz Padhte To Hum Diwaaro’n Ke Kinaaro’n Se Sooraj Kee Taraf Dekhte To Goya Woh Zard Rang Kee Chaadarein Mehsoos Hota Aur Hum Sitaaro’n Kee Taraf Dekhte Un Me Se Baa’z, Baa’z Se Takraate.”
–
[Tabarani Fi Al-Mu’jam-ul-Kabir, Hadith-2839.]

 

 

  1. Imam Tabarani Mu’jam-ul-Kabir Me Muhammad Bin Sirin Se Riwayat Kee Hai. Fartmate Hain :

لم يکن في السماء حمرة حتي قتل الحسين

“Hazrat Imam Husayn RadiyAllahu Ta’ala ‘Anhu Kee Shahaadat Ke Waqt Aasmaan Par Surkhi Chhaayi Rahi.”
–
[Tabarani Fi Al-Mu’jam-ul-Kabir, Hadith-2840,

Haythami Fi Majma’-uz-Zawa’id Wa Manba’-ul-Fawa’id, 09/197.]

 

 

  1. Imam Tabarani Sayyidah Ummi Salamah RadiyAllahu Ta’ala ‘Anha Se Riwayat Bayan Karte Hain. Sayyidah Farmati Hain :

سمعت الجن تنوح علی الحسين بن علی رضى الله تعالى عنه

“Mein Ne Jinno’n Ko Suna Ki Woh Husayn Bin Ali Ke Qatl Par Nohah Kar Rahe Hain.”
–
[Tabarani Fi Al-Mu’jam-ul-Kabir, Hadith-2862, 2867,

Haythami Fi Majma’-uz-Zawa’id Wa Manba’-ul-Fawa’id, 09/199.]

 

 

  1. Imam Tabarani Ne Zuhri Se Riwayat Kiya Hai Ki Huzoor SallAllahu Ta’ala ‘Alayhi Wa Aalihi Wa Sallam Ne Farmaya :

لما قتل الحسين بن علی رضى الله تعالى عنه لم يرفع حجر بيت المقدس الا وجد تحته دم عبيط

“Jab Hazrat Husayn RadiyAllahu Ta’ala ‘Anhu Ko Shaheed Kar Diya Gaya To Bayt Al-Maqdis Ka Jo Pat’thar Bhi Uthaaya Jaata Us Ke Neeche Taaza Khoon Paaya Gaya.”
–
[Tabarani Fi Al-Mu’jam-ul-Kabir, Hadith-2834.]

 

 

  1. Imam Tabarani Ne Imam Zuhri Se Is Qism Kee Aik Our Riwayat Bhi Naqal Kee Hai. Unhone Kaha :

مارفع حجر بالشام يوم قتل الحسين بن علی الاعن دم

“Shahadate Husayn RadiyAllahu Ta’ala ‘Anhu Ke Din Shaam Me Jo Bhi Pat’thar Uthaaya Jaata To Woh Khoon Aalood Hota.”
–
[Tabarani Fi Al-Mu’jam-ul-Kabir, Hadith-2835,

Haythami Fi Majma’-uz-Zawa’id Wa Manba’-ul-Fawa’id, 09/194.]
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/115 Ta 118.]

Posted in Baab-03 : Dhib’he ‘Azeem Kee Takmeel, Dhibhe 'Azeem

Shaame Gharibaa’n

Posted on by tahirulqadribooks

Karbala Mein Shaam Ne Apne Par Phaila Diye. Sooraj Ne Farte Khauf Se Maghrib Kee Waadiyo’n Me Apna Munh Chhupa Liya. Aasmaan Kee Aankhein Khoon Ke Aansuo’n Se Bhar Gayi’n. Khandane Rasoole Hashimi Ke Aik Aik Fard Ko Qatl Karne Ke Baa’d Yazeediyo’n Ka Kaleja Thanda Na Huwa, Intiqaam Kee Aag Sard Na Hwi, Imam Husayn Aur Un Ke Jaan Nithaar Rufaqa’ Ke Laasho’n Par Ghode Daudne Lage, Ghodo’n Kee Taap Se Shehzadagaane Rasool SallAllahu Ta’ala ‘Alayhi Wa Aalihi Wa Sallam Ke Naazuk Jismo’n Ko Raund Daala. Yeh Naazuk Jism Pehle Hee Tegh-o-Teer Se Chhalni Ho Chuke They. Phir Khanwada-E-Ahl-E-Bayt Ke Khaymo’n Ko Aag Laga Dee Gayi. Sakeena Tamanche Khaa Chuki To Khaimo’n Ka Saamaan Bhi Loot Liya Gaya. Apne Paighambar Ke Gharaane Kee Barahna Sar Bibiyo’n Ko Qaidi Banaaya Gaya. Bimaare Karbala Zayn-ul-Aabidin Bhi Qaidi Ban Gaye. Shaheedaane Karbala Ke Saro’n Ko Kaat Kar Nezo’n Par Chadha Liya Gaya. Aur Aseeraane Karbala Ka Qaafila Sayyidah Zaynab RadiyAllahu Ta’ala ‘Anhu Kee Qiyaadat Me Shaheedo’n Ke Saro’n Ke Saath Koofa Kee Jaanib Rawaana Huwa. Shaam Ke Saaye Kuchh Aur Bhi Gehre Ho Gaye, Bibiyo’n Kee Barahna Saro’n Ko Raat Ne Apne Siyaah Aanchal Se Dhaanp Diya. Abhi Is Qaafile Kee Qiyaadat Bimaare Karbala Hazrat Zayn-ul-Aabidin Kar Rahe They. Us Waqt Un Kee Umr Terah Chawdah Baras Ke Qareeb Thi. Sayyidah Fatimat-uz-Zahra RadiyAllahu Ta’ala ‘Anha Kee Shahzaadi Zaynab RadiyAllahu Ta’ala ‘Anha Khawaateen Kee Dekh Bhaal Karti’n Ki Koi Baccha Qaafile Se Bichhad Na Jaaye, Kisi Bibi Ke Sar Se Dupatta Ludhak Na Jaaye.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/118_119.]

Posted in Baab-03 : Dhib’he ‘Azeem Kee Takmeel, Dhibhe 'Azeem

Isaa’i Raahib Ka Izhaare Aqeedat

Posted on by tahirulqadribooks

Aseeraane Karbala Ka Qaafila Apni Manzil Kee Taraf Badh Raha Tha. Raaste Me Raat Ho Gayi, Chunanche “Faateheene Karbala” Ne Padaao Ka Faisla Kiya. Padaao Kee Jagah Ke Qareeb Hee Aik Girja Ghar Tha. Us Gije Me Aik Za’if-ul-Umr Isaa’i Raahin Rehta Tha. Bada Parhezgaar Aur Muttaqi Raahib Tha. Ibaadat Guzaar Bhi Tha Aur Khuda Taras Bhi. Use Jab Ma’loom Huwa Ki Qaafile Waale Apne Paighambar Ke Nawaase Aur Us Ke As’haab Ko Qatl Karne Ke Baa’d Un Ke Sar Le Kar Yazeed Ke Paas Jaa Rahe Hain To Us Ne Qaafile Ke Yazeedi Ameer Se Kaha : Mein Tumhein Das Hazaar Dinaar Dunga Shart Sirf Yeh Hai Ki Aaj Kee Raat Tumhaare Paighambar Ke Nawaase Ka Sar Mere Paas Rahega. Us Ke Liye Tum Padaao Hamaare Paas Karo. Tumhaari Khidmat Bhi Karunga Aur Tumhein Izzat Ke Saath Rawaana Karunga. Yazeedi Ameer Dunydaar Shakhs Tha Harse Dunya Ka Taalib, Us Ne Raahib Kee Sharaa’it Maan Lee’n Aur Husayn Ka Sar Us Raahib Ke Hawaale Kar Diya. Raahib Husayn RadiyAllahu Ta’ala ‘Anhu Ka Sar Le Kar Andar Chala Gaya. Raahib Ne Neze Se Sare Anwar Ko Utaara Aur Us Ko Khushbudaar Paani Se Dhoya Use Saaf Kiya Aur Khushbu Lagaayi, Khubshurat Ghilaaf Me Rakkha Aur Us Ke Paas Baith Gaya. Raat Bhar Chehra-E-Husayn RadiyAllahu Ta’ala ‘Anhu Kee Ziyaarat Me Masroof Raha. Woh Raahib Bayaan Karta Hai Ki Husayn ‘Alayh-is-Salam Ka Sar Pada Hai Aur Us Sar Se Noori Shu’aaein Uth Kar Arshe Mu’alla Tak Jaa Rahi Hain, Noor Ka Haala Sare Aqdas Ka Tawaaf Kar Raha Hai Jab Us Ne Yeh Kaifiyyat Dekhi To Saari Raat Qatl Husayn RadiyAllahu Ta’ala ‘Anhu Par Aansu Bahaata Raha. Husayn ‘Alayh-is-Salam Ke Ihtiraam Aur Tauqeer Ka Use Yeh Sila Mila Ki Sub’h Jab Baahar Nikla Rahmate Khudawandi Ne Use Apni Aaghosh Me Le Liya Us Ne Kalima Padha Aur Daa’ira-E-Islam Me Daakhil Ho Gaya. Aik Taraf Woh Shaqqi-ul-Qalb Ibn Sa’d Ke Sipaahi They Ki Be Adabi Ka Irtikaab Kar Ke Daulate Imaan Se Mahroom Ho Gaye Aur Aik Yeh Raahib Tha Ki Husayn Ke Sar Kee Izzat Karne Ke Sadqe Me Us Ka Daaman Imaab Kee Ne’mat Se Bhar Diya Gaya.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/119_120.]

Posted in Baab-03 : Dhib’he ‘Azeem Kee Takmeel, Dhibhe 'Azeem

Aik Qaatil Kee Biwi Kee Gawaahi

Posted on by tahirulqadribooks

Riwaayat Mein Hain Ki Ibn Sa’d Ne Imame Aali Maqam Ke Sare Aqdas Ko Khooli Ke Haath Ibn Ziyaad Ke Darbaar Me Bheja Jab Khooli Hazrat Imam Husayn RadiyAllahu Ta’ala ‘Anhu Ka Sare Aqdas Le Kar Koofah Me Pahuncha To Qasre Imaarat Ka Darwaaza Badn Ho Chuka Yha Chunanhe Woh Sare Anwar Ko Apne Ghar Le Aaya Aur Aik Bartan Se Sare Anwar Ko Dhaanp Diya Us Kee Biwi Niwaare Sakht Naaraaz Huwi Ki Too Rasoole Khuda SallAllahu Ta’ala ‘Alayhi Wa Aalihi Wa Sallam Ke Nawaase Ka Sar Le Kar Aaya Hai Chunanche Woh Us Jagah Aa Baithi Jaha’n Imame Aali Maqam Ka Sare Aqdas Rakkha Tha. Woh Riwaayat Karti Hai :

قواﷲ مازلت انظر الی نور يسطع مثل العمود من السماء الي الاجانة ورايت طيراً بيضاء ترفرف حولها

“Khuda Kee Qasam Mein Ne Dekha Ki Aik Noor Baraabar Aasmaan Se Us Bartan Tak Sutoon Kee Maanind Chamak Raha Hai Aur Mein Ne Sufed Parinde Dekhe Jo Bartan Ke Ird Gird Mandla Rahe They.”
–
[Tabari Fi Tarikh Al-Umam Wa’l-Mulook Al-Ma’roof Tarikh At-Tabari, 06/33,

Ibn Athir Fi Al-Kamil Fi At-Tarikh, 04/80.]
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/120_121.]

Posted in Baab-03 : Dhib’he ‘Azeem Kee Takmeel, Dhibhe 'Azeem

Darbaare Yazeed Me

Posted on by tahirulqadribooks

Ibn Ziyaad Ke Qasre Imaarat Ke Baa’d Aseeraane Karbala Ka Yeh Qaafila Jab Dimashq Me Yazeed Ke Darbaar Me Pahuncha To Woh Badbakht Us Waqt Masnade Shaahi Par Baitha Huwa Tha. Us Badbakht Ne Imame Aali Maqam Ke Dandaan Mubaarak Par Apni Chhadi Maari Aur Ash’aar Padhe Jin Ka Mafhoom Yeh Tha Ki Aaj Hum Ne Badr Me Apne Maqtoolin Ka Ka Badla Le Liya Hai, Us Badbakht Ne Apne Andar Chhupe Huwe Kufr Ko Zaahir Kar Diya. (Ibn Ziyaad Ke Darbaar Me Bhi Is Qism Ke Waaqe’aat Pesh Aaye They) Yeh Manzar Dekh Darbaar Me Maujood Aik Sahaabi Uthey Aur Yazeed Ko Us Harkat Se Baaz Rakhne Kee Koshis Kee Farmaya : Khuda Kee Qasam Mein Ne Apni Aankho’n Se Mustafa SallAllahu Ta’ala ‘Alayhi Wa Aalihi Wa Sallam Ko In Labo’n Ko Choomte Dekha Hai, Darbaar Me Qaysare Room Ka Safeer Jo Aik Isaa’i Bhi Masnad Nasheen Tha Us Ne Yazeed Ko Mukhaatib Karte Huwe Kaha Ki Tum Badbakht Aur Be Imaan Ho, Tum Ne Apne Paighambar Ke Nawaase Ko Shaheed Kar Ke Us Ka Sar Tan Se Juda Kar Diya Hai Aur Ab Apni Chhadi Se Is Muqaddas Sar Kee Be Hurmati Kar Rahe Ho, Mein Mazhaban Isaa’i Hoo’n Aik Ilaaqe Me Hamaare Paas Hazrat Isa ‘Alayh-is-Salam Kee Sawaari Ke Paao’n Ke Khur Hain, Hum Ne Unhein Mahfooz Kar Liya Hai Khuda Kee Qasam Aik Muddat Guzar Jaane Ke Baa’d Bhi Us Sawaari Ke Na’l Kee Izzat Karte Hain Jis Tarah Tum Apne Ka’bah Kee Izzat Karte Ho. Hum Apne Nabi Kee Sawaari Ke Qadmo’n Ka Yeh Ihtiraam Karte Hain, Har Saal Us Na’l Kee Ziyaarat Karte Hain Us Ka Adab Karte Hain. Badbakhto’n! Apne Paighambar Ke Shahzaade Ke Saath Yeh Sulook Kar Rahe Ho……! La’nat Hai Tumhaare Amal Aur Kirdaar Par, Yazeed Samajh Raha Tha Ki Husayn ‘Alayh-is-Salam Ko Qatl Kar Ke Us Ne Bahut Bada Ma’rika Sar Kar Liya Hai Ab Us Ke Khabare Musalsal Saamne Koi Deewaar Ban Kar Khada Na Hoga Ab Deen Kee Tehreef me Woh Aazaad Hoga Lekin Us Badbakht Ko Yeh Ma’loom Na Tha Ki Yazeediyyat Jeet Kar Bhi Haar Gayi Hai Aur Husayniyyat Bazaahir Haar Kar Bhi Jeet Gayi Hai.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/121_122.]

Posted in Baab-03 : Dhib’he ‘Azeem Kee Takmeel, Dhibhe 'Azeem

Ibn Ziyaad Ka Anjaam

Posted on by tahirulqadribooks

Mukhtaar Thaqafi Ke Lashkar Ke Sip’he Saalaar Ne Ibn Ziyaad Ka Sar Qalam Kiya Aur Use Neze Par Chadha Kar Mukhtaar Thaqafi Ke Paas Bheja . Badbakht Ibn Ziyaad Ka Sar Mukhtaar Thaqafi Ke Saamne Rakkha Tha. Aik Saanp Kahin Se Namoodaar Huwa Woh Maqtooleen Ke Saro’n Ko Sunghta Raha Jab Mukhtaar Thaqafi Ke Qareeb Pahuncha To Us Ke Munh Me Daakhil Hota Aur Naak Ke Nathno’n Se Baahar Aata Aur Yeh Amal Us Ne Kai Baar Dohraaya Goya Zubaane Haal Se Keh Raha Tha Ki Yazeediyo’n! Tumhaare Chehro’n Par La’nat Bhejta Hoo’n. Ibn Ziyaad Qatl Huwa. Yazeed Barbaad Huwa Lekin Husayn ‘Alayh-is-Salam Zinda Hai Aur Qiyaamat Tak Husayn Zinda Rahega. Yazeed Mar Gaya Aaj Koi Yazeed Ka Naam Bhi Nahin Leta. Karbala Me Aaj Husayn RadiyAllahu Ta’ala ‘Anhu Kee Qabr Bhi Zinda Hai. Jab Ki Dimashq Me Yazeed Kee Qabr Bhi Murdah Hai Waha’n Har Lamha La’nat  Baras Rahi Hai Lekin Saari Dunya Husayn ‘Alayh-is-Salam Kee Qabr Par Salat-o-Salam Ke Phool Nichhaawar Kar Rahi Hai.
–
[Dhib’he ‘Azeem(Dhib’he Isma’il ‘Alayh-is-Salam Se Dhib’he Husayn RadiyAllahu Ta’ala ‘Anhu Tak)/122.]