2 Doosra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Sahibzado’n Kee Shahadat

Posted on July 31, 2016August 23, 2016 by tahirulqadribooks

As’ad Bin Shurayh Alal Sub’h Hazrat Ibrahim Aur Hazrat Muhammad Ko Le Kar Us Qaafile Kee Jaanib Rawaana Huwe, Lekin Afsos Ki Yeh Qaafila Kuchh Der Pehle Rawana Ho Chuka Tha, Us Ne Qaafile Kee Raah Kee Taraf Nazar Daudaayi Thode Hee Faasle Par Kuchh Gard Udti Huwi Nazar Aa Rahi Thi, As’ad Bin Shurayh Ne Kaha : Baccho’n ! Woh Gard Usi Qaafile Kee Hai, Tumhare Saath Mera Jaana Aur Daudna Kuchh Munasib Nahin Hai Balki Maslahat Ke Khilaaf Hai Tum Daud Pado Jaldi Hee Us Qaafile Ke Saath Mil Jaaoge! Ma’soom Bacchho’n Ne Us Ka Shukriya Ada Kiya Aur Aik Doosre Ke Haath Pakad Kar Qaafile Keee Jaanib Daud Pade, Bacche Bahut Kam Umr They Raasta Khaardaar Tha Tezi Se Dauda Bhi Na Jaata Tha, Kuchh Hee Aage Chale They Ki Chhote Bacche Ibrahim Ke Paaun Me Kaanta Chubh Gaya, Us Ko Sakht Taklif Huwi Woh Baithna Chaahta Tha Aur Bhaai Use Giriftaari Ke Khauf Se Aage Bhagaana Chahta Tha, Der Tak Yahi Soorate Haal Rahi Lekin Bada Bhai Bhi Chhota Hee Tha Kis Tarah Ghaseet Kar Le Jata. Kuchh Der Ke Baa’d Use Rukna Hee Pada Aur Chhote Bhaai Ke Paaun Se Kaanta Nikaala, Thodi Der Baa’d Jab Do Baara Qafile Kee Taraf Rawaana Huwe To Gard Bhi Nazro’n Se Ojhal Ho Chuki Thi. Aur Qafile Kee Koi Khabar Na Thi Aik Doosre Kee Aankho’n Me Aankhein Daal Kar Zabaane Haal Se Kehne Lage Ki Hum Akele Rah Gaye Aur Qafila Jaata Raha Aik Doosre Ke Gale Lag Kar Rona Shuru’ Kar Diya.

Din Ka Ujaala Phailte Hee Ibn Ziyad Ke Sipaahi In Kee Talaash Me Wahin Aa Pahunche Jaha’n Shahzade Khade They, Unhone In Ke Chehre Ke Husn Se Pahchaan Liya Ki Yeh Khaandane Nubuwwat Ke Chashm-o-Chiragh Ma’loom Hote Hain. Un Ko Giriftar Kar Ke Ibn Ziyad Ke Paas Le Gaye Us Ne Un Ke Nanhe Munne Haath Rassiyo’n Se Baandh Diye, Aur Aik Siyaah Kothdi Me Band Kar Diya, Yeh Tang Wa Taareek Aur Bhayaanak Kothdi Dekh Kar Hayraan Rah Gaye Aur Aik Doosre Se Puchhne Lage Yeh Kaisi Kothdi Hai Hum Ne Madine Me To Aisi Kothdi Ko Kabhi Nahin Dekhi, Woh Ma’soom Jail Ke Tasawwur Se Na Aashna They, Unhein Kya Ma’loom Ke Jail Khaana Kya Hota Hai, Is Liye Udaas Aur Ghamgeen, Aik Doosre Se Chimat Kar Usi Kaali Kothdi Me Baith Gaye. Un Baccho’n Ne Teen Din Se Kuchh Khaaya Piya Na Tha. Jism Nidhaal Ho Chuka Tha Aur Pareshaani Kee Kaifiyyat Is Ke Ilaawah Thi Raat Bhar Rassiyo’n Kee Taklif Ke Sabab Rote Rahe Pareshaani Me Saari Raat Tadapte Rahe. Yeh Manzar Dekh Kar Aik Sipaahi Pahredaar Ko Taras Aa Gaya. Us Ne Chupke Se Un Kee Rassiya’n Khol Dee’n Aur Apni Anguthi Unhein De Kar Kahne Laga Shahzado’n! Mein Bhi Dil Me Tumhaare Hee Khaandan Kee Muhabbat Chhupaaye Huwe Hoo’n Lekin Haalaat Ne Zulm-o-Sitam Aur Jabar Wa Barbariyyat Par Majboor Kar Diya Hai. Meri Anguthi Thi Le Jaao. Chupke Se Chhup Chhupa Kar Qaadisiyah Ke Maqaam Par Pahuncha Jaao. Qaadisiyah Me Fula’n Jagah Mera Bhaai Rahta Hai Us Ka Yeh Naam Hai Use Meri Anguthi Dikha Dena Woh Tumhein Aafiyat Se Madinah Pahuncha Dega.

In Ma’soom Baccho’n Ko Kya Khabar Ke Qaadisiyah Kaha’n Hai? Dar Ke Maare Ab Kisi Se Puchhte Bhi Na They, Raat Ko Chal Pade Saari Raat Ghoom Phir Kar Bil-Aakhir Jab Sub’h Tuloo’ Huwi To Yeh Dekha Ki Koofah Kee Galiyo’n Me Hee Chakkar Laga Rahe Hain Aur Qaadisiyah Kee Koi Khabar Nahin Ki Woh Kaha’n Hai ? Faasle Par Dekha Ki Aik Weeraan Khushk Darakht Ka Tana Hai Jis Ka Khol Hai Chhote Se Ma’soom Bacche Phir Aik Doosre Ke Gale Lag Kar Ro Pade Aur Darakht Ke Khol Me Chhup Gaye Aur Saara Din To Yaha’n Rahein Phir Raat Ho Gayi To Dekha Jaaega. Woh Khade Hee They Ki Darakht Ke Qareeb Bahne Waale Aik Chashme Se Panai Bharne Ke Liye Aik Laundi Idhar Aa Gayi Us Kee Nazar Jab In Do Ma’soom Baccho’n Par Padi To Boli, Tum Koun Ho? Sach Bolne Ke Aadi They Bol Pade Hum Muslim Bin Aqil RadiyAllahu Ta’ala ‘Anhuma Ke Bete Hain, Fauran Aayi Aur Un Dono’n Shahzado’n Ko Apne Ghar Le Gayi Un Ko Nehlaaya, Dhulaaya, Din Bhar Un Ka Khayaal Rakkha Raat Ko Aik Alag Kamre Me Khaana Khila Kar Chhupa Diya, Us Aurat Ka Khaawind Un Shahzado’n Kee Talaash Me Saara Din Sar Gardaa’n Raha Tha. Thak Haar Kar Raat Ko Ghar Pahuncha Aur Khaana Khaa Kar Apne Kamre Me Let Gaya, Aik Kamre Me Woh Maalika Aur Us Ka Shauhar Lete Huwe They Doosre Kamre Me Tanha Do Ma’soom Bacche They. Achaanak Raat Ko Aik Bhaai Khwaab Dekhta Hai Ki Bahisht Ka Manzar Hai Aur Hamaare Naana Sayyidina Muhammad Mustafa SallAllahu Ta’ala ‘Alayhi Wa Aalhi Wa Sallam Aik Majlis Me Jalwah Farma Hain Woh Baccha Dekta Hai Ki Huzoor SallAllahu Ta’ala ‘Alayhi Wa Aalhi Wa Sallam Ke Darbaar Me Hazrat Ali Shere Khuda KarramAllahu Ta’ala Waj’hah-ul-Karim Bhi Hain Aur Hazrat Sayyida-E-Aalam Fatimat-uz-Zahrah Salam Allah ‘Alayha Bhi Hain. Hazrat Imam Hasan RadiyAllahu Ta’ala ‘Anhu Bhi Hain Aur Un Ke Waalid Hazrat Muslim Bin Aqil RadiyAllahu Ta’ala ‘Anhuma Bhi Hain Aur Huzoor SallAllahu Ta’ala ‘Alayhi Wa Aalhi Wa Sallam Hazrat Muslim Bin Aqil RadiyAllahu Ta’ala ‘Anhuma Se Farma Rahe Hain : Bete Muslim Bin Aqil RadiyAllahu Ta’ala ‘Anhuma ! Khud Aa Gaye Ho Aur Baccho’n Ko Akela Chhod Aaye Ho Is Par Hazrat Muslim Bin Aqil RadiyAllahu Ta’ala ‘Anhuma Ro Kar Arz Karte Hain, Ya RasoolAllah SallAllahu Ta’ala ‘Alayhi Wa Aalhi Wa Sallam ! Chand Ghadiyo’n Kee Baat Hai Woh Bhi Aa Rahe Hain Bas Yeh Guftagu Suni Yeh Manzar Dekha To Baccha Be Saakhta Cheekh Utha Us Kee Cheekh Buland Huwi Doosra Bhaai Bhi Be Saakhta Cheekh Pada Aur Phir Dono’n Aik Doosre Ke Gale Lag Kar Rone Lage, Bhaai Ne Puchha : Bhaai Tum Kyun Ro Rahe Ho? Woh Kehne Lage : Abhi Hamaare Nana Jaan Ne Baba Jaan Se Poochha Hai Ki Muslim Baccho’n Ko Akela Kyun Chhod Aaye Ho? Aur Baaba Jaan Ne Kaha Ki Huzoor Woh Bhi Aa Rahe Hain. Bada Bhaai Qasam Khaa Kar Kehne Laga : Ibrahim Mein Ne Bhi Yeh Manzar Dekha Hai Bas Woh Zaaro Qataar Ro Pade Un Kee Aawaaz Buland Huwi To Us Zaalim Kee Bhi Aankh Khul Gayi, Us Ne Apni Biwi Se Poochha! Us Kamre Me Koun Bacche Ro Rahe Hain ? Us Ne Jawaab Diya Ki Zaalim Ab Us Qisse Ko Bhool Jaa Khair Us Ne Biwi Ko Maara Pita, Aur Sakhti Se Darwazah Tod Kar Andar Ghus Gaya, Bacche Tharra Rahe They, Khauf Se Kaanp Rahe They, Us Ne Aa Kar Baccho’n Ko Gaisoo’o’n Se Pakad Liya, Tamaancho’n Se Maarna Shuru’ Kar Diya Woh Zaalim Kehta Tha Ki Zaalimo’n! Mein Teen Din Se Musasal Tumhaari Talaash Me Hoo’n Aur Tum Yaha’n Aaraam Se Chhupe Huwe Ho, Na Mujhe Khaane Ka Hosh Hai Na Peene Ka. Tum Ne Mujhe Be Had Pareshaan Kiya Hai Ab Mein Tumhein Nahin Chhodunga. Baccho’n Ne Kaha : Bataao To Sahi, Hum Ne Tumhaara Kya Bigaada Hai Tum Hamein Kis Wajah Se Maar Rahe Ho? Woh Aage Koi Jawaab Na De Saka, Aur Giriftaar Kar Ke Ibn Ziyad Ke Paas Le Gaya, Ibn Ziyad Ne Bhi In Baccho’n Ko Qatl Karne Ka Hukm De Diya, Us Shakhs Ne Dono’n Shahzado’n Ko Pakada Aur Shahr Ke Aik Goshe Me Le Jaa Kar Baari Baari Apni Talwaar Se Dono’n Ko Nihaayat Be Dardi Se Qatk Kar Daala. Chamanistane Mustafawi Ke Yeh Dono’n Phool Khilne Se Pehle Hee Murjha Gaye Un Ka Muqaddas Khoon Zameen Par Bah Gaya, Sar Tan Se Juda Ho Gaye Aur Tan Khaak Par Maahi-E-Be-Aab Kee Tarah Tadapne Lage. Phir Yeh Dono’n Sar Aur Muslim Bin Aqil Aur Haani Ke Sar Sab Yazeed Ke Paas Pahuncha Diye Gaye Aur Use Ittila’ Kar Dee Gayi Ki Tere Zulm-o-Sitam Ke Tasakeen Ka Saamaan Yun Faraaham Kiya Jaa Raha Hai. Shahzade Shaheed Ho Gaye. Shahadat Se Pehle Woh Is Baat Par Bhi Pareshaan Rahe Ki Hum To Jaa Rahe Hain Lekin Koi Hamaare Chacha Husayn ‘Alayh-is-Salam Ko Khabar Kar Deta Aur Unhein Pata Chal Jaata Ki Koofi Phir Gaye Hain Woh Yaha’n Tashrif Na Laaein Yahi Tamanna Dil Me Liye Woh Dunya Se Rukhsat Ho Gaye.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-32_35.]

2 Doosra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Sooe Koofah Rawaangi

Posted on July 21, 2016August 23, 2016 by tahirulqadribooks

Idhar Aali Maqaam, Khanwada-E-Rasool Kee Muqaddas Aur Izzat Maab Khawaateen Apne Baccho’n Dosto’n Aur Behi Khaaho’n Ko Saath Le Kar Aazime Koofah Ho Gaye. Hazrat Abd Allah Bin Abbas RadiyAllahu Ta’ala ‘Anhuma Ne Man’a Kiya Ki Bhaai Jaan Koofi Bade Be Wafa Hain, Woh Na-Qabile I’timaad Hain, Aap Koofah Na Jaaiye, Isi Tarah Hazrat Ja’far RadiyAllahu Ta’ala ‘Anhu Man’a Karte Rahe Abd Allah Bin Zubayr RadiyAllahu Ta’ala ‘Anhu Man’a Karte Rahe Aur Saathi Man’a Karte Rahe Lekin Imam Aali Maqam Sab Ko Yeh Jawaab Dete Rahe Ki Ab Mas’ala Wafa Aur Be-Wafa’i Ka Nahin Hai Mas’ala Da’wat Ka Hai Jis Ka Mujh Se Mutaalibah Kiya Gaya Hai Ki Mein Kalima-E-Haque Bulnad Karne Ke Liye, Jabr-o-Barbariyyat Ke Khilaaf, Zulm-o-Sitam Ke Khilaaf, Kufr Wa Taaghoot Ke Khilaaf, Shari’ate Mustafawi Kee Ihya’ Ke Liye Aur Deene Islam Kee Qadro’nKo Paamaal Hone Se Bachaane Ke Liye, Maidaan Me Aa Jaaun Aur Alame Jihaad Buland Karoo’n Taa Ki Mere Naana Jaan Ka Deen Phir Se Zinda Ho Sake, Mas’ala-E-Deen Ko Zinda Karne Ka Hai, Mas’ala-E-Haque Kee Sham’a Ko Raushan Karne Ka Hai Yaha’n Ba’z Ahbaab Naadaani Me Ya Bugze Ahl-E-Bayt Me Keh Dete Hain Aur Likh Dete Hain Aur Likh Jaate Hain Ki Aise Haalaat Me Jab Ki Imam Husain (‘Alayh-is-Salam) Ke Paas Musallah Lashkar Na Tha, Fauj Na Thi, Siyaasi Quwwat Na Thi Haalaat Saaz Gaar Na They. Ibn Ziyad Aur Yazeed Ke Paas Sab Kuchh Tha Aise Haalaat Me Imam Husayn RadiyAllahu Ta’ala ‘Anhu Ka Aise Maqaam Par Jaana Ma’azAllah Khurooj Tha Yeh Tasawwur Siwaye Us Ke Ki Ahl-E-Bayt Ka Bugz Aur Aale Rasool Ke Saath Dil Me Inaad Ho Is Ke Siwa Aur Koi Sabab Nahin Hai.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-35.]

2 Doosra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Raahe Rukhsat Aur Raahe Azimat

Posted on July 20, 2016August 26, 2016 by tahirulqadribooks

Aap Ke Dhihn Saaf Karne Ke Liye Mein Aik Zaabitah Aap Ke Saamne Pesh Karta Hoo’n Sune! Shari’ate Mutahharah Me Aise Mushkil Waqt Par Do Raaste Bataaye Jaate Hain Aur Dono’n Raaste Allah Aur Us Ke Rasool Ke Taraf Se Tajweez Kardah Hain, Aik Raaste Ko Raahe Rukhsat Kaha Jaata Hai Aur Aik Raaste Ko Raahe Azimat Kaha Jaata Hai Agar To Halate Saazgaar Ho’n Jabar Wa Barbariyyat Kufr-o-Zulm Aur Baatil Wa Taaghoot Ka Safaya Aasaani Se Kiya Ja Sakta Ho In Haalaat Me Har Chhote Bade Par, Har Kalimah Go Par, Us Zulm Ke Khilaaf Maidaane Kaarzaar Me Nikal Aana Farz Aur Waajib Ho Jaata Hai Phir Kisi Shakhs Ke Liye Siwaye Kisi Shar’iy Majboori Ke Koi Udhr Qaabile Qubool Nahin Hota Lekin Haalaat Jab Na Saazgaar Ho’n Jami’at, Quwwate Aslihah Aur Bhaari Fauj Saath Na Ho Aur Baatil Ziyaada Mazboot Ho, Taaqatwar Ho, Qawi Tar Ho Aise Haalaat Me Baatil Ko Khatm Karne Ya Hata Dene Kee Soorat Zaahiran Nazar Na Aati Ho To In Na Saazgaar Haalaat Me Do Raaste Shari’at Ne Ummat Ko ‘Ata Kiye Hain. Woh Log Jo Haalaat Kee Na Saazgaari Ko Dekhe Unhein Ijaazat Hai Ki Woh Rukhsati Par ‘Amal Karein Gosha Nashee’n Ho Jaaein Chupke Se La’nat Malaamat Karte Rahein Dil Se Bura Jaanein. Lekin Musallah Kashmakash Ke Liye Maidaan Me Na Aaein BeShak Alag Thalag Aik Jagah Gosha Nasheeni Kee Zindagi Basar Karein Yeh Raahe Rukhsat Hai Aur Har Daur Me Aksariyyat Rukhsat Par Amal Karti Rahi Hai. Aur Raahe Rukhsat Kee Raah Par Amal Karna Shari’at Me Na Jaa’iz Hai, Na Haraam Hai Aur Na Allah Kee Narazgi Ka Sabab Hai Isi Liye Allah Ta’ala Ne Har Iztiraari Haalaat Me Rukhsat Kee Ijaazat De Rakkhi Hai Lekin Agar Sab Ke Sab Log Bila Istishna Aise Haalaat Me Rukhsat Par Hee Amal Karna Shuru’ Kar De’n To Phir Zulm-o-Kufr Aur Taaghoot Ko Khatm Karne Ke Liye Haalaat Kabhi Bhi Saazgaar Nahin Ho Sakte Is Liye, Ba-Wajood Rukhsat Ke Kuchh Log Raahe Azimat Par Bhi Chalne Waale Hote Hain. Woh Haalaat Kee Saazgaari Aur Na Saazgaari Ko Nahin Dekhte, Woh Fauj Aur Lashkar Kee Bhaari Aksariyyat Par Nahin Nazar Daalte, Woh Musallah Kashmakash Me Naakaami Aur Kaamyabi Ke Anjaam Par Tawajjuh Nahin Dete Balki Un Kee Tawajjuh Sirf Aur Sirf Is Amr Par Markooz Hoti Hai Ki Hum Apne Tan Ko, Apne Man Ko Allah Ke Deen Ke Bachaane Ke Liye Kaise Qurbaan Karein Shaayad Tan Mein Lagi Huwi Yeh Aag Hee Aaindah Naslo’n Ke Andhere Dur Kar De Woh Apne Khoon Se Poore Deen Kee Aabiyaari Karne Ko Hee Deen Ke Ihya’ Aur Tahaffuz Ka Baa’ith Samajhte Hain Woh Haalaat Kee Na Saazgaari Se Be Khabar Aur Laa Ta’alluq Rahte Huwe Iztiraari Haalaat Me Bhi Apni Jaan Par Khel Jaate Hain Aur Sare Bakaf Ho Kar Maidaane Kaarzaar Me Utarte Aate Hain Woh Apni Shaan Ke Laa’iq Aur Apne Maqaam Kee Munaasabat Se Is Iqdaam Ko Farz Samajhte Hain, Jis Tarah Har Shakhs Raahe Rukhsat Par Amal Nahin Kar Sakta Usi Tarah Azimat Par Bhi Chalna Har Kisi Kee Bas Kee Baat Nahin Hai.

Imam Husayn RadiyAllahu Ta’ala ‘Anhu Ne Yeh Iqdaam Is Liye Kiya Tha Ki Un Ke Rag-o-Reshe Me Ali Bin Abi Talib KarramAllahu Ta’ala Waj’hah-ul-Karim Ka Khoon Gardish Kar Raha Tha. Hazrat Sayyidah Zahrah Salam Allah ‘Alayha Kee Goud Me Parwarish Paayi Thi, Mahboobe Khuda SallAllahu Ta’ala ‘Alayhi Wa-Aalihi Wa-Sallam Ke Mubarak Kandho’n Par Sawaari Kee Thi. Huzoor SallAllahu Ta’ala ‘Alayhi Wa-Aalihi Wa-Sallam Kee Zabaan Mubarak Ko Choosa Tha Woh Ali KarramAllahu Ta’ala Waj’hah-ul-Karim Ke Farzand Aur Khanwada-E-Nubuwwat Ke Chashm-o-Chiragh They, Is Liye Jo Ehsaase Ziya’n Unhein Tha, Woh Kisi Ko Nahin Ho Sakta Tha Woh Binaa-E-La Ilah They.

Is Liye Zaahir Hai Raahe Azimat Par Amal Karne Kee Izzat Us Daur Me Aap Ke Siwa Aur Kise Naseeb Ho Sakti Thi? Aur Phir Yeh Baat Bhi Dhihn Nasheen Farma Le’n Ki Jo Log Raahe Rukhsat Par Amal Karte Hain Woh Bhi Haque Bi-Jaanib Hote Hain. Kisi Shakhs Ko Haque Nahin Pahunchta Ki Unhein Mata’oon Kare Aur Bura Bhala Kahe. Is Liye Ki Unhein Haque Diya Gaya Hai Ki Raahe Rukhsat Ikhtiyar Karein Albatta Aisi Logo’n Kee Raah Ko Koi Shakhs Apna Uswah Aur Raahenuma Nahin Banaata, Ahle Azimat Aur Ushshaaq Un Kee Raah Par Chalte Hain Jo Log Apne Gale Katwaate Hain. Aur Apne Khoon Se Holi Khelte Hain Aur Qurbaniya’n Dete Hain. Woh Raahe Azimat Par Chal Kar Qiyamat Tak Aik Uswa-E-Hayaat De Jaate Hain. Deen Ko Zinda Karne Ke Liye Aik Shaahraah Qaa’im Kar Dete Hain. Deeni Aqdaar Ko Mitne Se Bachaane Ke Liye Aur Phir Se Bahaal Karne Ke Liye Aik Zaabita-E-Hayaat De Jaate Hain. Is Liye Jin Logo’n Ne Imam Husayn ‘Alayh-is-Salam Ke Iqdaam Ko Zaahiri Haalaat Kee Na Saazgaari Kee Bina Par Ma’azAllah Khurooj Aur Baghaawat Ka Ilzaam Diya Hai Woh Na To Deen Kee Rooh Aur Ta’leem Se Waaqif Hain Aur Na Hee Shari’ate Islamiya Ke Ihya’ Ke Taqaazo’n Se Waaqif Hain. Aur Na Hee Us Kee Amr Kee Khabar Rakhte Hain Ki Islam Kee Qadrein Mit Rahi Ho To Unhein Zinda Karne Ke Liye Khoon Kee Baazi Kis Tarah Lagaayi Jaati Hai Aur Shaayad Woh Yeh Bhi Nahin Jaante Ki Us Waqt Yazeed Ka Takht Par Baithna Islam Kee Taarikh Ko Kis Rookh Par Daal Raha Tha Aur Agar Aik Husayn RadiyAllahu Ta’ala ‘Anhu Bhi Maidaane Kaarzaar Me Alame Haque Buland Karne Ke Liye Na Nikalta To Aur Yeh Bahattar-72 Tan Bhi Apne Khoon Ka Nazaranah Dene Ke Liye Na Nikalte To Aaj Islaam Kee Jo Mataa’, Jamhoori Qadro’n Kee Soorat Me, Aazaadi Kee Soorat Me Izzat Aur Jaah-o-Shauqat Kee Soorat Me, Islam Kee Shari’at Ke Nafaadh Kee Soorat Me, Jis Haal Me Bhi Nazar Aa Rahi Hai Woh Shaayad Is Ka Nazaarah Kahin Dikhaayi Na Deta, Islam Kee Pairwi Taarikh Aur Ummate Mustafawi Marhoone Minnat Hai. Husayn Ibn Ali ‘Alayhima-‘s-Salam Ke Khoon Ke Qatraat Kee, Aur Khanwada-E-Rasool Kee Us Azeem Qurbaani Kee Jis Ne Rukhsat Ko Chhod Kar Apne Tan Ko To Maachis Kee Tarah Jala Liya Aur Umr Bhar Ke Liye Is Zamaane Kee Taarikiyo’n Aur Andhero’n Ko Ujaale Me Badal Daala. Yahi Wajah Hai Ki Aaj Chawdah Sau-14.00 Baras Beet Gaye. Rukhsat Kee Raah Chalne Waale Hazaro’n They Lekin Azimat Kee Raah Par Chalne Waale Bahattar-72 They Jin Ke Qaa’id Husayn Ibn Ali RadiyAllahu Ta’ala ‘Anhuma They Chawdah-14 Sadiya’n Beet Gayi’n Dunya Jab Bhi Naam Leti Hai Bataure Namoonah Ke, Woh Husayn Bin Ali ‘Alayhima-‘s-Salam Hee Naam Leti Hai.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-35_38.]

2 Doosra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Makkah Se Karbala Tak

Posted on July 20, 2016August 23, 2016 by tahirulqadribooks

Imam Husayn ‘Alayh-is-Salam Makkah Mu’azzamah Se Teen Dhu-‘l-Hijjah Ko Rawana Huwe Raaste Me Aik Shaa’ir Mila Aap Ne Puchha Ki Koofah Ka Kya Haal Hai? Us Ne Jawaab Dya : Un Ke Dil Aap Kee Saath Magar Talwaarein Yazeed Ke Saath Hain.

Aap Jab Teen Dhu-‘l-Hijjah Ko Rawana Huwe To Aap Kee Khidmat Me Darkhaast Kee Gayi Ki Kuchh Deen Aur Guzaar Le’n Lekin Imam Husayn RadiyAllahu Ta’ala ‘Anhu Ke Saamne Apne Naana Jaan Ka Yeh Irshaad Mubarak Tha Ki Mein Dekh Raha Hoo’n Ki Makkah Ke Haram Ka Taqaddus Quraysh Ke Aik Shakhs Ke Sabab Paamaal Ho Raha Hai, Yaha’n Aik Shakhs Ke Sabab Khoon Beh Raha Hai. Farmane Lage Mumkin Hai Ki Makkah Me Yazeedi Fauj Giriftaari Ke Liye Ihtimaam Kare Aur Hamaare Haami Hamaare Difa’ Me Talwaarein Utha Le’n Aur Mere Sabab Se Harame Makkah Me Khoon Bahe. Mein Nahin Chaahta Ki Apne Naana Jaan Ke Irshaad Ka Misdaaq Banu’n.

Hajj Ke Dino’n Se Qabl Rawangi Ikhtiyaar Farmayi Us Shaa’ir Kee Baat Sun Ne Ke Ba-Wajood Aage Gaye, Raaste Me Hurr Bin Yazeed Tamimi RadiyAllahu Ta’ala ‘Anhu Mila Use Ziyaad Ne Lashkar De Kar Bheja Tha Taa Ki Husayn RadiyAllahu Ta’ala ‘Anhu Tumhein Jaha’n Mile Use Koofah Me Daakhil Na Hone Do Aur Koshish Kar Ke Mere Paas Le Aao Hurr Ne Kaha : Husayn Bin Ali RadiyAllahu Ta’ala ‘Anhuma Aap Ko Pata Chal Chuka Hoga Ki Aap Ke Chacha Zaad Bhaai Muslim Bin Aqil RadiyAllahu Ta’ala ‘Anhuma Shaheed Ho Gaye Hain, Koofi Ke Log Hasbe Dastoor Be-Wafa Sabit Huwe Woh Aap Kee Itaa’at Se Phir Chuke Hain, Haalaat Saazgaar Nahin Hain, Bataaiye Aap Ka Kya Khayaal Hai? Mujhe Hukm Hai Ki Mein Aap Ko Ibn Ziyad Ke Paas Le Chaloo’n.

Imam Aali Maqam Ne Ahle Qaafila Se Mashwarah Kiya Aur Yeh Qaraar Paaya Ki Filhaal Maidan Me Padaao Kiya Jaae. Wahin Amr Bin Sa’d Bhi Aik Bahut Bade Lashkar Ke Saath Ibn Ziyaad Kee Taraf Se Imaam Husayn ‘Alayh-is-Salam Ke Qatl Ke Mansoobe Ke Taht Aa Pahuncha. Imam Husayn RadiyAllahu Ta’ala ‘Anhu Jis Maidaan Tak Pahunche Us Maidaan Kee Khabar Tak Na Thi Ki Yeh Kounsa Maidaan Hai Darya-E-Furaat Ka Kinaarah Tha, Khayaal Kiya Ki Yaha’n Paani Qareeb Hai Kuchh Aasaani Hogi, Yakum Muharram Ko Aur Baa’z Riwayato’n Ke Mutaabiq Do Muharram Ko Usi Maidaan Me Utre Aur Saathiyo’n Se Puchha Ki Yeh Kounsa Maidaan Hai ? Is Ka Naam Kya Hai ? Unhone Bataya Ki Hazrat Is Ka Naam Karbala Hai, Farmane Lage : Bas Yahi’n Khaime Laga Do, Yahi Hamare Safar Kee Aakhiri Manzil Hai, Us Jagah Pahunchte Hee Aap Ko Huzoor Nabiyye Akram SallAllahu Ta’ala ‘Alayhi Wa-Aalihi Wa-Sallam Ke Woh Faraamin Yaad Aa Gaye Jo Aap Ne Karbala Ke Muta’alliq Farmaaye They Aur Bachpan Ke Zamaane Kee Yaadein Aur Huzoor Kee Dee Huwi Bashaaratein Aankho’n Ke Saamne Aa Gayi’n. Woh Bachpan Ka Lamha Yaad Aa Gaya Ki Jab Hazrat Ummi Salamah Aur Hazrat Umm-il-Fadl RadiyAllahu Ta’ala ‘Anhuma Kee Riwaayat Ki Mutabiq Hazrat Ummi Salamah RadiyAllahu Ta’ala ‘Anha Kee Goud Me Imam Aali Maqaam Khel Rahe They Ki Achaanak Aaqa-E-Do-Jaha’n Kee Chashmane Muqaddas Par Aansu Aa Gaye Umm-il-Mu’minin Ne Puchha : Ya RasoolAllah SallAllahu Ta’ala ‘Alayhi Wa-Aalihi Wa-Sallam Kya Baat Hai ? Aap Kee Aankho’n Me Aansu Aa Gaaye Hain ? Farmaya :

أتاني جبريل أخبرني أن ابني الحسين يقتل في بعض أرض العراق يقال لها كربلا وهذه تربتها تربة حمراء.

–
[Suyooti Fi Khasa’is Al-Kubra, 02/125.]

Aye Ummi Salamah! Mere Paas Jibra’il Aaya Hai, Aur Us Ne Is Shahzade Kee Taraf Ishaarah Kar Ke Mujhe Bataaya Hai Ki Aaqa! Aap Ke Baa’d Ummat Ka Aik Zaalim Giroh, Aap Ke Bete Husayn RadiyAllahu Ta’ala ‘Anhu Ko Gharib-ul-Watani Ke Aalam Me Shaheed Kar Dega Aur Iraq Ke Jis Maidaan Me Un Kee Shahadat Hogi Us Ka Naam Karb Wa Bala Hai Aur Yeh Us Jagah Kee Surkh Mitti Hai, Huzoor SallAllahu Ta’ala ‘Alayhi Wa-Aalihi Wa-Sallam Ne Us Mitti Ko Sungh Kar Farmaya : “ريح كرب و بلاء” Haqiqat Yeh Hai Ki Is Mitti Se Bhi Ranj-o-Alam Aur Dukh Aur Dard Kee Boo Aa Rahi Hai, Yahi Woh Maidaan Hai Jis Kee Nisbat Mere Abba Ne Khabar Dee Thi Ki

هاهنا مناخ ركابهم و موضع رحالهم و مهراق دمائهم، فتية من آل محمد يقتلون بهذه العرصة تبكى عليهم السماء والأرض.

Yaha’n Mere Husayn ‘Alayh-is-Salam Aur Us Ke Qaafile Ke Khaime Lagenge, Yaha’n Un Musaafiro’n Ke Kajaawe Rakhe Jaaeinge. Yaha’n Un Ka Muqaddas Khoon Bahaya Jaaega Aur Aale Muhammad Ka Aik Mubarak Giroh Be-Dardi Ke Saath Yaha’n Shaheed Kar Diya Jaaega Aisi Shahadat Ki Jis Kee Shahadat Par Zameen Bhi Rooegi Aur Aur Aasmaan Bhi Aansu Bahaaega.
–
[Suyooti Fi Khasa’is Al-Kubra, 02/126,

Aboo Nu’aym Fi Dala’il-un-Nubuwwah,/509.]

Isi Maidaan Kee Mitti Huzoor ‘Alayh-is-Salatu Wa’s-Salam Ne Hazrat Ummi Salamah RadiyAllahu Ta’ala ‘Anha Ko Ata Kee Thi Aur Farmaya Tha :

إذا تحولت هذه التربة دما فاعلمي ان ابني قد قتل

Jab Yeh Mitti Khoon Me Tabdeel Ho Jaae To Jaan Lena Mera Beta Shaheed Kar Diya Gaya Hai.
–
[Ibn Hajar ‘Asqalani Fi Tahdhib-ut-Tahdhib, 02/347,

Suyooti Fi Khasa’is Al-Kubra, -2/125.]

Aye Ummi Salamah! Is Mitti Ko Sambhaal Kar Rakhna Mujhe Ma’loom Hai Ki Jab Mere Bete Husayn RadiyAllahu Ta’ala ‘Anhu Kee Shahaadat Ka Waqt Aaega To Us Waqt Too Zinda Hogi Jab Yeh Mitti Surkh Ho Jaaye To Samajh Lena Ki Mera Husayn ‘Alayh-is-Salam Shaheed Kar Diya Gaya Hai. Yeh Saari Bashaaratein Pehle Se Dee Jaa Chuki Thi’n. Isi Liye Imaam Aali Maqam Ne Is Maidaan Ko Apne Apne Safar Ka Muntahi Samajh Kar Khaime Lagaaye Aur Yeh Khayaal Farmaya Ki Darya Qareeb Hai Paani Muyassar Aayega Lekin Un Zaalimo’n Ne Aap Ko Paani Se Mehroom Karne Ka Mansooba Bana Liya. Aath-08 Din Amr Bin Sa’d Aur Ibn Ziyad Ke Qaasido’n Ke Darmiyaan Aane Jaane Me Guzar Gaye Kuchh Guft-o-Shunid Chalti Rahi, Ibn Ziyaad Ne Jab Samajha Ki Amr Bin Sa’d Imam Husayn RadiyAllahu Ta’ala ‘Anhu Ke Qatl Se Gurez Chaahta Hai To Us Ne Shimr Dhi-‘l-Jawshan Ko Lashkar De Kar Rawana Kiya Aur Kaha Ki Amr Bin Sa’d Agar Husayn RadiyAllahu Ta’ala ‘Anhu Ke Saath Muqaatalah Kare To Fabiha Agar Mutaammil Ho To Use Ma’zool Kar Ke Lashkar Kee Qiyaadat Tum Sambhaal Lena. Shimr Dhi-‘l-Jawshan Pahuncha To Muharram Ka Aaghaaz Ho Chuka Tha Amr Bin Sa’d Ne Yeh Dekha Ki Hukoomat Mujh Se Chhini Jaa Rahi Hai, Imam Husayn ‘Alayh-is-Salam Ke Saath Muqabala Karne Ka Faisalah Kar Liya Aur Ibn Ziyad Ke Kehne Par Paanch Sau-500 Lashkariyo’n Ko Bheja Ki Woh Furaat Par Qabza Kar Le’n Aur Husayn RadiyAllahu Ta’ala ‘Anhu Ko Paani Ka Aik Ghoont Tak Na Lene De’n.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-38_40.]

2 Doosra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Nau Aur Das Muharram Ke Waqe’at

Posted on July 20, 2016August 23, 2016 by tahirulqadribooks

Imam Husayn RadiyAllahu Ta’ala ‘Anhu Ne Nau-09 Muharram Ko Apne Bhaai Abbas Bin Ali Bin Abi Talib RadiyAllahu Ta’ala ‘Anhuma Ko Pachaas-50 Jawano’n Ke Saath Bheja Ki Kuchh Paani Le Kar Aaein Kyun Ki Kal Jang Ka Din Hai. Wuzoo Ke Liye Aur Peene Ke Liye Paani Kee Zaroorat Hogi. Hazrat Abbas RadiyAllahu Ta’ala ‘Anhu Gaye Furaat Ke Kinaare Jang Huwi Aap Shadeed Zakhmi Ho Gaye Thoda Sa Paani Lene Me Kaamyaab Ho Gaye.

Amr Bin Sa’d Aur Shimr Dhi-‘l-Jawshan Ne Mutaalibah Kiya Ki Abhi Raat Kee Jang Shuru’ Kee Jaaye. Imam Husayn ‘Alayh-is-Salam Ne Farmaya Ki Jab Jang Ka Faisalah Ho Hee Chuka Hai To Yeh Aik Raat Allah Se Munaajaat Aur Alahidagi Me Us Se Mulaqat Ke Ke Liye De Doo, Faisalah Ho Gaya Ki Kal Das-10 Muharram Ko Jang Shuru’ Hogi Raat Ko Aap Apne Khaime Me Gaye Izzat Maab Khawaateen Ko Jam’a Kiya Apni Bahan Hazrat Zaynab Salam Allah ‘Alayha Ko Zawja-E-Mutahharah Hazrat Shahr Baanu Salam Allah ‘Alayha, Chhoti Shahzadiyo’n Ko, Shahzado’n Ko Khanwada-E-Rasool Ke Jawaano’n Ko Irshaad Farmaya : Mein Tum Se Be-Had Raazi Hoo’n Aur Khush Hoo’n Tum Ne Haque-E-Sadaaqat, Wafa Shi’aari Ada Kar Diya. Qiyamat Ke Din Tumhare Haque Me Gawaahi Dunga. Tumhein Ijaazat Deta Hoo’n Ki Raat Ke Andhere Me Jaha’n Chaho Chale Jaao Mujhe Jaame Shahadat Isi Maidaan Me Naush Karna Hai Lekin Tumhein Apni Khaatir Jang Me Jhonkna Aur Marwaana Nahin Chaahta, Azizo’n Kee Aankhein Poor Nam Ho Gayi’n Sab Ne Thar-Tharaate Huwe Labo’n Se Jawaab Diya Ki Imam Aali Maqam! Hum Apne Khoon Ka Aakhiri Qatrah Bhi Aap Ke Qadmo’n Par Gira Denge. Agar Aaj Aap Ko Tanha Chhod Diya To Kal Apne Khuda, Aur Nabiyye Karim SallAllahu Ta’ala ‘Alayhi Wa-Aalihi Wa-Sallam Ko Kya Munh Dikhaaeinge. Hum Aap Kee Khaatir Kat Marenge Jaanein Qurbaan Karenge Aur Yazeedi Lashkar Ko Bata Denge Ki Ahl-E-Bayt Aise Hote Hain. Imam Aali Maqam Ne Raat Bhar Sabr Kee Talqeen Kee Ahl-E-Bayt ‘Alayhim-us-Salatu Wa’s-Salam Ke Muqaddas Khaimo’n Me Raat Bhar Tilaawat Hoti Rahi Sajde Hote Rahe, Istighfaar Hota Raha Aur Zikr Hota Raha Aur Allah Kee Baargaah Me Munaajaat Karte Rahe.

Alal-Sub’h Ma’reka-E-Karbala Bapa Ho Gaya Sab Se Pehle Yake Ba’d Deegare Aik Aik Shakhs Aata Raha Aur Qaafila-E-Husayni Ke Jawaan Yazeedi Lashkar Ke Logo’n Ko Waasile Jahannam Karte Rahe Unhone Ijtima’iy Hamle Ka Faisalah Kar Liya Lekin Idhar Se Aik Aik Jawaan Us Poore Qaafile Ko Muqaabalah Karta Raha Saare Saathi, Jaa’n Nishaar Shaheed Ho Gaye Ab Sirf Ahl-E-Bayte Nubuwwat ‘Alayhim-us-Salatu Wa’s-Salam Ke Afraad Rah Gaye, Imam Husayn RadiyAllahu Ta’ala ‘Anhu Ne Chaaha Ki Is Khandan Se Mein Aaghaaz Karoo’n, Talwaar Uthaayi, Lekin Hazrat Ali Akbar Maidan Me Aa Gaye. Arz Karne Lage : Abba Jaan! Beta Aap Ka Jawaan Hai, Aur Jawaan Beto’n Ke Hote Huwe Baap Ko Aisi Takleef Kee Zaroorat Nahin, Maidaan Me Pahuncha Jihaad Shuru’ Kiya. Aap Kee Talwaar Jis Samt Uthti Yazeed Fauj Ke Tukde Uda Deti. Aap Ne Unhein Gaajar Mooli Kee Tarah Kaat Kar Rakh Diya. Phir Aap Ka Ghoda Zakhmi Ho Gaya, Haydari Khoon Aur Husayni Shujaa’at Ne Yazeedi Lashkar Ko Museebat Wa Mashaqqat Me Daal Diya Aur Un Ke Parakhche Uda Deeye, Imam Husayn RadiyAllahu Ta’ala ‘Anhu Chaahte They Ki Apne Jawaan Bete Ko, Shabaab Ke Maahe Kaamil Ko, Husn Ke Maahe Tamaam Ko, Apni Aankho’n Se Ladta Huwa Dekhein. Lekin Maidane Karb-o-Bala Kee Gard Ne Un Ko Chhupa Liya Tha, Kuchh Khabar Na Thi Ki Woh Kaha’n Hai, Aur Un Par Kya Beet Rahi Hai? Bas Itna Andaazah Hota Tha Ki Jis Samt Yazeedi Lashkar Kee Bhedein Bhaagti’n, Imam Husayn ‘Alayh-is-Salam Aur Ahl-E-Bayt ‘Alayhim-us-Salam Ke Log Samajh Lete Hain Ki Husayn RadiyAllahu Ta’ala ‘Anhu Ka Laadla Beta, Us Samt Jaa Raha Tha. Yeh Ali Haidare Karrar Ka Pauta Tha Hazrat Muhammad SallAllahu Ta’ala ‘Alayhi Wa-Aalihi Wa-Sallam Ka Nawaasa, Derr Tak Yazeediyo’n Ko Waasile Jahannam Karta Raha, Pyaas Kee Shiddat Ne Aa Ghera Jism Par Beeso’n Zakhm Lag Gaye, Paani Ka Aik ghoont Bhar Kar Do Baarah Taazah Dam Hone Ke Liye Aaye To Arz Kee : Abba Jaan! Agar Paani Ka Aik Ghoont Mil Jaae To Phir Taazah Dam Ho Kar Hamla Karu’n Farmaya : Ali Akbar! Paani To Muyassar Nahin Lekin Apni Sookhi Huwi Zubaan Tere Moonh Me Daal Sakta Hoo’n Hazrat Ali Akbar ‘Alayh-is-Salam Ne Imam Aali Maqaam Kee Sookhi Huwi Zubaan Chakhi Aur Us Se Phir Taazah Dam Ho Kar Maidaan Me Pahunche, Derr Tak Ladne Ke Baa’d, Be-Andaazah Zakhm Khaa Kar Zameen Par Gir Pade Aik Nezah Aap Ke Seena-E-Aqdas Me Paiwast Ho Gaya Achaanak Zubaan Se Aawaaz Aayi : Ya Abtah ! Aye Abba Jaan! Imam Husayn RadiyAllahu Ta’ala ‘Anhu Be-Saakhta Daud Pade Jaa Kar Apne Bete Ko Goud Me Le Kar Utha Liya. Beta, Aik Ajeeb Andaaz Se Apne Baap Ko Tak Raha Hai Arz Kee! Abba Jaan! Agar Aap Neze Ka Yeh Phal Jism Se Nikaal De’n To Mein Aik Baar Phir Maidaan Me Jaane Ke Liye Tayyar Hoo’n. Aap Ka Beta Dushman Kee Kasrat Ke Ba-Wajood Himmat Haarne Waala Nahin. Imam Husayn ‘Alayh-is-Salam Ne Goud Me Jawaan Bete Ko, Us Maahe Tamaam Ko, Us Husn Ke Paikar Ko Apni Goud Me Le Liya, Sar Se Paau’n Tak Jism Zakhmo’n Se Choor Tha Aap Ne Neze Ka Phal Nikaala Khoon Ka Fawwaarah Ubal Pada.

Imam Husayn RadiyAllahu Ta’ala ‘Anhu Jab Hazrat Ali Akbar ‘Alayh-is-Salam Ko Goud Me Uthaaye Huwe They. Us Waqt Aap Kee Umr Chhappan-56 Saal Paanch-05 Mahine Aur Paanch-05 Din Thi. Ibn Asaakir Likhte Hain Ki Daadhi Aur Sar Ka Aik Baal Bhi Sufed Na Tha Lekin Khoon Ke Fawwaare Ko Dekh Kar Aur Jawaan Bete Kee Rooh Qafase Unsuri Se Parwaaz Karti Dekh Kar, Itna Sadma Pahuncha, Aur Is Qadar Gham Laahiq Huwa Ki Jab Jab Jawaan Bete Kee Laash Utha Kar Waapas Aaye To Sar Aur Daadhi Ke Baal Sufed Ho Chuke They.

Azm Wa Himmat Wa Sabr Wa Istiqlaal Ke Is Paikar Ne, Jawaa’n Bete Kee Laash, Khaime Me Rakkhi Huwi Shaheedo’n Kee Laasho’n Ke Saath Laa Kar Rakh Dee, Aur Is Daf’ah Khood Maidan Me Jaane Kee Tayyari Shuru’ Kar Dee. Aik Nau-09 Saal Ka Chhota Sa Baccha Talwaar Utha Kar Saamne Aaya. Yeh Koun Hai. Yeh Qasim Bin Hasan Bin Ali RadiyAllahu Ta’ala ‘Anhuma Hai, Hazrat Qasim ‘Alayh-is-Salam Se Farmaya : Bete! Too Mere Bhaai Hasan ‘Alayh-is-Salam Kee Nishaani Hai To Too Aaraam Kar! Jawaab Diya : Chacha Jaan! Mein Qiyamat Ke Din Apne Baap Ko Kya Munh Dikhaaunga? Woh Kaheinge Ki Tere Chacha Shaheed Ho Gaye Too Dekhta Raha, Nahin Mere Nanhe Gale Par Talwaar Chal Le, Phir Aap Kee Baari Aayegi, Aakhir Qasim Bin Hasan ‘Alayhima-‘s-Salam Bhi Shaheed Ho Gaye.

Aksar Log Kehte Hain Ki Hazrat Ali Asghar Jin Kee Umr Mubarak Sirf Chhe-06 Maah Thi Aur Woh Pyaas Se Tadap Rahe They Imam Husayn RadiyAllahu Ta’ala ‘Anhu Unhein Utha Kar Le Gaye, Aur Lashkare Yazeed Se Un Ke Liye Paani Maanga Lekin Paani Ke Bajaae Teer Aaya Aur Baccha Shaheed Ho Gaya, Mein Is Se Muttafique Nahin Mujhe Husayn RadiyAllahu Ta’ala ‘Anhu Kee Ghairat Aur Hamiyyat Is Baat Par Yaqeen Karne Kee Ijaazat Nahin Deti. Kyun Ki Woh Husayn RadiyAllahu Ta’ala ‘Anhu Jo Islam Kee Khaatir, Ahl-E-Bayt ‘Alayhim-us-Salam Kee Ghairat Wa Hammiyat Kee Khaatir, Sab Kuchh Luta Raha Hai Woh Is Bacche Ke Liye Yazeedi Badbakhto’n Se Paani Kee Bheek Kis Tarah Maang Sakta Hai? Agar Paani Kee Bheek Hee Maangna Thi To Phir Husayn RadiyAllahu Ta’ala ‘Anhu Ko Un Se Khayrat Talab Karne Kee Haajat Na Thi Woh Chaahte To Darya-E-Furaat Ko Ishaarah Karte, Darya-E-Furaat Un Ke Qadmo’n Me Bahne Lagta, Aasmaan Kee Taraf Haath Uthaate, Baarish Se Bhare Baadal Umad Aate, Moosla Dhaar Baarish Hoti, Isma’il Bin Ibrahim ‘Alayhima-‘s-Salam Kee Aidi Ke Ragadne Se Agar Zam Zam Ka Aik Chashma Nikal Sakta Hai To Phir Mustafa SallAllahu Ta’ala ‘Alayhi Wa-Aalihi Wa-Sallam Ke Laadle Bete Husayn Ibn Ali ‘Alayhima-‘s-Salam Kee Zarb Aur Aidi Maarne Se Karbala Ke Maidaan Me Chashma Kyun Nahin Phoot Sakta, Mera To Yeh Aqidah Hai Ki Agar Woh Zameen Par Paau’n Maarte To Aik Chashma To Kya, Regzaare Karbala Me Hazaro’n Chashme Phoot Padte.

Lekin Yeh Maidaane Imtihaan Wa Aazma’ish Tha Husayn ‘Alayh-is-Salam To In Masaa’ib-o-Aalaam Me Sabr Kar Ke Apne Mawla Ko Raazi Kar Rahe They Un Ke Naana Un Ko Tak Rahe They Ki Mera Husayn RadiyAllahu Ta’ala ‘Anhu Jise Mein Ne Apne Kandhe Par Sawaar Kiya Hai, Hazrat Fatimat-uz-Zahra Salam Allah ‘Alayha Dekh Rahi Thi’n Ki Jis Husayn ‘Alayh-is-Salam Ko Mein Ne Apni Chhati Ka Doodh Pilaaya Hai. Ali Shere Khuda KarramAllahu Ta’ala Waj’hah-ul-Karim Mulaahiza Farma Rahe They Ki Jis Ke Rag-o-Reshe Me Mera Khoon Gardish Kar Raha Hai Aaj Is Maqame Sabr Aur Maqame Istiqaamat Par Is Ke Qadam Kahin Ladkhadaye To Nahin Hain? Husayn Ibn Ali RadiyAllahu Ta’ala ‘Anhuma Is Haal Me Sabr-o-Raza Ka Paikare Atam Ban Kar Azm-o-Himmat Ke Saath Muskuraate Rahe.

Aakhir Jab Imam Husayn RadiyAllahu Ta’ala ‘Anhu Ne Maidaan Me Aane Ka Iraadah Kiya To Hazrat Aabid Bimar ‘Alayh-is-Salam Nikal Aaye Aur Arz Kee : Abba Jaan! Mere Oopar To Aisa Zulm Na Keejiye Ki Mere Hote Huwe Aap Maidaan Me Jaa Rahe Hain Mein Bhi Baaqi Bhaa’iyo’n Kee Tarah Apne Nana Jaan Ka Deedaar Karna Chaahta Hoo’n, Mein Bhi Apni Daadi Jaan Kee Bargah Me Jaa Kar Surkhroo Hona Chaahta Hoo’n, Ab Shahadat Ka Jaam Peena Meri Baari Hai, Imam Husayn RadiyAllahu Ta’ala ‘Anhu Ne Farmaya : Too Rah Jaa Ki Khanwada-E-Rasool Ka Har Chiraaag Gul Ho Chuka Hai Har Phool Murjha Chuka Hai Ab Meri Nasl Me Faqat Too Hee Baaqi Rah Gaya Hai Mujhe To Shaheed Hona Hee Hai Agar Too Bhi Shaheed Ho Gaya To Tere Naana Kee Nasl Kaha’n Se Chalegi Too Apne Naana Kee Nasl Kee Baqa Kee Khaatir Zinda Rah.

Hazrat Imam Husayn RadiyAllahu Ta’ala ‘Anhu Imam Zayn-ul-Aabidin ‘Alayh-is-Salam Ko Chhod Kar Khud Maidane Karbala Me Utre Aap Bhi Derr Tak Hazaaro’n Yazeediyo’n Ko Waasile Jahannam Karte Rahe. Poore Lashkar Me Kohraam Mach Gaya. Ali Shere Khuda KarramAllahu Ta’ala Waj’hah-ul-Karim Ka Yeh Jawaa’n Beta, Yeh Allah Ka Sher Jis Taraf Talwaar Le Kar Nikal Jaata Hazaaro’n Afraad Bhedo’n Kee Tarah Aage Bhaagne Lagte Aap Unhein Waasile Jahannam Karte Rahe Talwaaro’n Aur Nezo’n Ke Waar Khaate Rahe, Saara Din Is Tarah Guzar Gaya Khayaal Aaya Ki Wuzoo Taazah Kar Loo’n, Maidane Furaat Par Gaye Paanch Sau-500 Ka Lashkar Chhod Kar Bhaag Gaya, Aap Ne Wuzoo Karne Ke Liye Furaat Se Chullu Me Paani Liya To Woh Khoon Aaloodah Ho Gaya, Aap Ne Us Ko Uchhaala Aur Waapas Laut Aaye Muskura Kar Aasmaan Kee Taraf Dekha Aur Sar Jhuka Liya Jum’ah Ka Din Tha Ab Waha’n Jum’ah Kaha’n? Namaze Zuhr Ka Waqt Aaya Farmane Lage Yazeediyo’n ! Kuchh Der Rukh Jaao Taa Ki Allah Kee Bargah Me Do Sajde Aur Kar Loo’n, Lekin Woh Zaalim Yeh Muhlat Bhi Dene Par Tayyar Na They. Imam Aali Maqaam Ne Un Ke Azaa’im Dekh Kar Talawaar Rakh Dee Aur Zuhr Kee Namaaz Ke Liye Niyyat Baandh Lee Zaalimo’n Ne Yeh Na Dekha Ki Namaaz Ada Kar Rahe Hain, Kuchh Derr Tawaqquf Kar Le’n. Balki Unhone Mauqa-E-Ghanimat Jaana, Chaaro’n Taraf Se Chadhaayi Kar Dee, Teero’n Kee Bauchhaar Aur Pey Dar Pey Hamlo’n Ne Nawasa-E-Rasool Ke Jism Ko Nidhaal Kar Diya, Chunanche Ghode Se Gir Gaye Yaha’n Tak Ki Jisme At’har Me Uthne Kee Sakat Baaqi Na Rahi, Gire Huwe Husayn RadiyAllahu Ta’ala ‘Anhu Ke Saamne Aa Kar Bhi Koi Waar Na Karta Tha Peechhe Se Waar Karte. Nezo’n Se Waar Hote Imam Husayn ‘Alayh-is-Salam Sabr-o-Raza Aur Tawakkul Ke Saare Marhale Kaamyaabi Se Tay Kar Ke Shahadat Ke Us Maqaam Par Pahuncha Gaye Jis Kee Rif’at Wa Azmat Ko Koi Nahin Paa Sakta Un Kee Rooh Ko Qudsiyaane Falak Ne Aik Juloos Kee Soorat Me Huzoore Iyzidi Pahunchaane Ke Liye Tamaam Intizaamaat Mukammal Kar Liye They Aur Idhar Rooh Qafase Unsuri Se Parwaaz Karne Lagi. Udhar Haatife Ghaybi Se Nida Aayi Husayn Ab Aaja ! Too Ne Sabr Ko Kamaal Ata Kar Diya Istiqaamat Ko Intiha Tak Pahuncha Diya Hai Ummate Mustafa Salam Allah ‘Alayha Ka Sar Ooncha Kar Diya Aye Husayn! Aaj Se Tere Iqdaam Ko Bina-E-La-Ilah Qaraar De Diya Jaaega Aye Husayn Ab Aaja. Aye Roohe Taahir! ارْجِعِي إِلَىٰ رَبِّكِ رَاضِيَةً مَّرْضِيَّةً Jannat Ke Darwaaze Khol Diye Gaye Naana Jaan Istiqbaal Ke Liye Khade Hain Aye Husayn RadiyAllahu Ta’ala ‘Anhu Too Ne Mera Sar Fakhr Se Buland Kar Diya Hai. Hazrat Fatimat-uz-Zahrah RadiyAllahu Ta’ala ‘Anha Bete Ko Shabashi Deti Hain Ali Shere Khuda KarramAllahu Ta’ala Waj’hah-ul-Karim Bete Ko Aafreen Kehte Hain. Imam Aali Maqaam Kee Roohe Paak Is Tarah Hujoome Mala’ikah Me Allah Kee Bargaah Me Baaryaab Hoti Hai, Aur Izzat Paati Hai, Aap Ka Sar Tan Se Juda Kar Diya Jaata Hai Zaalimo’n Ke Jazba-E-Intiqaam Kee Phir Bhi Taskeen Nahin Hoti Woh Jisme At’har Par Ghode Daudaate Hain Taapo’n Se Raundate Hain Unhein Khayaal Tak Nahin Aata Ki Yeh Woh Sar Hai Jise Sarkare Do-Aalam SallAllahu Ta’ala ‘Alayhi Wa-Aalihi Wa-Sallam Chooma Karte They. Yeh Woh Jism Hai Jise Apne Kaandhe Par Sawaar Karte They Aur Apni Peeth Par Bitha Kar Ghutno’n Ke Bal Chalte They.

Koofi Har Qism Ke Ihsaasaat Se Aari They, Insaaniyyat Ko Khayr Aabaad Keh Chuke They Aur Aisi Darindagi Par Utar Aaye They Jis Par Darindagi Bhi Sharmaati Hai Imam Husayn ‘Alayh-is-Salam Ke Sare Aqdas Ke Ilaawah Unhone Baaqi Bahattar-72 Afraad Ke Sar Bhi Jismo’n Se Alaahidah Kiye Un Ka Juloos Nikaala Aur Un Ke Saath Khanwada-E-Rasool Kee Baa-Pardah, Hayaadaar Khawaateen Ko Le Kar Ibn Ziyaad Ke Darbaar Kee Taraf Rawaana Huwe, Koofah Me Us Paleed Ibn Ziyaad Ka Darbaar Laga Huwa Tha Ki Yeh Juloos Waha’n Pahunch Gaya.
Phir Kya Huwa Yeh Aaindah Khutbah Me Bayaan Kiya Jaaega…
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-41_46.]

3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Hazrat Hurr RadiyAllahu Ta’ala ‘Anhu Kee Tawbah

Posted on July 17, 2016August 26, 2016 by tahirulqadribooks

TEESRA
KHITAAB

بِسْمِ اللَّهِ الرَّحْمَنِ الرَّحِيْمِ

إِنَّ الَّذِينَ يُؤْذُونَ اللَّهَ وَرَسُولَهُ لَعَنَهُمُ اللَّهُ فِي الدُّنْيَا وَالْآخِرَةِ وَأَعَدَّ لَهُمْ عَذَابًا مُهِينًا ۝

Hazaraate Giraami! Guzishta Jumu’at-ul-Mubarak Ke Khitaab Me Hum Ne Waaqe’a-E-Karbala Sayyidina Imam Husayn RadiyAllahu Ta’ala ‘Anhu Kee Shahadat Tak Bayaan Kiya Tha Yeh Baat Dhihn Nasheen Rahe Ki Jin Bar Guzeedah Hastiyo’n Ka Zikr Guzishta Khitaab Me Huwa Hai Saaf Zaahir Hai Sirf Wohi Shuhda-E-Karbala Nahin Balki Un Ke Ilaawah Bhi Bahut Hee Bar Guzeedah Aur Naamwar Shakhsiyyaat Islaam Kee Hifaazat Wa Nigahdaasht Ke Us Ma’rake Me Shaheed Huwi Hain. Jin Me Fardan Fardan Har Kisi Ka Zikr Karna Waqt Kee Kami Ke Peshe Nazar Mumkin Nahin Hai.

Hazrat Hurr RadiyAllahu Ta’ala ‘Anhu Kee Tawbah

Un Me Se Hazrat Hurr Bhi Hain Aur Yeh Woh Khushnaseeb Hain, Jinhone Ma’reka-E-Karbala Ke Dauraan Allah Ke Fadl-o-Karam Se Apna Muqaddar Badalne Kee Sa’aadat Haasil Kee, Yeh Yazeedi Lashkar Ke Aik Sipah Saalaar They Aur Sayyidina Imam Husayn RadiyAllahu Ta’ala ‘Anhu Ke Madde Muaqaabil Logo’n Me Se They, Lekin Ware Athna Woh Apni Sawaari Le Kar Dauraane Jang Imam Ali Maqam Ke Saamne Aaye Aur Puchha Ki Aye Imame Aali Maqam ! Mein Aap Ko Is Jagah Laane Ka Qusoorwaar Aur Gunahgaar Hoo’n, Lekin Ab Taa’ib Ho Kar Aap Ke Qadmo’n Par Apni Jaan Nichhaawar Karna Chaahta Hoo’n To Kya Itna Bada Gunaah Karne Ke Baa’d Bhi Mere Liye Bakhshish Ka Koi Imkaan Hai ? Imame Aali Maqaam Ne Farmaya : Tawbah Ka Darwazah Khula Hai, Ab Bhi Agar Too Baatil Parasti Aur Zulm-o-Sitam Ka Saath Dene Se Baaz Aa Jaae Aur Raahe Haque Ikhtiyaar Kar Le To Aatishe Dozakh Se Najaat Haasil Kar Sakta Hai, Aur Daa’imi ‘Azaab Se Aazaad Ho Sakta Hai. Hazrat Hurr RadiyAllahu Ta’ala ‘Anhu Ne Jab Yeh Suna To Yazeedi Lashkar Ka Saath Chhod Kar Imam Paak Ke Saathiyo’n Me Shaamil Ho Gaye.

Nikal Kar Lashkare A’adaa’ Se Maara Hurr Ne Yeh Na’rah
Ki Dekho’n Yu’n Nikalte Hain Jahannam Se Khuda Waale

Ahl-E-Bayte Kiram Salam Allah ‘Alayhim Ke Saath Apni Wafadari Ka Suboot Faraaham Karte Huwe Maidaane Karbala Me Jaame Shahadat Nosh Kiya.
Is Qism Kee Naamwar Shaksiyaat Kee Shahadat Kee Tafseelaat Bahut Ziyaada Hain Hum Un Se Gurez Karte Huwe Nafse Mazmoon Kee Taraf Aa Rahe Hain Aur Jo Aayate Karimah Tilawat Kee Hai Us Kee Raushni Me Maidane Karbala Me Pesh Aane Waale Waaqe’at Ka Tajziyah Karte Hain Taa Ki Jaan Sakein Ki Yeh Kitna Bada Saanihah Tha Aur Us Me Mulawwath Afraad Kis Qism Ke Ibrat Naak Anjaam Se Do Chaar Huwe, Mazkoorah Baala Aayate Karimah Ka Mafhoom Yeh Hai :

“BeShak Jo Log Khuda Ta’ala Aur Us Ke Rasool Ki Aziyyat Dete Hain. Khuda Ta’ala Dunya Aur Aakhirat Me Un Par La’nat Farmata Hai Aur Aise Logo’n Ke Liye Us Ne Zillat Aamez ‘Azaab Tayyar Kar Rakkha Hai.”
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-49_50.]

3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Hazrat Abbas RadiyAllahu Ta’ala ‘Anhu Kee Aziyyat Se Sadmah

Posted on July 17, 2016August 23, 2016 by tahirulqadribooks

Hazrat Abbas RadiyAllahu Ta’ala ‘Anhu Huzoor SallAllahu Ta’ala ‘Alayhi Wa-Aalihi Wa-Sallam Ke Sage Chacha They Chun Ki Jange Badr Me, Musalmano’n Ke Khilaaf Jang Me Shareek They Aur Ahle Makkah Kee Taraf Se Ladne Ke Liye Aaye They. Is Liye Ahle Makkah Kee Shikast Aur Musalmano’n Kee Numaaya Fat’h Ke Baa’d Jangi Qaidi Kee Haishiyyat Se Madinah Tayyibah Laaye Gaye Aur Doosre Qaidiyo’n Kee Tarah Unhein Bhi Rassiyo’n Se Jakad Diya Gaya. Woh Rassiyo’n Kee Aziyyat Se Saari Raat Karaahte Rahe, Naaz Wa Na’m Me Pale Huwe They, Naamwar Insaan They, Is Liye Qaid-o-Band Kee Su’oobatein Un Ke Liye Intihaayi Aziyyat Ka Sabab Ban Gayi’n, Sub’h Ka Waqt Huzoor SallAllahu Ta’ala ‘Alayhi Wa-Aalihi Wa-Sallam Masjid Me Tashrif Laaye Aur Farmaya :

Chacha Abbas Kee Takleef Aur Aziyyat Ke Khayaal Hamein Raat Bhar Neend Nahin Aayi, Jab Woh Karaahte They To Hamein Behad Sadmah Pahunchta Tha.

Sochne Kee Baat Yeh Hai Ki Us Waqt Hazrat Abbas Kaafir They, Abhi Tak Unhone Islam Kee Raushni Se Kaashaana-E-Dil Ko Munawwar Nahin Kiya Tha, Kufr Kee Taa’id Wa Himayat Me Islam Ke Khilaf Jang Karne Ke Liye Aaye They, Phir Jangi Qaidi Kee Haisiyyat Se Giriftaar Huwe Is Ke Baawajood Huzoor SallAllahu Ta’ala ‘Alayhi Wa-Aalihi Wa-Sallam Ne Un Kee Aziyyat Ke Khayaal Se Takleef Mahsoos Farmaayi Aur Saari Raat Aankho’n Me Kaat Dee, Sirf Is Liye Ki Woh Nasabi Lihaaz Se Rishtedaar, Sage Chacha, Aur Apne Khandan Ke Aadami They. Sahaba-E-Kiram Se Farmaya : Munaasib Samjho To Fidyah Le Kar Unhein Aazaad Kar Do.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-50_51.]

3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Hazrat Hamzah RadiyAllahu Ta’ala ‘Anhu Ke Qaatil Ko Tambeeh

Posted on July 17, 2016August 26, 2016 by tahirulqadribooks

Isi Tarah Jange Uhad Me Jab Huzoor SallAllahu Ta’ala ‘Alayhi Wa-Aalihi Wa-Sallam Ke Chacha Hazrat Hamzah RadiyAllahu Ta’ala ‘Anhu Shaheed Ho Gaye Aur Un Ka Qatil Wahshi, Jo Ghair Muslim Tha, Woh Fat’h Makkah Ke Baa’d Islaam Le Aaya, Aur Kalimah Padh Kar Huzoor SallAllahu Ta’ala ‘Alayhi Wa-Aalihi Wa-Sallam Ke Sharafe Sahabiyyat Se Bahrah War Ho Gaya, Islaam Kehta Hai Ki Islaam Laane Se Pehle Kee Jitni Khataaein Ho’n, Jitne Gunaah Ho’n, Jitni Bhi Laghzishein Ho’n Woh Saari Kee Saari Mu’aaf Kar Dee Jaati Hain Lekin Chun Ki Yeh Wahshi Huzoor SallAllahu Ta’ala ‘Alayhi Wa-Aalihi Wa-Sallam Ke Chacha Ka Qaatil Tha, Aur Us Ne Bedardi Ke Saath Huzoor SallAllahu Ta’ala ‘Alayhi Wa-Aalihi Wa-Sallam Ke Chacha Ko Qatl Kiya Tha, Musalman Ho Gaya Us Kee Khataaein Bargahe Mustafawi Kee Taraf Se Mu’aaf Kar Dee Gayi, Us Kee Laghzisho’n Par Qalam Afw Pher Diya Gaya, Haalate Kufr Ke Saare Mazalim Tauba Ke Paani Se Dho Diye Gaye, Lekin Is Ke Baawajood Us Wahshi Se Farmaate, Ki Teri Saari Khataaein Mu’aaf Ho Chuki Hain, Aur Too Sahaabi Ban Gaya Hai, Lekin Too Mere Saamne Aane Se Gurez Kiya Kar, Mere Saamne Se Na Guzra Kar, Ke Jab Too Meri Nigaaho’n Ke Saamne Aata Hai To Mujhe Apne Pyaare Chacha Kee Shahadat Ka Manzar Yaad Aa Jaata Hai, Woh Dukh Dard Ke Zakhm Hare Ho Jaate Hain Is Liye Mere Saamne Kam Aaya Kar.

Un Ke Dukh Ko Dukh Jaana Un Ke Dard Me Shareek Huwe Aur Un Kee Aziyyat Par Huzoor SallAllahu Ta’ala ‘Alayhi Wa-Aalihi Wa-Sallam Ko Bhi Takleef Huwi Aur Taweel Waqt Guzar Jaane Ke Baawajood Jab Kabhi Woh Khayaal Aa Jaata To Dukh Dard Phir Taazah Ho Jaata. So! Huzoore Akram SallAllahu Ta’ala ‘Alayhi Wa-Aalihi Wa-Sallam Ke Narm Dili Aur Aap Ke Qalbe Anwar Ke Gosha-E-Rahmat Ko Jaan Lene Ke Baa’d Ab Jab Hum Nawasa-E-Rasool Kee Us Be Dardi Ke Saath Shaheed Hone Ke Waaqi’e Ko Chashme Tasawwur Me Apne Saamne Laate Hain To Ma’an Yeh Khayaal Aata Hai Ki Woh Rasool Jo Haalate Kufr Me Apne Chacha Abbas Ke Karaahne Kee Takleef Gawaara Na Kar Sake, Woh Rasool Jo Apne Chacha Hamzah Ke Be Dardi Kee Haalat Me Shahadat Ke Dard Naak Manzar Ko Kabhi Na Bhula Sake, Us Rasoole Paak SallAllahu Ta’ala ‘Alayhi Wa-Aalihi Wa-Sallam Kee Takleef Aur Aziyyat Ka Aalam Kya Ho Gaya Jab Diyaare Ghair Me Be Basi Aur Be Kasi Ke Aalam Me, Imam Aali Maqaam, Jigar Gosha-E-Rasool Jinhein Huzoor SallAllahu Ta’ala ‘Alayhi Wa-Aalihi Wa-Sallam Ne Apne Kandho’n Ka Sawaar Banaaya, Jinhein Huzoor SallAllahu Ta’ala ‘Alayhi Wa-Aalihi Wa-Sallam Ne Apni Goud Me Khelaaya Tha, Jin Ko Huzoor SallAllahu Ta’ala ‘Alayhi Wa-Aalihi Wa-Sallam Ne Apni Zubaane Aqdas Choosaa’i Thi Aur Jin Ko Apne Dil Ka Tukda Qaraar Diya Tha Aur Kabhi Bhi Apni Aankho’n Se Juda Na Hone Diya Tha, Aap Kee Roohe Paak Ko Karbala Ke Tapte Huwe Sahra Me Dhaaye Gaye, Zulm-o-Sitam Se Kitna Sadmah Pahuncha Hoga?

Aur Nabi SallAllahu Ta’ala ‘Alayhi Wa-Aalihi Wa-Sallam Ko Sadmah Aur Aziyyat Pahunchaana Koi Ma’mooli Jurm Nahin Jo Shakhs Yeh Harkat Karta Hai Khuda Ta’ala Us Ke Liye Dunya Wa Aakhirat Me Dardnaak ‘Azaab Aur Zillat Ko Muqaddar Kar Deta Hai. To Phir Kya Aalam Hoga Un Badbakhto’n Ke Anjaam Ka, Un Kee Aaqibat Aur Aakhirat Ka Jinhone Nawasa-E-Rasool Ko Aziyyat Pahunchaayi, Khanwada-E-Rasool Kee Tauheen Kee, Aur Regzaare Karbala Me Unhein Dhab’h Kiya. Un Ke Jismo’n Par Ghode Daudaaye, Un Ke Saro’n Ko Un Ke Mubarak Jismo’n Se Juda Kiya Andazah Keejiye Ki Huzoor SallAllahu Ta’ala ‘Alayhi Wa-Aalihi Wa-Sallam Kee Roohe Anwar Par Gumbade Khadra’ Ke Andar Kiya Qiyaamat Beeti Hogi?
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-51_52.]

3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Hazrat Ibn Abbas RadiyAllahu Ta’ala ‘Anhuma Kee Riwayat

Posted on July 17, 2016August 23, 2016 by tahirulqadribooks

Muta’addad Kutube Hadith Me Yeh Waqi’a Darj Hai. Jis Ke Raawi Hazrat Ibn Abbas RadiyAllahu Ta’ala ‘Anhuma Hain Farmate Hain :

رأيت النبي صلى الله تعالى عليه و على آله وسلم فيما يرى النائم ذات يوم بنصف النهار أشعث أغبر بيده قارورة فيها دم فقلت : بأبي أنت وأمي! ما هذا؟ قال : هذا دم الحسين وأصحابه ولم أزل ألتقطه منذ اليوم.

–
[Khatib Tabrizi Fi Mishkat-ul-Masabih,/572,

Ibn Hajar ‘Asqalani Fi Tahdhib-ut-Tahdhib, 02/355.]

Mein Ne Neend Kee Haalat Me Dekha Ki Rasoole Paak SallAllahu Ta’ala ‘Alayhi Wa-Aalihi Wa-Sallam Khwaab Me Mere Paas Tashrif Le Aaye, Aap Ke Sare Anwar Par Gard Hai Aur Aap Pareshaan Nazar Aate Hain Aur Aap Ke Daste Aqdas Me Aik Sheeshi Hai Aur Us Sheeshi Me Khoon Hai, Mein Hairaan Ho Gaya Aur Hairat Ke Aalam Me Pukaar Uttha, Mere Maa’n Baap Aap Par Qurbaan Ho’n Ya RasoolAllah SallAllahu Ta’ala ‘Alayhi Wa-Aalihi Wa-Sallam! Aap Itne Pareshaan Kyun Hain? Aur Daste Aqdas Me Yeh Sheeshi Kaisi Hai Jis Me Khoon Hai? Huzoor SallAllahu Ta’ala ‘Alayhi Wa-Aalihi Wa-Sallam Ne Farmaya : Ibn Abbas ! Too Dekh Ki Kalimah Padhne Waale Baa’z Badbakhto’n Ne Mere Baa’d Mere Bete Ka Kya Hashr Kiya Hai? Mein Sub’h Se Shaam Tak Saara Din Aaj Karbala Mein Guzaara Hai Aur Apne Bete Husayn Aur Us Ke Saathiyo’n, Jaan Nishaaro’n Aur Wafadaro’n Ka Khoon Is Sheeshi Me Jam’a Kiya Hai Aur Ab Yeh Khoon Le Kar Mein Apne Allah Kee Baargaah Me Jaa Raha Hoo’n Yeh Dikhaane Ki Liye Ki Un Badbakhto’n Ne Tere Rasool Ke Nawaase Ke Saath Karbala Ke Regzaaro’n Me Yeh Hashr Kiya Hai.

Ibn Abbas RadiyAllahu Ta’ala ‘Anhuma Khwaab Se Bedaar Huwe Kutube Ahadith Me Darj Hai Ki Aap Uthey Aur Aap Kee Zubaan Par Inna Lillahi Wa Inna Ilayhi Raji’oon Ke Alfaaz Jaari They. Logo’n Ne Puchha Hazrat Kya Ho Gaya Hai ? Farmane Lage :

Husayn Ibn Ali ‘Alayhima-‘s-Salam Shaheed Kar Diye Gaye Hain. Logo’n Ne Puchha :

Hazrat Yeh Kaise Pata Chala ? Farmane Lage Abhi Rasoole Paak Aik Ta’ziyati Kaifiyyat Me Mere Saamne Tashreef Laaye Aur Aap Ne Khwaab Me Mujhe Shahadate Husayn Ka Waqi’a Bayan Farmaya Hai. Chunanche Bees-20 Baa’is-22 Din Ke Baa’d Phir Jab Baa Zaabitah Shahadate Husayn Kee Ittilaa’ Hazrat Ibn Abbas Aur Ahle Makkah Ko Pahunchi. Baa’is-22 Din Pehle Jo Khabar Aap Ko Dee Gayi Thi Us Kee Tasdeeq Ho Gayi.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-52_53.]

3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Hazrat Ummi Salamah RadiyAllahu Ta’ala ‘Anha Kee Riwayat

Posted on July 17, 2016August 23, 2016 by tahirulqadribooks

Doosri Taraf Wohi Do Pahar Hai Hazrat Ummi-‘l-Mu’minin Ummi Salamah RadiyAllahu Ta’ala ‘Anha Madinah Tayyibah Me Huzoor SallAllahu Ta’ala ‘Alayhi Wa-Aalihi Wa-Sallam Ke Ghar Me Aaraam Farma Hain Hazrat Salma Farmati Hain Ki Mein Aap Ke Paas Ya’ni Umm-il-Mu’minin Ummi Salamah Ke Paas Gayi, Yeh Woh Huzoor SallAllahu Ta’ala ‘Alayhi Wa-Aalihi Wa-Sallam Kee Zawja-E-Mutahharah Hai Jin Ko Aaqa-E-Do Jaha’n Ne Woh Mitti Ata Kee Thi Jo Hazrat Jibra’il Ameen Regzaare Karbala Se Uthaa Kar Hazrat Imam Husayn RadiyAllahu Ta’ala ‘Anhu Ke Bachpan Ke Zamaane Me De Gaye They, Aur Yeh Arz Kar Gaye They Ki Huzoor Yeh Us Maidaane Karb-o-Bala Kee Mitti Hai Jis Me Kuchh Badbakht Husayn Ibn Ali Ko Aap Ke Baa’d Shaheed Kar Denge, Aap Ne Woh Mitti Ummi Salamah Ko De De Thi Yeh Farmate Huwe Ki :

إذا تحولت هذه التربة دما فاعلمي ان ابني قد قتل

–
[Suyooti Fi Khasa’is Al-Kubra, 02/125,

Ibn Hajar ‘Asqalani Fi Tahdhib-ut-Tahdhib, 02/347.]

Aye Ummi Salamah Jab Yeh Mitti Surkh Ho Jaaye Ya’ni Khoon Me Badal Jaaye To Samajh Lena Ki Mera Beta Husayn Shaheed Kar Diya Gaya Hai.
Hazrat Ummi Salma Farmati Hain Ki Mein Aap Se Milne Ke Liye Gayi, Mein Ne Dekha Ki Aap Zaar-o-Qataar Ro Rahi Hain Chashmane Muqaddas Se Aansoo Rawa’n Hain. Aik Dukh Aur Dard-o-Alam Kee Kaifiyyat Taari Hai Mein Ne Puchha Umm-il-Mu’minin! Rone Ka Kya Sabab Hai? Woh Farmane Lagi’n Abhi Khwaab Me Rasoole Paak SallAllahu Ta’ala ‘Alayhi Wa-Aalihi Wa-Sallam Tashreef Laaye They Aur Mein Ne Un Ko Dekha Hai Khuda Kee Qasam Un Kee Chashmane Muqaddas Se Bhi Aansoo Bah Rahe They.

على رأسه ولحيته التراب ، فقلت : مالك يا رسول الله ؟ قال : شهدت قتل الحسين آنفا.

–
[Hakim Fi Al-Mustadrak ‘Ala Sahihayn, 04/19,

Ibn Hajar ‘Asqalani Fi Tahdhib-ut-Tahdhib, 02/356,

Ibn Kathir Fi Al-Bidayah Wa An-Nihayah, 08/200.]

Aap Ke Sare Anwar Aur Daadhi Mubarak Par Mitti Thi. Mein Ne Puchha : Aaqa! Yeh Gard Kaisi? Farmane Lage : Ummi Salamah! Abhi Apne Husayn Ke Qatl Ka Manzar Dekh Kar Aa Raha Hoo’n. Mein Maidaane Karbala Se Aaya Hoo’n. Hazrat Ummi Salamah Ne Bedaar Hote Hee Us Sheeshi Ko Uthaaya, Jis Me Mitti Bhari Padi Thi Dekha To Woh Khoon Ho Chuki Thi, Farmaane Lagi’n Ab Husayn Ibn Ali RadiyAllahu Ta’ala ‘Anhuma Shaheed Kar Deeye Gaye Hain.

To Dosto’n ! Woh Rasool SallAllahu Ta’ala ‘Alayhi Wa-Aalihi Wa-Sallam Jo Us Rishte Kee Munaasibat Se Adna See Bhi Takleef Gawaara Na Farmate They Us Rasool Ko Kis Qadar Aziyyat Pahunchi Hogi? Is Liye Woh Sub’h Se Shaam Tak Apni Roohe Tayyibah Ke Mithaali Jism Ke Saath Maidaane Karbala Me They? Huzoor SallAllahu Ta’ala ‘Alayhi Wa-Aalihi Wa-Sallam Apne Nawase Husayn Kee Shahadat Ka Manzar Dekh Rahe They. Jo Nabi Khooni Rishte Kee Badaulat Apne A’izzah Wa Aqaaqrib Ke Zara See Takleef Bhi Gawaara Nahin Farmaate They Aur Un Kee Aziyyat Se Be Chain Ho Jaate They Us Saanihah Ke Wauqoo’ Ke Waqt Un Ke Dard-o-Alam Ka Andaazah Lagaya Jaa Sakta Hai! Aur Jo Bad Kirdaar, Saffaak Log, Us Qatl Me Mulawwasth They, Un Ke Khilaaf Aap Ke Nafrat Bhare Jazbaat Kaise Honge Woh Bakhoobi Ma’loom Kiye Jaa Sakta Hain. Isi Haadithe Kee Taraf Ishaarah Farmaate Huwe Aap Ne Aik Baar Farmaya Tha Ki :

“Mein Dekhta Hoo’n Aik Dhabbe Daar Kutte Ko Woh Mere Ahl-E-Bayt Ke Khoon Se Haath Rang Raha Hai.”

Jab Imam Husayn Maidane Karbala Me Pahunche Aur Shimr Dhi-‘l-Jawshan Talwaar Lehraata Huwa Us Shaahsawaar Ke Saamne Aaya To Us Kee Shakal Dekhte Hee Pukaar Uthe Ki Mere Naana Ne Sach Farmaya Tha Ki Mein Aik Dhabbe Daar Bars Waale Kutte Ko Dekhta Hoo’n Ki Mere Bete Ke Khoon Se Haath Rang Raha Hai. Aye Badbakht Shimr! Too Hee Woh Kutta Hai Jis Kee Nisbat Mere Naana Ne Khabar Dee Thi Aur Mein Tere Bars Ko Dekh Raha Hoo’n, Aur Dekh Raha Hoo’n Tere Anjaam Ko Ki Anqareeb Too Hamaare Khoon Se Apne Haath Rangega. Ibn Asaakir Ne Is Riwayat Ko Bayan Farmaya Hai.

Chunanche Jis Tarah Mein Ne Pehle Arz Kiya Ki Un Ka Sare Anwar Aur Deegar Shuhda-E-Karbala Ke Saro’n Ko Tano’n Se Juda Kar Diya Gaya.

Ab Shaam Ho Chuki Thi Un Zaalimo’n Ne Raat Usi Maidaan Me Basar Kee Andaazah Keejiye Ki Woh Raat Kaisi Qayamat Kee Raat Hogi Khanwadae Rasool Kee Muqaddas Bibiya’n Khaimo’n Me Hain Aur Raat Chhaa Gayi Hai, Aur Tan Sar Se Juda Hain! Aur Is Tarah Bahattar-72 Shuhada’ Ke Tan Aik Taraf Aur Sar Aik Taraf Regazaare Karbala Me Darya-E-Furaat Ke Kinaare Par Hain. Saari Raat Is Qayamat Kee Kaifiyyat Me Basar Ho Gayi.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-53_55.]

TEESRA KHITAAB

Hazrat Hurr RadiyAllahu Ta’ala ‘Anhu Kee Tawbah

TEESRA
KHITAAB