tahirulqadribooks

3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Shahadat Ke Baa’d Taareeki Aur Khoon Kee Baarish

Posted on July 16, 2016August 23, 2016 by tahirulqadribooks

Hazrat Allama Ibn Hajar Makki, Hazrat Imam Suyooti, Ibn Athir, Allama Ibn Jarir Tabari, Allama Ibn Kathir Wa Deegar Aa’imma-E-Hadith Ne Bhi Apni Apni Kutub Me Bayan Farmaya Hai Ki :

Ahl-E-Bayte At’har Salam Allah ‘Alayhim Kee Shahadat Ke Maaba’d Nataa’ij Wa Alaamaat Se Pehle Hee Aagaah Kar Diya Gaya Tha Ki Jab Unhein Be Dardi Aur Zulm Ke Saath Shaheed Kar Diya Jaaega To Zameen Wa Aasmaan Khoon Ke Aansoo Roenge. Chunanche Shahadate Imame Husayn ‘Alayh-is-Salam Ke Baa’d Pesheengoyi Minn-o-An Poori Huwi.

لما قتل الحسين اسودت السماء وظهرت الكواكب نهاراً

–
[Haytami Fi As-Sawa’iq-ul-Muhriqah,/92,

Ibn Hajar ‘Asqalani Fi Tahdhib-ut-Tahdhib, 02/354.]

Jab Imam Husayn Shaheed Huwe To Aasmaan Siyaah Ho Gaya Aur Taareeki Ke Baa’ith Din Ko Taare Nazar Aane Lage.

Baa’z Kutub Me Hai Ki Teen Din Tak Aasmaan Kee Rangat Surkh Rahi Jis Par Andhere Ka Gumaan Hota Tha. Baa’z Mu’arrikheen Ne Yeh Muddat Saat Din Bayaan Kee Hai. Har Taraf Khoon Kee Baarish Hone Lagi Bayt-ul-Maqaddas Tak Jaha’n Kahin Bhi Koi Shakhs Apne Matke Se Us Ka Dhakkan Uthaata To Us Me Paani Kee Jagah Khoon Nazar Aata Zameen Ke Jis Maqam Se Patthar Ka Tukda Uthaaya Jaata Us Tukde Ke Neeche Se Khoon Ka Fawwarah Rawa’n Ho Jaata, Al-Gharaz Har Soo Zameen Bhi Qatle Husayn Par Ro Rahi Thi Aur Aasmaan Bhi Shahadate Husayn Par Ro Raha Tha. Umm-il-Mu’minin Hazrat Ummi Salamah RadiyAllahu Ta’ala ‘Anha Farmati Hain Rabbe Dhi-‘l-Jalaal Kee Izzat Kee Qasam! Husayn Kee Shahadat Ke Din Mein Ne Jinnat Ko Bhi Rote Huwe Dekha, Un Ko Bhi Yeh Kehte Huwe Suna Ki Badbakht Aur Badnaseeb Hain Woh Log Jinhone Rasool Ke Bete Ko Shaheed Kar Ke Apne Oopar Rasool Kee Shafa’at Ka Darwazah Band Kar Liya Hai.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-55_56.]

3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Sare Husayn RadiyAllahu Ta’ala ‘Anhu Ka Safar

Posted on July 16, 2016August 23, 2016 by tahirulqadribooks

Raat Guzar Gayi Sub’h Un Muqaddas Saro’n Ko Nezo’n Par Uthaaya Gaya, Oonto’n Kee Sawaariyo’n Par Muqaddas Biwiyo’n Ko Bithaya Gaya Aur Yeh Luta Pita Saara Qaafila Sooe Koofah Rawanah Ho Gaya, Zaalim Yazeedi Us Qaafile Ko Le Kar Koofah Kee Taraf Rawana Ho Gaye. Raat Ko Ibn Sa’d Ke Lashkar Me Se Kisi Ne Chaaha Ki Hazrat Zayn-ul-Aabidin Ko Bhi Shaheed Kar De Lekin Ibn Sa’d Ne Kaha Bimaar Baccha Hai, Ise Rahne Do!

Mashiyyate Iyzidi Yahi Thi Ki Koi Mard Un Me Zaroor Rahe Jis Ne Sab Kuchh Apni Aankho’n Se Dekha Ho Aur Woh Haalaat Ka Ayni Shaahid Ho.

Doosre Roz Lashkare Yazeed Ne Apni Tamam Laasho’n Ko Jam’a Kiya Aur Unhein Dafn Kar Ke Rawangi Ka E’laan Kar Diya, Magar Ahl-E-Bayte Kiram ‘Alayhim-us-Salatu Wa’s-Salam Kee Laasho’n Ko Dafn Karne Kee Koi Zaroorat Mahsoos Na Kee, Be Ghairat Kameene Logo’n Ne Imame Paak Ke Khandan Aur Saathiyo’n Ke Jismo’n Aur Laasho’n Ko Usi Jagah Be Goro Kafan Chhod Diya.

Furaat Ke Kinaare Aik Qabeela-E-Banu Sa’d Aabaad Tha Jab Unhein Yeh Pata Chala Ki Yazeedi Log Ahl-E-Bayte At’har ‘Alayhim-us-Salam Kee Laasho’n Ko Khule Aasmaan Tale Chhod Kar Chale Gaye Hain Woh Fauran Waha’n Pahunche Aur Shuhda’ Ke Mubarak Jismo’n Ke Kafan Dafan Ka Intizaam Kiya.

Yazeediyo’n Ka Qaafila Ahl-E-Bayte Kiram Salam Allah ‘Alayhim Ke Hamrah Koofah Daakhil Huwa Shuhada’ Ke Sar Un Ke Paas They. Woh Sab Ibn Ziyad Ke Saamne Pesh Kar Deeye Gaye. Hazrat Imam Paak Ka Sar Mubarak Khooli Ke Paas Tha Woh Kisi Wajah Se Barwaqt Darbaar Me Nahin Pahunch Saka Aur Sar Mubarak Apne Hamraah Apne Ghar Le Gaya. Apni Biwi Se Kehne Laga : Aaj Mein Tere Liye Dunya Wa Jahaan Kee Daulat Le Kar Aaya Hoo’n Is Ka Matlab Yeh Tha Ki Jab Yeh Sar Ibn Ziyad Ke Saamne Pesh Hoga To Bahutsa In’aam Milega.
Sang Dil Khooli Lambi Taan Kar So Gaya Magar Us Kee Biwi Sar Mubarak Ke Saamne Baith Gayi Aur Saari Raat Ro Ro Kar Guzaar Dee. Us Ne Dekha Ki Zameen Se Asmaan Tak Noor Hee Noor Phaila Huwa Hai Aur Sar Mubarak Ke Ird Gird Ajeeb Shakl Ke Noorani Paikar Tawaaf Kar Rahe Hain Kuchh Nahin Kaha Jaa Sakta Ki Woh Hoor Wa Firishte Hain, Is Jaha’n Kee Makhlooq Hain Ya Aalame Baala Se Aaye Huwe Mala’ikah Hain Woh Saari Raat Yahi Nazaare Karti Rahi.
Sub’h Badbakht Khooli Utha Aur Imam Paak Ka Sare Anwar Ibn Ziyad Ke Paas Le Gaya Imam Aali Maqaam Ka Sare Anwar Baaqi Saro’n Ke Saath Aur Khanwada-E-Rasool Ke Baaqi Qaidiyo’n Ke Saath Us Badbakht Ibn Ziyaad Ke Takht Ke Saamne Pesh Kiya Gaya Woh Badbakht Us Waqt Takht Par Baitha Tha Us Ke Haath Me Chhadi Thi Us Ne Chhadi Le Kar Sayyidina Imam Husayn Ke Dandan Mubarak Par Maari Aur Kaha Dekho! Sar Akda Kar Chalne Waale! Aaj Too Apne Anjaam Ko Pahunch Gaya. Huzoor SallAllahu Ta’ala ‘Alayhi Wa-Aalihi Wa-Sallam Ke Aik Naabina Sahabi Jo Ki Bilkul Naabina Na They Nazar Kuchh Kamzor Thi Woh Bahut Budhe Ho Chuke They Un Ka Naam Zayd Bin Arqam Tha Woh Majlis Me Mawjood They. Ibn Zayd Ne Chhadi Ko Jab Imame Aali Maqam Ke Mubarak Labo’n Par Dekha To Woh Cheekh Uthe Aur Kaha Ki Kuchh To Haya Kar! Mein Ne Apni Aankho’n Se Huzoor SallAllahu Ta’ala ‘Alayhi Wa-Aalihi Wa-Sallam Ke Labo’n Ko In Ke Labo’n Par Dekha Hai Huzoor SallAllahu Ta’ala ‘Alayhi Wa-Aalihi Wa-Sallam In Labo’n Ko Chooma Karte They, Us Ne Kaha Ki Aye Zayd Bin Arqam! Agar Aap Rasool Ke Sahaabi Aur Budhe Na Hote To Mein Aap Ka Sar Qalam Kar Deta.

Zaalim! Tujhe Kya Haya Hai Huzoor Ke Sahabi Ka, Jis Rasool Ke Lakhte Jigar Se Tum Yeh Sulooq Kar Rahe Ho Us Rasool Ke Sahabi Se Haya Karne Ka Tumhein Kya Haque Pahunchta Hai? Ibn Ziyad Ne Yeh Sab Kuchh Karne Ke Baa’d Yazeed Kee Khushnudi Ke Liye Imam Aali Maqam Ka Sare Anwar Deegar Saro’n Ke Juloos Ke Saath Aur Unhein Khanwada-E-Rasool Kee Barguzidah Qaidiyo’n Ke Saath Yazeed Kee Taraf Dimashq Rawana Kar Diya.

Jab Yeh Qaafila Dimashq Kee Taraf Rawana Huwa To Raaste Me Aik Girje Ke Qareeb Padaao Kiya Waha’n Unhone Jali Huroof Me Aik Pahaadi Par Surkh Rang Ke Saath Yeh She’r Likha Huwa Dekha :

أترجو أمّةٌ قتَلَـت حسينـاً شفاعةَ جَدِّهِ يومَ الحسابِ ؟!

“Jis Qaum Ne Husayn Ko Qatl Kar Diya Hai Kya Woh Qiyaamat Ke Din In Ke Naana Jaan Kee Shafa’at Kee Ummid Rakhte Hain?”
Ahle Qaafila Ne Jab Yeh Ajeeb-o-Gharib She’r Padha To Un Ke Raungte Khade Ho Gaye Kuchh Samajh Na Sake Ki Yeh She’r Is Pahaadi Par Is Qadar Numaaya Soorat Me Kaise Mastoor Ho Gaya. Abhi In Par Hairat Aur Dahshat Ka Aalam Taari Tha Ki Us Girje Me Se Aik Isaa’i Paadri Un Ke Qareeb Aaya Ahle Qafile Ne Us Kee Aamada Ko Ghaneemat Jaana Aur Puchha Ki Yeh She’r Yaha’n Kab Se Likha Huwa Hai? Us Ne Kaha Mujhe Ma’loom Nahin, Hum To Apni Paida’ish Ke Waqt Se Dekhte Aa Rahe Hain Aur Hamaare Bade Buddhe Bataate Hain Ki Nabiyye Karim SallAllahu Ta’ala ‘Alayhi Wa-Aalihi Wa-Sallam Kee Bi’that Se Bhi Sadiyo’n Pehle Yeh She’r Yahin Likha Huwa Tha Aur Yeh Arse Se Chala Aa Raha Hai. Yeh Bataane Ke Liye Ki Zaalimo’n! Woh Badbakht Giroh Tum Me Se Hoga Jo Tumhein Kalimah Padhaane Waale Nabi Ke Nawaase Ko Shaheed Kar Dega. Us Raahib Ne Jab Yeh Kaifiyyat Dekhi To Puchha Yeh Sar Kis Ka Hai? Yeh Qaafila Kaisa Hai? Yeh Maajra Kya Hai? Us Raahib Ko Bataaya Gaya Ki Yeh Sar Husayn Ibn Ali Ka Hai, Nabi Ke Lakhte Jigar Ka Sar Hai, Yeh Un Ke Khandan Kee Muqaddas Bibiyo’n Ka Qaafila Hai, Yeh Un Kee Awlaad Ke Muqaddas Sar Hain.
Woh Raahib Kaanp Utha, Us Ka Jism Laraz Gaya Woh Kehne Laga Zaalimo’n Mein Tumhein Das Hazar-10.000 Dinaar Deta Hoo’n, Das Hazar Ke Badle Aik Raat In Saro’n Kee Mehmaani Mujhe Ata Kar Do! Mein Isaa’i Hoo’n, Mein Tumhaare Deen Par Imaan Nahin Rakhta, Mein Tumhaara Kalimah Nahin Padhta Lekin Musaafir Samajh Kar Mein Chaahta Hoo’n Ki Aik Raat Khidmat Kar Loo’n.

Woh Zaalim Seem-o-Zar Ke Ghulaam They, Un Logo’n Ne Das Hazaar Dinaaro’n Kee Khaatir Aik Raat Raahib Ke Paas Padaao Qubool Kar Liya. Raahib Ne Apne Ghar Ko Khaali Kar Liya Parda Daar Muqaddas Bibiyo’n Ko Ghar Ke Chaar Diwaari Me Mahfooz Rakkha Apni Khawaateen Se Kaha Ki Raat Bhar Un Kee Khidmat Karo Yeh Musalmano’n Ke Nabi Kee Betiya’n Hain. Aur Khud Imam Aali Maqam Ke Sare Anwar Ko Aik Dhoye Huwe Saaf Ujle Tasht Me Rakh Liya, Raat Ko Aik Pyaala Paani Le Kar Us Sare Anwar Ko Dhoya Us Kee Gard Saaf Kee, Rishe Mubaarak Par Khooshbu Lagaayi Phir Saari Raat Sare Anwar Ke Saamne Haath Baandh Kar Khada Raha Zaar-o-Qataar Rota Raha Aur Yeh Kehta Raha : Aye Husayn! Mein Musalman Nahin Hoo’n, Aap Ke Naana Jaan Ka Kalimah Nahin Padha Phir Bhi Yeh Khaufnaak Manzar Dekhne Se Qaasir Hoo’n, Yeh Harees-o-Dhaleel Aur Zaalim Log Kis Be Dardi Se Aap Ke Khandan Ko Dhib’h Kar Ke Badi Be Parwaahi Se Safar Kar Rahe Hain Unhein Ihsaas Hee Nahin Ki Unhone Kitna Bada Jurm Kiya Hai.

Saari Raat Us Khidmat Ke Iwaz Khanwada-E-Rasool Kee Muqaddas Bibiya’n Us Raahib Ko Du’aaein Deti Rahin, Sare Husayn Bhi Zubaane Haal Se Use Du’aaein Deta Raha, Yaakayak Us Kee Qismat Ka Sitaarah Chamka, Us Kee Aankho’n Ke Aage Se Hijaabaat Uth Gaye, Aur Woh Noor Jo Khooli Kee Biwi Ne Dekha Tha Woh Arsh Se Zameen Tak Us Kee Aankho’n Par Bhi Munkashif Ho Gaya Us Ne Dekha Ki Aik Noor Utara Hai Aur Husayn Ke Sar Ke Ird Gird Tawaaf Kar Raha Hai. Jab Us Ne Yeh Hairat Angez Manzar Dekha, Aur Sare Aqdas Ke Ru’b-o-Jalaal Ka Mushaahidah Kiya, To Us Ke Dil Kee Kaifiyyat Hee Badal Gayi, Us Kee Muhabbat Aur Husne Aqidat Ka Silah Milne Ke Intizaamaat Ho Gaye Us Waqt Us Ka Baatin Jagmaga Utha, Seena Raushan Ho Gaya Aur Us Ne Fauran Kalimah Padh Liya, Ab Us Ke Liye Ahle Bayte Kiram ‘Alayhim-us-Salam Se Doorr Rahna Naa Mumkin Ho Gaya. Chunanche Jab Yeh Qaafila Rawaana Huwa To Woh Bhi Un Ke Saath Ho Liya, Apni Manzilein Tay Karta Huwa Jab Yeh Qaafila Yazeed Ke Darbar Me Pahuncha To Woh Pehle Hee Se Us Ka Muntazar Tha Aur Badi Ra’oonat Ke Saath Apne Takht Par Baitha Huwa Tha Aik Chhadi Us Ke Haath Me Thi.
Jab Sare Husayn Us Ke Saamne Rakkha Gaya To Us Ke Tan Badan Me Aag Lag Gayi Chhadi Aap Ke Dandaan Mubaarak Par Maari Aur Daant Pees Kar Bola : Tum Apne Anjaam Ko Pahunch Gaye Ho.

Waha’n Bhi Darbaar Me Huzoor Nabiyye Karim SallAllahu Ta’ala ‘Alayhi Wa-Aalihi Wa-Sallam Ke Aik Buzurg Sahabi Hazrat Aboo Barzah Aslami RadiyAllahu Ta’ala ‘Anhu Bhi Mawjood They, Woh Yeh Be Adabi Bardaasht Na Kar Sake Aur Yazeed Ko Daant Kar Farmaane Lage Zaalim! Is Behoodah Harkat Aur Gustaakhi Se Baaz Aaja Mein Ne Baaraha Dekha Ki Huzoor Nabiyye Karim SallAllahu Ta’ala ‘Alayhi Wa-Aalihi Wa-Sallam In Honto’n Ko Chooma Karte They Aur Husayn In Honto’n Ke Saath Zubaane Nubuwwat Choosa Karte They.

Yazeed Paleed Ko Sahabi Kee Yeh Tanqeed Pasand Na Aayi Aur Un Kee Yeh Baat Sakht Naa Gawaar Guzri Chunanche Unhein Darbaar Se Nikaal Diya.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-56_60.]

3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Safeere Rome Kee Hairat Aur Tanqeed

Posted on July 16, 2016August 23, 2016 by tahirulqadribooks

Majlis Me Rome Ka Aik Isaa’i Safeer Bhi Maujood Tha Woh Yeh Sab Kuchh Dekh Kar Hairaan Rah Gaya Aur Mu’aamale Kee Tah Tak Na Pahunch Saka, Aakhir Us Se Na Raha Gaya Aur Bola Bataao To Sahi Yeh Kis Ka Sar Hai Jis Ke Labo’n Par Yazeed Chhadi Maar Raha Hai Aur Nafrat Ke Saath Labo’n Par Chhadi Maar Kar Bade Tafaakhur Se Aur Badi Tamkanat Ke Saath Fir’awniyyat Ke Roop Me Yeh Keh Raha Hai Ki Kaash! Aaj Ghazwa-E-Badr Me Marne Waale Mere Bade Zinda Hote To Mein Unhein Bataata Ki Dekho Hum Ne Tumhaare Marne Ka Badla Nabi Ke Khaandaan Se Le Liya Hai.

Yazeed Ke Is Khule E’laan Ke Baa’d Kya Ab Bhi Us Ke Imaan Daar Hone Ka Koi Imkaan Baaqi Rahta Hai? Kya Ab Bhi Islaam Ke Saath Aur Jannat Ke Saath Aur Aakhirat Ke Saath Yazeed Ke Kisi Ta’alluq Ka Koi Tasawwur Kiya Ja Sakta Hai, Jo Barmala Us Nawasa-E-Rasool Ke Labaane Aqdas Par Chhadi Maar Kar Yeh Keh Raha Hai Ki Agar Aaj Mere Buzurg Zinda Hote, Jo Sahaba-E-Kiram Ke Haatho’n Maidane Badr Me Maare Gaye They To Mein Unhein Bataata Ki Tumhaare Qatl Ka Badla Mein Ne Husayn Kee Soorat Me Nabi Ke Khaandaan Se Le Liya Hai.

Be Ta’alluq Tha Is Badbakht Ka Allah Ke Nabi Aur Us Ke Khandan Aur Us Ke Deen Ke Saath, Woh Isaa’i Puchhne Laga Bataao To Sahi Yeh Koun Hai? Logo’n Ne Bataaya : Yeh Hamaare Rasool Ka Beta Hai, Woh Isaa’i Kaanp Utha Aur Uth Kar Khada Ho Gaya Aur Majlis Me Kehne Laga Zaalimo’n! Mujhe Koi Shub’ha Nahin Raha Ki Tum Qadre Naashanaas, Zaalim Aur Dunya Parast Ho Is Liye Ki Hamaare Pasas Aik Girje Me Hazrat Isaa ‘Alayh-is-Salam Kee Sawaari Ke Paaun Ka Aik Nishaan Mahfooz Hai Hum Saari Kee Saari Ummat Saalha Saal Se Us Nishaan Kee Takreem Karte Aa Rahe Hain Aur Tumhaare Ka’be Kee Tarah Chal Kar Us Kee Ziyaarat Ko Jaate Hain. Hum Apne Nabi Kee Sawaari Ke Paaun Ke Nishaan Ko Hirze Jaan Banaaye Huwe Hain Aur Tum Apne Nabi Ke Bete Ke Saath Yeh Sulook Kar Rahe Ho?
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-60_61.]

3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Aik Yahoodi Kee La’nat Malaamat

Posted on July 16, 2016August 23, 2016 by tahirulqadribooks

Waha’n Us Majlis Me Aik Yahoodi Bhi Maujood Tha Us Ne Bataaya Ki Mein Hazrat Moosa ‘Alayh-is-Salam Kee Nasl Se Hoo’n Aur Ab Tak Sattar-70 Pushtein Guzar Chuki Hain Lekin Is Ke Baawajood Hazrat Moosa ‘Alayh-is-Salam Ke Ummati Meri Be Had Ta’zeem Karte Hain Aur Aik Tum Ho Ki Apne Nabi Ke Nawaase Ko Be Dardi Se Qatl Kar Diya Hai Aur Ab Us Par Fakhr Bhi Kar Rahe Ho Tumhaare Liye Doob Marne Ka Maqaam Hai Apni Badbakhti Par Jitna Bhi Maatam Karo Kam Hai.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-61.]

3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Yazeed Kee Manafiqanah Siyaasat

Posted on July 16, 2016August 23, 2016 by tahirulqadribooks

Al-Gharaz Is Qism Kee Guftagu Aur Waqe’at Darbare Yazeed Me Pesh Aaye Is Ke Baa’d Us Badbakht Ne Khushi Manaayi Aur Fakhr Kiya. Ibn Ziyad Ko In’aam-o-Ikraam Diya Lekin Baa’d Me Jab Us Ne Dekha Ki Logo’n Ke Tewar Badal Rahe Hain Aur Jis Iktidaar Kee Khaatir Us Ne Yeh Saare Mazaalim Dhaaye Hain Woh Khatre Me Hai Aur Log Us Se Sakht Nafrat Karne Lag Gaye Hain To Us Ne Fauran Paintara Badla Aur Bhola Miskeen Ban Kar Kehne Laga :

“Bura Ho Ibn Ziyad Ka Jis Ne Maidane Karbala Me Ahl-E-Bayt Kee Tauheen Kee Aur Un Ke Chidah Chidah Afraad Ko Qatl Kiya Aur Nihaayat Saffaaki Aur Be Rahmi Ka Suboot Diya, Mein Us Ke Is Fi’l Par Khush Nahin Hoo’n, Agar Woh Husayn Ko Zinda Le Aata To Mujhe Ziyaada Khushi Hoti Magar Is Sitamgar Ne Bahut Jabar Kiya Hai Aur Zulm-o-Sitam Kee Intiha Kar Dee Hai Khuda Is Par La’nat Kare, Woh Bahut Badi La’nat Wa Malaamat Ka Mustahiq Hai.”

Yazeed Kee In Munafiqana Baato’n Kee Bunyaad Par Baa’z Kotaah Andesh Is Ghalat Fahmi Ka Shikaar Ho Gaye Hain Ki Woh Qatle Husayn Se Khush Na Tha Aur Us Ne Us Waqi’a Se Be Had Sadmah Pahuncha Tha.

Aisi Soch Rakhne Waale Se Hum Puchhte Hain Ki Agar Woh Ibn Ziyad Kee Is Kaarwaa’i Se Naakhush Tha To Phir Un Se Aur Ibn Sa’d Se Qisaas Kyun Na Liya? Chalo Qatl Ka Qisaaas Lena Doorr Kee Baat Hai, Un Dono’n Ko Ma’zool Kyun Na Kiya? Ya Un Ke Uhdo’n Me Kami Kyun Na Kee? In Sab Soorto’n Ke Bar Aks Hum Dekhte Hain Ki Us Ne Un Se Baazpurs Tak Na Kee Na Koi Saza Dee.

Yeh Soorate Haal Is Baat Kee Daleel Hai Ki Woh Andar Se Khush Tha Un Kee Kaarwaa’i Ko Haque-E-Bi-Jaanib Jaanta Tha, Baa’d Me Us Ne Jo Magarmachh Ke Aansu Bahaaye Aur Chikni Chupdi Baatein Kee’n Woh Sab Apne Siyaasi Anjaam Se Bachne Aur Iqtedaar Ko Dawaam Bakhshne Ke Liye Thi’n. Kyun Ki Qatle Husayn Ne Us Ke Takhte Iqtedaar Ko Hila Kar Rakh Diya Tha.

Baa’d Azaa’n Us Zaalim Ne Imam Aali Maqam Ke Sar Aur Baaqi Saro’n Ke Baare Me Kaha Ki Inhein Dimashq Ke Baazaro’n Me Phiraaya Jaaye. Kya Yahi Yazeed Jo Qatle Husayn Par Khush Nahin Hai Agar Khush Nahin To Phir Kya Qatle Husayn Ke Baa’d Koi Gunjaa’ish Rah Gayi Thi Jo Us Ne Saro’n Kee Numaa’ish Ka Bhi Ihtimaam Kiya.

Yazeed Paleed Ibn Ziyad Aur Ibn Sa’d Kee Saffakaana Kaarkardagi Se Badal-o-Jaa’n Khush Tha Aur Mahz Oopar Se Lipa Poti Kar Raha Tha Ki Log Badzan Na Ho Jaaein Us Kee Aik Daleel Yeh Bhi Hai Ki Ahl-E-Bayt ‘Alayhim-us-Salam Ke Qaafile Ko Dimashq Ke Baazaaro’n Me Phiraaya Gaya, Shuhada’ Ke Saro’n Kee Numa’ish Kee Gayi Aur Nezo’n Par Latke Huwe Un Saro’n Ka Juloos Bhi Nikaala Gaya.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-61_63.]

3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Sare Husayn RadiyAllahu Ta’ala ‘Anhu Kee I’jaazi Shaan

Posted on July 16, 2016August 23, 2016 by tahirulqadribooks

Kehte Hain Ki Sab Se Aage Imam Husayn ‘Alayh-is-Salam Ka Sar Mubarak Tha Jab Yazeedi Log Saro’n Ko Le Kar Ghum Rahe They To Us Waqt Aik Makaan Ke Qareeb Se Guzre Andar Se Kisi Shakhs Kee Aawaaz Aayi, Jo Soorah Kahf Kee Tilawat Kar Raha Tha Aur Us Kee Zubaan Par Yeh Aayate Karimah Thi :

أَمْ حَسِبْتَ أَنَّ أَصْحَابَ الْكَهْفِ وَالرَّقِيمِ كَانُوا مِنْ آيَاتِنَا عَجَبًا ۝
–
[Al-Kahf : 09.]

“Kya Too Ne Socha Ki As’haabe Kahf Ya’ni Ghaar Waale Log Hamari Ajeeb Nishaaniyo’n Me Se Aik Nishaani They”

Us Waqt Imame Pak Ke Sar Mubarak Ne Faseeh Zubaan Me Kaha :

أعجب من أصحاب الكهف قتلي وحملي

“Mera Qatl Kiya Jaana Aur Yoo’n Galiyo’n Me Phiraaya Jaana As’haabe Kahf Ke Waaqi’e Se Bhi Ajeeb Tar Hai”

Aik Shakhs Ka Bayan Hai Ki Allah Kee Izzat Kee Qasam Mein Ne Apni Aankho’n Se Dekha ki Imam Husayn Ka Sare Anwar Yazeed Ke Hukm Par Dimashq Me Phiraaya Jaa Raha Tha Un Ke Neze Ke Saamne Aik Dimashq Ka Shakhs Jaa Raha Tha Aur Woh Soorah Kahf Kee Tilaawat Kar Raha Tha Jab Woh Is Maqam Par Pahuncha Ki Kahf Aur Raqeem Ke Logo’n Ke Waqe’at Bahut Ajeeb Hain To Allah Paak Ne Sare Husayn Ko Zubaan Ata Kar Dee Aur Imam Husayn Ka Sare Anwar Neze Kee Nok Se Faseeh Zubaan Me Bola Ki Kahf Aur Raqeem Ke Waaqi’aat Par Ta’ajjub Karne Waalo’n! Nawasa-E-Rasool Ka Sar Kat Kar Neze Par Sawaar Kiya Jaana Yeh Kahf Ke Waaqie Se Bhi Ajeeb Tar Hai Aur Ziyaada Dardnaak Hai.

Imam Aali Maqam Ke Is Waaqie Ke Baa’d Imam Aali Maqam Ke Us Muqaddas Qaafile Aur Un Bibiyo’n Ko Phir Madinah Kee Taraf Rawaana Kiya Gaya. Yeh Luta Puta Qaafila Hazrat Zayn-ul-Aabidin Kee Qiyaadat Me Jab Madinah Pahuncha To Shahre Madinah Kee Galiyo’n Me Qiyamat Bapa Ho Gayi Aik Kohraam Mach Gaya. Aik Ajeeb Kaifiyyat Taari Ho Gayi Aur Hum Nahin Samajh Sakte Ki Waha’n Ke Dharraat Ka Aalam Kya Hoga? Madine Kee Galiyo’n Kee Jis Khaak Par Husayn Ka Bachpan Guzra Tha Us Khaak Ke Zarre Is Lute Huwe Qaafile Ko Dekh Kar Kya Kehte Honge? Madine Kee Fazaao’n Me Jaha’n Husayn Apne Naana Ke Kandho’n Par Sawaar Ho Kar Saans Lete Rahe Un Fazaao’n Ke Afsurdagi Ka Aalam Kya Huwa Hoga? Madine Ke Dar-o-Diwaar Kya Kehte Honge? Waha’n Ke Buzurg Aur Naujawaan Kya Soch Rahe Honge Are Gumbade Khadra’ Ke Saaye Kya Kehte Honge Aur Huzoor SallAllahu Ta’ala ‘Alayhi Wa-Aalihi Wa-Sallam Ke Rawda-E-At’har Kee Fazaaein Kya Kahti Hongi? Yeh Mu’amala To Allah Hee Behtar Jaanta Hai.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-63_64.]

3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Yazeed Kee Fir’awniyyat Wa Gumraahi Kee Tafseelaat

Posted on July 16, 2016August 23, 2016 by tahirulqadribooks

Imam Aali Maqam Kee Shahadat Ke Baa’d Yazeed Badbakht Ne Fir’awniyyat Aa Gayi, Mazeed Qaarooniyyat Aa Gayi, Us Kee Badkaari Me Izaafa Ho Gaya Nasha-E-Iqtidar Me Mazeed Dhut Ho Gaya. Sharaabi To Pehle Hee Tha Lekin Ab Sharaab Khori Kee Koi Had Na Rahi, Badkaar To Pehle Hee Tha Lekin Ab To Sauteli Maao’n Bahno’n Aur Beto’n Ke Saath Bhi Badkaari Karne Laga.

Al-Gharaz Uyoob-o-Naqa’is Ka Mujassama Ban Gaya Aur Us Ka Zulm-o-Sitam Intiha Ko Pahunch Gaya, Loot Maar Kee Koi Had Na Rahi Hazrat Abd Allah Bin Handhalah Ghasil-ul-Mala’ikah Farmate Hain Ki Jab Hum Ne Yeh Sab Kuchh Dekha To Hum Is Nateeje Par Pahunche Ki Ab Is Kee Bay’at Ka Inkaar Karna Zaroori Ho Gaya Hai Wagarna Mumkin Hai Ki Allah Ka ‘Azaab Naazil Ho Jaaye Aur Aasmaan Se Patthar Barasne Lagein. Chunanche Madinah Aur Makkah Waalo’n Ne Barmala Yazeed Kee Bay’at Ko Tod Daala Aur Us Kee Hukoomat Ko Taslim Karne Se Inkaar Kar Diya Is Ko Yazeed Ne Apne Khilaaf Baghaawat Samajha Aur Muslim Bin Uqbah Ke Zere Qiyaadat Me Hazaaro’n Faujiyo’n Ka Lashkar Tayyar Kiya Aur Kaha Ki Jaao Madine Par Hamla Kar Do Aur Mein Teen Din Ke Liye Tum Par Madinah Ko Halaal Karta Hoo’n Jo Tumhaare Jee Me Aaye Karo Tumhein Koi Nahin Puchhega.
Yeh Kirdaar Hai Us Yazeed Ka…

Jise Kabhi “Amir Al-Mu’minin” Kaha Jaata Hai Aur Kabhi Us Ke Naam Ke Saath “RadiyAllahu Ta’ala ‘Anhu” Padha Aur Likha Jaata Hai. Kabhi Use Momin Aur Jannati Qaraar Diya Jaata Hai. Yeh Hai Woh Yazeed Yeh Hai Us Ka Deeni Kirdaar Yeh Hai Us Kee Jannati Sirat, Jo Bees Hazaar-20.000 Ka Lashkar Nawasa-E-Rasool Kee Shahadat Ke Baa’d Madine Ko Taakht-o-Taaraaj Karne Ke Liye Bhej Raha Hai Chunanche Mash’hoor Waaqe’a-E-Harrah Pesh Aaya Yazeedi Fauj Ne Madine Ke Lashkar Ka Muhaasarah Kar Liya Shahre Madinha Ka Gheraao Kar Liya Unhone Khandaq Se Apni Muhaafazat Kee Yeh Pathraao Karte Rahe Aur Na’re Buland Karte Rahe Ki Aao Ab Hum Badr Aur Uhad Ke Apne Maqtoolin Ka Badla Lene Ke Liye Aa Gaye Hain. Unhone Apne Ghode Ane Khacchar Apne Oont Apni Sawariya’n Huzoor Ke Rawda-E-At’har Aur Masjide Nabawi Ke Sutono’n Ke Saath Baandh Dee’n. Masjide Nabawi Weeraan Ho Gayi Us Kee Be Hurmati Hone Lagi Teen-03 Din Tak Mere Aaqa Kee Masjid Me Azaan Mu’attal Rahi, Namazein Mu’attal Ho Gayi’n Aur Teen Din Tak Qatle Aam Jaari Raha.

Aap Wafa’-ul-Wafa Li-Ibn Kathir Aur Tarikh-ul-Khulafa’ Jaisi Mu’tabar Tawarikh Wa Siyar Uthaa Kar Dekhein Tab Aap Ko Pata Chalega Ki Yazeedi Lashkar Ne Madinah Tayyibah Par Kya Qiyamat Dhaa’i. Sahaba-E-Kiram, Sahabiyat, Tabi’iyn Aur Tab’a Tabi’iyn Me Se Taqriban Das Hazaar-10.000 Muqaddas Hastiyo’n Ko Be Daregh Tegh Kiya. Khawaatin Kee Behurmati Kee, Aur Awaam Par Be Panaah Tashaddud Rawa Rakkha. Umm-il-Mu’minin Hazrat Ummi Salamah RadiyAllahu Ta’ala ‘Anha Isi Mauqa Par Shaheed Huwin Aur Huzoor Ke Sahabi Aboo Sa’iyd Khudri Jo Naabina Ho Gaye They Un Kee Daadhi Mubarak Sufed Thi Huzoor Ke Deedaar Kee Talab Le Kar Madinah Me Masjide Nabawi Kee Taraf Aa Rahe They Ki Yazeedi Lashkar Ne Puchha Baaba Too Koun Hai? Woh Kehne Lage Mein Aaqa-E-Do-Jaha’n Ka Sahabi Hoo’n, Aboo Sa’iyd Khudri Mera Naam Hai, Un Zaalimo’n Ne Un Kee Daadhi Mubarak Pakad Kar Tamaanche Maare Aur Waapas Ghar Bhej Diya.

Teen Din Tak Masjide Nabawi Kee Ibaadatein, Namazein Jama’atein Mu’attal Rahi’n. Hazrat Aboo Sa’iyd Bin Musayyab Jalil-ul-Qadr Tabi’iy Farmate Hain Ki Mein Paagal Diwana Aur Majnoo’n Ban Kar Masjide Nabawi Me Huzoor Ke Rawda-E-At’har Me Mimbar Ke Qareeb Chhup Gaya. Pakda Bhi Gaya Lekin Majnoo’n Samajh Kar Chhod Diya Gaya. Mera Dil Gawaara Na Karta Tha Ki Us Kaifiyyat Me Apne Aaqa Ka Mazaar Chhod Kar Apne Ghar Jaau’n Teen Din Aur Teen Raatein Usi Mimbar Me Baitha Raha, Koi Azaan Kee Awaaz Masjid Me Na Uthti Thi Jama’at Ka Ihtimaam Na Tha, Kehte Hain Ki Rabbe Dhi-‘l-Jalaal Kee Izzat Kee Qasam! Namaz Ka Waqt Aata To Mujhe Rawda-E-Rasool Se Azaan Wa Takbeer Kee Aawaaz Aati Thi Aur Mein Rawda-E-Rasool Kee Azaan Ko Sun Kar Namazein Ada Karta Tha.

Yaha’n Apne Maqaasid Aur Naapaak Azaa’im Ko Poora Karne Ke Baa’d Woh Makkah Kee Taraf Laute Chun Ki Makkah Me Bhi Yazeed Ke Khilaaf Baghaawat Ho Chuki Thi Is Liye Unhone Zaroori Samjha Ki Ahle Makkah Ko Bhi Saza De’n.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-64_66.]

3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Muslim Bin Uqbah Ka Anjaam

Posted on July 15, 2016August 23, 2016 by tahirulqadribooks

Isi Athna’ Me Yazeedi Lashkar Ka Sipah Saalaar Muslim Bin Uqbah Mar Gaya Jis Ne Madina-E-Paak Kee Khule Band Be Hurmati Kee Thi, Woh Madinah Tayyibah Jis Ke Liye Sahih Muslim Utha Ke Dekhiye Mere Aaqa Farmaate Hain Ki BeShak Jo Shakhs Mere Shahr Madinah Ke Logo’n Ko Ma’mooli Saa Bhi Khaufzadah Karega Allah Paak Use Yoo’n Khatm Kar Dega Jis Tarah Namak Paani Me Phighal Kar Khatm Ho Jaata Hai.

Doosri Hadith Hai : Jo Mere Madinhah Waalo’n Se Bura’i Ka Iraadah Karega Allah Paak Aur Firishte Qiyaamat Tak Us Par La’nat Karte Chale Jaaeinge. Yeh Ahadith Mubaraka Hain Ta’ajjub Hai Ki Shahre Madinah Me Rahne Waale Aik Badwi Ko Hiraasa’n Karne Waala To Khuda Kee La’nat Aur Dunya Wa Aakhirat Ke ‘Azaab Ka Mustahiq Thehre Aur Nawasa-E-Rasool Aur Poore Khanwda-E-Rasool Ko Kuchal Dene Waala Aur Un Kee Shahadat Par Fat’h Wa Nusrat Ke Jashn Manaane Waala Ba Dastoor Momin Rahe, Kam Az Kam Yeh Baat Hamaari Samajh Se Baalatar Hai. Madinah Par Hamla Karne Waala Yazeedi Lashkar Ka Sipah Saalaar Jab Mar Gaya, To Aik Aurat Ke Dil Me Khayaal Aaya Us Shakhs Ne Naa Qabile Mu’aafi Jurm Kiya Hai. Zara Us Ka Haal To Ma’loom Karna Chaahiye, Raushan Zameer Aur Imaandaar Aurat Thi. Us Roohaani Nazar Se Bahrah War Thi Jo Aalame Barzakh Ke Waaqe’at Ko Bhi Dekh Leti Thi Hai.

Chunanche Is Ne Aa Kar Qabr Khodi To Yeh Manzar Dekh Kar Hairaan Rah Gayi Ki Do Azdahe Us Kee Qabr Me Maujood Hain Aik Us Ke Sar Par Phunkaar Raha Hai Aur Doosra Taango’n Ke Saath Lipta Huwa Hai.

Qur’an Paak Ne Aise Mal’oono’n Ke Liye Pehle Hee Bata Diya Huwa Hai Ki ‘Azaab Un Ka Muqaddar Hai.

لَعَنَهُمُ اللَّهُ فِي الدُّنْيَا وَالْآخِرَةِ وَأَعَدَّ لَهُمْ عَذَابًا مُهِينًا ۝
–
[Al-Ahzab : 57.]

“Dunya Wa Aakhirat Me Khuda Ne Un Par La’nat Farmaayi Hai Aur Un Ke Liye Zillat Aamez ‘Azaab Tayyar Kiya Huwa Hai.”
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-66.]

3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Yazeed Ka Ibratnaak Anjaam

Posted on July 15, 2016August 23, 2016 by tahirulqadribooks

Yazeediyo’n Ne Makkah Mukarramah Kee Taraf Pesh Qadam Kee, Waha’n Pahunch Kar Muhaasarah Kar Liya Phir Un Harkaat Ka Aaghaaz Huwa Jin Ka Aik Musalman Taasawwur Bhi Nahin Kar Sakta. Do-02 Mahine Tak Harame Makkah Kee Be Hurmati Kee Gayi, Khana-E-Ka’ba Ke Ghilaaf Ko Aag Se Jala Diya Gaya. Khana-E-Ka’ba Par Yazeedi Lashkar Ne Pathraao Kiya Us Kee Chhat Ud Gayi. Khana-E-Ka’ba Kee Imaarat Shikashta Ho Gayi, Makkah Ke Logo’n Ko Shaheed Kiya Gaya. Usi Athna’ Me Jab Makkah Me Ka’ba Sharif Par Aag Barsaa’i Jaa Rahi Thi Aur Pathraao Kiya Jaa Raha Tha Ayn Usi Waqt Ittila’ Aa Gayi Ki Badbakht Aidiya’n Ragad Ragad Kar Mar Gaya Hai. Jab Us Ke Hukm Se Makkah Mukarramah Par Aag Aur Patthar Kee Baarish Kee Jaa Rahi Thi Woh Us Waqt Darde Qaulanj Me Mubtala Tha. Teen Din Tak Dard Se Tadapta Aur Bilbilaata Raha Aur Hukoomat Karne Kee Hasrat Dil Me Liye Waasile Jahannam Ho Gaya.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-67.]

3 Teesra Khitaab : Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me

Yazeediyyat, Murdabad

Posted on July 15, 2016August 23, 2016 by tahirulqadribooks

Lashkare Yazeed Ne Muhaasarah Khatm Kar Diya Aur Dimashq Kee Taraf Laut Gaya Zulm-o-Sitam Aur Jor-o-Barbariyyat Ka Aik Daur Khatm Ho Gaya, Fisq-o-Fuzoor Zulm-o-Jabar Tabaahi-o-Barbaadi Aur Mubaahaat Ka Jo Toofaan, Yazeed Kee Sarkardagi Me Badi Tezi Se Utha Aur Har Qadre Insaani Ko Paamaal Karta Huwa Aage Badh Raha Tha Wahi’n Ruk Gaya. Aur Yazeed Ke Marte Hee Har Taraf Sukoon Chha Gaya Yazeed Ko Us Ke A’amaal Kee Qabaahato’n Samet Qabr Me Dafn Kar Diya Gaya Woh Us Dunya Se Badnaami, La’na, Nafrat Aur Aag Ka Touq Gale Me Daal Kar Hamesha Ke Liye Rukhsat Ho Gaya. Us Ke Mazaalim Us Ke Saath Hee Chale Gaye. Aaj Koi Achchhe Alfaaz Me Use Yaad Karne Waale Nahin, Har Koi Us Par La’nat Bhejta Hai Aur Gaaliya’n Deta Hai.
–
[Shahadate Imame Husayn RadiyAllahu Ta’ala ‘Anhu Haqa’iq Wa Waqe’at Kee Raushni Me, Safha-67.]